តំណាង​អ្នក​ភូមិ​ឡពាង​ខេត្ត​កំពង់ឆ្នាំង​គ្រោង​ប្ដឹង​មន្ត្រី​សុរិយោដី​ពីរ​នាក់​ចោទ​ធ្វើ​ប្លង់​ដី​មិន​ត្រឹមត្រូវ

ដោយ ជិន ជេដ្ឋា
2016-09-11
Share
អ្នក​ភូមិ​ឡពាង ២០១៦ ៨៥៥ អ្នក​ភូមិ​ឡពាង ប្រមូល​ផ្ដុំ​គ្នា​ដាក់​បណ្ដឹង​ទៅ​សាលា​ខេត្ត​កំពង់ឆ្នាំង ប្រឆាំង​នឹង​ក្រុមហ៊ុន ខេ.ឌី.ស៊ី (KDC) នៅ​ថ្ងៃ​ទី​២៨ ខែ​មេសា ឆ្នាំ​២០១៦។ Photo LICADHO
Photo LICADHO

តំណាង​អ្នក​ភូមិ​ឡពាង និង​បឹងកក់ នៃ​ឃុំ​តាជេស ស្រុក​កំពង់ត្រឡាច គ្រោង​ដាក់​លិខិត​សុំ​អន្តរាគមន៍​ទៅ​ក្រសួង​យុត្តិធម៌ និង​ព្រះមហាក្សត្រ ដើម្បី​មាន​ចំណាត់ការ​ប្រឆាំង​នឹង​មន្ត្រី​សុរិយោដី​ពីរ​រូប ដែល​ពួក​គេ​អះអាង​ថា បាន​ធ្វើ​ប្លង់​ដី​មិន​ត្រឹមត្រូវ​បង្ក​ឲ្យ​មាន​ជម្លោះ។ គម្រោង​នេះ បន្ទាប់​ពី​សាលា​ដំបូង​ខេត្ត​កំពង់ឆ្នាំង និង​សាលា​ឧទ្ធរណ៍ តម្កល់​រឿង​ទុក​ឥត​ចាត់ការ។

តំណាង និង​ក្រុម​អ្នក​ភូមិ​ដែល​មាន​ជម្លោះ​ដីធ្លី​រ៉ាំរ៉ៃ​ជាមួយ​ក្រុមហ៊ុន ខេ.ឌី.ស៊ី (KDC) ឲ្យ​ដឹង​នៅ​ថ្ងៃ​ទី​១១ ខែ​កញ្ញា ថា ពលរដ្ឋ​នឹង​កាន់​លិខិត​ចូល​ស្ថាប័ន​ទាំង​ពីរ​នៅ​ដើម​សប្ដាហ៍​ទី​បួន​នៃ​ខែ​កញ្ញា ឆ្នាំ​២០១៦។ ពួក​គេ​ថា បណ្ដឹង​ប្រឆាំង​នឹង​មន្ត្រី​សុរិយោដី និង​ភូមិបាល​ស្រុក​កំពង់ត្រឡាច ឈ្មោះ អេង ណារិទ្ធិ និង​ឈ្មោះ ម៉ិល ចន្ថា ដែល​ប្ដឹង​កាល​ពី​ឆ្នាំ​២០១៤ មិន​ត្រូវ​បាន​ព្រះរាជអាជ្ញា និង​អគ្គព្រះរាជអាជ្ញា​ចាត់ការ​ទេ។

តំណាង​ពលរដ្ឋ​មាន​បញ្ហា​ដីធ្លី​នៅ​ភូមិ​ឡពាង លោក រាជ សីម៉ា មាន​ប្រសាសន៍​ថា ដើម​បណ្ដឹង​ទាំង​បី​នាក់​នឹង​សាកល្បង​ដាក់​បណ្ដឹង​ប្រឆាំង​នឹង​មន្ត្រី​សុរិយោដី​ទៅ​តុលាការ​កំពូល​ទៀត ក្រែង​គេ​ទទួល​បណ្ដឹង និង​ចាត់ការ​រក​យុត្តិធម៌​ជូន​អ្នក​ភូមិ​រងគ្រោះ​ដីធ្លី។ លោក​ថា បើ​តុលាការ​មិន​ទទួល​បណ្ដឹង​ដោយ​សម្អាង​ថា​ខុស​នីតិវិធី​នោះ ពួក​គេ​នឹង​ដាក់​លិខិត​ចូល​ក្រសួង​យុត្តិធម៌ និង​ព្រះមហាក្សត្រ៖ «ប៉ុន្តែ​បើ​សិន​ជា​តុលាការ​នេះ​អត់​ចាត់ការ​ទេ ខ្ញុំ​នឹង​ប្ដឹង​នៅ​អាណត្តិ​គណបក្ស​ក្រោយ​ជាប់​ឆ្នោត ព្រោះ​ខ្ញុំ​គិត​ថា តុលាការ​សព្វថ្ងៃ​ជា​តុលាការ​របស់​អ្នក​មាន​លុយ​មាន​អំណាច»

ចំណែក​តំណាង​ពលរដ្ឋ​មាន​បញ្ហា​ដីធ្លី​នៅ​ភូមិ​បឹងកក់ លោក សៀង ហេង បញ្ជាក់​ថា ការ​បន្ត​ប្ដឹង​តវ៉ា​ជុំវិញ​រឿង​ដីធ្លី​នេះ ក៏​ព្រោះ​តែ​លោក​ចង់​បង្ហាញ​ពី​ភាព​មិន​ប្រក្រតី​នៃ​ការ​ធ្វើ​ប្លង់​ដី​ដោយ​មន្ត្រី​ជំនាញ​កាល​ពី​ឆ្នាំ​២០០៦។ លោក​ថា លោក​នឹង​ចូលរួម​ធ្វើ​ជា​តំណាង​ដើម​បណ្ដឹង​ជាមួយ​ពលរដ្ឋ​ចំនួន​ពីរ​នាក់​ផ្សេង​ទៀត គឺ​លោក រាជ សីម៉ា និង​លោក ហុង ដារ៉ូ ដើម្បី​សើរើ​រក​ខុស​ត្រូវ​ជុំវិញ​រឿង​នេះ៖ «ប្ដឹង​ទៅ​លើ​បញ្ហា​ប្លង់​ហ្នឹង! ជា​ផល​ប្រយោជន៍​គឺ​ខាង​ខ្ញុំ និង​ពលរដ្ឋ​ចង់​បញ្ជាក់​ថា ជា​ដី​ពលរដ្ឋ​មិន​ទាន់​បាន​ដោះស្រាយ ឬ​ទិញ​លក់​អី​ចប់​ពី​ពលរដ្ឋ ហើយ​គាត់​យក​ទៅ​ធ្វើ​ប្លង់​ក្ដោប​យក​ទាំងអស់»

អាស៊ីសេរី មិន​អាច​រក​ប្រភព​ទាក់ទង​មន្ត្រី​សុរិយោដី លោក អេង ណារិទ្ធិ និង​លោក ម៉ិល ចន្ថា ដើម្បី​ឆ្លើយ​តប​នឹង​ការ​ចោទ​ប្រកាន់​នេះ​បាន​ទេ​នៅ​ថ្ងៃ​ទី​១១ ខែ​កញ្ញា។ ប៉ុន្តែ​អភិបាល​រង​ខេត្ត​កំពង់ឆ្នាំង ទទួល​បន្ទុក​ដោះស្រាយ​វិវាទ​ដីធ្លី លោក ចេង ញ៉ាន់ ធ្លាប់​បញ្ជាក់​ថា ដី​របស់​ក្រុមហ៊ុន​មាន​ប្លង់​រឹង​ដែល​បាន​ធ្វើ​ប្លង់​ឡើង​ដោយ​ស្រប​ច្បាប់ ទើប​ការ​តវ៉ា​ណា​មួយ​របស់​ក្រុម​ពលរដ្ឋ​លំបាក​នឹង​ដោះស្រាយ។

ប្រធាន​ផ្នែក​បច្ចេកទេស​ស៊ើប​អង្កេត​អង្គការ​លីកាដូ (LICADHO) លោក អំ សំអាត ថ្លែង​ថា តាម​នីតិវិធី​ដែល​សំណុំ​រឿង​របស់​តំណាង​ដើម​បណ្ដឹង​ទាំង​បី​រូប​មិន​ទាន់​បាន​ចូល​ដល់​ដៃ​ចៅក្រម​ស៊ើបសួរ នោះ​ដើម​បណ្ដឹង​មិន​អាច​បន្ត​ដាក់​បណ្ដឹង​ទៅ​តុលាការ​កំពូល​ទៀត​ទេ ព្រោះ​ព្រះរាជអាជ្ញា និង​អគ្គព្រះរាជអាជ្ញា​បាន​តម្កល់​រឿង​ទុក​ឥត​ចាត់ការ​ហើយ។ ប៉ុន្តែ​លោក​គាំទ្រ​ពលរដ្ឋ​ដែល​ចេះ​រក​ខុស​ត្រូវ​តាម​ផ្លូវ​ច្បាប់៖ «បាទ! កន្លែង​នេះ​យើង​ងឿងឆ្ងល់​បន្តិច​ដែរ​ទាក់ទង​នឹង​រឿង​ដី​នៅ​តំបន់​ឡពាង ព្រោះ​នៅ​ក្នុង​ប្រទេស​កម្ពុជា យើង​អត់​ដែល​ឃើញ​មាន​ដី​ណា​មាន​ជាង ១០០​ប័ណ្ណ ហើយ​ប័ណ្ណ​នីមួយៗ​មាន​ទំហំ ៥​ហិកតារ​ស្មើ​គ្នា ហើយ​មិន​ដឹង​គេ​ធ្វើ​យ៉ាង​ម៉េច​បាន​ជា​ម្ចាស់​ដី​ហ្នឹង​ទទួល​បាន​ដី ៥​ហិកតារ​ដូច​គ្នា​ដើម្បី​លក់​ឲ្យ​ក្រុមហ៊ុន»

ទាក់ទង​នឹង​ជម្លោះ​ដីធ្លី​រវាង​ពលរដ្ឋ​ជាច្រើន​គ្រួសារ​នៅ​ឃុំ​តាជេស ស្រុក​កំពង់ត្រឡាច នេះ ភាគី​ក្រុមហ៊ុន និង​អាជ្ញាធរ ធ្លាប់​ប្រើ​វិធានការ​ក្ដៅ​ផង ត្រជាក់​ផង និង​ពេល​ខ្លះ​លួងលោម​ដើម្បី​សម្របសម្រួល​បញ្ចប់​ជម្លោះ​ជាមួយ​ពលរដ្ឋ ប៉ុន្តែ​រហូត​មក​ដល់​ពេល​នេះ នៅ​មាន​ពលរដ្ឋ​ប្រមាណ ១៥​គ្រួសារ​ទៀត​នៅ​ក្រាញ​ននៀល​តវ៉ា​មិន​ព្រម​ទទួល​យក​គោល​នយោបាយ​ដោះស្រាយ​របស់​ភាគី​ក្រុមហ៊ុន​នៅ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល