ក្រុមកូដករណាហ្គាវើលដ៍បន្តធ្វើកូដកម្ម និងដាំបាយធ្វើម្ហូបមុខក្រុមហ៊ុន ដើម្បីរង់ចាំថៅកែចេញមុខដោះស្រាយ
2022.09.10
ក្រុមកូដករណាហ្គាវើលដ៍ប្រមាណរយនាក់(១០០) បន្តធ្វើកូដកម្មទាមទារដំណោះស្រាយវិវាទការងារ បើទោះបីជារងការគំរាមកំហែងបែបណាក្តី។ ស្ថានភាពតវ៉ានៅថ្ងៃទី១០ ខែកញ្ញា ចាប់ផ្តើមតាំងពីម៉ោង១០ព្រឹករហូតដល់ល្ងាច ដោយក្រុមកូដករ ក៏បានយកចានឆ្នាំ ដាំបាយធ្វើម្ហូប និងបរិភោគជុំគ្នានៅខាងមុខក្រុមហ៊ុនដែរ ដែលជាសកម្មភាពតស៊ូមតិដោយសន្តិវិធីក្នុងការជំរុញឲ្យក្រុមហ៊ុន ផ្តល់ដំណោះស្រាយជូនពួកគាត់។ ក្រៅពីនេះ ពួកគាត់ នាំគ្នាទូងស្គរ ផ្លុំត្រែ លើកបដា និងស្រែកតវ៉ាដោយហៅឈ្មោះថៅកែក្រុមហ៊ុនណាហ្គាវើលដ៍ លោក តាន់ ស្រ៊ី ឲ្យចេញមុខចរចាដោះស្រាយវិវាទការងារជាមួយពួកគាត់។
ទោះជាយ៉ាងណាមកទល់ពេលនេះ ថៅកែក្រុមហ៊ុន និងអាជ្ញាធរពាក់ព័ន្ធនៅតែរក្សាភាពស្ងៀមស្ងាត់ ប៉ុន្តែបានដាក់ពង្រាយកម្លាំងសន្តិសុខជាច្រើន និងបិទបារ៉ាស់នៅខាងមុខ ដើម្បីរារាំងកុំឲ្យក្រុមកូដករ ចូលខាងក្នុងក្រុមហ៊ុន។ អាជ្ញាធរ ក៏បានចុះទៅព្រមានឲ្យក្រុមកូដករឲ្យបញ្ឈប់ដាំស្លនៅខាងមុខក្រុមហ៊ុនដែរ បើពុំនោះទេ នឹងត្រូវរឹបអូសចានឆ្នាំង។
តំណាងកូដករម្នាក់ អ្នកនាង ម៉ម សុវឌ្ឍិន រៀបរាប់ទាំងទួញសោកថា ការព្រងើយកន្តើយរបស់ក្រុម ហ៊ុន និងអាជ្ញាធរពាក់ព័ទ្ធក្នុងការផ្តល់ដំណោះស្រាយជូនពួកគាត់ គឺជាការរំលោភសិទ្ធិរបស់ពួកគាត់ និងការជាន់ឈ្លីច្បាប់ការងារកម្ពុជា។ ទន្ទឹមគ្នានេះ អ្នកនាងរៀបរាប់ថា អាជ្ញាធរ និងជនស្លៀកពាក់ស៊ីវិល នៅតែបន្តគំរាមកំហែងរួបគាត់ និងកូដករដទៃទៀតពីការប៉ុនប៉ង់ធ្វើបាប និងការចាប់ខ្លួនជាដើម៖ «មិញនេះ ជនស៊ីវិល វាធាក់ ហើយថា ខ្ញុំនេះ ជិតត្រូវគេ ចាប់ខ្លួនហើយ។ ជនស៊ីវិលដែលតាមថតពួកខ្ញុំនោះថា ឲ្យត្រៀមខ្លួនទៅ ត្រៀមចិត្តទៅ។ ព្រឹកមិញនេះ ក៏មានក្រុមអាជ្ញាធរខណ្ឌចំការមន សំណូមពរឲ្យយើងនេះ អត់អាចដាំបាយនៅទីនេះទៀតទេ។គ្រាន់តែពួកខ្ញុំដាំបាយទាមទារដំណោះស្រាយ រង់ចាំថៅកែមកដោះស្រាយ ក៏អត់បានដែរ។ តាំងពីម្សិលមិញ ហើយថ្ងៃនេះទៀត ចង់រឹបអូសឆ្នាំងបាយពួកខ្ញុំ»។
ទាក់ទងនឹងវិវាទការងាររវាងបុគ្គលិក និងក្រុមហ៊ុនណាហ្គាវើលដ៍នេះដែរ ថ្នាក់ដឹកនាំសហជីព និងសមាគមដែលធ្វើការងារក្នុងវិស័យការងារសរុប ៤រយនាក់ (៤០០)នឹងជួបជុំនៅមុខក្រសួងការងារ នៅព្រឹកថ្ងៃទី១១ ខែកញ្ញា ដើម្បីស្នើសុំឲ្យដោះស្រាយបញ្ចប់វិវាទការងារនេះ ដោយទទួលយកថ្នាក់ដឹកនាំ និងសមាជិកសហជីពជាង១៥០នាក់ចូលធ្វើការងារជាមួយប្រាក់រំលឹកទូទាត់សំណងឲ្យបានត្រឹមត្រូវតាមច្បាប់ព្រមទាំងលុបចោលបទចោទប្រកាន់លើថ្នាក់ដឹកនាំនិងសកម្មជនសហជីពចំនួន១៥នាក់ផងដែរ។ ក្រៅពីនេះ ថ្នាក់ដឹកនាំសហជីព និងសមាគមទាំងនោះ ក៏ស្នើសុំឲ្យដោះស្រាយសំណុំរឿងថ្នាក់ដឹកនាំសហជីពចំនួន៣១ករណីផ្សេងទៀតដែលកើតឡើងនៅតាមស្ថាប័នផ្សេងៗ។
គិតមកទល់ពេល នេះ ក្រុមកូដករ បានធ្វើកូដកម្ម៩ខែហើយ ប៉ុន្តែពុំទទួលបានដំណោះស្រាយនោះទេ។ ផ្ទុយទៅវិញ អាជ្ញាធរ និងក្រុមហ៊ុន បានរួមគ្នាចោទប្រកាន់ និងចាប់ខ្លួនតំណាង ក្រុមកម្មករជាង១០នាក់ ដាក់ពន្ធនាគារ ហើយថែមទាំងប្រើហិង្សាឥតឈប់ឈរលើក្រុមកូដករភាគច្រើនជាស្ត្រីបណ្តាលឲ្យរបួសធ្ងន់ និងស្ត្រីម្នាក់រលូតកូនក្នុងផ្ទៃ។ ក្រុមកូដករ និងអ្នកឃ្លាំមើល ចាត់ទុកថា ទង្វើរបស់រដ្ឋាភិបាល និងក្រុមហ៊ុននេះ គឺជាការរំលោភសិទ្ធិស្ត្រីផ្ទុយពីគោលនយោបាយរដ្ឋាភិបាល។ លើសពីនេះ ពួកគាត់ យល់ឃើញថា រដ្ឋាភិបាល និងក្រុមហ៊ុន មានផលប្រយោជន៍រួមគ្នា ទើបខំការពារគ្នាទៅវិញទៅមកដោយមិនខ្វល់អំពីច្បាប់ការងារ និងទុក្ខលំបាករបស់កូដករដែលភាគច្រើនជាស្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។