សហគមន៍ខ្មែរនៅអូស្ត្រាលី ធ្វើបុណ្យផ្ការៃប្រាក់ជួយសកម្មជនមាតាធម្មជាតិ
2024.07.29
ពលរដ្ឋខ្មែរនៅក្រុងម៉ែលប៊ ប្រទេសអូស្ត្រាលី ធ្វើបុណ្យផ្កាប្រាក់ ដើម្បីជួយដល់គ្រួសារនិងសកម្មជនចលនាមាតាធម្មជាតិ នៅសមាគមខ្មែររដ្ឋវ៉ិកតូរីយ៉ា (Victoria) នៅព្រឹកថ្ងៃទី២៨ ខែកក្កដា ឆ្នាំ២០២៤។
រូប៖ ហ្វេសប៊ុកលោក តាក់ ម៉េងហ៊ាង
សហគមន៍ខ្មែរនៅក្រុងម៉ែលប៊ន (Melbourne) ប្រទេសអូស្ត្រាលី (Australia) ធ្វើបុណ្យផ្កាប្រាក់ ដើម្បីប្រមូលលុយជួយដល់គ្រួសារនិងសកម្មជនចលនាមាតាធម្មជាតិ ដែលកំពុងជាប់ពន្ធនាគារ។ ពលរដ្ឋខ្មែរ មិនត្រឹមតែចូលរួមបរិច្ចាគថវិកានោះទេ ពួកគាត់ ថែមទាំងថ្កោលទោសរដ្ឋាភិបាលរបស់ត្រកូល «ហ៊ុន» ថា បានប្រើអំណាចទាំងបំពានច្បាប់ធ្វើបាបយុវជនបរិស្ថាន និងចោទថាកំពុងដឹកនាំប្រទេសធ្វើឲ្យបាត់បង់ទឹកដីខ្មែរទៅប្រទេសជិតខាង។
ពិធីបុណ្យផ្កាប្រាក់ដើម្បីប្រមូលលុយជួយដល់គ្រួសារ និងសកម្មជនចលនាមាតាធម្មជាតិកំពុងជាប់ឃុំ ដែលរៀបចំធ្វើនៅសមាគមខ្មែររដ្ឋវ៉ិកតូរីយ៉ា (Victoria) នៅព្រឹកថ្ងៃទី២៨ ខែកក្កដា មានអ្នកចូលរួមច្រើនខុសប្លែកពីរាល់ដង។ ក្រុមអ្នកចូលរួម សុទ្ធតែមានទឹកមុខក្រៀមក្រំ បង្ហាញពីក្តីអាណិតអាសូរចំពោះសកម្មជនចលនាមាតាធម្មជាតិវ័យក្មេងដែលកំពុងជាប់ឃុំទាំង៥រូបផង និងបង្ហាញពីក្តីកង្វល់ចំពោះបូរណភាពទឹកដីខ្មែរចំនួន៤ខេត្តនៅភាគឦសាននៃប្រទេសកម្ពុជា ដែលត្រូវបានដាក់បញ្ចូលនៅក្នុងគម្រោងអភិវឌ្ឍន៍រួមគ្នាជាមួយវៀតណាម និងឡាវផង។
ក្រោយពីពិធីសាសនា តំណាងសហគមន៍ខ្មែរ តំណាងគណបក្សប្រឆាំង តំណាងសង្គមស៊ីវិល និងអ្នកចូលរួម បានឡើងថ្លែងសារជាបន្តបន្ទាប់។
សមាគមខ្មែររដ្ឋវ៉ិកតូរីយ៉ា លោក ជា យូហ៊ន លើកឡើងថា ជារឿងឈឺចាប់បំផុតដែលរដ្ឋាភិបាលត្រកូល «ហ៊ុន» មិនត្រឹមតែចាប់ឃុំខ្លួនយុវជនចលនាមាតាធម្មជាតិ និងសកម្មជនកិច្ចព្រមព្រៀងប៉ារីសទាំងអយុត្តិធម៌នោះទេ ថែមទាំងធ្វើឲ្យខេត្តខ្មែរ ចំនួន៤ប្រឈមបាត់បង់ទៅវៀតណាមនៅថ្ងៃខាងមុខទៀតផង។
លោក ជា យូហ៊ន៖ «ទាំងអស់គ្នាដឹងហើយថា ហ៊ុន សែន គឺជាមនុស្សក្បត់ជាតិ។ តើខ្មែរយើងទាំងអស់គ្នាដែលនៅក្រៅប្រទេសនេះ យើងដេកលក់ទេ។ យើងត្រូវតែនាំគ្នាធ្វើបាតុកម្ម យើងទាំងអស់គ្នាមិនត្រូវនៅសម្ងំស្ងៀមទេ។ គ្រាន់តែ ព្រះបាទជ័យជេដ្ឋាទី២ អនុញ្ញាតឲ្យយួន ដែលជាប្រពន្ធរបស់គាត់ មកនៅ យើងបាត់បង់២១ខេត្ត យើងបាត់បង់ជនជាតិកម្ពុជាក្រោមជាង១០លាននាក់។ តើយើង បន្តបាត់បង់ប្រទេសយើងទាំងមូលដែរឬទេ?។
លោក ជា យូហ៊ន និងតំណាងសហគមន៍ខ្មែរ ក៏សម្រេចគ្នាថា នឹងរៀបចំធ្វើបាតុកម្មប្រឆាំងគម្រោងអភិវឌ្ឍន៍រួមគ្នានៅតំបន់ត្រីកោណពិសេសនេះ នៅថ្ងៃទី១១ ខែសីហា ខាងមុខ។
រីឯតំណាងរាស្ត្រអូស្ត្រាលីដើមកំណើតខ្មែរ លោក តាក់ ម៉េងហ៊ាង វិញ លោក ថ្លែងកោតសរសើរចំពោះសកម្មជនមាតាធម្មជាតិ ដែលបានតស៊ូលះបង់ធំធេងប្រឆាំងនឹងរឿងបំពុលបរិស្ថាន ការបំផ្លាញធនធានធម្មជាតិ បញ្ហាពុករលួយ និងរឿងអយុត្តិធម៌សង្គមនៅកម្ពុជា។ ក្រៅពីនេះ លោកក៏កោតសរសើរចំពោះទឹកចិត្តរបស់ពលរដ្ឋខ្មែរនៅអូស្ត្រាលីដែលបានចូលរួមដ៏ច្រើននៅក្នុងពិធីបុណ្យផ្កាប្រាក់នេះ។ លោកកត់សម្គាល់ថា ទោះបីជាពលរដ្ឋខ្មែរ មករស់នៅប្រទេសអូស្ត្រាលីជាច្រើនទសវត្សហើយក្តី ក៏ពួកគាត់នៅតែមិនភ្លេចប្រទេសកំណើត និងនៅតែមានស្មារតី និងឈាមជ័រជាខ្មែរ ហើយជាអ្នកចង់បានសេរីភាព និងស្អប់ខ្ពើមអំពើអយុត្តិធម៌ និងអំពើកេងប្រវ័ញ្ចពីប្រទេសជាតិ។
លោក តាក់ ម៉េងហ៊ាង៖ «សូមកោតសរសើរដល់បងប្អូនទាំងអស់។ ថវិកាដែលបានមកនេះ ជាការសន្សំជាការដកចេញពីហោប៉ៅ ដោយខ្ញុំបានឃើញហើយ ដូចជាអ៊ំប្រុសអ៊ំស្រី ដែលអញ្ជើញមកនេះ គឺមានតែអ្នកធ្លាប់អត់ធ្លាប់លំបាកទេ ដែលទុក្ខលំបាកដែលអ្នករងគ្រោះ។ ចំណែកអ្នកដែលកាត់ដីរដ្ឋយកទៅឲ្យកូនរបស់ ខ្លួនឯង យកទៅឲ្យបក្ខពួករបស់ខ្លួនឯង លុយរាប់លាន អាហ្នឹងគឺគេអត់ឈឺឆ្អាលទេ។ ដូច្នេះហើយថវិកាដែលបងប្អូនបានបរិច្ចាគទោះតិចក្តីច្រើនក្តីក៏ជាទឹកចិត្តដែរ»។
ក្រោយការថ្លែងរបស់លោក តាក់ ម៉េងហ៊ាង នេះ ក៏មានការចាក់វីដេអូខ្លីមួយរបស់សកម្មជនមាតាធម្មជាតិ កញ្ញា ភួន កែវរស្មី ដែលនាងបាន និយាយថា «តស៊ូហើយស្លាប់ ប្រសើរជាងស្លាប់មិនបានតស៊ូការពារធនធានធម្មជាតិ»។ វីដេអូនេះ បានធ្វើឲ្យអ្នកចូលរួមមួយចំនួនស្រក់ទឹកភ្នែកដោយសារការអាណិត ការកោតសរសើរវីរភាព និងការលះបង់របស់ក្មេងស្រីរូបនេះ។
អ្នកឃ្លាំមើលសិទ្ធិមនុស្ស និងសង្គម លោក ស៊ឹង សែនករុណា មានប្រសាសន៍ថា បើទោះបីជាកម្ពុជា មានកិច្ចព្រមព្រៀងសន្តិភាពទីក្រុងប៉ារីស និងមានរដ្ឋធម្មនុញ្ញ ចែងថា កម្ពុជាជាប្រទេសប្រជាធិបតេយ្យ សេរីពហុបក្ស និងគោរពសិទ្ធិមនុស្សក្តី ក៏ជាក់ស្តែងអ្នកនយោបាយបក្សប្រឆាំង សកម្មជនសង្គម សកម្មជនសិទ្ធិមនុស្ស និងបរិស្ថាន តែងតែរងការធ្វើទុក្ខបុកម្នេញ រងការកាប់សម្លាប់ និងរងការចាប់ដាក់គុកឥតឈប់ឈរ។ ទោះជាយ៉ាងណា លោកអំពាវនាវឲ្យពលរដ្ឋខ្មែរទាំងក្នុងប្រទេសនិងក្រៅប្រទេស កុំអស់សង្ឃឹមហើយត្រូវតែបន្តរួបរួមសាមគ្គីគ្នា និងតស៊ូតទៅមុខទៀត ដើម្បីកុំឲ្យមេដឹកនាំប្រទេសធ្វើអ្វីៗតាមទំនើងចិត្ត។
លោក ស៊ឹង សែនករុណា៖ «រឿងបងប្អូនការពារធនធានធម្មជាតិថ្មីនេះ ខ្ញុំស្គាល់ប្អូននិងធ្លាប់ចូលរួមចែកចំណេះដឹង គឺពួកគាត់សុទ្ធសឹងតែជាយុវជនដ៏សកម្ម ស្រលាញ់ធនធានធម្មជាតិ ស្រលាញ់ប្រទេសជាតិ ហើយបែរជាចាត់វិធានការទៅលើពួកគាត់ ចាប់ដាក់គុក ហើយចោទពីបទក្បត់ជាតិ គឺធ្ងន់ណាស់ក្បត់ជាតិ។ ឥឡូវ បងប្អូននៅទីនេះ តើអ្នកណាក្បត់ជាតិ? គាត់ការពារទឹកដីការពារធនធានរបស់ជាតិ ទៅជាក្បត់ជាតិ ហើយចុះអាអ្នកបំផ្លាញជាតិវាយ៉ាងម៉េច តើវាជាអ្នកស្រលាញ់ជាតិ ? មើលយើងឲ្យនិយមន័យនេះឲ្យច្បាស់។ តើអ្នកណាក្បត់ជាតិឲ្យច្បាស់? ហេតុអីចូលចិត្តបន្លំ ? ដល់ពេលធ្វើរឿងអំពើខុស ទៅកៀរគរពលរដ្ឋដែលគ្នាអត់យល់អត់ដឹងទៅសម្លុតគំរាមឲ្យគេបង្ហាញតាមហ្វេសប៊ុក តើគេល្ងង់ណាស់ឬ? គេជឿណាស់ ឬ? គេមានខួរក្បាលគិតដែរអ្នកណាស្រលាញ់ជាតិ អ្នកក្បត់ជាតិ គេដឹងច្បាស់ណាស់»។
ជាមួយគ្នានេះ ប្រធានគណបក្សភ្លើងទៀនប្រចាំអូស្ត្រាលី លោក ម៉ែន វណ្ណា បានបញ្ចេញមតិ និងកង្វល់ដោយផ្តោតសំខាន់ទៅលើបញ្ហាទឹកដី ជាពិសេសគម្រោងអភិវឌ្ឍន៍តំបន់ត្រីកោណ (CLV) ដែលលោក ចោទថា លោក ហ៊ុន សែន នឹងធ្វើឲ្យកម្ពុជា នឹងបាត់បង់ទឹកដីចំនួន៤ខេត្ត រួមមាន ក្រចេះ ស្ទឹងត្រែង រតនគិរី និងមណ្ឌលទៅវៀតណាមនៅថ្ងៃអនាគត។ លោកបន្តថា បញ្ហាទឹកដីគឺជាបញ្ហារួម ដូច្នេះអំពាវនាវឲ្យពលរដ្ឋខ្មែរទាំងអស់ ត្រូវរួមគ្នាប្រឆាំងនឹងគម្រោងអភិវឌ្ឍតំបន់ត្រីកោណពិសេសនេះ។
លោក ម៉ែន វណ្ណា៖ «កុំភ្លេចថា ដីសម្បទានទល់ដែនយួនសឹងតែគ្រប់កន្លែងទាំងអស់៩៩ឆ្នាំ។ តើពលរដ្ឋយើងបានចំណេញអី សូម្បីតែចូលព្រៃទីនោះ មិនបានផង។ យើងគិតមើល ហើយតើចាំបាច់អីដែលយើងត្រូវសហការជាមួយយួន និងឡាវ ដើម្បីអភិវឌ្ឍ។ EBAដែលគេឲ្យបានផ្តល់ការងារជូនប្រជាពលរដ្ឋរាប់លាននាក់នៅខាងក្នុង បែរជាគាត់ (ហ៊ុន សែន ) បំបិទចោលតែម្តង។ សួរគាត់មើល តើគាត់អភិវឌ្ឍស្អី? ប្រជាពលរដ្ឋពីមុនធ្វើការនៅស្រុកខ្មែរ ឥឡូវនេះ ទៅថៃ ប៉ុន្មានលាននាក់ ទៅកូរ៉េប៉ុន្មានលាន ទៅជប៉ុនប៉ុន្មាន ទៅម៉ាឡេស៊ីប៉ុន្មាន?»។
កន្លងមក រដ្ឋាភិបាលក្រុងភ្នំពេញ ព្យាយាមបកស្រាយថា ការចាប់ឃុំខ្លួនសកម្មជនបរិស្ថាន គឺជាការអនុវត្តច្បាប់។ ចំណែកកិច្ចសហប្រតិបត្តិការតំបន់អភិវឌ្ឍន៍ត្រីកោណកម្ពុជា ឡាវ និងវៀតណាមវិញ លោក ហ៊ុន សែន កាលពីថ្ងៃទី២៣ កក្កដា បានប្រើពេលវេលា២ម៉ោងដើម្បីបកស្រាយផង និងគំរាមកំហែងពលរដ្ឋដែលឈឺ ឆ្អាលរឿងទឹកដីផង។ បុរសខ្លាំងរូបនេះ អះអាងថា កិច្ចសហប្រតិបត្តិការតំបន់អភិវឌ្ឍន៍ត្រីកោណពិសេសដែលផ្តួចផ្តើមដោយគំនិតរបស់លោកនេះ នឹងមិនធ្វើឲ្យបាត់បង់ទឹកដីខ្មែរទៅវៀតណាមនោះទេ។ លោក បានបញ្ជាឱ្យគ្រប់អំណាចរដ្ឋទាំងអស់ បើកការបង្ក្រាបលើពលរដ្ឋទាំងក្នុង និងក្រៅប្រទេស តាមរយៈការចាប់ដាក់គុក និងសម្លុតគំរាមគ្រួសាររបស់ពួកគាត់ បើពលរដ្ឋហ៊ានបញ្ចេញមតិរឿងទឹកដីនេះតទៅទៀត។
ទោះជាយ៉ាងណា តំណាងសហគមន៍ខ្មែរនៅអូស្ត្រាលី មិនខ្លាចការគំរាមរបស់លោក ហ៊ុន សែន ឡើយ និងនៅតែបារម្ភថា ជោគវាសនាទឹកដីខ្មែរទាំង៤ខេត្ត នឹងធ្លាក់ទៅវៀតណាមនៅពេលអនាគត បើរដ្ឋាភិបាល មិនដកខ្លួនចេញពីគម្រោងអភិវឌ្ឍតំបន់ត្រីកោណទេនោះ។
អតីតសមាជិកព្រឹទ្ធសភាគណបក្សសម រង្ស៊ី លោក អ៊ឹង ប៊ុនអាង លើកឡើងថា ផ្អែកតាមប្រវត្តិសាស្ត្រ និងភាពពុតត្បុតរបស់ លោក ហ៊ុន សែន នេះ គឺទឹកដីខ្មែរ ទាំង៤ ខេត្តមិនគង់វង្សឡើយ។
លោក អ៊ឹង ប៊ុនអាង៖ «ប្រសិនបើយើងមានលុយ យើងអាចខ្ចីលុយគេបានមក អាចធ្វើឲ្យខេត្តយើងរីកចម្រើនហេតុអីបានយើងហៅគេមកជួយគ្រប់គ្រង។ របៀបគិត និងមធ្យោបាយរបស់លោក ហ៊ុន សែន គឺគាត់ចង់សងគុណទៅលើវៀតណាមដែលបានលើកបន្តុបគាត់ឲ្យធ្វើជានាយករដ្ឋមន្ត្រីទល់ម៉ោងនេះ។ គាត់ប្រាប់ហើយថា ត្រូវដឹងគុណវៀតណាមនិងដឹងគុណគាត់រហូត»។
ងាកមកពិធីបុណ្យផ្កាប្រាក់វិញ សមាគមខ្មែរ រៃអង្គាសលុយពីអ្នកចូលរួមបានជាង១ម៉ឺន២ពាន់ដុល្លារដើម្បីប្រគល់ជូនគ្រួសារនិងសកម្មជនចលនាមាតាធម្មជាតិដែលកំពុងជាប់ឃុំ។ ដោយឡែក នៅថ្ងៃទី២៥ ខែសីហា អង្គការមូលនិធិសង្គ្រោះបន្ទាន់កម្ពុជា នឹងរៀបចំពិធីបុណ្យផ្កាប្រាក់មួយទៀតនៅវត្តពុទ្ធរង្សីម៉ែលប៊ន ដើម្បីប្រមូលលុយជួយដល់ជនរងគ្រោះជាសកម្មជននយោបាយ សកម្មជនសង្គមស៊ីវិល និងសកម្មជនបរិស្ថានជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
