អង្គការ​សិទ្ធិមនុស្ស​អំពាវនាវ​ឱ្យ​ដោះ​លែង​កញ្ញា សេង ធារី និង ឈឹម ស៊ីថរ ក្នុង​ឱកាស​នៃ​ទិវា​សិទ្ធិ​នារី​អន្តរជាតិ

ដោយ ខាន់ លក្ខិណា
2024.03.01
អង្គការ​សិទ្ធិមនុស្ស​អំពាវនាវ​ឱ្យ​ដោះ​លែង​កញ្ញា សេង ធារី និង ឈឹម ស៊ីថរ ក្នុង​ឱកាស​នៃ​ទិវា​សិទ្ធិ​នារី​អន្តរជាតិ (ឆ្វេង) កញ្ញា សេង ធារី ​មេធាវី​សញ្ជាតិ​ខ្មែរ-អាម៉េរិកាំង និង​ជា​សកម្មជន​សិទ្ធិមនុស្ស និង​ជា​អ្នក​គាំទ្រ​លទ្ធិ​ប្រជាធិបតេយ្យ និង​កញ្ញា ឈម ស៊ីថរ ប្រធាន​សហជីព​នៅ​ក្រុមហ៊ុន​កាស៊ីណូ​ណាហ្គាវើលដ៍។
រូប៖ ហ្វេសប៊ុក

មុន​ទិវា​សិទ្ធិនារី​អន្តរជាតិ ៨ មីនា មជ្ឈមណ្ឌល​សិទ្ធិ​មនុស្ស​កម្ពុជា (CCHR) អំពាវនាវ​ឱ្យ​ដោះលែង និង​ទម្លាក់​បទ​ចោទ​ប្រឆាំង​លើ​កញ្ញា សេង ធារី និង​កញ្ញា ឈឹម ស៊ីថរ  ខណៈក្រុម​អង្គការ​សង្គម​ស៊ីវិល​ចំនួន ២០ស្ថាប័ន ក៏​គ្រោង​ប្រារព្ធ​ទិវា​នារី​អន្តរជាតិ ខួប​លើក​ទី១១៣ ក្រោម​ប្រធាន​បទ «ធានា​សិទ្ធិ​សេរីភាព​ស្ត្រី និង​ក្មេង​ស្រី ដើម្បី​ស្ថិរភាព​សេដ្ឋកិច្ច និង​យុត្តិធម៌​សង្គម»

មជ្ឈមណ្ឌល​សិទ្ធិ​មនុស្ស​កម្ពុជា (CCHR) ទទូច​ឱ្យ​រដ្ឋាភិបាល ​បញ្ចប់​រាល់​ទម្រង់​នៃ​ការ​យាយី​លើ​អ្នក​តស៊ូ​មតិ​ជា​ស្ត្រី ជា​ពិសេស ​លើ​អ្នក​មាន​សំឡេង​មិន​ស្រប​នឹង​រដ្ឋាភិបាល។

សេចក្ដី​ថ្លែង​ការណ៍​របស់​មជ្ឈមណ្ឌល​សិទ្ធិ​មនុស្ស​កម្ពុជា ចុះ​ថ្ងៃ​ទី២៩ កុម្ភៈ ឱ្យ​ដឹង​ថា CCHR នឹង​បង្ហាញ​ពី​សកម្មភាព​នៃ​ការ​ចូល​រួម​របស់​ស្ត្រី​កម្ពុជា​នៅ​ក្នុង​សង្គម​ស៊ីវិល និង​ការងារ​ប្រកប​ដោយ​ឆន្ទៈ​ដ៏​មោះមុត​របស់​អ្នក​ការពារ​សិទ្ធិ​មនុស្ស​ជា​ស្ត្រី ព្រម​ទាំង​លើកឡើង​នូវ​បរិយាកាស​ប្រឈម​លើ​អ្នក​ការពារ​សិទ្ធិ​មនុស្ស​ជា​ស្ត្រី​ផង​ដែរ។

ដើម្បី​អបអរ​សាទរ​ទិវា​សិទ្ធិនារី​អន្តរជាតិ​នៅ​ឆ្នាំ​នេះ CCHR បង្កើត​នូវ​សកម្មភាព​មួយ​ចំនួន ដូចជា ការ​ចេញ​ផ្សាយ​វីដេអូ​និយាយ​អំពី​បញ្ហា​របស់​អ្នក​ការពារ​សិទ្ធិ​មនុស្ស​កញ្ញា សេង ធាវី និង​កញ្ញា ឈឹម ស៊ីថរ  ការ​រៀបចំ​ផ្សាយ​កម្មវិធី​វិទ្យុ​ក្រោម​ប្រធាន​បទ «ឥទ្ធិពល​ស្ត្រី»  និង​ការ​បង្ហោះ​សារ​ផ្ដល់​កម្លាំង​ចិត្ត​របស់​អ្នក​ការពារ​សិទ្ធិ​មនុស្ស និង​អ្នក​សារព័ត៌មាន​ជា​ស្ត្រី​ជា​ដើម។

