សកម្មជន​​សិទ្ធិ​មនុស្ស ស្នើ​ឲ្យ​អ្នក​​​រាយការណ៍​​​ពិសេស​​ជំរុញ​​រដ្ឋាភិបាល​ឲ្យ​​ស្ដារ​​សិទ្ធិ​មនុស្ស​និង​​លទ្ធិប្រជាធិបតេយ្យ

ដោយ ទីន ហ្សាការីយ៉ា
2022.01.12
Share on WhatsApp
Share on WhatsApp
សកម្មជន​​សិទ្ធិ​មនុស្ស ស្នើ​ឲ្យ​អ្នក​​​រាយការណ៍​​​ពិសេស​​ជំរុញ​​រដ្ឋាភិបាល​ឲ្យ​​ស្ដារ​​សិទ្ធិ​មនុស្ស​និង​​លទ្ធិប្រជាធិបតេយ្យ ក្រុមមន្ត្រីអង្គការសង្គមស៊ីវិល យុវជនបរិស្ថាន ជួបប្រជុំតាមអនឡាញ (Online) ជាមួយលោក​សាស្ត្រាចារ្យ វិទិត មុនតាប៊ន​ (Vitit Muntarbhorn)​ ​អ្នក​​​រាយការណ៍​​​ពិសេស​​នៃ​អង្គការ​សហប្រជាជាតិ ស្ដីពី​​ស្ថានភាព​​សិទ្ធិមនុស្ស​​នៅ​កម្ពុជាកាលពីថ្ងៃទី១២ ខែមករា ឆ្នាំ២០២២។
រូប៖ Tweetter OHCHR

សកម្មជន​​សិទ្ធិ​មនុស្ស ព្រំដែន យុវជន​សង្គម និង​បរិស្ថាន ស្នើ​ឲ្យ​អ្នក​​រាយការណ៍​​ពិសេស​​ស្ដីពី​​ស្ថានភាព​​សិទ្ធិមនុស្ស​​នៅ​កម្ពុជា នៅ​ក្នុង​អាណត្តិ​របស់​ខ្លួន ជំរុញ​ទៅ​រដ្ឋាភិបាល​​កម្ពុជាឲ្យ​ស្ដារ​សិទ្ធិ​មនុស្ស និង​លទ្ធិប្រជាធិបតេយ្យ​ឡើង​វិញ។

មន្ត្រី​អង្កេត​នៃ​សមាគម​ការពារ​សិទ្ធិ​មនុស្ស​អាដហុក​ (ADHOC) និង​​ជា​​អតីត​​អនុ​ប្រធាន​សមាគម​សម្ពន្ធ​និស្សិត​បញ្ញវន្ត​ខ្មែរលោក មាន ព្រហ្មមុនី បាន​ជួប​ជាមួយ​រាយការណ៍​​ពិសេស​​នៃ​អង្គការ​សហប្រជាជាតិ ស្ដីពី​​ស្ថានភាព​​សិទ្ធិមនុស្ស​​នៅ​កម្ពុជា លោក​សាស្ត្រាចារ្យ វិទិត មុនតាប៊ន​ (Vitit Muntarbhorn)​ តាម​​ប្រព័ន្ធ​​អន​ឡាញ​ ​(Online) កាល​​​ពី​​ពេល​​ថ្មីៗ​​នេះ។

លោក​ថ្លែង​នៅ​យប់​ទី​១២ ខែមករាថា បញ្ហា​ដែល​ពួកគាត់​បាន​លើក​ឡើង​ទៅ​អ្នក​រាយការណ៍​ពិសេស គឺ​ជា​កង្វល់​រួម​ទាក់ទង​និង​ការ​គោរព​សិទ្ធិ​មនុស្ស និង​លទ្ធិ​ប្រជាធិបតេយ្យ​ដែល​កំពុង​ធ្លាក់​ចុះ។ ជាង​នេះ​ទៅ​ទៀត ពួក​លោក​ក៏​ស្នើ​ឲ្យ​យក​ចិត្ត​ទុក​ដាក់ ចំពោះ​បទ​ចោទ​ដ៏​ពេញ​និយម គឺ​បទ​ញុះញង់ ដែល​អាជ្ញាធរ​តុលាការ​ប្រើប្រាស់​លើ​អ្នក​មាន​សំឡេង​ប្រឆាំង​រដ្ឋាភិបាល ដោយ​រង​ការ​គំរាមកំហែង និង​​ការ​ធ្វើ​ទុក្ខបុកម្នេញ បង្ក្រាប បំបិទ​សេរីភាព​ក្នុង​ការ​បញ្ចេញមតិ។ រីឯ​បញ្ហា ភាព​ចង្អៀត​ណែន​ក្នុង​ពន្ធនាគារ និង​សំណុំ​រឿង​កកស្ទះ ក៏​ត្រូវ​បាន​លើក​ឡើង ដោយ​ពួកគាត់​​ស្នើ​ឲ្យ​មន្ត្រី​អង្គការ​សហប្រជាជាតិ យក​ចិត្ត​ទុក​ដាក់​និង​ជំរុញ​ឲ្យ​រដ្ឋាភិបាល​កែលម្អរ​ហើយ​ទម្លាក់​ចោល​បទ​ចោទ​ប្រកាន់​ទាំង​ស្រុង​​ពី​ពួកគេ​តាម​ផ្លូវ​តុលាការ​ផង​ដែរ។

