មេដឹកនាំសហជីពស្នើក្រសួងការងាររកយុត្តិធម៌ក្រោយពីថៅកែរោងចក្រ បូវឃើរ បញ្ឈប់ពីការងារ
2024.06.22
កម្មកររោចក្រ បូវឃើរ ហ្គាមេន ហ្វេកធើរី ខេមបូឌា (Bowker Garment Factory Cambodia Co.,LTD.) ដែលត្រូវថៅកែរោងចក្របញ្ឈប់ពីការងារ។
រូប៖ ផ្ដល់ឱ្យ
មេដឹកនាំសហជីពស្នើក្រសួងការងាររកយុត្តិធម៌ ក្រោយពីថៅកែរោងចក្រ បូវឃើរ ហ្គាមេន ហ្វេកធើរី ខេមបូឌា (Bowker Garment Factory Cambodia Co.,LTD.) បានបញ្ឈប់ពួកគាត់ពីការងារ ទាំងបំពាន់ច្បាប់។ ពួកគាត់ចាត់ទុកករណីបញ្ឈប់មេដឹកនាំ សហជីពនេះ គឺរំលោភសិទ្ធិសហជីព និងសិទ្ធិការងារដែលមានចែងនៅក្នុងច្បាប់។
មេដឹកនាំ សហជីពដែលធ្វើការនៅរោងចក្រកាត់ដេរសំលៀកបំពាក់ បូវឃើរ ហ្គាមេន ក្នុងកណ្ដាល បន្តរងការធ្វើទុក្ខបុកម្នេញ ពីសំណាក់ថៅកែក្រុមហ៊ុនចិន ក្រោយពីពួកគាត់ បាន បង្កើតសហជីពឯករាជ្យ ដើម្បីពារការផលប្រយោជន៍កម្មករ-កម្មការិនី។ ការអះអាងនេះ ធ្វើឡើងក្រោយពីមេដឹកនាំសហជីព២រូបហើយ ត្រូវបានបណ្ដេញពីការងារទាំងបំពានច្បាប់។
អនុប្រធានសហជីពមូលដ្ឋានប្រចាំរោងចក្រ បូវឃើរ ហ្គាមេន លោក ម៉ាប់ ប៊ុនណា ប្រាប់វិទ្យុអាស៊ីសេរី នៅថ្ងៃទី២១ ខែមិថុនាថា លោកត្រូវបានថៅកែក្រុមហ៊ុន បូវឃើរ ហ្គាមេន បញ្ឈប់ពីការងារជិត ៥ខែមកហើយ ដោយចោទលោកថា កេងផលប្រយោជន៍ក្រុមហ៊ុន។ លោក អះអាងថា ការចោទ ពីសំណាក់ថៅកែក្រុមហ៊ុននេះ ក្រោមហេតុផលថា លោកចូលធ្វើការងារយឺត។
លោក ម៉ាប់ ប៊ុនណា បានចាត់ទុកហេតុផលខាងលើនេះ គឺពុំសមហេតុផលទាល់តែសោះ។ លោកថា រឿងនេះជាប់ពាក់ព័ន្ធ ការរើសអើងសហជីពច្រើនជាង។ លោកទទូចឱ្យរដ្ឋាភិបាល ជាពិសេសក្រសួងការងារ ជួយស្វែងរកយុត្តិធម៌ដល់ពួកគាត់ បើពុំដូច្នោះទេ ក្រុមហ៊ុនមួយនេះ នៅតែបន្តរំលោភសិទ្ធិកម្មករជាបន្តបន្ទាប់។
លោក ម៉ាប់ ប៊ុនណា៖ «ក្រុមសហជីពពួកខ្ញុំកាលធ្វើការនៅក្នុងហ្នឹង គឺតែងតែបញ្ចេញសកម្មភាពតវ៉ា ឬស្នើច្រើនជាងគេ ទាំងកម្មវិធីបែបសប្បុរសធម៌ និងការទាមទារសុវត្ថិភាពសម្រាប់កម្មករ នៅក្នុងនោះមានសកម្មភាពច្រើនជាង។ ដូច្នេះរាល់សកម្មភាពពួកខ្ញុំតែងតែមានការឃ្លាំមើលជាពិសេស ខ្លាំងជាងគេបំផុត រាល់សកម្មភាព ឬរាល់ការធ្វើអ្វីមួយគឺមានគេតាមមើលគ្រប់វិនាទី»។
ការស្នើរបស់អនុប្រធានសហជីពមូលដ្ឋានរូបនេះ ស្របពេលដែល កាលថ្មីៗនេះ មានសមាជិកស្ថាបនិក សហជីពមូលដ្ឋាន ប្រចាំរោងចក្រ បូវឃើរ ហ្គាមេន ម្នាក់ទៀត គឺលោកស្រី សុខ ចាន់ថា ក៏ត្រូវបានបញ្ឈប់ពីការងារផងដែរ កាលពីថ្ងៃទី១៣ ខែមិថុនា កន្លងទៅ។ ការបញ្ឈប់លោកស្រីនេះ ដោយក្រុមហ៊ុន បានចោទលោកស្រីថា បានប្រព្រឹត្ត អំពើហិង្សានៅក្នុងកន្លែងការងារ។
