មន្ត្រីសិទ្ធិមនុស្សថាការថ្លែងរបស់លោក ហ៊ុន សែន នៅអ.ស.បមិនអាចស្វែងរកការគាំទ្រពីអន្តរជាតិបានទេ
2018.09.30
ក្រុមសិទ្ធិមនុស្សអះអាងថា សេចក្ដីថ្លែងការណ៍លោក ហ៊ុន សែន នៅក្នុងមហាសន្និបាតលើកទី៧៣ របស់អង្គការសហប្រជាជាតិកាលពីថ្ងៃទី២៨ កញ្ញា នឹងមិនអាចស្វែងរកការគាំទ្ររបស់អន្តរជាតិទៅលើភាពស្របច្បាប់ នៃរបបថ្មីរបស់លោកនោះឡើយ។
នាយករងទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិយូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ើតសិន (Phil Robertson) បានប្រាប់អាស៊ីសេរីតាមទូរស័ព្ទថាសេចក្ដីថ្លែងការណ៍របស់លោកជាការភូតកុហកទាំងស្រុង។ លោកបន្តថា ការអះអាងរបស់លោក ហ៊ុន សែន ថាការបោះឆ្នោតនៅកម្ពុជា គ្មានការបំភិតបំភ័យ និងគ្មានការបង្ខិតបង្ខំ នោះសុទ្ធសឹងតែជាការ កុហកដែរ។
កាលពីថ្ងៃទី២៨ ខែកញ្ញា កន្លងទៅ លោក ហ៊ុន សែន បានថ្លែងការពាររបបរបស់លោកនៅក្នុងអង្គមហាសន្និបាតរបស់អង្គការសហប្រជាជាតិថា របបថ្មីរបស់លោកកើតចេញពីការបោះឆ្នោតដោយសេរីដែលមានការចូលរួមពីគណបក្សជាច្រើន និងគ្មានការបង្ខិតបង្ខំ ហើយដែលអាចជឿទុកចិត្តបាន។
លោក ហ៊ុន សែន បានបន្ទោសដល់បណ្ដាប្រទេសលោកសេរីថាបាន ជ្រៀតជ្រែកកិច្ចការផ្ទៃក្នុងរបស់កម្ពុជា។ លោក ហ៊ុន សែន អះអាងថា មជ្ឈដ្ឋានខាងក្រៅមួយចំនួន ធ្វើមិនឃើញនូវគុណភាព និងសុចរិតភាព នៃដំណើរការបោះឆ្នោតនៅកម្ពុជា ហើយពួកគេបានចេញ សេចក្ដីថ្លែងការណ៍ជាច្រើនប្រឆាំងនិងវាយប្រហារមកលើលទ្ធផល នៃការបោះឆ្នោត។ លោកបន្តថា ទង្វើបែបនេះ គឺជាការប្រមាថធ្ងន់ធ្ងរ ចំពោះ ឆន្ទៈរបស់ពលរដ្ឋកម្ពុជា។
ប៉ុន្តែ លោក ហ្វីល រ៉ូប៊ើតសិន អះអាងថា លោក ហ៊ុន សែន ប្រហែលជាធ្វើភ្លេចទេដឹងអំពីកិច្ចព្រមព្រៀងសន្តិភាពទីក្រុង ប៉ារីសបានធ្វើឲ្យកម្ពុជាអាចឈរលើឆាកអន្តរជាតិដោយខ្លួនឯងបាន រហូតមកដល់សព្វថ្ងៃនេះ ក្រោយពីរបបខ្មែរក្រហម និងសង្គ្រាមស៊ីវិល ពីអតីតកាល។ លោកបន្តថា ចំណុចសំខាន់របស់កិច្ចព្រមព្រៀង សន្តិភាពទីក្រុងប៉ារីសគឺការបោះឆ្នោតដោយសេរី ត្រឹមត្រូវ យុត្តិធម៌ ដោយពហុបក្ស និងមានការចូលរួមពីគ្រប់ភាគីពាក់ព័ន្ធតាមបែបប្រជាធិបតេយ្យពិតប្រាកដ ប៉ុន្តែជាអកុសលអ្វីដែលកើតឡើងសព្វថ្ងៃ គឺជារបបផ្ដាច់ការសុទ្ធសាធ៕