ជាក់ស្ដែង​នៅ​ថ្ងៃ​ទី១ មីនា មជ្ឈមណ្ឌល​សិទ្ធិ​មនុស្ស​កម្ពុជា (CCHR)  បាន​បង្ហោះ​វីដេអូ​ឃ្លីប​ជាង ២នាទី នៅ​លើ​ហ្វេសប៊ុក​បង្ហាញ​នូវ​រឿង​រ៉ាវ​របស់​អ្នកការពារ​សិទ្ធិមនុស្ស​ជា​ស្ត្រី គឺ​កញ្ញា សេង ធារី ដែល​ត្រូវ​ជាប់​ពន្ធនាគារ ដោយសារតែ​សកម្មភាព​សិទ្ធិ​មនុស្ស។ CCHR ក៏​បាន​អំពាវនាវ​ឱ្យ​ដោះលែង និង​ទម្លាក់​ចោល​បទ​ចោទ​ប្រឆាំង​លើ​កញ្ញា សេង ធារី ជា​បន្ទាន់ ព្រម​ទាំង​បញ្ចប់​រាល់​ទម្រង់​នៃ​ការ​យាយី​ទៅ​លើ​គាត់ និង​អ្នក​មាន​សំឡេង​មិន​ស្រប​ផង​ដែរ។

វិទ្យុ​អាស៊ី​សេរី​មិន​អាច​សុំ​ការ​អត្ថាធិប្បាយ​រឿង​នេះ ពី​អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន និង​ប្រធាន​អង្គភាព​អ្នក​នាំ​ពាក្យ​រដ្ឋាភិបាល លោក ប៉ែន បូណា បាន​ទេ នៅ​ថ្ងៃ​ទី១ មីនា ដោយ​ទូរស័ព្ទ​ចូល​គ្មាន​អ្នក​ទទួល។

ទាក់ទិន​ការ​ប្រារព្ធ​ទិវា​សិទ្ធិ​នារី​អន្តរជាតិ ក្រុម​អង្គការ​សង្គម​ស៊ីវិល​ចំនួន ២០ស្ថាប័ន នៅ​ថ្ងៃ​ទី១ មីនា បាន​ចេញ​សេចក្ដី​ប្រកាស​ព័ត៌មាន​រួម​មួយ​ថា នឹង​ប្រារព្ធ​កម្មវិធី​ទិវា​នារី​អន្តរជាតិ​ខួប​លើក​ទី១១៣ ក្រោម​ប្រធាន​បទ «ធានា​សិទ្ធិ​សេរីភាព​ស្ត្រី និង​ក្មេង​ស្រី ដើម្បី​ស្ថិរភាព​សេដ្ឋកិច្ច និង​យុត្តិធម៌​សង្គម» ចាប់​ពី​ថ្ងៃ​ទី១ ដល់​ថ្ងៃ​ទី២៩ មីនា ដោយ​នឹង​រៀបចំ​ឱ្យ​មាន​កម្មវិធី​វិទ្យុ និង​ការ​ផ្សាយ​ផ្ទាល់​លើ​ទំព័រ​ហ្វេសប៊ុក ដែល​មាន​ប្រធាន​បទ​ផ្សេងៗ ពាក់ព័ន្ធ​នឹង​ស្ត្រី និង​ការ​បង្ហោះ​ស៊ុម​រូបថត​យុទ្ធនា​ការ​នៅ​លើ​ទំព័រ​ហ្វេសប៊ុក​ជា​ដើម។

ចំណែក​នៅ​ថ្ងៃ​ទី៨ មីនា សង្គម​ស៊ីវិល​ចំនួន ២០ស្ថាប័ន នឹង​ជួប​ជុំ​គ្នា​នៅ​ទីលាន​ប្រជាធិបតេយ្យ រាជធានី​ភ្នំពេញ ដែល​មាន​អ្នក​ចូលរួម​ប្រមាណ ៥០០នាក់ ដើម្បី​លើក​ឡើង​ពី​បញ្ហា​ប្រឈម​របស់​ស្ត្រី និង​ស្វែង​រក​ដំណោះស្រាយ​ពី​រដ្ឋាភិបាល។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិមនុស្ស​លីកាដូ (LICADHO) លោក អំ សំអាត ប្រាប់​វិទ្យុ​អាស៊ី​សេរី នៅ​ថ្ងៃ​ទី១ មីនា ថា ការ​ប្រារព្ធ​ទិវា​សិទ្ធិ​នារី​អន្តរជាតិ​នេះ ដើម្បី​លើក​កម្ពស់​សិទ្ធិ​ស្ត្រី និង​កុមារី ពីព្រោះ​កន្លងមក មាន​ស្ត្រី​ជា​ថ្នាក់​ដឹក​នាំ​សហជីព ស្ត្រី​ធ្វើ​ការងារ​សង្គម និង​ស្ត្រី​ដែល​ជា​តំណាង​សហគមន៍​ដីធ្លី​មួយ​ចំនួន ត្រូវ​បាន​កាត់​ទោស​ឱ្យ​ជាប់​ពន្ធនាគារ ហើយ​ជាប់​បណ្ដឹង​នៅ​តុលាការ​ ដោយសារ​តែ ការ​ធ្វើការ​លើក​កម្ពស់​សិទ្ធិ​ស្ត្រី សិទ្ធិ​កុមារី សិទ្ធិ​ការងារ និង​ការ​ការពារ​ដីធ្លី​របស់​ពួកគេ​ជា​ដើម។

