សមត្ថកិច្ចខេត្តរតនគិរីបន្តស្វែងរកជនជាតិម៉ុងតាញ៉ា១៣នាក់ដែលលាក់ខ្លួនក្នុងព្រៃ
2014.11.26
ក្រុមសមត្ថកិច្ចខេត្តរតនគិរី បន្តស្វែងរកកន្លែងលាក់ខ្លួនជនជាតិដើមភាគតិចចារ៉ាយ ឬក្រុមម៉ុងតាញ៉ា ១៣នាក់ ខណៈមានសេចក្តីរាយការណ៍ថា ពួកគេបានភៀសខ្លួនចេញពីប្រទេសវៀតណាម ក្នុងហេតុផលនយោបាយ។
រហូតមកទល់នឹងថ្ងៃទី២៦ ខែវិច្ឆិកា សមត្ថកិច្ចខេត្តរតនគិរី មិនទាន់រកឃើញជនជាតិដើមភាគតិចម៉ុងតាញ៉ា ១៣នាក់ ដែលកំពុងលាក់ខ្លួនក្នុងព្រៃខេត្តរតនគិរី នៅឡើយ។ ទោះជាយ៉ាងនេះក៏ដោយ ប្រជាពលរដ្ឋជនជាតិដើមភាគតិចខ្មែរដែលបានដឹងពីកន្លែងលាក់ខ្លួនរបស់ក្រុមម៉ុងតាញ៉ា ឲ្យដឹងថា ពួកគេបីនាក់ក្នុងចំណោម ១៣នាក់ កំពុងមានជំងឺគ្រុនចាញ់។
ស្នងការប៉ូលិសខេត្តរតនគិរី លោក ងួន គឿន មានប្រសាសន៍បញ្ជាក់ថា ប៉ូលិសកំពុងស្វែងរកកន្លែងលាក់ខ្លួនរបស់ពួកគេ ក៏ប៉ុន្តែលោកមិនទាន់ប្រាកដថា ប្រសិនសមត្ថកិច្ចរកពួកគេឃើញ ឬមួយជនភៀសខ្លួនទាំងនោះមកបង្ហាញខ្លួនជូនសមត្ថកិច្ច តើពួកគេនឹងប្រឈមមុខបែបណាខ្លះនៅឡើយ? លោកថ្លែងថា «បញ្ហាសំខាន់ គឺរកជនភៀសខ្លួនឲ្យឃើញ បន្ទាប់មកទើបរាយការណ៍សុំការសម្រេចពីថ្នាក់ជាតិ»។
កាលពីថ្ងៃទី២៥ ខែវិច្ឆិកា អ្នកនាំពាក្យក្រសួងមហាផ្ទៃ លោក ខៀវ សុភ័គ អំពាវនាវឲ្យជនជាតិចារ៉ាយ-វៀតណាម ដែលកំពុងលាក់ខ្លួនក្នុងព្រៃនៅតាមព្រំដែនកម្ពុជា-វៀតណាម ត្រូវបង្ហាញខ្លួនដល់អាជ្ញាធរខេត្តរតនគិរី ដើម្បីជៀសផុតពីការស្លាប់ដោយសារដាច់ស្បៀងអាហារ និងជំងឺតម្កាត់ផ្សេងៗ។ ជាមួយគ្នានោះ លោកអះអាងថានឹងបញ្ជូនក្រុមការងារចុះមកពិនិត្យ និងវាយតម្លៃពីស្ថានភាពជនភៀសខ្លួនទាំងនោះ។
ទាក់ទិនបញ្ហានេះដែរ ជនជាតិដើមភាគតិចខ្មែរដែលដឹងពីកន្លែងលាក់ខ្លួនរបស់ក្រុមម៉ុងតាញ៉ា សុំមិនឲ្យបញ្ចេញឈ្មោះអះអាងថា ក្រុមម៉ុងតាញ៉ា ១៣នាក់នោះ បានលាក់ខ្លួនជាពីរក្រុមផ្សេងគ្នា ហើយពួកគេនៅតែព្រួយបារម្ភពីសុវត្ថិភាព និងត្រូវការជំនួយសង្គ្រោះបន្ទាន់ពីមន្ត្រីឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ (UNHCR)។ ប្រជាពលរដ្ឋដដែលកត់សម្គាល់ថា «ពួកគេទទួលបានអាហារតិចតួចបំផុត ពីប្រជាពលរដ្ឋជនជាតិដើមខ្មែរអ្នកធ្វើចម្ការក្នុងព្រៃ ជាអ្នកផ្តល់ឲ្យ។ ការផ្តល់ស្បៀងអាហារមិនបានគ្រប់គ្រាន់ គឺមួយថ្ងៃហូបបានមួយពេល ចំណែកថ្ងៃខ្លះមិនមានអាហារបរិភោគ ដោយសារអ្នកផ្តល់អាហារមិនហ៊ានចូលទៅកន្លែងលាក់ខ្លួនពួកគេ ព្រោះសមត្ថកិច្ចមូលដ្ឋានដាក់កម្លាំងឃ្លាំមើល»។
វិទ្យុអាស៊ីសេរី នៅថ្ងៃទី២៦ ខែវិច្ឆិកា មិនទាន់អាចទាក់ទងមន្ត្រីឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ សុំអធិប្បាយបញ្ហានេះបាននៅឡើយ។
ទាក់ទិនករណីនេះដែរ ប្រភពព័ត៌មានមួយសុំមិនឲ្យបញ្ចេញឈ្មោះ ឲ្យដឹងថា មន្ត្រីការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា កំពុងខ្នះខ្នែងរកកិច្ចអន្តរាគមន៍ជួយសង្គ្រោះក្រុមម៉ុងតាញ៉ាទាំងនោះហើយ។
ក្រុមម៉ុងតាញ៉ា-វៀតណាម ១៣នាក់ បានភៀសខ្លួនពីខេត្តយ៉ាឡាយ ប្រទេសវៀតណាម មកសំងំលាក់ខ្លួនក្នុងព្រៃខេត្តរតនគិរី ជាងបីសប្ដាហ៍កន្លងមកហើយ ដើម្បីសុំសិទ្ធិជ្រកកោននៅប្រទេសកម្ពុជា ក្នុងហេតុផលថា ពួកគេរងការធ្វើទុក្ខបុកម្នេញពីសំណាក់អាជ្ញាធរវៀតណាម ដោយសារពួកគេប្រតិបត្តិសាសនាគ្រឹះ៕