សហព័ន្ធខ្មែរកម្ពុជាក្រោមទទូចឲ្យតុលាការវៀតណាមទម្លាក់ចោលសាលក្រមផ្ដន្ទាទោសកសិករខ្មែរក្រោមបីនាក់
2021.05.13
សហព័ន្ធ និងកសិករខ្មែរក្រោមទទូចឲ្យតុលាការវៀតណាមទម្លាក់ចោលសាលក្រមផ្ដន្ទាទោសឲ្យពួកគេឲ្យជាប់ពន្ធនាគារករណីជម្លោះដីធ្លី។ ចំណែកមន្ត្រីអង្គការសិទ្ធិមនុស្សអន្តរជាតិព្រមានថា សាលក្រមអយុត្តិធម៌របស់វៀតណាមនឹងបង្កឲ្យពលរដ្ឋខ្មែរក្រោមខឹងសម្បារនឹងរដ្ឋាភិបាលវៀតណាមកាន់តែខ្លាំងឡើងថែមទៀត។
សហព័ន្ធ និងកសិករខ្មែរក្រោមថ្កោលទោសតុលាការនៅខេត្តក្រមួនស ដែលវៀតណាមប្ដូរឈ្មោះទៅជាខេត្តគៀន យ៉ាង (Kien Giang) ដែលបានបន្តតម្កល់សាលក្រមផ្ដន្ទាទោសកសិករខ្មែរក្រោមបីនាក់ឲ្យជាប់ពន្ធនាគារពីពីរឆ្នាំដល់ ប្រាំបួនខែ។ ទាំងមន្ត្រីសហព័ន្ធ និងកសិករខ្មែរក្រោមអះអាង ដូចគ្នាថា សាលក្រមនេះជារឿងអយុត្តិធម៌ និងជាការប្លន់ដីខ្មែរក្រោមឲ្យទៅលក់ចែកលុយគ្នា។
ការថ្កោលទោសនេះ ធ្វើឡើងបន្ទាប់ពីតុលាការថ្នាក់ខេត្តវៀតណាម កាលពីថ្ងៃទី៦ ឧសភា បានសម្រេចតម្កល់សាលក្រមផ្ដន្ទាទោសរបស់តុលាការថ្នាក់ស្រុក ប្រឆាំងនឹងកសិករខ្មែរក្រោម ៣រូប ទុកជាបានការ ប៉ុន្តែបានសម្រាលទោសកសិករខ្មែរក្រោមខ្លះ។ កសិករដែលត្រូវតុលាការសម្រាលទោសនោះរួមមាន លោក ហ្វិន វ៉ាំងឌែប ពីជាប់ពន្ធនាគារ ២ឆ្នាំ ៦ខែ ពេលនេះនៅ ២ឆ្នាំលោក តៀន ដាម ផ្ដន្ទាទោសឲ្យជាប់ពន្ធនាគារ ២ឆ្នាំ ៣ខែ មកនៅ ២ឆ្នាំ និងលោក តៀន ណាមផ្ដន្ទាទោស ១ឆ្នាំ មកនៅ ៩ខែវិញ។
កសិករខ្មែរក្រោម លោក ហ្វិន វ៉ាំងឌែប ដែលជាអ្នកស៊ីឈ្នួលភ្ជួរដីស្រែឲ្យពលរដ្ឋខ្មែរក្រោម ប្រាប់វិទ្យុអាស៊ីសេរី កាលពីថ្ងៃទី៨ ឧសភាថា សាលក្រមតុលាការវៀតណាម មានលក្ខណៈអយុត្តិធម៌ ចំពោះលោក និងខ្មែរពីរនាក់ផ្សេងទៀត ពីព្រោះពួកគេជាជនរងគ្រោះនៃការរំលោភយកដីកេរ្តិ៍ដូនតា ពីសំណាក់អាជ្ញាធរវៀតណាម៖ «ដីទឹកហ្នឹងរបស់អ្នកភូមិតាំងពីណាមកនោះ។ និយាយរួមមកពួកអាជ្ញាធរហ្នឹងវាយកចែកគ្នា។ ប្អូនជាកសិករសស៊ីឈ្នួលគេ ហើយប្អូនក៏អត់បង្ករបួសស្នាមដែរ»។
លោក ហ្វិន វ៉ាំងឌែប ស្នើឲ្យតុលាការវៀតណាម ទម្លាក់ចោលការចោទប្រកាន់ទាំងស្រុងប្រឆាំងលោក និងកសិករខ្មែរក្រោមផ្សេងទៀត ពីព្រោះលោកគ្មានកំហុសដូចទៅនឹងការចោទប្រកាន់របស់តុលាការវៀតណាមនោះទេ។
លោក ហ្វិន វ៉ាំងឌែប ត្រូវបានអាជ្ញាធរវៀតណាមចាប់ដាក់ពន្ធនាគារអស់រយៈ ៣ខែ កាលពីឆ្នាំ២០២០ ក្រោយអាជ្ញាធរវៀតណាមបានប្រើប្រាស់អំពើហិង្សាបង្ក្រាបកសិករខ្មែរក្រោម ដែលកំពុងធ្វើស្រែចម្ការលើដីកេរ្តិ៍ដូនតារបស់ពួកគេ។ អាជ្ញាធរបានហាមឃាត់មិនឲ្យពលរដ្ឋខ្មែរក្រោមធ្វើស្រែចម្ការដោយអះអាងថា ដីរបស់ខ្មែរក្រោម ជាដីរដ្ឋវៀតណាម។
ពាក់ព័ន្ធនឹងសាលក្រមតុលាការវៀតណាមប្រឆាំងនឹងពលរដ្ឋខ្មែរក្រោមនេះ ប្រធាននាយកដ្ឋានព័ត៌មាននៃសហព័ន្ធខ្មែរកម្ពុជាក្រោម ព្រះភិក្ខុ ស៊ឺង យ៉ឹងរតនា មានថេរដីកាថា ទោះបីតុលាការវៀតណាមបន្ធូរបន្ថយទោសកសិករខ្មែរក្រោមក៏ដោយ ក៏រឿងនេះជារឿងអយុត្តិធម៌ដោយសារតែកសិករជាជនរងគ្រោះនៃការរំលោភយកដីធ្លីពីសំណាក់អាជ្ញាធរវៀតណាម៖ «នៅតែជាអំពើអយុត្តិធម៌ចំពោះកសិករខ្មែរក្រោម ពីព្រោះថា កសិករខ្មែរក្រោមជាម្ចាស់ស្រុក ជាជនជាតិដើម។ ពួកគាត់បានប្រកបរបរចិញ្ចឹមជីវិតនៅលើដីស្រែចម្ការរបស់ពួកគាត់ប៉ុន្តែត្រូវបានអាជ្ញាធរវៀតណាម រារាំងហាមឃាត់ និងប្រើអំពើហិង្សាទៅលើកសិករខ្មែរក្រោម»។
សហព័ន្ធខ្មែរកម្ពុជាក្រោមគ្រោងនឹងបន្តធ្វើយុទ្ធនាការប្រឆាំងនឹងសាលក្រមតុលាការវៀតណាមដើម្បីធានាថា កសិករខ្មែរក្រោមទាំងបីនាក់នឹងមិនជាប់ពន្ធនាគារទាំងអយុត្តិធម៌។ ដោយឡែក មេធាវីខ្មែរក្រោមទាំងបីនាក់ ក៏កំពុងប្ដឹងឧទ្ធរណ៍ប្រឆាំងនឹងសាលក្រមតុលាការខេត្តវៀតណាមនេះដែរ។
ពាក់ព័ន្ធនឹងសាលក្រមប្រឆាំងកសិករខ្មែរក្រោមនេះដែរ មន្រ្តីសិទ្ធិមនុស្សអន្តរជាតិស្វាគមន៍ចំពោះការបន្ធូរបន្ថយទោសនេះ ប៉ុន្តែចាត់ទុកថា សាលក្រមនេះ គ្មានយុត្តិធម៌ទាល់តែសោះ។ លោក ហ៊្វីល រ៉ូបឺតសុន (Phil Robertson) នាយករងប្រចាំតំបន់អាស៊ីរបស់អង្គការ (Human Rights Watch) ប្រាប់អាស៊ីសេរីតាមរយៈអ៊ីម៉េលថា ប៉ូលិសវៀតណាមបានប្រើប្រាស់កម្លាំងហួសហេតុ ទើបបណ្ដាលឲ្យមានអំពើហិង្សា ហើយសវនាការគ្មានយុត្តិធម៌នោះទេ ដោយសារតែតុលាការមិនឯករាជ្យ ដូច្នោះវាបង្ហាញថា សាលក្រមប្រឆាំងនឹងកសិករខ្មែរក្រោមបីនាក់នោះ ត្រូវបានអាជ្ញាធរវៀតណាមរៀបចំឡើង។ លោក ហ៊្វីល រ៉ូបឺតសុន ព្រមានថា ការចាប់ខ្មែរក្រោមដាក់ពន្ធនាគារ នឹងមិនអាចដោះស្រាយជម្លោះបានទេ ប៉ុន្តែវានឹងធ្វើឲ្យសហគមន៍ខ្មែរក្រោម កាន់តែមានកំហឹងថែមទៀត ដោយសារតែពួកគេគិតថា រដ្ឋាភិបាលវៀតណាមជាអ្នកបង្កហិង្សា និងបានរំលោភបំពានសិទ្ធិពលរដ្ឋខ្មែរក្រោម។ លោកបន្ថែមទៀតថា សិទ្ធិដីធ្លីជនជាតិដើមតែងតែរងការគំរាមកំហែងពីសំណាក់អាជ្ញាធរវៀតណាម ដែលបដិសេធមិនទទួលស្គាល់សិទ្ធិនេះ។ ពលរដ្ឋខ្មែរក្រោម ដែលធ្លាប់បង្កបង្កើនផលលើដីរបស់ពួកគេជាច្រើនឆ្នាំមកហើយនោះ បានបាត់បង់ដីធ្លី និងរងការចាប់ខ្លួនដាក់ពន្ធនាគារបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។