ទោះយ៉ាងណា លោកស្រី សុខ ចាន់ថា ធ្លាប់វិទ្យុអាស៊ីសេរីថា ការបញ្ឈប់លោកស្រី ក្រោមហេតុផលបែបនេះគឺ ជារឿងមិនត្រឹមត្រូវ ហើយ គ្រាន់តែជាលេសប៉ុណ្ណោះ ខណៈដែលកម្មករម្នាក់ទៀត ដែលជាអ្នកបង្កហេតុបែរជាទុកឱ្យធ្វើការដដែល។
ជុំវិញរឿងនេះ អ្នកនាំពាក្យក្រសួងការងារ លោក កត្តា អ៊ន បាន ប្រាប់វិទ្យុអាស៊ីសេរី តាមបណ្ដាញសង្គមតេឡេក្រាម (Telegram) នៅថ្ងៃទី២១ ខែមិថុនា ថា ក្រសួងកំពុងពិនិត្យសម្របសម្រួល ដោះស្រាយតាមនីតិវិធី និងច្បាប់ការងារ។ លោកបន្តថា ករណីនេះប្រសិនបើរកឃើញថា ក្រុមហ៊ុនខុស តម្រូវឱ្យកម្មករចូលធ្វើការវិញ និងផ្ដល់អត្ថប្រយោជន៍ផ្សេងៗ។ ចំណែកករណី កម្មករខុស វិញ នឹងត្រូវរំលាយកិច្ចសន្យាការងារ។
រីឯក្រុមសហជីព ចង់ឃើញក្រសួងការងារ ចុះមកពិនិត្យឱ្យបានត្រឹមត្រូវ ដើម្បីស្វែងរកការពិត ផ្ដល់យុត្តិធម៌ជូនកម្មករ។ ពួកគាត់បារម្ភថា កន្លងទៅ ក្រសួងការងារ អសមត្ថភាព ក្នុងការប្រមូលព័ត៌មាន ឱ្យបានគ្រប់ជ្រុងជ្រោយ ជុំវិញការរំលោភបំពាន់សិទ្ធិកម្មករ ពីសំណាក់ និយោជក។ ជាក់ស្ដែង លោកអនុប្រធានសហជីពមូលដ្ឋាន លោក ម៉ាប់ ប៊ុនណា ក៏ត្រូវបានបញ្ឈប់ពីការងារក្រោយពី ក្រសួងបានចេញសេចក្ដីសម្រេច ឱ្យរំលាយកិច្ចសន្យាការងារ តាមសំណើរបស់ក្រុមហ៊ុន។
ទាក់ទិនរឿងនេះ ប្រធានសហព័ន្ធសហជីពសេរីឯករាជ្យ លោក សយ ចន្ធូ ដែលតាមដានករណីនេះ សង្កេតឃើញថា ករណីថៅកែរោងចក្រ បូវឃើរ ហ្គាមេន បានបញ្ឈប់មេដឹកនាំសហជីព២រូប កន្លងទៅនេះ គឺជារើសអើងសហជីព ឯករាជ្យព្រោះថា កន្លងទៅក្រុមហ៊ុននេះ តែងតែរំលោភសិទ្ធិកម្មករជាហូរហែ។
លោក សយ ចន្ធូ៖ «យើងដាក់ការសង្ស័យ យើងសួរថាប្រសិនគ្មានការរើសអើងសហជីព ហេតុអីបានជាសហជីពគេអត់បញ្ឈប់ ៗ តែពួកយើង។ នេះយើងចាត់ទុកថា គឺជាការរើសអើងពួកយើង។ ខ្ញុំស្នើសុំ ក្រសួងការងារ សូមមេត្តាជួយជំរុញករណីនេះ ហើយចាត់វិធានការ ផ្លូវច្បាប់ចំពោះក្រុមហ៊ុន ដែលមានការរើសអើងសហជីពសេរីឯករាជ្យពិតប្រាកដ»។
រោងចក្រកាត់ដេរសំលៀកបំពាក់ បូវឃើរ ហ្គាមេន មានទីតាំងស្ថិតនៅភូមិពងទឹក ឃុំបែកចាន ស្រុកអង្គស្នួល ខេត្តកណ្ដាល ហើយមានកម្មករធ្វើការសរុប ៤ពាន់ ២រយនាក់(៤.២០០)។
កាលពីថ្ងៃទី៤ ខែមិថុនា មជ្ឈមណ្ឌលសម្ពន្ធភាពការងារ និងសិទ្ធិមនុស្សហៅកាត់ថា «សង់ត្រាល់» បានចេញរបាយការណ៍ រកឃើញថា សេរីភាពរបស់សហជីពក្នុងប្រទេសកម្ពុជាកំពុងរងការគំរាមកំហែង និងរឹតត្បិតខ្លាំងពីសំណាក់និយោជក។ អង្គការនេះបន្តថា ក្នុងចំណោម សហជីពចំនួន១៤ មានសហជីពចំនួន ១០ រងការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឲ្យប៉ះពាល់ដល់ការបំពេញការងាររបស់ពួកគេ។ អង្គការសង់ត្រាល់ ទាមទារឱ្យគ្រប់ភាគីពាក់ព័ន្ធគួរតែពិនិត្យមើល និងដោះស្រាយកុំឱ្យមានការរំលោភសិទ្ធិសេរីភាពការងាររបស់ កម្មករនិយោជិក និងសហជីព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
