អង្គការ HRW ជំរុញ​ជប៉ុន​ឱ្យ​ដាក់​សម្ពាធ​​លើ​កម្ពុជា​ឱ្យ​បញ្ឈប់​​ការ​បង្ក្រាប​សហជីព​នៅ​ណាហ្គាវើលដ៍

ដោយ មាន ឫទ្ធិ
2022.08.08
Share on WhatsApp
Share on WhatsApp
អង្គការ HRW ជំរុញ​ជប៉ុន​ឱ្យ​ដាក់​សម្ពាធ​​លើ​កម្ពុជា​ឱ្យ​បញ្ឈប់​​ការ​បង្ក្រាប​សហជីព​នៅ​ណាហ្គាវើលដ៍ (រូបឯកសារ) ក្រុមកូដករ​ក្រុមហ៊ុន​បនល្បែង​ណាហ្គាវើលដ៍ (NagaWorld) ត្រូវបានអាជ្ញាធរ​បង្ខំឱ្យ​ឡើងលើ​រថយន្ត​ក្រុង រួចហើយ​ដាក់​យក​ទៅ​ដាក់​ចោល នៅខ័ណ្ឌ​ព្រែកព្នៅ ជាយ​ក្រុង​ភ្នំពេញ កាល​ពិ​ថ្ងៃ​ទី១៨ ខែមីនា ឆ្នាំ២០២២។
រូបភាពពីពលរដ្ឋ

អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ជំរុញ​ប្រទេស​ជប៉ុន ឱ្យ​ដាក់​សម្ពាធ​លើ​កម្ពុជា​ឱ្យ​ឈប់​បង្ក្រាប​​សហជីព​នៅ​ក្រុមហ៊ុន​បនល្បែង​ណាហ្គាវើលដ៍ (NagaWorld)។ អង្គការ​នេះ​គូស​បញ្ជាក់​ថា រដ្ឋាភិបាល​ជប៉ុន​គួរ​តែ​ដាក់​សម្ពាធ​លើ​អាជ្ញាធរ​កម្ពុជា​ឱ្យ​បញ្ឈប់​ការ​ប្រើប្រាស់​រថយន្ត​ក្រុង ដែល​ជា​ជំនួយ​របស់​ប្រទេស​ជប៉ុន យក​ទៅ​ដឹក​កូដករ​ណាហ្គាវើលដ៍​ទៅ​ទម្លាក់​ចោល​នៅ​ជាយ​ក្រុង​ភ្នំពេញ​ទាំង​បង្ខំ​ត​ទៅ​ទៀត។ អង្គការ​នេះ​ថា ចំណាត់​ការ​របស់​រដ្ឋាភិបាល​កម្ពុជា​មក​លើ​កម្មករ​ណាហ្គាវើលដ៍​បែប​នេះ រំលោភ​ទៅ​លើ​សិទ្ធិ​ជា​មូលដ្ឋាន​របស់​ពួក​គេ​ក្នុង​ការ​ធ្វើ​កូដកម្ម និង​សេរីភាព​នៃ​ការ​ជួប​ប្រជុំ និង​ការ​បញ្ចេញ​មតិ។

មន្ត្រី​កម្មវិធី​ប្រចាំ​តំបន់​អាស៊ី​របស់​អង្គការ យូមែន រ៉ៃត៍ វ៉ច្ឆ លោក តេប៉ៃ កាហ្សៃ (Teppei Kasai) ថ្លែង​ក្នុង​សេចក្ដី​ថ្លែងការណ៍​របស់​អង្គការ​នេះ​ផ្សាយ​នៅ​ថ្ងៃ​ទី៨ ខែសីហា ថា ជប៉ុន​គួរ​តែ​ទាមទារ​ឱ្យ​អាជ្ញាធរ​កម្ពុជា​បញ្ឈប់​ការ​ប្រើប្រាស់​ខុស​គោលដៅ​នូវ​រថយន្ត​ក្រុង ដែល​ជា​ជំនួយ​ផ្តល់​ឱ្យ​ដោយ​អ្នក​បង់​ពន្ធ​ជា​ពលរដ្ឋ​ជប៉ុន។ លោក​សង្កត់​ធ្ងន់​ថា បើ​មិន​ដូច្នោះ​ទេ ជប៉ុន​នឹង​ប្រឈម​នូវ​ការ​ចោទ​ថា បាន​ចូល​ដៃ​ជាមួយ​រដ្ឋាភិបាល​កម្ពុជា​ក្នុង​ការ​រំលោភ​សិទ្ធិ​របស់​កម្មករ​និយោជិត​នៃ​ក្រុមហ៊ុន​ណាហ្គាវើលដ៍ ដែល​ជា​កូដករ។ មន្ត្រី​រូប​នោះ​បន្ត​ថា រដ្ឋាភិបាល​ជប៉ុន គួរ​តែ​លើក​កម្ពស់​សិទ្ធិ​របស់​កម្មករ​និយោជិត​នៅ​ក្រៅ​ប្រទេស ដោយ​មិន​ត្រូវ​អនុញ្ញាត​ឱ្យ​ជំនួយ​បរទេស​របស់​ខ្លួន ត្រូវ​បាន​រដ្ឋាភិបាល​បរទេស​យក​ទៅ​ប្រើប្រាស់ ដើម្បី​ធ្វើ​ឱ្យ​ទន់​ខ្សោយ​ដល់​សិទ្ធិ​ទាំង​នេះ​ទេ។

បើ​តាម​អង្គការ យូមែន រ៉ៃត៍ វ៉ច្ឆ រដ្ឋាភិបាល​ជប៉ុន កាល​ពី​ថ្ងៃ​ទី២៧ ខែកញ្ញា ឆ្នាំ២០១៦ បាន​ចុះ​ហត្ថលេខា​ផ្តល់​ជំនួយ​ឥត​សំណង​ចំនួន​ជិត ១០លាន​ដុល្លារ ប្រគល់​រថយន្ត​ក្រុង​ចំនួន ៨០គ្រឿង​ដល់​អាជ្ញាធរ​ក្រុងភ្នំពេញ។ អង្គការ​នេះ​ថា ផ្អែក​តាម​វីដេអូ ដែល​កូដករ​បាន​ថត​បង្ហោះ​នៅ​លើ​បណ្ដាញ​សង្គម អាជ្ញាធរ​កម្ពុជា​ពិត​ជា​ប្រើប្រាស់​រថយន្ត​ក្រុង ដែល​ដូច​គ្នា​ទៅ​នឹង​រថយន្ត​ក្រុង ដែល​ជា​ជំនួយ​របស់​ប្រទេស​ជប៉ុន​មែន។

មន្ត្រី​កម្មវិធី​នៃ​អង្គការ យូមែន រ៉ៃត៍ វ៉ច្ឆ លោក តេប៉ៃ កាហ្សៃ លើក​ឡើង​ថា ក្រុងតូក្យូ (Tokyo) គួរតែ​ផ្ញើ​សារ​ជាក់​ច្បាស់​ទៅ​រដ្ឋាភិបាល​កម្ពុជា​ថា ការ​គោរព​សិទ្ធិមនុស្ស គឺ​ជា​ស្នូល​នៃ​ទំនាក់ទំនង​ទ្វេភាគី​រវាង​ប្រទេស​ទាំង​ពីរ។

បើ​តាម​អង្គការ យូមែន រ៉ៃត៍ វ៉ច្ឆ ដដែល កាល​ពី​ថ្ងៃ​ទី២៤ ខែមិថុនា អង្គការ​នេះ​បាន​សរសេរ​លិខិត​មួយ​ច្បាប់​ផ្ញើ​ជូន​ទីភ្នាក់ងារ​កិច្ច​សហប្រតិបត្តិការ​អន្តរជាតិ​របស់​ជប៉ុន (JICA) ដោយ​ស្នើ​ឱ្យ​ទីភ្នាក់ងារ​នេះ​បញ្ចេញ​ព័ត៌មាន​ថា តើ​រដ្ឋាភិបាល​ជប៉ុន​បាន​សម្ដែង​កង្វល់ ឬ​ចាត់​វិធានការ​ជាក់លាក់​ណា​មួយ ជុំវិញ​ការណ៍​ដែល​រដ្ឋាភិបាល​កម្ពុជា​យក​រថយន្ត​ក្រុង ដែល​ជា​ជំនួយ​របស់​ប្រទេស​ជប៉ុន​ទៅ​ប្រើប្រាស់​ខុស​គោលដៅ​បែប​នេះ។ ទីភ្នាក់ងារ​នេះ បាន​ឆ្លើយតប​មក​អង្គការ​នេះ​វិញ នៅ​ថ្ងៃ​ទី២៨ ខែកក្កដា ថា រដ្ឋាភិបាល​ជប៉ុន និង​ទីភ្នាក់ងារ JICA មាន​ទំនាក់ទំនង​ជិតដិត​ជា​ប្រចាំ​ជាមួយ​រដ្ឋាភិបាល​កម្ពុជា រួម​ទាំង​អំពី​ស្ថានភាព​សិទ្ធិមនុស្ស​ផង និង​ថា រដ្ឋាភិបាល​ជប៉ុន​កំពុង​ធ្វើការ​លើ​បញ្ហា​នេះ តាម​របៀប​សមស្រប​មួយ។ ទីភ្នាក់ងារ JICA របស់​ជប៉ុន​ពន្យល់​បន្ត​ថា ដោយ​គិតគូរ​ដល់​បញ្ហា​ការទូត ទីភ្នាក់ងារ JICA សូម​មិន​ធ្វើ​អត្ថាធិប្បាយ​លម្អិត​អំពី​ការ​ប្រាស្រ័យ​ទាក់ទង​ជាមួយ​អាជ្ញាធរ​កម្ពុជា​ឡើយ។

អភិបាល​រង​រាជធានី​ភ្នំពេញ លោក មាន ចាន់យ៉ាដា បដិសេធ​មិន​ផ្តល់​អត្ថាធិប្បាយ​ជុំវិញ​រឿង​នេះ​ទេ កាល​ពី​ថ្ងៃ​ទី៨ ខែសីហា ដោយ​រុញ​ឱ្យ​ទៅ​សួរ​អ្នក​នាំ​ពាក្យ​សាលាក្រុង​ភ្នំពេញ លោក ម៉េត មាសភក្តី ដែល​មិន​អាច​ទាក់ទង​បាន។ វិទ្យុ​អាស៊ី​សេរី​កំពុង​ទាក់ទង​ស្ថានទូត​ជប៉ុន​ប្រចាំ​កម្ពុជា ដើម្បី​សុំ​ប្រតិកម្ម​ជុំវិញ​រឿង​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក​នាយក​រដ្ឋមន្ត្រី ហ៊ុន សែន ប្រកាស​មិន​ជួប​អ្នក​គាំទ្រ នៅ​បុរី​ញូវយ៉ក ខណៈ​គណបក្ស​ប្រឆាំង​គ្រោង​ធ្វើ​បាតុកម្ម​ប្រឆាំង​លោក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។