អ្នកផ្ទុកមេរោគអេដស៍នៅឃុំរកាស្នើឲ្យអាជ្ញាធរប្រារព្ធទិវាសិទ្ធិមនុស្សរៀងរាល់ឆ្នាំ
2015.12.10
ពលរដ្ឋនៅឃុំរកា ស្រុកសង្កែ ខេត្តបាត់ដំបង ផ្ដល់បទសម្ភាសន៍នៅថ្ងៃទី១០ ធ្នូ ឆ្នាំ២០១៥។
គ្រួសារអ្នកផ្ទុកមេរោគអេដស៍នៅឃុំរកា ស្រុកសង្កែ ខេត្តបាត់ដំបង ស្នើឲ្យអាជ្ញាធរ និងអង្គការពាក់ព័ន្ធប្រារព្ធទិវាសិទ្ធិមនុស្សក្នុងមូលដ្ឋានរស់នៅឲ្យបានរៀងរាល់ឆ្នាំ ដើម្បីផ្ដល់កម្លាំងចិត្ត និងកម្លាំងស្មារតីដល់ពួកគាត់ ដូចដែលមានចែងពីសិទ្ធិសេរីភាពរបស់ប្រជាពលរដ្ឋនៅក្នុងរដ្ឋធម្មនុញ្ញនៃប្រទេសកម្ពុជា។
អ្នកភូមិរកា ភាគច្រើនលើកឡើងថា អាជ្ញាធរពាក់ព័ន្ធខ្វះការយកចិត្តទុកដាក់សួរសុខទុក្ខផ្ដល់ភាពកក់ក្ដៅដល់ប្រជាពលរដ្ឋដែលផ្ទុកមេរោគអេដស៍នៅឃុំរកា ឲ្យបានដិតដល់ ជាពិសេសនៅថ្ងៃប្រារព្ធទិវាសិទ្ធិមនុស្សទី១០ ធ្នូ។
អ្នកផ្ទុកមេរោគអេដស៍មួយចំនួនថ្លែងនៅថ្ងៃទី១០ ធ្នូ ថា អាជ្ញាធរហាក់ព្រងើយកន្តើយក្នុងរៀបចំទិវាសិទ្ធមនុស្សសាកល ដែលប្រារព្ធឡើងនៅថ្ងៃទី១០ ធ្នូ ដល់ពួកគាត់ដែលផ្ទុកមេរោគអេដស៍ក្នុងឃុំរកា នោះទេ។ អ្នកភូមិចង់ឲ្យអាជ្ញាធរនិងអង្គការសង្គមស៊ីវិលពាក់ព័ន្ធរៀបចំពិធីនេះក្នុងមូលដ្ឋានរស់នៅឲ្យបានរៀងរាល់ឆ្នាំ ដើម្បីផ្ដល់កម្លាំងចិត្ត និងកាត់បន្ថយពីការគិតរវើរវាយពីជំងឺប្រចាំកាយនេះ៖ «ខ្ញុំមានអារម្មណ៍ថា នៅឯកោ ដោយសារអាជ្ញាធរមិនខ្វល់ពីប្រជាពលរដ្ឋផ្ទុកមេរោគរឿងទិវាសិទ្ធិមនុស្ស។ ពួកខ្ញុំកើតរោគអេដស៍ប៉ុណ្ណឹងហើយមិនគួរណាអាជ្ញាធរមិនមកសួរសុខទុក្ខនោះទេ»។
ឆ្លើយតបនឹងបញ្ហានេះ មេឃុំរកា អ្នកស្រី ស៊ឹម ពៅ មានប្រសាសន៍ថា អាជ្ញាធរពាក់ព័ន្ធពុំបានព្រងើយកន្តើយសួរសុខទុក្ខប្រជាពលរដ្ឋដែលផ្ទុកមេរោគអេដស៍នោះទេ។ អ្នកស្រីបញ្ជាក់ថា អាជ្ញាធរឃុំចង់ប្រារព្ធទិវាសិទ្ធមនុស្សថ្ងៃទី១០ ធ្នូ ជូនប្រជាពលរដ្ឋដែរ តែមិនអាចធ្វើទៅរួច ដោយសារនៅសាលាឃុំជាប់រវល់ការងារច្រើន៖ «កន្លងមកយើងតែងផ្សព្វផ្សាយឲ្យប្រជាពលរដ្ឋយល់ដឹងអំពីទិវាសិទ្ធមនុស្សនេះជាបន្តបន្ទាប់មកហើយ»។
