តុលាការឃុំខ្លួនកូនប្រុសអតីតរដ្ឋមន្ត្រីក្រសួងកសិកម្ម រឿងព្រួតវាយគ្រូបង្រៀន
2019.12.21
កូនប្រុសអតីតរដ្ឋមន្ត្រីក្រសួងកសិកម្ម លោក ច័ន្ទ សារុន គឺលោក សារុន វិធុរ៉ាក់ ដែលប្រើហិង្សាលើគ្រូបង្រៀនម្នាក់ កាលពីថ្ងៃទី១៦ ធ្នូ ២០១៩។
Screenshot
សាលាដំបូងរាជធានីភ្នំពេញ សម្រេចឃុំខ្លួនម្ចាស់ស្ថានីយ៍ប្រេងឥន្ទនៈភី.ធី.ធី(PTT) លោក សារុន វិធុរ៉ាក់ និងគូលីមួយចំនួនដាក់ក្នុងពន្ធនាគារនៅរសៀលថ្ងៃទី២១ ខែធ្នូ ករណីព្រួតគ្នាវាយគ្រូបង្រៀន ម្នាក់ កាលពីថ្ងៃទី១៦ ខែធ្នូ។ ព្រះរាជអាជ្ញារងអមសាលដំបូងរាជធានីភ្នំពេញ លោក សាយ ណូរ៉ា ចោទប្រកាន់អ្នកទាំងនេះពីបទ «ប្រើហិង្សាដោយចេតនាមាន ស្ថានទម្ងន់ទោស» តាមមាត្រា២១៨ នៃក្រមព្រហ្មទណ្ឌ។
លោក សារុន វិធុរ៉ាក់ គឺជាកូនប្រុសរបស់អតីតរដ្ឋមន្ត្រីក្រសួងកសិកម្ម និងបច្ចុប្បន្នជាតំណាងរាស្ត្រ របស់គណបក្សប្រជាជនកម្ពុជា ប្រចាំខេត្តតាកែវ គឺលោក ច័ន្ទ សារុន។
កាលពីថ្ងៃទី១៦ ខែធ្នូ កូនប្រុសមន្ត្រីជាន់ខ្ពស់គណបក្សប្រជាជនកម្ពុជារូបនេះ រួមជាមួយគូលីរបស់ខ្លួនជាច្រើននាក់ បានចាប់គ្រួបង្រៀនម្នាក់ចងដៃទៅក្រោយហើយវាយដំ បណ្ដាលឱ្យរងរបួសធ្ងន់ធ្ងរ ហើយថែមទាំងថតវីដេអូប្រើហិង្សានោះ បង្ហោះលើបណ្ដាញសង្គមហ្វេសប៊ុកទៀតផង។ ក្រុមជនដៃដល់បាន ចោទថា គ្រូបង្រៀនឈ្មោះ អ៊ឹម សិរីរដ្ឋ បានលួចចូលបន្ទប់ទឹកស្រី និងលួចថតស្រីៗ ក្នុងបន្ទប់ទឹកនៅស្ថានីយ ប្រេងឥន្ទនៈរបស់ខ្លួន ស្ថិតនៅជិតរង្វង់មូលកួរស្រូវ ក្នុងខណ្ឌដង្កោ រាជធានីភ្នំពេញ។ ទោះយ៉ាងណាក្តី គ្រួបង្រៀនរូបនោះ បានឆ្លើយបដិសេធចំពោះការប្រកាន់ ដោយ អះអាងថា លោកគ្រាន់តែចូលបន្ទប់ទឹកច្រឡំ ហើយក៏ចេញមកវិញ ស្រាប់តែថៅកែស្ថានីយប្រេងឥន្ទនៈ និងគូលីរបស់គាត់ បានរត់ដេញវាយលោកតែម្ដង ដោយមិនព្រមស្ដាប់ការបកស្រាយអ្វីនោះទេ។ តំណាងអយ្យការអមសាលាដំបូងរាជធានីភ្នំពេញ ប្រកាសថា គ្រួបង្រៀនរូបនោះ មិនបានប្រព្រឹត្តកំហុសអ្វីនោះទេ ព្រោះរកមិនឃើញភស្តុតាងដាក់បន្ទុក ក្រោយសាកសួររួចរាល់។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា គាំទ្រឱ្យតុលាការអនុវត្ត ច្បាប់តឹងរ៉ឹងចំពោះជនដែលប្រព្រឹត្តអំពើហិង្សាវាយដំទាំងនោះ ដោយមិនត្រូវយោគយល់ចំពោះ កូនអ្នកធំ ឬអ្នកមានលុយមានអំណាចនោះទេ ព្រោះទង្វើវាយដំនេះគឺផ្ទុយពីគោលការណ៍ច្បាប់ជាតិ និងអន្តរជាតិ ស្ដីពី «ការសន្មតជាមុនពីការគ្មានទោស» មានន័យថា ជនណាក៏ដោយត្រូវចាត់ទុកថា គ្មានទោស ដរាបណាមិនទាន់មានសាលដីកាស្ថាពរពីតុលាការ។ លោក អំពាវនាវឱ្យពលរដ្ឋគ្រប់រូប មិនត្រូវកាត់ក្តីតាមអារម្មណ៍របស់ខ្លួននោះទេ ប៉ុន្តែត្រូវឃាត់ខ្លួនជនសង្ស័យ ហើយបញ្ជូន ឱ្យមន្ត្រីមានសមត្ថកិច្ច ដើម្បីអនុវត្តតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
