អ្នកភូមិ៣នាក់ត្រូវបានចាប់ខ្លួនពីបទរំលោភកាន់កាប់ដីធ្លីនៅប៉ៃលិន
2014.03.31
សមត្ថកិច្ចប៉ូលិសខេត្តប៉ៃលិន បានចុះទៅចាប់ខ្លួនអ្នកភូមិបីនាក់ ដោយចោទប្រកាន់បទរំលោភចូលទៅកាន់កាប់លើកម្មសិទ្ធិដីធ្លីរបស់អ្នកដទៃ នៅភូមិភ្នំក្រិញ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
មន្ត្រីគណបក្ស សម រង្ស៊ី ប្រចាំខេត្តប៉ៃលិន លោក ឃឹម ប៉ុន ថ្លែងកាលពីល្ងាចថ្ងៃទី៣១ ខែមីនា ថា ការចាប់ខ្លួនបានកើតឡើងកាលពីរសៀលថ្ងៃទី៣១ មីនា។ សមត្ថកិច្ចប៉ូលិសបានប្រើរថយន្តពីរគ្រឿង និងកងកម្លាំងជាច្រើននាក់ ចុះទៅចាប់ខ្លួនអ្នកភូមិទាំងនោះតាមដីការរបស់តុលាការខេត្តប៉ៃលិន។
លោក ឃឹម ប៉ុន៖ «គេមានដីកាចាប់ខ្លួនហ្នឹង ៧នាក់ ហើយគេចាប់បានបីរត់រួច ៤ នៅលើដីទំនាស់ ១៩គ្រួសារ ដែលមានយូរហើយ គេចោទពួកគាត់ហ្នឹងថា រំលោភកម្មសិទ្ធិដីធ្លី ព្រោះដីហ្នឹងគេបានប្រគល់ទៅឲ្យមនុស្សម្នាក់ពីប៉ុន្មានឆ្នាំមុន គាត់ធ្លាប់ចាប់ដាក់គុកពីរនាក់ម្ដងហើយដាក់គុកជាងពីរឆ្នាំ ហើយពួកគាត់នៅតែងើបឡើងតវ៉ាទៀតហ្នឹង ហើយឥឡូវហ្នឹង គាត់ទាមទារដីគាត់ទៀត»។
អ្នកភូមិទាំងបីនាក់ដែលគេចាប់ខ្លួននោះ មានឈ្មោះ ពេជ្រ សុធា ឈ្មោះ ឱម សំអាត និងឈ្មោះ ឱម សំអុល។ អ្នកទាំងបីនាក់ត្រូវគេឃុំខ្លួនជាបណ្ដោះអាសន្ន នៅស្នងការនគរបាលខេត្តប៉ៃលិន។ ចំណែកអ្នកភូមិ ៤នាក់ ដែលកំពុងរត់គេចខ្លួនពីការតាមចាប់របស់សមត្ថកិច្ចនោះ មានឈ្មោះ ថោង ថន ឈ្មោះ ស៊ឹម គី ឈ្មោះ ប្រាក់ សុធី និងឈ្មោះ ទួត ម៉ាក់៕