អ្នក​សិក្សា​​រឿងរ៉ាវ​ខ្មែរ​ក្រហម​ថា​ចម្លើយ​សារភាព​របស់​អ្នក​ទោស​វៀតណាម​មិន​មែន​ជា​ចម្លើយ​ពិត

ដោយ ឡេង ម៉ាលី
2016-12-23
Share
ជុំ ម៉ាប់ ៨៥៥ អ្នក​សិក្សា​អំពី​រឿងរ៉ាវ​ខ្មែរ​ក្រហម លោក ជុំ ម៉ាប់ ថ្លែង​ក្នុង​កម្មវិធី​បាឋកថា​សាធារណៈ​នៅ​សារមន្ទីរ​ទួលស្លែង កាល​ពី​ថ្ងៃ​ទី​២៣ ខែ​ធ្នូ ឆ្នាំ​២០១៦។ RFA/Leng Maly
RFA/Leng Maly

អ្នក​សិក្សា​អំពី​រឿងរ៉ាវ​ខ្មែរ​ក្រហម​និយាយ​ថា ចម្លើយ​សារភាព​របស់​អ្នកទោស​វៀតណាម មិន​មែន​ជា​ចម្លើយ​បញ្ជាក់​ពី​ការ​ពិត​ទេ។ ការ​អះអាង​នេះ គឺ​ធ្វើ​ឡើង​ក្នុង​កម្មវិធី​បាឋកថា​សាធារណៈ​របស់​អ្នក​វិភាគ​ឯកសារ​នៃ​មជ្ឈមណ្ឌល​សោតទស្សន៍​បុប្ផាណា គឺ​លោក ជុំ ម៉ាប់ នៅ​សារមន្ទីរ​ទួលស្លែង កាល​ពី​រសៀល​ថ្ងៃ​ទី​២៣ ខែ​ធ្នូ។

លោក ជុំ ម៉ាប់ មាន​ប្រសាសន៍​ថា ការ​អះអាង​របស់​លោក គឺ​ផ្អែក​លើ​សក្ខីកម្ម​របស់​ទណ្ឌិត កាំង ហ្កេកអ៊ាវ ហៅ ឌុច អតីត​ប្រធាន​គុក​ទួលស្លែង នៅ​សាលាក្ដី​ខ្មែរក្រហម កាល​ពី​ក្នុង​សំណុំរឿង​០០១។ លោក​ថា សក្ខីកម្ម​របស់ ឌុច បញ្ជាក់​ថា ការ​សួរ​ចម្លើយ​អ្នក​ទោស​វៀតណាម នៅ​គុក​ទួលស្លែង គឺ​ធ្វើ​តាម​ការ​ចង់​បាន​របស់​ថ្នាក់​លើ៖ «រាល់​ចម្លើយ​សារភាព​ទាំង​អស់ គឺ ឌុច ជា​អ្នក​បាន​ប្រាប់​ទៅ​ដល់​អ្នក​សួរ​ចម្លើយ​ថា ត្រូវ​ធ្វើ​យ៉ាង​ណា ឲ្យ​ដូច​នឹង​អ្វី​ដែល​ថ្នាក់​លើ​ចង់​បាន។ ចំណុច​នេះ​គឺ​បាន​ន័យ​ថា គំនិត​ដែល​ថ្នាក់​លើ​ចង់​បាន​នោះ គឺ​មិន​មែន​ជា​គំនិត​របស់​ជនជាតិ​វៀតណាម ផ្ទាល់​នោះ​ទេ ដោយសារ​ការ​ធ្វើ​ទារុណកម្ម​ដើម្បី​បាន​ចម្លើយ​សារភាព​ដូច​អ្វី​ដែល​ថ្នាក់​លើ​របស់​គេ​ចង់​បាន។ ចំណុច​ដែល​ថ្នាក់​លើ​ចង់​បាន គឺ​ចង់​បាន​ឲ្យ​អ្នក​ទោស​ទាំង​នោះ​ឆ្លើយ​ថា ប្រទេស​វៀតណាម គឺ​ជា​ប្រទេស​មួយ​អត់​ឃ្លាន អត់​មាន​អី​ហូប ហើយ​កងទ័ព​វៀតណាម ទាំង​នោះ ឬ​ក៏​ប្រជាជន​ដែល​ខ្មែរ​ក្រហម​ចាប់​បាន​ទាំង​នោះ គឺ​ត្រូវ​បាន​រដ្ឋាភិបាល​បង្ខំ​ឲ្យ​ចូល​មក​ដើម្បី​ស៊ើបអង្កេត ឬ​ក៏​ប្រឆាំង​ទៅ​នឹង​ខ្មែរ​ក្រហម»

លោក ជុំ ម៉ាប់ បញ្ជាក់​ថា គោលបំណង​ដែល​លោក​ធ្វើ​បាឋកថា​អំពី​បញ្ហា​នេះ គឺ​លោក​ចង់​ឲ្យ​យុវជន​បាន​យល់​ដឹង​ថា នៅ​គុក​ទួលស្លែង ដែល​ខ្មែរ​ក្រហម​ហៅ​ថា មន្ទីរ​សន្តិសុខ​ស-២១ ក៏​មាន​ជនជាតិ​វៀតណាម ស្លាប់​នៅ​ទី​នេះ​ដែរ។ លោក​ក៏​ចង់​ឲ្យ​មាន​ការ​ផ្សះផ្សា​នៅ​ក្នុង​ចំណោម​យុវជន ចំពោះ​វៀតណាម ព្រោះ​យុវជន​ខ្លះ​មាន​ប្រតិកម្ម​ខ្លាំង​នៅ​ពេល​មាន​ជនជាតិ​វៀតណាម មក​អុជ​ធូប​រំឭក​ដល់​សាច់ញាតិ ឬ​ជាតិ​សាសន៍​របស់​ខ្លួន​ដែល​បាន​ស្លាប់​នៅ​ក្នុង​ប្រទេស​កម្ពុជា។ អ្នក​មក​ចូលរួម​ក្នុង​បាឋកថា​សាធារណៈ​នៅ​ថ្ងៃ​ទី​២៣ ខែ​ធ្នូ គឺ​ជា​សិស្ស​សាលា​ប្រមាណ ៥០​នាក់។

