ទស្សនៈនានាជុំវិញការផ្តន្ទាទោសលោក នួន ជា និងលោក ខៀវ សំផន ឲ្យជាប់ពន្ធនាគារមួយជីវិតលើសំណុំរឿង ០០២ វគ្គ ២
2018.11.16
ពលរដ្ឋដែលធ្លាប់រងគ្រោះក្នុងរបបខ្មែរក្រហម រួមទាំងពលរដ្ឋកើតក្រោយរបបនេះយល់ឃើញផ្សេងៗ គ្នា ចំពោះការកាត់ទោសរបស់សាលាក្តីខ្មែរក្រហមដោយឲ្យអ្នកទាំងពីរជាប់គុកអស់មួយជីវិតលើសំណុំរឿង ០០២/០០២។
ពលរដ្ឋភាគច្រើនពេញចិត្ត ចំពោះការផ្តន្ទាទោសរបស់អង្គជំនុំជម្រះសាលាដំបូងនៃសាលាក្ដីខ្មែរក្រហមនៅពេលនេះ។ ពួកគេស្នើ ដល់មេដឹកនាំសព្វថ្ងៃ ឬមេដឹកនាំកម្ពុជាជំនាន់ក្រោយៗ កុំឲ្យយកជីវិតរបស់ពលរដ្ឋខ្លួនធ្វើជាល្បែងនយោបាយ។
ពលរដ្ឋកើតក្រោយរបបខ្មែរក្រហមម្នាក់ គឺលោក តារា វិឆ័យ ឲ្យអាស៊ីសេរីដឹងថ្ងៃទី១៦ ខែវិច្ចិកាថា ការសម្រេចក្តីរបស់តុលាការខ្មែរក្រហមឲ្យអ្នកទាំងពីរជាប់ពន្ធនាគារអស់មួយ ជីវិតនេះ គឺស័ក្កិសមនិងទង្វើដែលអ្នកទាំងពីរបានប្រព្រឹត្តក្នុងការដឹកនាំប្រទេសកន្លងមក។ លោកបន្តថា គឺជាសញ្ញាប្រាប់ទៅអ្នកដឹកនាំប្រទេសក្រោយទៀតឲ្យខ្លាចរអាមិនអាចហ៊ាន ដឹកនាំប្រទេសបែបផ្តាច់ការទៀត៖ «ខ្ញុំគិតថា កាត់ទោសមួយជីវិត គឺសមនឹងពួកគាត់ទទួលហើយ ព្រោះថា ការព្រឹត្តរបស់គាត់សាហាវយង់ឃ្នងសម្លាប់តែពលរដ្ឋខ្លួនឯង»។
ចំណែកពលរដ្ឋម្នាក់ទៀតលោកស្រី ឃុន សាវរ៉ាន សង្កេតឃើញថា លោក ខៀវ សំផន និងលោក នួន ជា តែងឆ្លើយបដិសេធក្នុងសវនការកន្លងមកថា ពួកគេមិនបានដឹង ឬមិនបានប្រព្រឹត្តក្នុងការសម្លាប់ពលរដ្ឋខ្មែរក្នុងរបបខ្លួនដឹកនាំនោះទេ។ ពលរដ្ឋរូបនេះនិយាយថា លោកស្រីជឿជាក់លើការអះអាងរបស់អតីតមេដឹកនាំទាំងពីរនេះ ដោយសង្ស័យថា មានបរទេសនៅពីក្រោយនៃការសម្លាប់រង្គាលនៅក្នុងរបបនេះ។ ដូច្នេះលោកស្រីយល់ថា ការសម្រេចរបស់តុលាការ ខ្មែរក្រហមនៅពេលនេះ គឺដូចជាធ្ងន់ធ្ងរពេកលើអ្នកទាំងពីរ៖ «តែការកាត់ទោសនេះដូចជាអយុត្តិធម៌ពេក។ តាមខ្ញុំដឹងរឿង យើងបានមើលសារព័ត៌មានហ្នឹងនៅតុលាការតាមដែលគាត់និយាយកន្លងមក គាត់មិនមែនជាជនក្បត់ជាតិទេ»។
រីឯអតីតជនរងគ្រោះនៅក្នុងគុកទួលស្លែងក្នុងរបបខ្មែរក្រហម លោក ជុំ ម៉ី ប្រាប់អាស៊ីសេរីថា លោកពេញចិត្តចំពោះការសម្រេចរបស់តុលាការ។ លោក ជុំ ម៉ី បន្តទៀតថា លោកមិនចង់បានសំណងអ្វីពីតុលាការនោះទេ ប៉ុន្តែលោកស្នើសុំទៅតុលាការឲ្យមានការសាងសង់ស្តូបគោរពវិញ្ញាណក្ខន្ធពលរដ្ឋខ្មែរ ដែលបានបាត់បង់ជីវិតព្រោះការសម្លាប់នៅក្នុងរបបនោះ នៅតាមបណ្តាខេត្តនានា របស់កម្ពុជា៖ «ធ្វើនៅតាមបណ្តាខេត្តទៅនៅពេលចូលឆ្នាំ ឬភ្ជុំអីហ្នឹងទៅ ពលរដ្ឋអាចទៅបង្សុកូលនៅកន្លែងស្តូបគោរព្ធវិញ្ញាណក្ខន្ធបាន»។
ប្រធានកម្មវិធីដីធ្លីនិងធនធានធម្មជាតិ និងជាអតីតប្រធានកម្មវិធីតុលាការខ្មែរក្រហមរបស់សមាគមអាដហុក (ADHOC) លោក ឡាត់ គី យល់ថា នេះជាផ្នែកមួយនៃការផ្តល់យុត្តិធម៌ដល់ប្រជាពលរដ្ឋខ្មែរ។ លោកយល់ថា ទោះដំណើរកាត់ក្តីនេះប្រើរយៈពេលវែងពេកក្តី ប៉ុន្តែ លោកចង់ឲ្យតុលាការក្នុងស្រុកគួរយកតុលាការខ្មែរក្រហមធ្វើជាគំរូក្នុងការផ្តល់យុត្តិធម៌ដល់ជនរងគ្រោះ ជនសង្ស័យ និងឧក្រិដ្ឋជននានា៖ «ជាផ្នែកមួយដែលផ្តល់យុត្តិធម៌ដល់ជនរងគ្រោះ ក៏ដើមបណ្តឹងរដ្ឋប្បវេណីដែលគាត់បានចូលចំណាយពេលក្នុងការតាមដានក្នុងសាលាក្តីនេះ»។
អ្នកប្រើប្រាស់បណ្តាញសង្គមហ្វេសប៊ុកខ្លះក៏បានបញ្ចេញមតិលើសំណុំរឿងនេះ ដោយអ្នកខ្លះងឿងឆ្ងល់ថា តើលោក នួន ជា និងលោក ខៀវ សំផន ត្រូវជាប់ពន្ធនាគារពីរជីវិតមែនទេ ព្រោះអ្នកទាំងពីរធ្លាប់ត្រូវតុលាការសម្រេចឲ្យជាប់ពន្ធនាគារអស់មួយជីវិតម្តងរួចមកហើយ? ប៉ុន្តែលោកមេធាវី កើត ធី ពន្យល់ថា សាលាដំបូង នៃអង្គជំនុំជម្រះវិសាមញ្ញក្នុងតុលាការកម្ពុជាបានបើកសវនាការប្រកាសសាលក្រមនៃសំណុំរឿង ០០២/០២ ដោយសម្រេចផ្តន្ទាទោសអស់មួយជីវិត តែទោសនេះអនុវត្តតែមួយប៉ុណ្ណោះ ពោលទោសអស់មួយជីវិតលើលោក នួន ជា និងលោក ខៀវ សំផន នៃសំណុំរឿង ០០២/០១ (គោលការណ៍ស្រូបទោស) អត់មានន័យថា ដាក់ទោសអស់មួយជីវិតពីរដងនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។