ច្បាប់រដ្ឋធម្មនុញ្ញមាត្រា៣១ ចែងថា ប្រជាពលរដ្ឋខ្មែរមានភាពស្មើគ្នាចំពោះមុខច្បាប់ មានសិទ្ធិសេរីភាព និងករណីយកិច្ចដូចគ្នាទាំងអស់ ដោយឥតប្រកាន់ពូជសាសន៍ ពណ៌សម្បុរ ភេទ ភាសា ជំនឿសាសនា និន្នាការនយោបាយ ដើមកំណើតជាតិឋានៈសង្គម ធនធាន ឬស្ថានភាពឯទៀតឡើយ។ ការប្រើសិទ្ធិសេរីភាពផ្ទាល់ខ្លួនរបស់បុគ្គលម្នាក់ៗ មិនត្រូវឲ្យប៉ះពាល់ដល់សិទ្ធិសេរីភាពអ្នកដទៃឡើយ។ ការប្រើសិទ្ធិសេរីភាពនេះត្រូវប្រព្រឹត្តទៅតាមលក្ខខណ្ឌកំណត់ក្នុងច្បាប់។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី មានប្រសាសន៍ថា អង្គការសង្គមស៊ីវិលគ្រាន់តែជួយបំពេញបន្ថែមនូវចំណុចខ្វះខាតរបស់រដ្ឋាភិបាលប៉ុណ្ណោះ។
លោកកក់សំគាល់ថា កន្លងទៅអាជ្ញាធរក្នុងខេត្តបាត់ដំបង ពុំដែលប្រារព្ធទិវាសិទ្ធិមនុស្ស ដើម្បីឲ្យប្រជាពលរដ្ឋបានយល់ដឹងអំពីសិទ្ធិសេរីភាព ដូចដែលមានចែងនៅក្នុងរដ្ឋធម្មនុញ្ញនោះទេ៖ «ខ្ញុំគិតថា នៅក្នុងថ្ងៃបុណ្យសំខាន់ អាជ្ញាធរមិនត្រូវមើលរំលងប្រជាពលរដ្ឋនៅឃុំរកា នោះទេ ព្រោះអីពួកគាត់មានផ្ទុកមេរោគអេដស៍ក្នុងខ្លួនដែលត្រូវយកចិត្តទុកដាក់ ពិសេសឲ្យបានច្រើនជាងពលរដ្ឋដទៃ»។
កាលពីថ្ងៃទី៧ ធ្នូ កន្លងទៅអង្គការសង្គមស៊ីវិលបានរៀបចំទិវាសិទ្ធិមនុស្ស នៅខាងមុខវត្តកណ្ដាល ក្រុងបាត់ដំបង ដែលមានប្រជាពលរដ្ឋមកពីតាមសហគមន៍នានា ចូលរួមប្រមាណ ៤០០នាក់ និងព្រះសង្ឃជាង ១០អង្គ។
ច្បាប់រដ្ឋធម្មនុញ្ញមាត្រាទី៧៣ ចែងថា រដ្ឋយកចិត្តទុកដាក់ចំពោះកុមារ និងមាតា។ រដ្ឋរៀបចំឲ្យមានទារកដ្ឋាន និងជួយឧបត្ថម្ភនារីដែលមានកូនច្រើនក្នុងបន្ទុក ហើយឥតទីពឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
