ក្រសួងព័ត៌មានគ្រោងបញ្ចប់សេចក្តីព្រាងច្បាប់សិទ្ធិទទួលបានព័ត៌មាននៅដើមខែឧសភា
2015.04.24
ក្រសួងព័ត៌មាន
ក្រសួងព័ត៌មាន កោះអញ្ជើញមន្ត្រីសិទ្ធិមនុស្ស និងតំណាងអ្នកសារព័ត៌មាន ព្រមទាំងស្ថាប័នពាក់ព័ន្ធក្នុងការចូលរួមធ្វើសេចក្តីព្រាងច្បាប់ស្ដីពីសិទ្ធិទទួលបានព័ត៌មាន ទៅពិភាក្សាគ្នាជាថ្មីទៀតនៅដើមខែឧសភា ខាងមុខនេះ។
កិច្ចពិភាក្សានោះ អាចជាឱកាសចុងក្រោយសម្រាប់ក្រុមអង្គការសង្គមស៊ីវិល ពិនិត្យមើលសេចក្តីព្រាងច្បាប់នេះ មុននឹងក្រសួងបញ្ជូនទៅទីស្ដីការគណៈរដ្ឋមន្ត្រី។
មន្ត្រីជាន់ខ្ពស់ក្រសួងព័ត៌មាន ទទួលបន្ទុករៀបចំតាក់តែងសេចក្តីព្រាងច្បាប់ស្ដីពីសិទ្ធិទទួលបានព័ត៌មាន បញ្ជាក់នៅថ្ងៃទី២៤ មេសា ថា សេចក្តីព្រាងច្បាប់នេះបានលេចចេញជារូបរាងហើយ បន្ទាប់ពីមន្ត្រីក្រសួងបានចំណាយពេលជាច្រើនខែលើកិច្ចការនេះ។
ទីប្រឹក្សាក្រសួងព័ត៌មាន និងជាអ្នកនាំពាក្យនៃក្រុមការងារបច្ចេកទេសតាក់តែងសេចក្តីព្រាងច្បាប់ លោក អ៊ុក គឹមសេង។ លោកមានប្រសាសន៍ថា រហូតដល់ពេលនេះ សេចក្តីព្រាងច្បាប់បានចែកចេញជា ៩ជំពូក និង ៣៤មាត្រា ហើយគ្រោងដាក់ឲ្យភាគីពាក់ព័ន្ធ រួមមានតំណាងអ្នកសារព័ត៌មាន អង្គការសិទ្ធិមនុស្សជាតិ និងអន្តរជាតិ ចូលរួមពិភាក្សាយោបល់គ្នាជាលើកទី៣ នៅដើមខែឧសភា ខាងមុខនេះ៖ «យើងមានគ្រោងមានមែកមានធាងទៅតាមក្បួនខ្នាតត្រឹមត្រូវ នៃការរៀបចំច្បាប់នោះ មានគ្រប់អស់ហើយ។ ចំពោះខ្លឹមសារនៅក្នុងសេចក្តីព្រាងនៃមាត្រានីមួយៗ តើអាចទទួលយកបានទាំងអស់គ្នា ឬក៏ត្រូវបន្ថែមបន្ថយយ៉ាងណាទៀតនោះ គឺជាការសម្រេចរបស់ក្រុមបច្ចេកទេសជាអ្នករៀបចំតាក់តែងនោះឯង»។
លោកបន្តថា សេចក្តីព្រាងច្បាប់នេះ នឹងក្លាយជាសេចក្តីព្រាងចុងក្រោយ បន្ទាប់ពីឆ្លងកិច្ចប្រជុំលើកទី៣ ខាងមុខនេះ ដោយមានដាក់បញ្ចូលនូវមតិយោបល់របស់ភាគីពាក់ព័ន្ធ និងក្រុមអ្នកច្បាប់នានា មុននឹងបញ្ជូនទៅទីស្ដីការគណៈរដ្ឋមន្ត្រីពិនិត្យសម្រេច។
កាលពីថ្ងៃទី២៣ មេសា ក្រសួងព័ត៌មាន បានបើកកិច្ចប្រជុំផ្ទៃក្នុងមួយ ដើម្បីពិនិត្យមើលឡើងវិញលើការរៀបចំឯកសារនៃសេចក្តីព្រាងច្បាប់ ស្ដីពីសិទ្ធិទទួលបានព័ត៌មានដែលតាក់តែងដោយក្រុមការងារក្រសួងព័ត៌មាន មុននឹងដាក់ឲ្យមានកិច្ចពិភាក្សាលម្អិតលើសេចក្តីព្រាងច្បាប់មួយនេះ។