លោក អំ សំអាត៖ «ស្ត្រី​មួយ​ចំនួន មាន​ការ​រំលោភ​បំពាន​នៅ​កន្លែង​ការងារ បៀតបៀន​នៅ​កន្លែង​ការងារ​ ហើយ​ស្ត្រី​មួយ​ចំនួន មាន​ការ​បៀតបៀន​នៅ​ទី​សាធារណៈ​ជា​ដើម។ បញ្ហា​នេះ គី​ជា​សេចក្ដី​ព្រួយ​បារម្ភ​នៅ​ឡើយ ចំពោះ​សិទ្ធិ​ស្ត្រី។ អ៊ីចឹង​អង្គការ​សង្គម​ស៊ីវិល​សហគមន៍​មូលដ្ឋាន នឹង​ប្រារព្ធ​ទិវា​សិទ្ធិនារី​អន្តរជាតិ ក្នុង​គោល​បំណង​ជំរុញ​ឱ្យ​មាន​ការ​លើក​កម្ពស់ និង​កិច្ច​ការពារ​បន្ថែម​ទៅ​លើ​សិទ្ធិ​ស្ត្រី ហើយ​នឹង​សមភាព​យេនឌ័រ​រវាង​បុរស និង​ស្ត្រី​ផង​ដែរ»

កញ្ញា សេង ធារី  ដែល​ជា​មេធាវី​សញ្ជាតិ​ខ្មែរ-អាម៉េរិកាំង និង​ជា​សកម្មជន​សិទ្ធិមនុស្ស និង​ជា​អ្នក​គាំទ្រ​លទ្ធិ​ប្រជាធិបតេយ្យ ត្រូវ​សមត្ថកិច្ច​ក្រុង​ភ្នំពេញ បាន​ចាប់​ខ្លួន​កាល​ពី​ថ្ងៃទី១៤ ខែមិថុនា ឆ្នាំ២០២២ នៅ​ខាង​មុខ​សាលាដំបូង​រាជធានី​ភ្នំពេញ  ក្រោយ​តុលាការ​ប្រកាស​សាលក្រម​កាត់​ទោស​កញ្ញា​ឱ្យ​ជាប់​ពន្ធនាគារ ៦ឆ្នាំ ក្រោម​ចោទ​បទ «រួម​គំនិត​ក្បត់» ក្នុង​សំណុំ​រឿង​វិល​ចូល​ស្រុក​របស់​លោក សម រង្ស៊ី កាល​ពី​ឆ្នាំ២០១៩។

រីឯ​មេ​ដឹក​នាំ​សហជីព​ក្រុមហ៊ុន​ណាហ្គាវើលដ៏ កញ្ញា ឈឹម ស៊ីថរ វិញ ត្រូវ​បាន​តុលាការ​ក្រុង​ភ្នំពេញ កាត់​ក្ដី​ឱ្យ​ជាប់​ពន្ធនាគារ​២ឆ្នាំ ក្រោម​បទ​ចោទ «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ដោយសារ​តែ​​ការ​ការពារ​សិទ្ធិ​កម្មករ។

សហគមន៍​ជាតិ និង​អន្តរជាតិ​ចាត់​ទុក​ការ​ចាប់​ខ្លួន និង​កាត់​ទោស​កញ្ញា សេង ធារី និង​កញ្ញា ឈឹម ស៊ីថរ ថា ជា​ការ​ធ្វើ​ទុក្ខ​បុក​ម្នេញ​ផ្នែក​នយោបាយ និង​ការ​រើស​អើង​សហជីព។ ពួក​គេ​ស្នើ​ដល់​តុលាការ​​ឱ្យ​ដោះ​លែង​អ្នក​ទាំង​ពីរ​ឱ្យ​មាន​សេរីភាព​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។