សាលាក្ដីខ្មែរក្រហមបដិសេធសំណើសុំកោះហៅលោក ហ៊ុន សែន ធ្វើជាសាក្សី
2015.12.24
ជនជាប់ចោទ ខៀវ សំផន (ពីឆ្វេងទី២) និងជនជាប់ចោទ នួន ជា (ពីឆ្វេងទី៥) ក្នុងសវនាការនៃអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៧ ខែសីហា ឆ្នាំ២០១៥។
ប្រធានអង្គជំនុំជម្រះសាលាដំបូងនៃសាលាក្ដីខ្មែរក្រហម លោក និល ណុន បានសម្រេចសង្ខេបមួយ បដិសេធចោលសំណើកោះហៅលោកនាយករដ្ឋមន្ត្រី ហ៊ុន សែន មកធ្វើជាសាក្សី ក្នុងសំណុំរឿង០០២ វគ្គ០២ ដែលធ្វើដោយជនជាប់ចោទ លោក នួន ជា។
សេចក្ដីសម្រេចរបស់ លោក និល ណុន ដែលចុះថ្ងៃទី១៨ ខែធ្នូ បញ្ជាក់ថា ជនជាប់ចោទ នួន ជា បានស្នើសុំឲ្យពន្លឿនកោះហៅសាក្សីពីររូប និងកោះហៅសាក្សីបន្ថែមនៅក្នុងអំឡុងពេលកិច្ចដំណើរការនីតិវិធីក្នុងសំណុំរឿង០០២ វគ្គ០២ ដែលពាក់ព័ន្ធនឹងការប្រព្រឹត្តចំពោះជនជាតិចាម។
ក្នុងសំណើនោះបញ្ជាក់ថា សាក្សីបន្ថែមនោះ រួមមាន លោក ហ៊ុន សែន ឈ្មោះ សូ សីម៉ិច និងឈ្មោះ កា ដេវ។
សេចក្ដីសម្រេចដដែលនោះបង្ហាញថា សហព្រះរាជអាជ្ញាជាតិក៏ជំទាស់ទៅនឹងការកោះហៅសាក្សី លោក ហ៊ុន សែន ដែរ។ ផ្ទុយទៅវិញ សហព្រះរាជអាជ្ញាអន្តរជាតិ មិនបានជំទាស់ទៅនឹងការកោះហៅសាក្សីទាំងនេះទេ។
ចៅក្រម និល ណុន បញ្ជាក់ថា ករណីនេះ សាលាដំបូងនឹងចេញសេចក្ដីសម្រេចដែលមានសំអាងហេតុពេញលេញ នឹងចេញនៅពេលសមស្របខាងមុខ។
សំណុំរឿង០០២ វគ្គ០២ មានជនជាប់ចោទដែលជាមេដឹកនាំជាន់ខ្ពស់នៃរបបខ្មែរក្រហមចំនួន ២នាក់ គឺលោក នួន ជា និងលោក ខៀវ សំផន។ សំណុំរឿងនេះ ផ្ដោតទៅលើអំពើប្រល័យពូជសាសន៍ ប្រឆាំងនឹងជនជាតិចាម និងជនជាតិវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