សាលាក្ដីខ្មែរក្រហមបន្តសវនាការស្ដីពីការសម្លាប់ជនជាតិវៀតណាមនៅខេត្តព្រៃវែង
2016.01.25
អង្គជំនុំជម្រះសាលាដំបូងនៃសាលាក្ដីខ្មែរក្រហម រហូតមកដល់ពេលនេះ នៅបន្តសវនាការស្ដាប់សាក្សី និងដើមបណ្ដឹងរដ្ឋប្បវេណី អំពីការប្រព្រឹត្តចំពោះជនជាតិវៀតណាម នៅក្នុងរបបកម្ពុជា ប្រជាធិបតេយ្យ ជាពិសេស ការចាប់ជនជាតិវៀតណាម នៅខេត្តព្រៃវែង ហើយបាត់ខ្លួនរហូត។
ដើមបណ្ដឹងរដ្ឋប្បវេណីវ័យ ៧៥ឆ្នាំ ឈ្មោះ ដូង អឿន ថ្លែងចំពោះមុខអង្គជំនុំជម្រះសាលាដំបូង នៅថ្ងៃទី២៥ មករា ថា លោកស្រីទទួលរងការឈឺចាប់រហូតមកដល់សព្វថ្ងៃដោយសារតែពួកខ្មែរក្រហមធ្វើបាបទាំងផ្លូវកាយ និងផ្លូវចិត្ត។
ការថ្លែងទុក្ខសោករបស់លោកស្រី ដូង អឿន គឺធ្វើនៅបន្ទាប់ពីលោកស្រីបញ្ចប់សក្ខីកម្មរបស់ខ្លួននៅពេលរសៀល៖ «ប្រើខ្ញុំនេះប្រើគ្មានទំនេរទេ។ គ្មានបាននៅស្រុកនៅភូមិនឹងគេទេ។ ដើរតែជីកព្រែក ជីកដី ដកស្ទូងមិនដែលទំនេរទេ។ ខ្ញុំឈឺចិត្តឆ្អែតត្រង់ហ្នឹងណាស់ ព្រោះប្ដី កូនខ្ញុំបាត់អស់រលីងហើយ។ ខ្ញុំឈឺចាប់! ខ្ញុំដេកទៅនឹកឃើញប្ដី កូន សព្វបែបសព្វយ៉ាង ណាមួយទៀតអត់ពីប្ដីទៅវេទនានៅម្នាក់ឯង រកស៊ីចិញ្ចឹមកូន។ បើថាមានទៅ ឯងក្រទៀត»។
សក្ខីកម្មរបស់លោកស្រី ដូង អឿន គឺទាក់ទងនឹងការចាប់បោសសម្អាតជនជាតិវៀតណាម នៅភូមិពោធិ៍ចិន្ដាំ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ចន្លោះពីឆ្នាំ១៩៧៥ ដល់ឆ្នាំ១៩៧៩។ លោកស្រីឱ្យដឹងថា ប្ដីរបស់លោកស្រីឈ្មោះ ទេព យន់ ហៅ ជុយ ដែលជាជនជាតិវៀតណាម ត្រូវបានពួកខ្មែរក្រហមចាប់យកទៅ នៅឆ្នាំ១៩៧៧ ហើយបាត់ដំណឹងរហូតមកដល់សព្វថ្ងៃនេះ។
សក្ខីកម្មរបស់ដើមបណ្ដឹងរដ្ឋប្បវេណី ដូង អឿន អំពីប្ដីលោកស្រី គឺជាសក្ខីកម្មបន្ថែមលើសាក្សីមុនៗ ទាក់ទងនឹងការប្រព្រឹត្តចំពោះជនជាតិវៀតណាម រៀបការជាមួយខ្មែរ ៤គ្រួសារនៅស្រុកស្វាយអន្ទរ ក្នុងខេត្តព្រៃវែង។ សាក្សីជាច្រើននាក់សុទ្ធតែអះអាងដូចគ្នាថា ពួកខ្មែរក្រហមមានគោលនយោបាយសម្លាប់ផ្ដាច់ពូជជនជាតិវៀតណាម ដែលរស់នៅលើទឹកដីកម្ពុជា។ អាជ្ញាធរខ្មែរក្រហមបានប្រមូលយកទាំងកូន ប្រសិនបើមានម្ដាយជាជនជាតិវៀតណាម។ បើឪពុកជាជនជាតិវៀតណាម គឺគេទុកកូនឱ្យនៅរស់ជាមួយម្ដាយជាខ្មែរ ដូចជាករណីលោកស្រី ដូង អឿន។
លោកស្រី ដូង អឿន ថ្លែងថា លោកស្រីធ្លាប់ប្រាប់ប្ដីលោកស្រីឱ្យត្រឡប់ទៅប្រទេសវៀតណាម វិញ ប៉ុន្តែប្ដីរបស់លោកស្រីបដិសេធ ព្រោះមិនដាច់ចិត្តពីកូន៖ «គាត់ថា គាត់មិនទៅទេ... ដាច់ខាតគាត់មិនទៅទេ! ព្រោះនៅក៏ងាប់នៅស្រុកខ្មែរទៅ ជុំកូនជុំចៅ។ គាត់មិនទៅទេ ម្នាក់ឯងនោះ។ គាត់ថាអ៊ីចេះ។ ខ្ញុំថា ឱ្យទៅៗ គេទៅលាន់ហើយម្ដេចមិនទៅ? គាត់ថា គាត់មិនទៅទេ ទៅចោលកូនចោលចៅ គាត់មិនទៅទេ សុខចិត្តនៅងាប់ស្រុកខ្មែរចុះ!»។
អង្គហេតុទាក់ទងនឹងការប្រព្រឹត្តចំពោះជនជាតិវៀតណាម នៅក្នុងរបបកម្ពុជាប្រជាធិបតេយ្យ ត្រូវបានសាលាក្ដីខ្មែរក្រហមចាត់ចូលជាបទប្រល័យពូជសាសន៍ ហើយចោទប្រកាន់លើអតីតមេដឹកនាំជាន់ខ្ពស់ខ្មែរក្រហមពីររូប គឺជនជាប់ចោទ នួន ជា និង ខៀវ សំផន។ ជនជាប់ចោទ នួន ជា ជាអតីតអនុលេខាបក្សកុម្មុយនិស្តកម្ពុជា និងជនជាប់ចោទ ខៀវ សំផន ជាអតីតប្រធានរដ្ឋនៃរបបកម្ពុជាប្រជាធិបតេយ្យ ចន្លោះឆ្នាំ១៩៧៥ ដល់ឆ្នាំ១៩៧៩ ដែលបានធ្វើឱ្យពលរដ្ឋកម្ពុជា ជិត ២លាននាក់បាត់បង់ជីវិត៕