លោក វន់ ពៅ ស្នើឱ្យតុលាការផ្ដល់យុត្តិធម៌ ក្រោយពីរងការចោទប្រកាន់អស់រយៈពេល ១០ឆ្នាំ ពាក់ព័ន្ធបទ «ញុះញង់»
2024.08.29
(ឆ្វេង) លោក វន់ ពៅ ប្រធានសមាគមប្រជាធិបតេយ្យ នៃសេដ្ឋកិច្ចក្រៅប្រព័ន្ធ បង្ហាញដីការបស់នគរបាលនៅថ្ងៃទី១០ ខែមករា ឆ្នាំ២០២៣។
រូប៖ ពីពលរដ្ឋ
ប្រធានសមាគមប្រជាធិបតេយ្យ នៃសេដ្ឋកិច្ចក្រៅប្រព័ន្ធ ឬកាត់ហៅថា IDEA លោក វន់ ពៅ ស្នើដល់តុលាការឱ្យផ្ដល់យុត្តិធម៌ ក្រោយពីរងការចោទប្រកាន់អស់រយៈពេល ១០ឆ្នាំ ពាក់ព័ន្ធបទ «ញុះញង់»។ ការស្នើនេះ ធ្វើឡើងបន្ទាប់ពីលោក បានទទួលដីកាកោះហៅឱ្យចូលរួមសវនាការនៅតុលាការកំពូល នៅថ្ងៃទី២ ខែកញ្ញាខាងមុននេះ។
លោក វន់ ពៅ នៅតែមានសង្ឃឹមថា តុលាការនឹងសម្រេចឱ្យលោក គឺជាមនុស្សស្អាតស្អំ ពុំបានប្រព្រឹត្តបទល្មើស ដូចការចោទប្រកាន់របស់តុលាការនោះទេ។ លោកថា អស់រយៈពេលច្រើនឆ្នាំកន្លងមកនេះ គួរតែដល់ពេលតុលាការផ្ដល់យុត្តិធម៌ពិតប្រាកដដល់លោក ដែលបានលះបង់ទាំងកម្លាំងកាយ ចិត្ត ជួយដល់ប្រទេសជាតិ ជាពិសេស ការពារសិទ្ធិ អ្នករកស៊ីក្រៅប្រព័ន្ធឱ្យមានជីវភាពសមរម្យ។
ប្រធានសមាគមប្រជាធិបតេយ្យ នៃសេដ្ឋកិច្ចក្រៅប្រព័ន្ធ លោក វន់ ពៅ ប្រាប់វិទ្យុអាស៊ីសេរី នៅថ្ងៃទី២៩ ខែសីហាថា លោក ពុំរារែកក្នុងការចូលរួមសវនាការនៅថ្ងៃទី២ ខែកញ្ញា ខាងមុខនោះទេ ពាក់ព័ន្ធបទ ញុះញង់ ដើម្បីបំភ្លឺទៅដល់តុលាការថា លោកគឺជាមនុស្សស្អាតស្អំ។ លោកថា អស់រយៈពេលជាង ១០ឆ្នាំមកនេះ លោករស់នៅដោយការឈឺចាប់ជាមួយនឹងភាពអយុត្តិធម៌ម្ដងជាពីរដង។ ដូច្នេះ លោកសង្ឃឹមថា តុលាការ និងទម្លាក់ការចោទប្រកាន់ និងផ្ដល់សិទ្ធិសេរីភាពឱ្យលោកបានពេញលេញមកវិញ។
លោក វន់ ពៅ៖ «ខ្ញុំសំណូមពរឱ្យតុលាការទម្លាក់ចោលការចោទប្រកាន់ទាំងឡាយ ទាក់ទងនឹងសាលក្រមរបស់សាលាដំបូងរាជធានីភ្នំពេញ ដើម្បីផ្ដល់យុត្តិធម៌ឱ្យខ្ញុំទទួលបានយុត្តិធម៌ ដើម្បីឱ្យយើងមានស្មារតី មានអារម្មណ៍ល្អ ធ្វើកិច្ចការសម្រាប់សង្គម សម្រាប់ប្រទេសជាតិតទៅទៀត សម្រាប់ជួយដល់កម្មករ»។
តុលាការនឹងបើកសវនាការលើសំណុំរឿងរបស់លោក វន់ ពៅ និងអ្នកផ្សេងទៀត នៅដើមខែកញ្ញា ខាងមុខនេះ នៅក្នុងសំណុំរឿង«ញុះញង់»ជាង ១០ឆ្នាំមកហើយ ពាក់ព័ន្ធនឹងការធ្វើបាតុកម្មរបស់កម្មករ ដែលទាមទារដំឡើងប្រាក់ឈ្នួល ១៦០ដុល្លារ កាលពីឆ្នាំ២០១៤ ដែលកាលនោះលោកត្រូវបានទាហានឆត្រយោង ៩១១ វាយឱ្យរងរបួសធ្ងន់។ លោក វន់ ពៅ ចាត់ទុកការសម្រេចរបស់តុលាការកន្លងទៅនេះថា ជារឿងអយុត្តិធម៌មិនអាចទទួលយកបានឡើយ។
វិទ្យុអាស៊ីសេរីពុំអាចទាក់ទងអ្នកនាំពាក្យក្រសួងយុត្តិធម៌ លោក ជិន ម៉ាលីន និង អ្នកនាំពាក្យ សាលាដំបូងរាជធានីភ្នំពេញ លោក ឆាយ ហុង ដើម្បីឆ្លើយតបជុំវិញរឿងនេះបានទេ នៅថ្ងៃទី២៩ ខែសីហា។
នៅក្នុងសំណុំរឿង «ញុះញង់» នេះ អ្នកពាក់ព័ន្ធ ដែលត្រូវបានតុលាការចោទប្រកាន់មាន ប្រមាណ ២៥នាក់ ក្នុងនោះរួមមាន ប្រធានសមាគមសម្ព័ន្ធសហគមន៍កសិករកម្ពុជា (CCFC) លោក ថេង សាវឿន អតីតអ្នករងគ្រោះក្នុងតំបន់បឹងកក់ លោក ចាន់ ពុទ្ធិស័ក្ក និងលោក វន់ ពៅ ជាដើម។ តែយ៉ាងណាក្ដី នៅថ្ងៃសវនាការថ្ងៃទី២ ខែកញ្ញាខាងមុខនេះ គឺមានតែវត្តមានលោក វន់ ពៅ ម្នាក់ប៉ុណ្ណោះ ដែលនឹងចូលរួម ព្រោះអ្នកផ្សេងទៀត ពុំទទួលដីកាកោះហៅ ពីតុលាការនោះឡើយ។
ជុំវិញសវនាការនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មើលឃើញថា រឿងក្ដីក្ដាំនេះ បានអូបន្លាយពេលវេលាយូរឆ្នាំ ហើយលោករំពឹងតិចតូច សម្រាប់លោក និងមនុស្សមួយចំនួនទៀត ដែលនឹងទទួលបានយុត្តិធម៌ ព្រោះករណីនេះ ហាក់ដូចជារឿងនយោបាយច្រើនជាង។ ទោះជាបែបនេះក្ដី លោកស្នើឱ្យតុលាការជាន់ខ្ពស់មួយនេះ សម្រេចក្ដីប្រកបដោយតម្លាភាព ដើម្បីផ្ដល់យុត្តិធម៌ដល់អ្នកទាំងនោះ។
លោក នី សុខា៖ «ក្នុងការកាត់សេចក្ដីរបស់តុលាការឧទ្ធរណ៍ក្ដីសាលាកំពូលក្ដី ចំពោះករណីអីចឹងៗគឺថាកម្រឈ្នះក្ដីណាស់។ យើងនៅមិនទាន់មានជំនឿប៉ុន្មានទេ ចំពោះការសម្រេចក្ដីថា នឹងផ្ដល់បាននូវយុត្តិធម៌រហូតដល់លោក វន់ ពៅ អាចនឹងឈ្នះក្ដី។ ហើយអាចនឹងទទួលបានយុត្តិធម៌ពេញលេញត្រឡប់មកវិញនឹង តែយ៉ាងណាយើងរង់ចាំមើលបន្តទៀត»។
កាលពីថ្ងៃទី១៧ ខែកក្កដា ឆ្នាំ២០២៣ កន្លងទៅ តុលាការបានកោះហៅជនជាប់ចោទលោក វន់ ពៅ និងលោក ថេង សាវឿន ឱ្យចូលសវនាការម្ដងមកហើយ ដើម្បីជំនុំជម្រះពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តែយ៉ាងណា សវនាការ កាលនោះ ពុំមានអ្វីវិវត្តន៍នោះទេ ហើយបានអូសបន្លាយ ដល់ដើមខែកញ្ញា ឆ្នាំ២០២៤ នេះ ដែលនឹងធ្វើម្ដងទៀត។ លោក វន់ ពៅ សង្ឃឹមថា តុលាការកំពូលនឹងសម្រេចសេចក្ដីឈរលើគោលការណ៍យុត្តិធម៌ ដើម្បីផ្ដល់នូវគំរូភាពសម្រាប់មនុស្សជាតិជំនាន់ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ទូតអង់គ្លេស និងសហភាពអឺរ៉ុបបារម្ភពីការចាប់ខ្លួនអ្នកសារព័ត៌មាន លោក ម៉ិច ដារ៉ា