ទន្ទឹម​គ្នា​នេះ អនុ​ប្រធាន​ការិយាល័យ​នៃ​សារមន្ទីរ​ឧក្រិដ្ឋកម្ម​ប្រល័យ​ពូជសាសន៍​ទួលស្លែង លោក ជ័យ ភារម្យ ថ្លែង​ថា បាឋកថា​សាធារណៈ​នេះ គឺ​ជា​កម្មវិធី​ចុង​ក្រោយ​ក្នុង​គម្រោង​ដែល​សារមន្ទីរ​រៀបចំ​ប្រាំ​លើក​ក្នុង​ឆ្នាំ​២០១៦។ លោក​ថា កម្មវិធី​បាឋកថា​សាធារណៈ គឺ​ទាក់ទង​នឹង​រឿងរ៉ាវ​កាល​ពី​ក្នុង​របប​ខ្មែរ​ក្រហម​ដែល​អ្នក​ជំនាញ​ស្រាវជ្រាវ​រក​ឃើញ៖ «ភាគ​ច្រើន​ទាក់ទង​ទៅ​នឹង​សារមន្ទីរ​ទួលស្លែង ដូច​ជា​លើក​ទី​មួយ ខ្ញុំ​នៅ​ចាំ និយាយ​ពី​ការ​ថែ​រក្សា​ឯកសារ​នៅ​សារមន្ទីរ​ទួលស្លែង។ ក្រោយ​មក​ទៀត និយាយ​អំពី​បរិវេណ​មន្ទីរ ស-២១ និង​មួយ​ទៀត​ដែល​ខ្ញុំ​ចាំ គឺ​អ្នក​ទោស​ជនជាតិ​វៀតណាម​ហ្នឹង។ ទាំង​អស់​វា​មាន​ប្រាំ ប៉ុន្តែ​សាច់​រឿង​គឺ​ទាក់ទង​ជា​មួយ​នឹង​ទួល​ស្លែង​ភាគ​ច្រើន។ ឆ្នាំ​ក្រោយ​យើង​នឹង​បន្ត​កម្មវិធី​ហ្នឹង​ទៀត យើង​នឹង​ស្វែង​រក​វាគ្មិន​ផ្សេងៗ​ទៀត ដើម្បី​យក​មក​ធ្វើ​បទ​បង្ហាញ​ប្រធាន​បទ​ថ្មីៗ ទៀត ដែល​ទាក់ទង​នឹង​សារមន្ទីរ​ទួលស្លែង ហ្នឹង»

លោក​ឲ្យ​ដឹង​ថា អ្នក​ចូលរួម​ក្នុង​បាឋកថា​សាធារណៈ​​អំពី​រឿងរ៉ាវ​ខ្មែរ​ក្រហម កន្លង​មក មាន​សមាជិក​អង្គការ​ដៃគូ​សហការ​អង្គការ​យុវ​សន្តិភាព អង្គការ​ក្ដី​ករុណា និង​មជ្ឈមណ្ឌល​សោតទស្សន៍​បុប្ផាណា ជា​ដើម ដែល​ជា​អង្គការ​ធ្វើ​ការ​ពាក់ព័ន្ធ​នឹង​រឿងរ៉ាវ​ក្នុង​របប​ខ្មែរក្រហម​នោះ។

ក្នុង​បាឋកថា​សាធារណៈ លោក ជុំ ម៉ាប់ ធ្វើ​សេចក្ដី​សន្និដ្ឋាន​ថា ជនជាតិ​វៀតណាម ដែល​ពួក​ខ្មែរ​ក្រហម ចាប់​យក​មក​គុក​ទួលស្លែង មាន ៣​ប្រភេទ គឺ​មាន​ទាហាន ចារកម្ម និង​ជន​ស៊ីវិល ដែល​គេ​ចោទ​ថា ជា​ខ្សែរយៈ​វៀតណាម ទាំង​នោះ។ លោក​ថា ពេល​ដែល​អ្នក​សួរ​ចម្លើយ​របស់​ខ្មែរ​ក្រហម ធ្វើ​តាម​ការ​ចង់​បាន​របស់​ថ្នាក់​លើ ពួក​គេ​បាន​កែច្នៃ​ការ​ចងចាំ​អតីតកាល​របស់​ជន​រងគ្រោះ​ទៅ​ជា​សកម្មភាព​ក្បត់ ឲ្យ​ងាយ​ស្រួល​សម្រាប់​ចោទ​ប្រកាន់។ ចម្លើយ​សារភាព​របស់​ជនជាតិ​វៀតណាម ទាំង​នោះ មិន​បាន​បញ្ជាក់​ពី​កំហុស​ជាក់ស្ដែង​ទេ គឺ​បង្ហាញ​ពី​ទស្សនៈ​របស់​ខ្មែរ​ក្រហម​ទៅ​លើ​វៀតណាម ដែល​ខ្មែរ​ក្រហម​យល់​ថា វៀតណាម អាច​ធ្វើ​ឲ្យ​គ្រោះថ្នាក់​ដល់​របប​របស់​ខ្លួន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល