CCHR បារម្ភពីការធ្លាក់ចុះនៃសិទ្ធិសេរីភាពបញ្ចេញមតិ សារព័ត៌មាន និងសិទ្ធិទទួលបានព័ត៌មាននៅកម្ពុជា
2022.04.23
មជ្ឈមណ្ឌលសិទ្ធិមនុស្សកម្ពុជាបារម្ភពីការធ្លាក់ចុះនៃសិទ្ធិសេរីភាពបញ្ចេញមតិ សេរីភាពសារព័ត៌មាន និងសិទ្ធិទទួលបានព័ត៌មាន ដែលនៅតែបន្តរងការរឹតត្បិត ការគំរាមកំហែង បំភិតបំភ័យ និងប្រឈមបណ្តឹងនៅតុលាការជាដើម។
ក្នុងរបាយការណ៍ប្រចាំឆ្នាំរបស់មជ្ឈមណ្ឌលសិទ្ធិមនុស្សកម្ពុជា ដែលបានចងក្រងលំអិត រយៈពេលមួយឆ្នាំ ចាប់ពីថ្ងៃទី១ ខែកញ្ញា ឆ្នាំ២០២០ ដល់ថ្ងៃទី៣១ ខែសីហា ឆ្នាំ២០២១ ដោយបានចេញផ្សាយនៅថ្ងៃទី២២ ខែមេសា បង្ហាញទិន្នន័យសំខាន់ៗ រួមមាន ការដកហូតអាជ្ញាប័ណ្ណប្រព័ន្ធផ្សព្វផ្សាយចំនួន៧ ក្រុមអ្នកសារព័ត៌មាននិងអ្នកការពារសិទ្ធិមនុស្សមួយចំនួន រងការប្រឈមពី បណ្តឹងនៅតុលាការ រងការបំភិតបំភ័យនៅពេលចុះអនុវត្តការងាររបស់ខ្លួន។ បន្ថែមពីនេះ ក្រុមអ្នកសារព័ត៌មាននិងពលរដ្ឋ នៅតែប្រឈមដោយមិនទទួលបានព័ត៌មាននិងដាក់កំហិតខ្លួនឯង កាន់តែកើនច្រើនឡើង។
អ្នកសម្របសម្រួលគម្រោងការលើកកម្ពស់និងការពារសេរីភាពបញ្ចេញមតិ និងប្រព័ន្ធផ្សព្វផ្សាយឯករាជ្យ នៃមជ្ឈមណ្ឌលសិទ្ធិមនុស្សកម្ពុជា លោក ហ៊ួន ផន មានប្រសាសន៍ប្រាប់វិទ្យុអាស៊ីសេរី មុនការផ្សាយនេះបន្តិចថា ទាំងអ្នកយកព័ត៌មាន និងអ្នកការពារសិទ្ធិមនុស្ស នៅតែបន្តរងការគំរាមកំហែង ទាំងផ្លូវច្បាប់និងសុវត្ថិភាពផ្ទាល់ខ្លួន ដោយសារច្បាប់ដែលរដ្ឋាភិបាលបានបង្កើតឡើង មិនស្របតាមបទដ្ឋានច្បាប់សិទ្ធិមនុស្សអន្តរជាតិ និងត្រូវបានតុលាការប្រើប្រាស់ជាឧបករណ៍ ក្នុងការដាក់ទោសប្រឆាំងជាមួយអ្នកដែលមានទស្សនៈផ្ទុយពីរដ្ឋាភិបាល៖ «យ៉ាងហោចណាស់ អ្នកសារព័ត៌មាន៩នាក់ និងអ្នកការពារសិទ្ធិមនុស្ស១៧នាក់ ដែលរងការបៀតបៀន យាយី តាមផ្លូវច្បាប់ និងការគំរាមកំហែងទាក់ទងនឹងសន្តិសុខផ្ទាល់ខ្លួន។ យើងចង់បង្ហាញថា ការអនុវត្តន៍សិទ្ធិសេរីភាពការបញ្ចេញមតិ និងសេរីភាពសារព័ត៌មាន មានការរឹតត្បិត ទាំងផ្លូវច្បាប់និងការគំរាមកំហែងដល់សុវត្ថិភាពផ្ទាល់ខ្លួន។ ច្បាប់មួយចំនួនដែលរដ្ឋាភិបាលបង្កើតឡើង វាអត់មានសង្គតិភាពទៅនឹង ច្បាប់សិទ្ធិមនុស្សអន្តរជាតិ ហើយច្បាប់ទាំងនេះត្រូវបានប្រើជាឧបករណ៍ក្នុងការបំបាត់សម្លេងផ្ទុយពីរដ្ឋាភិបាលជាដើម...»។
របាយការណ៍ដដែល ក៏បានផ្តល់អនុសាសន៍ជាច្រើនដល់រដ្ឋាភិបាល ដើម្បីឲ្យមានវិធានការជាក់លាក់ ក្នុងការបំពេញកាតព្វកិច្ចរបស់ខ្លួន ស្របតាមបទដ្ឋានច្បាប់អន្តរជាតិ ដើម្បីការពារនិងលើកកម្ពស់ សេរីភាពខាងបញ្ចេញមតិ សេរីភាពសារព័ត៌មាន និងសិទ្ធិទទួលបានព័ត៌មាន ជាដើម។ ជាពិសេស គឺជំរុញឲ្យមានភាពចម្រុះនៃប្រព័ន្ធផ្សព្វផ្សាយ តាមរយៈសារព័ត៌មានឯករាជ្យ អាចធ្វើការស៊ើបអង្កេត និងរាយការណ៍គ្រប់បញ្ហា ដែលមានប្រយោជន៍សម្រាប់សាធារណជន ដោយមិនមានការភ័យខ្លាច និងធានាថា រាល់ស្ថាប័នរដ្ឋាភិបាល និងឯកជនដែលមានមុខងារសាធារណៈ ត្រូវអនុវត្តនូវគោលការណ៍នៃការបញ្ចេញ ឬបង្ហាញព័ត៌មានឲ្យបានជាអតិបរិមា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។