សហព័ន្ធខ្មែរ​កម្ពុជា​ក្រោម ​អំពាវនាវ​រក​ការ​គាំទ្រ​មិន​ឲ្យ​វៀតណាម​ក្លាយ​ជា​សមាជិក​ក្រុម​ប្រឹក្សា​សិទ្ធិ​មនុស្ស

ដោយ យន់ សាមៀន
2022.07.05
Share on WhatsApp
Share on WhatsApp
សហព័ន្ធខ្មែរ​កម្ពុជា​ក្រោម ​អំពាវនាវ​រក​ការ​គាំទ្រ​មិន​ឲ្យ​វៀតណាម​ក្លាយ​ជា​សមាជិក​ក្រុម​ប្រឹក្សា​សិទ្ធិ​មនុស្ស លោក ប្រាក់ សេរីវុឌ្ឍ (លើវេទិកាខាងស្នាំដៃ) នាយកប្រតិបត្តិ​​សហព័ន្ធ​ខ្មែរ​កម្ពុជា​ក្រោម​ ថ្លែង​នៅក្នុង​មហាសន្និបាត​សកល​លើកទី១១ នៃ​សហព័ន្ធខ្មែរ​កម្ពុជា​ក្រោម នៅឯ​សហរដ្ឋអាមេរិក កាលពីថ្ងៃទី៦ ខែឧសភា ឆ្នាំ២០២២។
រូប៖ KKF

សហព័ន្ធ​ខ្មែរ​កម្ពុជា​ក្រោម​ដែល​មាន​មូលដ្ឋាន​នៅ​សហរដ្ឋអាមេរិក​កំពុង​ធ្វើ​យុទ្ធនាការ​ ប្រឆាំង​នឹង​រដ្ឋាភិបាល​វៀតណាម ដែល​កំពុង​ចង់​សុំ​ធ្វើ​សមាជិក​ ក្រុម​ប្រឹក្សា​សិទ្ធិមនុស្ស​របស់​អង្គការ​សហប្រជាជាតិ​សម្រាប់​អាណតិ្ត​បី​ឆ្នាំពី​ឆ្នាំ២០២៣ ដល់ឆ្នាំ២០២៥។ សហព័ន្ធខ្មែរ​កម្ពុជា​ក្រោម​អះអាង​ថា វៀតណាម​កំពុង​រំលោភ​សិទ្ធិមនុស្ស ជាពិសេស​ខ្មែរ​កម្ពុជា​ក្រោម  ដែលជា​ម្ចាស់​ស្រុក​ ដូច្នោះ​វៀតណាមនេះ​មិន​អាច​ក្លាយ​ជា​សមាជិក​ក្រុម​ប្រឹក្សា​សិទ្ធិមនុស្ស​របស់​អង្គការ​សហប្រជាជាតិ​បាន​ទេ។

សហព័ន្ធខ្មែរ​កម្ពុជា​ក្រោម​ កំពុង​ដើរ​ប្រមូល​ការ​គាំទ្រ​ពី​អង្គការ​សិទ្ធិមនុស្ស​អន្តរជាតិ និង​អង្គការ​ផ្សេងៗ​ទៀត​នៅ​ជុំវិញ​ពិភពលោក​ដើម្បីប្រឆាំង​ការ​សុំ​ធ្វើ​ជា​សមាជិក ក្រុម​ប្រឹក្សា​សិទ្ធិមនុស្ស​របស់​អង្គការ​សហប្រជាជាតិ​របស់​វៀតណាម។

នាយកប្រតិបត្តិ​សហព័ន្ធ​ខ្មែរ​កម្ពុជា​ក្រោម​លោក ប្រាក់ សេរីវុឌ្ឍ ប្រាប់​វិទ្យុ​អាស៊ីសេរី កាល​ពី​សប្តាហ៍​មុន​ថា វៀតណាម​មាន​កំណត់​ត្រា​អាក្រក់​បំផុត​ផ្អែក​រំលោភ​សិទ្ធិមនុស្ស និង​ជនជាតិ​ដើម​ដែល​កំពុង​រស់​នៅ​វៀតណាម ដូច្នោះ​វៀតណាម មិន​សាកសម​នឹង​ក្លាយ​ជា​ក្រុម​ប្រឹក្សា​សិទ្ធិមនុស្ស​របស់​អង្គការ​សហ​ប្រជាជាតិ​នោះ​ទេ៖ «ចំណុចទី១​គឺការ​គាប​សង្កត់​ជនជាតិ​ដើម​ខ្មែរ​ក្រោម​និង​ជនជាតិ​ដើម​ផ្សេងៗ​ទៀត​សូម្បី​តែ​យួន​គ្នា​គេ ដែល​ប្រកាន់​គំនិត​សេរី​ហ្នឹង​ក៏​គាប​សង្កត់​គេ​ខ្លាំង​ដែរ។ នេះ​ជា​រឿង​ទី​មួយ​ ចំណែក​រឿង​ទីពីរ​នៅ​ពេល​ដែល​រុស្ស៊ី​ឈ្លានពានអ៊ុយក្រែន ពេល​នោះ​ប្រទេស​សេរី ពិសេស​អាមេរិក​ក៏​បាន​បោះឆ្នោត​ប្រឆាំង​ផ្ទុយ​ទៅវិញ​វៀតណាម​មិន​បាន​បោះឆ្នោត​ដូច​សហរដ្ឋអាមេរិកទេ។ គាត់ (វៀតណាម) គាំទ្រ​រុស្ស៊ីវិញ។ រឿង​ហ្នឹង​សុំ​ឲ្យ​អង្គការ​សហប្រជាជាតិពិនិត្យ​ឡើង​វិញ»

ការលើកឡើង​របស់​លោក ប្រាក់ សេរីវុឌ្ឍ​ នេះ​ធ្វើឡើង​ក្រោយ​ពេល​ក្រសួងការ​បរទេស​វៀតណាម​ប្រកាស​ថា វៀតណាម​ចង់​ក្លាយ​ជា​សមាជិក​ក្រុម​ប្រឹក្សា​សិទ្ធិ​មនុស្ស​របស់​អង្គការ​សហប្រជាជាតិ​សម្រាប់​អាណតិ្ត​ពីរ​ឆ្នាំ​ពីឆ្នាំ២០២៣ ដល់​ឆ្នាំ​២០២៥។ វៀតណាម​អះអាង​ថា រដ្ឋាភិបាល​កុម្មុយនីស្ត​មួយ​នេះ នឹង​ប្តេជ្ញា​ការពារ​ជនងាយ​រងគ្រោះ បំបាត់​អំពើ​ហិង្សា លើក​តម្កើង​សមភាព​យេនឌ័រ​និង​ ដោះ​ស្រាយ​​បញ្ហា​ប្រឈម​របស់​ពិភពលោក។ រដ្ឋមន្រ្តីការបរទេស​វៀតណាម លោក ប៊ូយ ថាញ់ សឺន (Bui Thanh Son) ថ្លែង​ក្នុង​សេចក្តីថ្លែងការណ៍​ក្នុង​កិច្ច​ប្រជុំអង្គការ​សហ​ប្រជាជាតិ​​មួយ​កាល​ពី​ខែមីនាថា​​​ វៀតណាម​បាន​ត្រៀម​រួចជា​ស្រេចហើយ​ដើម្បី​ធ្វើការងារ​នឹង​សមាជិក​ផ្សេង​ទៀត ដើម្បី​ពង្រឹង និង​លើក​តម្លើង​ធម្មនុញ្ញ​អង្គការ​សហប្រជាជាតិ ច្បាប់​អន្តរជាតិ និង​ពង្រឹង​ស្ថាប័ន​ក្រុម​ប្រឹក្សា​សិទ្ធិ​មនុស្ស​តាម​រយៈ​​កិច្ចសហការ​សន្ទនា​​ និង​គោរព​គ្នា​ទៅ​វិញ​ទៅ​មក។ វៀតណាម​ធ្លាប់​ក្លាយ​ជា​សមាជិក​ក្រុម​ប្រឹក្សា​នេះម្តង​រួច​ហើយ កាល​ពី​ចន្លោះ​ឆ្នាំ២០១៤ និង២០១៦។ បច្ចុប្បន្ន ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ​មាន​សមាជិក​១៥​ប្រទេស​ដែល​បាន​ចាប់​ផ្តើម​អាណត្តិ​តាំង​ពី​ដើម​ឆ្នាំ២០២១។​

