អ្នក​ស្រុក​នៅ​កំពត​បន្ត​ពុល​ថ្នាំ​បាញ់​ស្មៅ​របស់​ក្រុមហ៊ុន សូ ងួន

ថ្នាំ​ពុល​កសិកម្ម ថ្នាំ​សម្លាប់​ដើម​ព្រិច និង​ស្មៅ ក្នុង​ក្រុមហ៊ុន សូ ងួន វើល ទ្រីស្តា អិនធើធែនមែន ខេមបូឌា (World Tri-starts Entertainment Cambodia) បន្ត​ធ្វើ​ឲ្យ​អ្នក​ស្រុក​រស់​នៅ​ក្នុង​ឃុំ​ត្រពាំងភ្លាំង ស្រុក​ឈូក ខេត្ត​កំពត ពុល​ថែម​ទៀត។
ដោយ អ៊ុក សាវបូរី
2011.07.07
Share on WhatsApp
Share on WhatsApp

អនុ​ប្រធាន​មន្ទីរ​ពេទ្យ​បង្អែក​ឈូក លោក ផាត វីសាល មាន​ប្រសាសន៍​នៅ​ថ្ងៃ​ព្រហស្បតិ៍ ទី​៧ ខែ​កក្កដា ថា អ្នក​ពុល​ថ្នាំ​គីមី​នៅ​ភូមិ​ព្រៃពាយ ឃុំ​ត្រពាំងភ្លាំង នៅ​តែ​បន្ត​បញ្ជូន​មក​កាន់​មន្ទីរពេទ្យ​បន្តបន្ទាប់។

កាល​ពី​ថ្ងៃ​ពុធ ទី​៦ កក្កដា មន្ទីរពេទ្យ​បង្អែក​ឈូក ព្យាបាល​អ្នក​ពុល​ថ្នាំ​គីមី​ដែល​កម្មករ​ក្រុមហ៊ុន សូ ងួន ឈ្មោះ ​វើល ទ្រីស្តា អិនធើធែនមែន ខេមបូឌា បាញ់​ថ្នាំ​ពុល​បង្ក​ឲ្យ​មាន​អ្នក​ពុល​ថ្នាំ​នោះ​ចំនួន ៨៧​នាក់។ នៅ​ថ្ងៃ​ព្រហស្បតិ៍ អ្នក​ជំងឺ​រាគ ក្អួត បាន​បញ្ជូន​ពី​ភូមិ​ព្រៃពាយ មក​បន្ថែម​ទៀត សរុប ១២៧​នាក់ ភាគ​ច្រើន​ជា​មនុស្ស​ចាស់។

លោក ផាត វិសាល បន្ត​ថា ក្នុង​ចំណោម​អ្នក​ជំងឺ​សរុប ១២៧​នាក់ គ្មាន​កុមារ​ចូល​ថ្មី​ទេ។ កុមារ​អាយុ​ក្រោម ៥​ឆ្នាំ មាន​ចំនួន ៧​នាក់​ដដែល។ លោក​ឲ្យ​ដឹង​ថា គ្រូពេទ្យ​ដែល​បាន​ចូល​ទៅ​ដឹក​អ្នក​ជំងឺ​ពី​ភូមិ​ព្រៃពាយ យក​មក​មន្ទីរពេទ្យ ក៏​រង​នូវ​ការ​វិល​មុខ​ដោយសារ​ក្លិន​ថ្នាំ​ពុល​កសិកម្ម​នោះ​ដែរ ៖ «ប៉ុន្តែ​ជា​ទូទៅ​ថា ថ្នាំ​សម្លាប់​ស្មៅ​ប្រហែល​ជា​ប្រភេទ​អាអ៊ែប៊ីសីត​ហ្នឹង​ហើយ អា​ហ្នឹង​វា​ប៉ះពាល់​ដល់​ទឹក ដល់​បរិស្ថាន​នោះ​សម្បើម​ណាស់»

បុរស​វ័យ ២៥​ឆ្នាំ ឈ្មោះ ឆិល ផល្លា ឲ្យ​ដឹង​ថា គ្រួសារ​គាត់ ៥​នាក់ បាន​ពុល​ថ្នាំ​គីមី​ទាំង​អស់​គ្នា ក្នុង​នោះ​មាន​កូន​អាយុ ៩​ខែ​ផង​ដែរ។ ចំពោះ​គាត់​ឈឺ​ពោះ ចុក រាគ ព្រោះ​ពុល​ថ្នាំ​គីមី​ដែល​ក្រុមហ៊ុន សូ ងួន វើលទ្រីស្តា អិនធើធែនមែន ខេមបូឌា បាញ់​នោះ ជំងឺ​គាត់​មិន​ទាន់​បាន​ធូរ​ស្រាល​ទេ ៖ «ខ្ញុំ​មក​តាំង​ពី​ម្សិលមិញ (៦ កក្កដា) នៅ​ចុក​ពោះ​នៅ​ឡើយ នៅ​រាគ»

មេ​ឃុំ​ត្រពាំងភ្លាំង លោក សួស ភន ឲ្យ​ដឹង​ថា អ្នក​ភូមិ​ពុល​លឿន ព្រោះ​តែ​ដី​ក្រុមហ៊ុន​បាញ់​ថ្នាំ​គីមី​សម្លាប់​ដើម​ព្រិច និង​ស្មៅ​នោះ​នៅ​ជាប់​ភូមិ​ពលរដ្ឋ​កំពុង​រស់​នៅ។

អភិបាល​ស្រុក​ឈូក លោក ខឹម ហម មាន​ប្រសាសន៍​ថា លោក​កំពុង​ខ្នះខ្នែង​ជួយ​សង្គ្រោះ​ពលរដ្ឋ មិន​ទាន់​បាន​ស្រាវជ្រាវ​រក​មូលហេតុ​នៃ​ការ​ធ្វើ​ឲ្យ​អ្នក​ភូមិ​ព្រៃ​ពាយ ពុល​ជាង ១០០​នាក់​បាន​នៅ​ឡើយ​ទេ។ លោក​ថា ពលរដ្ឋ និង​អាជ្ញាធរ​មូលដ្ឋាន​សុទ្ធតែ​អះអាង​ថា ការ​ពុល​បង្ក​ពី​ក្រុមហ៊ុន សូ ងួន បាញ់​ថ្នាំ​គីមី​ពុល​ដើម្បី​ដាំ​ដំណាំ។

មន្ត្រី​ការពារ​សិទ្ធិ​មនុស្ស​អាដហុក អ្នកស្រី ទ្រី ឈូន ឲ្យ​ដឹង​ថា គាត់​បាន​ចុះ​អង្កេត​ផ្ទាល់​ឃើញ​ថា ដី​សម្បទាន​សេដ្ឋកិច្ច​របស់​ក្រុមហ៊ុន សូ ងួន វើល ទ្រីស្តា អិនធើធែនមែន ខេមបូឌា ស្ថិត​នៅ​ក្នុង​បរិវេណ​ដី​ភូមិ​ដែល​ប្រជាពលរដ្ឋ​រង​គ្រោះ​ពុល​ថ្នាំ​គីមី​កំពុង​រស់​នៅ​ក្បែរ​នោះ ហើយ​ដី​ក្រុមហ៊ុន សូ ងួន នោះ នៅ​ខាង​លើ​ភូមិ​តែម្ដង។ ក្រុមហ៊ុន​បាញ់​ថ្នាំ​ពុល​ពី​លើ​ទួល​ពេល​មាន​ភ្លៀង​ធ្វើ​ឲ្យ​សារធាតុ​ពុល​ហូរ​តាម​ទឹក​ចេញ​ពី​ដី​ក្រុមហ៊ុន​ធ្លាក់​មក​ប្រឡាយ​ធម្មជាតិ​ឈ្មោះ​ស្រែ​មាស ដែល​អ្នក​ស្រុក​មាន​តែ​ទឹក​មួយ​ជង្ហុក​នោះ​សម្រាប់​ប្រើ ទើប​ធ្វើ​ឲ្យ​ឥទ្ធិពល​នៃ​សារធាតុ​ពុល​បាន​បង្ក​ការ​ប៉ះពាល់​សុខភាព​អ្នក​ភូមិ​ព្រៃពាយ។

អ្នកស្រី លាក់ សារ៉េត អាយុ ២៨​ឆ្នាំ ឲ្យ​ដឹង​ថា ក្រោយ​ពី​ក្រុម​គ្រូពេទ្យ​បាន​ជួយ​សង្គ្រោះ​បន្ថយ​ជាតិ​ពុល​បាន ២​ថ្ងៃ ក្រុម​គ្រួសារ​គាត់ ៥​នាក់ ក្នុង​នោះ​មាន​កូន​ប្រុស​អាយុ ៤​ឆ្នាំ​ម្នាក់​ផង​បាន​ធូរ​ស្បើយ​ជំងឺ ហើយ​គាត់​ចង់​ត្រឡប់​ទៅ​ផ្ទះ​វិញ ៖ «ខ្ញុំ​គិត​ចង់​ទៅ​ផ្ទះ​ថ្ងៃ​ហ្នឹង ចង់​សុំ​ថ្នាំ​លេប​បន្ត»

ប្រធាន​ក្រុមហ៊ុន សូ ងួន វើល ទ្រីស្តា អិនធើធែនមែន ខេមបូឌា លោក​ឧកញ៉ា សូ ងួន មាន​ប្រសាសន៍​នៅ​ថ្ងៃ​ព្រហស្បតិ៍ ទី​៧ ខែ​កក្កដា ថា ថ្នាំ​ពុល​កសិកម្ម​ដែល​ក្រុមហ៊ុន​បាន​ប្រើ​បាញ់​សម្លាប់​ស្មៅ និង​ដើម​ព្រិច​នោះ គឺ​ដាក់​លក់​នៅ​ផ្សារ​អូរឫស្សី និង​ផ្សារ​ទួលទំពូង ជា​ផលិតផល​របស់​ប្រទេស​ថៃ និង​ប្រទេស​វៀតណាម។ កម្មករ​ក្រុមហ៊ុន​បាន​លាយ​ថ្នាំ​គីមី​ទៅ​តាម​បច្ចេកទេស​ណែនាំ​លើ​សំបក​ប៊ីដុង​ថ្នាំ ហើយ​បាញ់​លើ​ស្មៅ និង​ដើម​ព្រិច​រយៈពេល​បន្តបន្ទាប់ ២​ខែ លើ​ដី​ទំហំ ១០០​ហិកតារ។

លោក​បាន​យក​សំបក​ប៊ីដុង​ជ័រ​ដាក់​ថ្នាំ​ពុល​កសិកម្ម​ទៅ​ជូន​មន្ត្រី​កសិកម្ម​ខេត្ត​កំពត ដើម្បី​ពិសោធ​រក​សារធាតុ​ពុល​ជាមួយ​គ្នា​នោះ។ លោក​បាន​ជួយ​បង់​ថ្លៃ​ដឹក​ជញ្ជូន និង​ថ្លៃ​អាហារ​ដល់​អ្នក​ពុល​ថ្នាំ​ក្នុង​មន្ទីរពេទ្យ​ចំនួន ៤​ម៉ឺន​រៀល​ក្នុង​ម្នាក់ ៖ «១​ហិកតារ​គេ​មាន​រូបមន្ត​គេ​នៅ​ក្នុង​ប៊ីដុង​វា​ហ្នឹង គេ​ថា ក្នុង​ទឹក ២៥​លីត្រ ដាក់ ០,២៥ សេសេ ហើយ​គេ​មាន​កំប៉ុង​គេ​សម្រាប់​វាល់»

អនុ​ប្រធាន​មន្ទីរពេទ្យ​បង្អែក​ឈូក លោក ផាត វិសាល មាន​ប្រសាសន៍​ថា នៅ​រសៀល​ថ្ងៃ​ព្រហស្បតិ៍ មាន​អ្នក​ជំងឺ​ជិត ៨០​នាក់ បាន​សុំ​ត្រឡប់​ទៅ​ផ្ទះ​វិញ​បន្តបន្ទាប់ ក្រោយ​ពី​គ្រូពេទ្យ​បន្សាប​ជាតិ​ពុល​ពី​ពួក​គាត់​រួច។ លោក​ឲ្យ​ដឹង​ថា ថ្នាំ​គ្រប់​ប្រភេទ​ដែល​យក​មក​ព្យាបាល​សង្គ្រោះ​ពលរដ្ឋ ដោយសារ​ពុល​នូវ​សារធាតុ​គីមី បាន​ឧបត្ថម្ភ​ពី​មន្ទីរ​សុខាភិបាល​ប្រតិបត្តិ​ស្រុក។ រថយន្ត និង​សាំង​ចាក់​ដឹក​ជញ្ជូន​អ្នក​ជំងឺ គឺ​មន្ទីរពេទ្យ និង​អាជ្ញាធរ​ស្រុក ខេត្ត ចេញ​បណ្ដោះអាសន្ន។ អាហារ​សម្រាប់​អ្នក​ជំងឺ​ទទួល​ទាន​ប្រចាំ​ថ្ងៃ ត្រូវ​បាន​អង្គការ​មួយ​ចំនួន​បាន​យក​មក​ចែក​ជូន ឯ​ថវិកា ៤​ម៉ឺន​រៀល​បាន​ចែក​នៅ​ថ្ងៃ​នេះ​ជូន​អ្នក​ជំងឺ​ម្នាក់ៗ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
ក្រុម​មន្ត្រី​ជាន់ខ្ពស់​គណបក្ស​កាន់​អំណាច​ប្រតិកម្ម​នឹង​ពលរដ្ឋ​ខ្មែរ​រស់នៅ​ក្រៅ​ប្រទេស ជេរ​ប្រមាថ​លោក ហ៊ុន ម៉ាណែត តាម​បណ្ដាញ​សង្គម
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។