លោក មាន ព្រហ្មមុនី រំពឹង​ថា នេះ​ជា​ឱកាស​ល្អ និង​ជា​ក្ដី​សង្ឃឹម​មួយ ថា​អាច​នឹង​មាន​ដំណោះស្រាយ​ជា​វិជ្ជមាន៖ «គាត់​ថា​នឹង​ខិតខំ​ប្រឹងប្រែង​ជួយ​ស្ដារ​លទ្ធិប្រជាធិបតេយ្យ តែ​អាស្រ័យ​លើ​រដ្ឋាភិបាល​កម្ពុជា និង​ឆន្ទៈ​ស្ដារ​ប្រជាធិបតេយ្យ និង​ស្ដារ​សិទ្ធិ​មនុស្ស​ដែរ​ឬ​អត់តែ​គាត់​ខិតខំ​ប្រឹងប្រែង​ក្នុង​អាណត្តិ​ការងារ​របស់​គាត់ ហើយ​នឹង​ទាមទារ​ឲ្យ​ទម្លាក់​បទ​ចោទ​ប្រកាន់​ពី​យើង​ខ្ញុំ​ផង​ដែរ។ យើង​មាន​ក្ដី​សង្ឃឹម​ពី​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស គាត់​ធ្វើ​របាយការណ៍​ពី​ការ​រំលោភ​សិទ្ធិ​មនុស្ស​ហ្នឹង​ហើយជា​អង្គការ​មួយ​មាន​ក្រុម​ប្រឹក្សា​សិទ្ធិ​មនុស្ស​អាច​មាន​ឥទ្ធិពល​លើ​រដ្ឋ​នីមួយៗ​អាច​ដាក់​ទណ្ឌកម្ម ឬ​សម្ពាធ​លើ​រដ្ឋ​នីមួយៗ សំខាន់​ភាគី​រដ្ឋ​ត្រូវ​គោរព​តាម​គោលការណ៍​ច្បាប់​សិទ្ធិ​មនុស្ស​អន្តរជាតិ​និង​រដ្ឋធម្មនុញ្ញ​របស់​ប្រទេស​នីមួយៗ»

ការ​លើក​ឡើង​នេះ បន្ទាប់​ពីសកម្មជន​សិទ្ធិ​មនុស្ស ព្រំដែន យុវជន​សង្គម និង​បរិស្ថាន បាន​ជួប​ជាមួយ​អ្នក​​រាយការណ៍​​ពិសេស​​នៃ​អង្គការ​សហប្រជាជាតិ ស្ដីពី​​ស្ថានភាព​​សិទ្ធិមនុស្ស​​នៅ​កម្ពុជា លោក​សាស្ត្រាចារ្យ វិទិត មុនតាប៊ន​ (Vitit Muntarbhorn)​ ជា​បន្តបន្ទាប់​ចាប់​តាំង​ពី​ពាក់​កណ្ដាល​ខែ​ធ្នូ មក តាម​ប្រព័ន្ធ​អនឡាញ។

អ្នករាយការណ៍​ពិសេស​របស់​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​កម្ពុជា លោក​សាស្ត្រាចារ្យ វិទិត មុនតាប៊ន​ (Vitit Muntarbhorn) ​ធ្លាប់​បង្ហាញ​ក្ដី​បារម្ភ​​ក្នុង​​របាយការណ៍​របស់​ខ្លួន ក្នុង​កិច្ចប្រជុំ​អង្គការសហប្រជាជាតិ​ថា កម្ពុជា​កំពុង​តែ​ដើរ​ថយក្រោយ ដោយ​ងាក​ចេញ​ពី​ការ​គោរព​សិទ្ធិ​មនុស្ស​និង​គន្លង​ប្រជាធិបតេយ្យ។

ថ្មីៗ​នេះ ក្រុម​អ្នក​ជំនាញ​សិទ្ធិ​មនុស្ស​របស់​អង្គការ​សហ​ប្រជាជាតិ​ចំនួន ៣ រូប ក៏​បាន​អំពាវនាវ​ដល់​រដ្ឋាភិបាល​កម្ពុជា​ឱ្យ​បញ្ឈប់​ការ​ប្រើប្រាស់​ប្រព័ន្ធ​តុលាការ​ធ្វើ​ជា​ឧបករណ៍​ដើម្បី​ផ្ដន្ទាទោស​លើ​អ្នក​ហ៊ាន​និយាយ​អំពី​សិទ្ធិមនុស្ស​នៅ​កម្ពុជា​ផងដែរ។

ក្រុម​អ្នក​ជំនាញ រិះគន់​រដ្ឋាភិបាល​កម្ពុជា​យ៉ាង​ខ្លាំង​ជុំវិញ​ការ​ប្រើប្រាស់​ប្រព័ន្ធ​តុលាការ​ធ្វើ​ជា​មធ្យោបាយ​កាត់បន្ថយ​វិសាលភាព​នៃ​សកម្មភាព​របស់​ពលរដ្ឋ។ ក្រុម​អ្នក​ជំនាញ​សិទ្ធិ​មនុស្ស​ទាំងនេះ គូស​បញ្ជាក់​ថា ពួកគេ​ព្រួយបារម្ភ​ជា​ខ្លាំង និង​ភ្ញាក់ផ្អើល​ដែល​ថា រដ្ឋាភិបាល​កម្ពុជា​បាន​ប្រើប្រាស់​តុលាការ​ជា​មធ្យោបាយ​ជា​ថ្មី​ទៀត​ក្នុង​ការ​បំបិទ​សំឡេង​រិះគន់​របស់​អ្នក​ដែល​ហ៊ាន​និយាយ​រិះគន់ រួម​ទាំង​សកម្មភាព​អហិង្សា ដែល​ត្រូវ​បាន​ការពារ​ដោយ​សិទ្ធិ​សេរីភាព​នៃ​ការ​បញ្ចេញ​មតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
បទសម្ភាសន៍​ពលរដ្ឋ​ខ្មែរ​អាមេរិកកាំង​ដែល​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក​
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល