អាដហុកទទូចដល់ក្រសួងមហាផ្ទៃឲ្យពន្លឿនដោះស្រាយរឿងអាជ្ញាធរខេត្តកំពង់ចាមរុះរើស្លាកទាមទារឲ្យដោះលែងលោក កើត សារ៉ាយ
2024.09.20
លោក ចាន់ រស្មី (រូបទី៣ ខាងឆ្វេង) ស្នងការរង ខេត្តកំពង់ចាម បានមកស្នាក់ការអាដហុកខេត្តនេះ ស្នើសុំអាដហុកឱ្យដោះស្លាកកើតសារ៉ាយចេញ នៅថ្ងៃទី៨ ខែកក្កដា ឆ្នាំ២០២៤។
Provided photo
សមាគមការពារសិទ្ធិមនុស្សអាដហុក (ADHOC) ទទូចដល់ក្រសួងមហាផ្ទៃ ឲ្យពន្លឿននីតិវិធីដោះស្រាយតាមសំណើរបស់សមាគម ដែលស្នើឲ្យក្រសួងមហាផ្ទៃមានវិធានការចំពោះអាជ្ញាធរក្រុងកំពង់ចាម ខេត្តកំពង់ចាម ដែលបានរុះរើស្លាកទាមទារឲ្យដោះលែងប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ កាលពីខែកក្កដាកន្លងទៅ។
អនុប្រធានផ្នែកសិទ្ធិមនុស្ស ដីធ្លី ធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី ប្រាប់វិទ្យុអាស៊ីសេរីនៅថ្ងៃទី១៨ ខែកញ្ញាថា លោកសោកស្ដាយចំពោះក្រសួងមហាផ្ទៃ ដែលអាក់ខានក្នុងការឆ្លើយតប ចំពោះសំណើរបស់សមាគម។ លោកស្នើដល់រដ្ឋមន្ត្រីក្រសួងមហាផ្ទៃ ឲ្យពិនិត្យឡើងវិញនូវការផ្ដល់សេវារដ្ឋបាលសាធារណៈរបស់មន្ត្រីថ្នាក់ក្រោមជាតិ ដើម្បីបង្កើនប្រសិទ្ធភាព និងជំនឿដល់ពលរដ្ឋ។
លោក យិន ម៉េងលី «យើងឃើញថា នៅតាមបណ្ដាលខេត្តរហូតដល់ស្រុក ឃុំ មានច្រកចេញចូលតែមួយគោលបំណងក្នុងការជួយសម្រួលនូវបែបបទរដ្ឋបាលឲ្យមានភាពប្រសើរឡើង និងឆាប់រហ័សក្នុងការឆ្លើយតបនឹងតម្រូវការ ប៉ុន្តែបែរជាលិខិតរបស់សមាគម ដែលដាក់ទៅក្រសួងហ្នឹងបែរជាមានភាពយឺតយ៉ាវជាងមុនទៅទៀត កាន់តែលំបាកជាងមុនទៅទៀត»។
ការទទូចជាថ្មីម្ដងទៀតនេះ ធ្វើឡើងបន្ទាប់ពីក្រសួងមហាផ្ទៃ នៅពុំទាន់ឆ្លើយតប ឬមានវិធានការណាមួយ លើរដ្ឋបាលក្រុងកំពង់ចាម ដែលបានរុះរើបដាទាមទារឲ្យដោះលែងលោក កើត សារ៉ាយ នៅឡើយទេ អស់រយៈពេលជិត២ខែមកហើយ។ សមាគមអាដហុក បានចាត់ទុកសកម្មភាពរបស់រដ្ឋបាលក្រុងកំពង់ចាមនេះ ជាការរឹតត្បិតសេរីភាពរបស់អង្គការសមាគម។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យរងក្រសួងមហាផ្ទៃ លោក ទូច សុឃៈ ដើម្បីសុំការឆ្លើយតបជុំវិញបញ្ហានេះ បាននៅឡើយទេ នៅថ្ងៃទី១៨ ខែកញ្ញា។
មន្ត្រីនៃសមាគមអាដហុក បានលើកឡើងថា ប្រសិនបើក្រសួងមហាផ្ទៃ នៅតែមិនមានវិធានការសមស្របណាមួយលើរដ្ឋបាលក្រុងកំពង់ចាម ដែលបានរឹតត្បិតសេរីភាពបញ្ចេញមតិរបស់អង្គការសង្គមស៊ីវិលនោះ សមាគមអាដហុក នឹងបញ្ចូលការរឹតត្បិតសេរីភាពបញ្ចេញមតិទាំងនេះ ទៅក្នុងរបាយការណ៍ប្រចាំឆ្នាំរបស់ខ្លួន ដើម្បីទុកឲ្យសាធារណៈជនជាតិ និងអន្តរជាតិជាអ្នកវាយតម្លៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- សកម្មជននិងសង្គមស៊ីវិលទទូចឱ្យរដ្ឋាភិបាលស្ដារទំនាក់ទំនងកម្ពុជា និងស៊ុយអែតឡើងវិញ