ទាក់ទងបញ្ហានេះដែរ នាយកវិទ្យាស្ថានតស៊ូមតិ និងគោលនយោបាយ លោក ណែប ស៊ីនថៃ មានប្រសាសន៍ថា អង្គការលោកក៏ត្រូវបានក្រសួងកោះអញ្ជើញឲ្យចូលរួមពិភាក្សាលើសេចក្តីព្រាងច្បាប់នេះដែរ ប៉ុន្តែលោកមិនទាន់ដឹងពីរបៀបវារៈជុំវិញកិច្ចពិភាក្សានោះនៅឡើយ ប៉ុន្តែលោកគិតថា ចំណុចសំខាន់ដែលត្រូវពិភាក្សានោះ គឺពិនិត្យទៅលើខ្លឹមសារការច្របាច់បញ្ចូលគ្នានូវអនុសាសន៍ពីសង្គមស៊ីវិលនានា ដែលក្រុមការងារអន្តរបច្ចេកទេសបានផ្ញើទៅក្រសួងកន្លងមកនោះ៖ «តែគ្រាន់តែដឹងថា នឹងមានបទបង្ហាញមួយក្នុងការរៀបចំដាក់បញ្ចូលនូវមតិយោបល់ទាំងអស់ នៅក្នុងជំពូកទី១ និងទី២ ដែលបានដាក់ចេញឲ្យសមាជិកផ្សេងៗចូលរួមហ្នឹង ធ្វើការផ្តល់យោបល់ ហើយយោបល់ទាំងនោះបានផ្ញើទៅក្រសួងរួចហើយ។ ក្រសួងនឹងច្របាច់បញ្ចូលឲ្យចេញជារូបរាងថ្មីមួយ»។
សិទ្ធិទទួលព័ត៌មាន គឺជាឧបករណ៍ដ៏សំខាន់មួយដែលធានាដល់ការបើកចំហដំណឹងដោយតម្លាភាព និងជាផ្នែកសំខាន់នៃលទ្ធិប្រជាធិបតេយ្យ។
នាយកវិទ្យាស្ថានកម្ពុជា សម្រាប់ការសិក្សាសារព័ត៌មាន លោក មឿន ឈានណារិទ្ធ បានស្វាគមន៍ចំពោះការលេចចេញនូវរូបរាងពិតប្រាកដនៃសេចក្តីព្រាងច្បាប់នេះ។ លោកថា កម្ពុជា ល្មមដល់ពេលមានច្បាប់នេះហើយ ព្រោះច្បាប់នេះប្រទេសម្ចាស់ជំនួយបានជំរុញទៅរដ្ឋាភិបាលបង្កើតឡើងនោះមានរយៈពេលជាង ១០ឆ្នាំហើយ។ ចំណែករដ្ឋាភិបាលកម្ពុជា ក៏បានទទួលស្គាល់នូវភាពចាំបាច់ ក្នុងការបង្កើតច្បាប់នេះ ដើម្បីសបញ្ជាក់ថា ប្រទេសមួយនេះមានសេរីភាពក្នុងការទទួលព័ត៌មានពិតប្រាកដ ប៉ុន្តែកិច្ចការនេះត្រូវបានពន្យារពេលរហូតមក៖ «ទោះបីការរង់ចាំនេះយូរយ៉ាងណាក៏ដោយ ក៏យើងនៅតែស្វាគមន៍ ហើយអ្វីដែលយើងចាប់អារម្មណ៍ខ្លាំងនោះ គឺច្បាប់នេះមានផលប្រយោជន៍ចំពោះស្ថាប័នទាំងអស់ រួមទាំងសារព័ត៌មាន រដ្ឋាភិបាល ទាំងសាធារណជនទូទៅតែម្តង»។
ការវិវឌ្ឍចុងក្រោយ ក្រសួងព័ត៌មាន បានសម្រេចចុះអនុស្សរណៈយោគយល់គ្នា ឬហៅថា អិមអូយូ (MOU) ជាមួយអង្គការយូណេស្កូ (UNESCO) កាលពីដើមឆ្នាំ២០១៤ ដើម្បីដឹកនាំបង្កើតច្បាប់សិទ្ធិទទួលបានព័ត៌មាននេះឲ្យបានក្នុងរយៈពេលប្រមាណជា ៣ឆ្នាំខាងមុខ។ ស្របពេលគ្នានោះដែរ ប្រទេសស៊ុយអែត (Sweden) ក៏បានផ្តល់ទឹកប្រាក់ប្រមាណ ១លានដុល្លារ សម្រាប់ឲ្យធ្វើការងារនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
