មេប៉ូលិសពាក់ផ្កាយ៣ម្នាក់ រងការចោទប្រកាន់ថា បានទះកំផ្លៀងលើមន្ត្រីគណបក្សភ្លើងទៀន
2022.04.24
ប្រធានក្រុមការងារគណបក្សភ្លើងទៀននៅខេត្តត្បូងឃ្មុំ អះអាងថា មន្ត្រីប៉ូលិសជាន់ខ្ពស់ពាក់ផ្កាយ៣ម្នាក់បានទះកំផ្លៀងលោក ខណៈរូបលោកកំពុងបំពេញការងារនៅអង្គភាពក្រុមប្រឹក្សាអភិវឌ្ឍគ្រូនគរបាលជាតិ នៃបណ្ឌិត្យសភានគរបាលកម្ពុជា។ មន្ត្រីសង្គមស៊ីវិល ចាត់ករណីប្រើអំពើហិង្សានេះថា ជាបទល្មើសព្រហ្មទណ្ឌ និងស្នើដល់ស្ថាប័នមានសមត្ថកិច្ច ចាត់វិធានការលើជនដៃដល់នោះឱ្យមានប្រសិទ្ធភាព។
ប្រធានក្រុមការងារគណបក្សភ្លើងទៀននៅខេត្តត្បូងឃ្មុំ និងជាគ្រូបង្រៀន នៅអង្គភាពក្រុមប្រឹក្សាអភិវឌ្ឍគ្រូនគរបាលជាតិ នៃបណ្ឌិត្យសភានគរបាលកម្ពុជា លោក អេង ស្រូយ ត្រូវបានមេរបស់គាត់ គឺឧត្តមសេនីយ៍ឯក ប្រាក់ ណារ៉ុង ទះកំផ្លៀងមួយដៃក្នុងពេលកំពុងប្រជុំក្នុងអង្គភាពកាលពីថ្ងៃទី២២ ខែមេសា ដោយសាររឿងនិន្នាការនយោបាយ។
លោក អេង ស្រូយ រៀបរាប់ប្រាប់វិទ្យុអាស៊ីសេរីនៅថ្ងៃទី២៣ មេសាថា មេរបស់លោក គឺឧត្តមសេនីយ៍ឯក ប្រាក់ ណារ៉ុង និងជាប្រធានក្រុមប្រឹក្សាអភិវឌ្ឍគ្រូនគរបាលជាតិ នៃបណ្ឌិតសភានគរបាលកម្ពុជា បានកោះហៅលោកចូលប្រជុំក្រោយពីចប់កម្មវិធីវគ្គសិក្សាមួយនៅកន្លែងអង្គភាពកាលពីថ្ងៃទី២២ មេសា។
ក្រោយមកលោកថា ដើមចមដែលបណ្ដាលឱ្យកើតមានករណីប្រើហិង្សាលើលោក គឺដោយសារតែ លោក ប្រាក់ ណារ៉ុង បានហាមឃាត់រូបលោកមិនឱ្យថតរូបក្នុងកម្មវិធីវគ្គសិក្សានោះ ដោយចោទថាលោកបានយកម៉ោងការងារក្នុងស្ថាប័នរដ្ឋទៅបម្រើឱ្យគណបក្សនយោបាយផ្សេង៖ «ខ្ញុំបានប្រាប់ទៀតថា បើមានឯកសារភស្តុតាងរូបភាពណាដែលខ្ញុំយកម៉ោងរដ្ឋ ទៅបម្រើការងារគណបក្ស ចាត់វិធានការ និងដកក្របខណ្ឌខ្ញុំចោលចុះ។ ខ្ញុំស្នើសុំលោក ប្រាក់ ណារ៉ុង សុំនិយាយម្តង តែលោកប្រើភាសាច្រឡោងខាម ប្រើភាសាបែបមនុស្សព្រៃ គ្មានសមជាអ្នកអប់រំអីបន្តិច។ គាត់ចង្អុលមុខខ្ញុំ ថាលោកឯងគ្មានអំណាចទេ។ គាត់ថាខ្ញុំមានតួនាទីបក្សប៉ុន្មាន? ខ្ញុំជាមេលោកឯង។ រួចហើយស្ទុះមកទាំងកម្រោលទះកំផ្លៀងខ្ញុំមួយដៃ។ តែខ្ញុំអត់តបត»។
ប្រធានក្រុមការងារគណបក្សភ្លើងទៀនរូបនេះ ចាត់ទុកទង្វើរបស់មេប៉ូលិសផ្កាយ៣នេះជាមន្ត្រីអនុវត្តតួនាទីគ្មានវិជ្ជាជីវៈ និងបានប្រើអំណាចតួនាទី ដើម្បីគាបសង្កត់អ្នកដែលមាននិន្នាការនយោបាយផ្ទុយពីគណបក្សកាន់អំណាច។ លោកបញ្ជាក់ថា លោកមិនខ្លាចបាត់បង់តួនាទីជាមន្ត្រីនគរបាលនេះទេ ដោយសារតែយល់ថាទង្វើរបស់លោកធ្វើដោយស្របច្បាប់ និងមានការធានាដោយច្បាប់រដ្ឋធម្មនុញ្ញ៖ «ខ្ញុំស្នើដល់សម្ដេចក្រឡាហោ ស ខេង ចាត់វិធានការលើបុគ្គលនេះ។ បើទុកបុគ្គល ច្រឡោងខាម គ្មានវិជ្ជាជីវៈក្នុងខ្លួនបែបនេះថ្ងៃក្រោយនឹងមានគ្រោះថ្នាក់ដល់អ្នកដទៃ។ នេះគាត់ដៃទទេ បើគាត់មានកាំភ្លើងវិញ កំហឹងក្រេវក្រោធ ទាញកាំភ្លើងបាញ់គេស្លាប់គិតម៉េច? គាត់និយាយទៀត ថានឹងគំរាមខ្ញុំទៀត។ លោក ប្រាក់ ណារ៉ុង និយាយថាគាត់នៅក្នុងអង្គភាពស្លូតទេ បើនៅក្រៅកន្លែងធ្វើការខ្លាំងជាងនេះទៀត។ គាត់នឹងគំរាម គាបសង្កត់ខ្ញុំតទៅទៀតនៅក្នុងអង្គភាពហ្នឹង»។
លោក អេង ស្រូយ គឺជាមន្ត្រីនគរបាលមួយរូប និងជាគ្រូបង្រៀននៅក្រុមប្រឹក្សាអភិវឌ្ឍគ្រូនគរបាលជាតិនៃបណ្ឌិតនគរបាលកម្ពុជា។ លោក ឲ្យដឹងថា នៅថ្ងៃសម្រាកចុងសប្តាហ៍ពីការងារក្របខណ្ឌរដ្ឋ ឬចំថ្ងៃពីធីបុណ្យទាន លោកតែងចុះជួយធ្វើសកម្មភាពជាមួយគណបក្សភ្លើងទៀន ដើម្បីជំរុញឱ្យមានលទ្ធិប្រជាធិបតេយ្យពិតប្រាកដ។ ដោយសារតែលោកបានចុះចូលជាមួយគណបក្សភ្លើងទៀនបែបនេះហើយ ដែលធ្វើឱ្យមន្ត្រីថ្នាក់លើរបស់លោកខឹងសម្បារ និងគំរាមកំហែងជាបន្តបន្ទាប់ រហូតមានការទះកំផ្លៀងរូបលោកទាំងនៅកន្លែងអង្គភាព។
ទាក់ទងករណីនេះ ប្រធានក្រុមប្រឹក្សាអភិវឌ្ឍគ្រូនគរបាលជាតិ នៃបណ្ឌិតសភានគរបាលកម្ពុជា លោក ប្រាក់ ណារ៉ុង បដិសេធមិនធ្វើអត្ថាធិប្បាយទេ ដោយលោកចុចផ្តាច់ទូរស័ព្ទ នៅពេលវិទ្យុអាស៊ីសេរីសាកសួរអំពីរឿងនេះ។
លោក អេង ស្រូយ ថាលោកមិនទាន់ដាក់ពាក្យប្តឹងទៅកាន់ស្ថាប័នណាមួយនោះទេ ដោយលោកកំពុងពិចារណានៅឡើយ។ លោកបន្តថា មូលហេតុដែលលោកស្ទាក់ស្ទើរគឺដោយសារប្រព័ន្ធតុលាការខ្វះភាពឯករាជ្យ ក្នុងការជួយរកយុត្តិធម៌សម្រាប់អ្នកទន់ខ្សោយ។
ទាក់ទងបញ្ហានេះ វិទ្យុអាស៊ីសេរីមិនអាចទាក់ទង ប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បាននៅឡើយនៅថ្ងៃទី២៣មេសា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (LICADO) លោក អំ សំអាត មានប្រសាសន៍ថា ប្រជាពលរដ្ឋទាំងអស់មានសិទ្ធក្នុងការចូលរួមយ៉ាងសកម្មលើជីវភាព នយោបាយជាមួយគណបក្សណាមួយដែលខ្លួនពេញចិត្ត ដោយគ្មានការបង្ខំ៖ «មន្ត្រីរាជការទាំងអស់ ក៏ជាពលរដ្ឋលោកមានសិទ្ធចូលរួមជាមួយគណបក្សនយោបាយ និងគាំទ្រនយោបាយ។ គ្រាន់តែមិនអាចអនុញ្ញាតឱ្យយក ពេលវេលានៃការងាររបស់រដ្ឋហ្នឹង ទៅបម្រើរាល់គណបក្សនយោបាយ។ ជាពិសេស គណបក្សកាន់អំណាច យើងឃើញមានអ្នកគាំទ្រច្រើន ជាមន្ត្រីរាជការ រហូតកងកម្លាំងប្រដាប់អាវុធទាំងអស់ គាត់អាចចូលរួម និងគាំទ្របាន តែក្នុងក្របខណ្ឌមួយ មិនអាចយកពេលវេលា ឬម៉ោងក្របខណ្ឌរដ្ឋ បម្រើគណបក្សនយោបាយ»។
មន្ត្រីផ្នែកឃ្លាំមើលសិទ្ធិមនុស្សរូបនេះបន្ថែមថា ករណីប្រើអំពើហិង្សាគំរាមកំហែងលើលោក អេង ស្រូយ ដោយចេតនាបែបនេះ ក្រសួងមានសមត្ថកិច្ចត្រូវតែមានការចាត់វិធានការលើជនដៃដល់នោះដើម្បីយកមកផ្ដន្ទាទោសតាមច្បាប់។
ករណីលោក ប្រាក់ ណារ៉ុង ប្រើហិង្សាលើមន្ត្រីគណបក្សភ្លើងទៀននេះ គឺជាការអនុវត្តផ្ទុយពីការប្រកាសរបស់លោក ហ៊ុន សែន កាលពីថ្ងៃទី២០ ខែមេសា ដែលអំពាវនាវជាថ្មីដល់អាជ្ញាធរពាក់ព័ន្ធគ្រប់លំដាប់ថ្នាក់ ត្រូវបង្កបរិយាកាសនយោបាយល្អ ជៀសវាងការប្រើហិង្សាលើរាងកាយ និងពាក្យសម្តីព្រមទាំងត្រូវប្រកាន់ជំហរអព្យាក្រឹត្យ ដើម្បីធ្វើឲ្យដំណើរការបោះឆ្នោតក្រុមប្រឹក្សាឃុំ-សង្កាត់ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
ទោះបីជាយ៉ាងណា មកទល់ពេលនេះ មានសកម្មជនគណបក្សភ្លើងទៀនចំនួន ៦នាក់ហើយ ក្នុងនោះរួមទាំងសាច់ញាតិរបស់ពួកគេផង ត្រូវបានអាជ្ញាធររដ្ឋាភិបាលលោក ហ៊ុន សែន ចាប់ខ្លួនដាក់ពន្ធនាគារ ហើយសកម្មជនជិត ១០នាក់ទៀត ត្រូវតុលាការកោះហៅទៅបំភ្លឺពីបទញុះញង់ និងបទក្លែងឯកសារដាក់បេក្ខជនឈរឈ្មោះបោះឆ្នោត។ ទន្ទឹមនឹងនេះ អនុប្រធានប្រតិបត្តិគណបក្សភ្លើងទៀននៅខណ្ឌច្បារអំពៅ រាជធានីភ្នំពេញ លោក ជឿន សារឹម បានស្លាប់ដោយសារគ្រោះថ្នាក់ចរាចរណ៍ដោយគ្រួសារជនរងគ្រោះសង្ស័យថា ជាប់ពាក់ព័ន្ធរឿងនយោបាយ។
ក្រៅពីនេះសកម្មជន និងបេក្ខជនបក្សនេះជាច្រើននាក់ទៀត ត្រូវបានជនមិនស្គាល់មុខប៉ុនប៉ងធ្វើបាបដោយគប់ដុំថ្មចូលក្នុងផ្ទះ ការប្រើអំពើហិង្សា និងដេញធាក់ផ្ដួលម៉ូតូគំរាមកំហែង និងរារាំងបេក្ខជនបក្សភ្លើងទៀនគ្រប់រូបភាពដែរ។
ក្រុមអង្គការសង្គមស៊ីវិល និងអ្នកសង្កេតការណ៍បោះឆ្នោតវាយតម្លៃថា បើបរិយាកាសនយោបាយនៅតែស្ថិតក្នុងភាពអាប់អួបែបនេះ នឹងមិនអាចធានាថា ការបោះឆ្នោតនៅពេលខាងមុខ ប្រកបដោយសេរី ត្រឹមត្រូវ និងយុត្តិធម៌នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។