ទោះបី​វៀតណាម​អះអាង​ថា ប្រទេស​នះ ចង់​ចូល​រួម​អនុវត្ត​ការ​គោរព​សិទ្ធិ​មនុស្ស​ក៏ដោយក៏​អង្គការ​សិទិ្ធមនុស្ស និង​ប្រទេស​សេរី​មួយ​ចំនួន មិន​មាន​ជំនឿលើ​ប្រទេស​វៀតណាម​ដែរ ដោយ​សារ​តែ​សព្វ​ថ្ងៃ​នេះ​វៀតណាម​បាន​រំលោភ​សិទ្ធិមនុស្ស​យ៉ាង​ធ្ងន់ធ្ងរសហព័ន្ធខ្មែរ​កម្ពុជា​អះអាង​ថា ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ វៀតណាម​បន្តធ្វើ​ទុក្ខ​បុក​ម្នេញ​លើ​ពលរដ្ឋខ្មែរ​ក្រោម។​ជាក់ស្តែង វៀតណាម​បាន​រឹប​អូស និង​ឃាត់ខ្លួន យុវជន​ខ្មែរ​ក្រោម​ជាច្រើន​នាក់ ពី​មូលហេតុ​ដែល​ពួកគេ​បាន​ចែក​សេចក្តី​ប្រកាស​ អង្គការ​សហប្រជាជាតិ ​ឯកសារ​ស្តីពី​សិទ្ធិម​នុស្ស និង​សិទ្ធិ​ជន​ជាតិ​ដើមវៀតណាម​ចោទ​យុវជន​ខ្មែរ​ក្រោម​ថា ការដែល​ពួកគេ​ចែកចាយ​ឯកសារ​សិទ្ធិ​មនុស្សនេះ​ មាន​គោល​បំណង​បំបែក​បំបាក់​សាមគ្គី​វៀតណាម។ ត្រង់នេះ​សហព័ន្ធខ្មែរ​កម្ពុជា​ក្រោម​ចោទ​សួរ​ថា ទង្វើ​របស់​វៀតណាម​នេះ តើ​អាច​ឲ្យប្រទេសវៀតណាម​អាច​ក្លាយ​ជា​គំរូ​សមាជិក​ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ ដើម្បី​លើក​តម្កើង​សិទ្ធិ​មនុស្ស​ដែរឬទេ? ថ្មីៗនេះទៀត​សោត វៀតណាម​ក៏​បន្ត​ឃាត់​ខ្លួន​យុវជន​ខ្មែរ​ក្រោម​ជា​ច្រើន​រូប ដោយគ្រាន់​តែ​ពួកគេ​ពាក់អាវយឺត ដែល​មាន​សរសេរ​អក្សរ​ថា ខួប​៧៣​ឆ្នាំ​ក្រោម​អាណានិគម​យួន និង​ដាក់ទង់ជាតិ​ខ្មែរ​ក្រោម​ជាដើមចំណែក​ស្រ្តីខ្មែរ​ក្រោម​៥​នាក់ ក៏​ត្រូវ​វៀតណាមបណ្តេញ​ចេញ​ពី​ការងារ ដោយ​សារតែពួកគេ​ពាក់អាវ​យឺត​នេះ​ដែរ

នាយកប្រតិបត្តិ​សហព័ន្ធ​ខ្មែរ​កម្ពុជា​ក្រោម​លោក ប្រាក់ សេរីវុឌ្ឍ មាន​ប្រសាសន៍​ទៀត​ថា បើ​វៀតណាម ងាក​មក​គោរព​សិទ្ធិ​មនុស្ស និង​សិទ្ធិជនជាតិ​ដើម ​សហព័ន្ធ​នឹងពិចារណា​ យុទ្ធនាការ​នេះ​ឡើង​វិញ៖ «សព្វថ្ងៃយើង​ទាមទារ​សិទ្ធិ​សម្រេច​វាសនា​ដោយ​ខ្លួន​ឯង ហើយ​សិទ្ធិ​ដែល​យើង​បាត់បង់​យើង​នឹង​ទាមទារ​ជា​លំដាប់​លំដោយ​រហូត​ដល់​គ្រប់​នូវ​អ្វី​ដែល​យើងចង់​បាន​ជា​ពលរដ្ឋ​មួយ​រស់​នៅ​ដោយ​ត្រឹមត្រូវ ជា​ម្ចាស់​ដើម​នៃ​ទឹកដី»

ទោះបី​ជាយ៉ាង​ណា​ សហព័ន្ធ​លើក​ឡើង​ថា ដើម្បី​បង្ហាញ​ថា វៀតណាម​ពិតជា​ចង់​ចូលរួម​លើក​ស្ទួយ​វិស័យ​សិទ្ធិមនុស្ស​មែន​នោះ ប្រទេសនេះ​ត្រូវ​ធ្វើការងារ​មួយចំនួន​សិន មុននឹង​ត្រូវ​បានគេ​អនុញ្ញាត​ឲ្យ​ធ្វើ​ជា​សមាជិក​ក្រុម​ប្រឹក្សា​សិទ្ធិម​នុស្ស​​អង្គការ​សហប្រជាជាតិ។ ការងារ​សំខាន់ៗ​រួមមាន ការ​អនុវត្តដោយ​ស្មោះត្រង់ នូវ​រាល់​អនុសញ្ញា​ទាំង​ឡាយ​ណា ដែល​វៀតណាម បានចុះ​នឹងអង្គការ​សហប្រជា​ជាតិ ដើម្បី​ធានា​ថា ពលរដ្ឋ​ទូទៅរស់​នៅ​វៀតណាមទទួល​បាន​សិទ្ធិ​ជា​មូលដ្ឋាន​ ដោយ​គ្មាន​ការ​ធ្វើទុក្ខ​បុកម្នេញ ប្រឈម​នឹងការ​ធ្វើ​ទារុណ្ឌកម្ម​ ជាប់​ពន្ធនាគារ នៅពេល​ដែល​ពួកគេ​ងើបឡើង​ទាមទារ​ សិទ្ធិ​ជា​មូលដ្ឋាន​របស់​ពួកគេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។