ក្រុមហ៊ុន អូស៊ីអាយស៊ី បន្តឈូសឆាយដីធ្លីប្រជាពលរដ្ឋដែលរងពីគម្រោងវាលយន្តហោះភ្នំពេញថ្មី
2021.12.22
ក្រុមហ៊ុន អូ.ស៊ី.អាយ.ស៊ី ដែលទទួលបានសិទ្ធិសាងសង់វាលយន្តហោះថ្មីក្នុងខេត្តកណ្ដាល នៅតែបន្តប្រើគ្រឿងចក្រគាស់កាយផ្លូវទំនប់ និងឈូសឆាយរំលោភយកដីធ្លីរបស់ប្រជាពលរដ្ឋ ដោយព្រមានចាប់ខ្លួនអ្នកភូមិ ដែលហ៊ានថតសកម្មភាពរបស់ពួកគេ។ ពលរដ្ឋអះអាងថា ពួកគាត់មិនជំទាស់នឹងការសាងសង់របស់ក្រុមហ៊ុនទេ តែស្នើសុំរដ្ឋាភិបាលពន្លឿនការដោះស្រាយវិវាទដីធ្លីនេះឲ្យបានឆាប់ ដោយផ្ដល់សំណងមួយដែលអាចទទួលបាន។
ជម្លោះដីធ្លីរវាងពលរដ្ឋចំនួន ៣ឃុំ ក្នុងខេត្តកណ្ដាល និង ១ឃុំក្នុងខេត្តតាកែវ ជាមួយក្រុមហ៊ុន OCIC របស់ឧកញ៉ា ពុង ឃាវសែ ប្រជាពលរដ្ឋនៅមិនទាន់ទទួលដោះស្រាយនៅឡើយ ខណៈខាងក្រុមហ៊ុននៅបន្តសកម្មភាពរំលោភយកដីធ្លីពួកគាត់ ដោយគ្មានផ្ដល់សំណងសមរម្យណាមួយឡើយ។
ពលរដ្ឋម្នាក់នៅភូមិកំពង់តាឡុង លោក ប៉ៅ សុភាព ថ្លែងប្រាប់អាស៊ីសេរីនៅថ្ងៃទី២២ ធ្នូថា រយៈពេល២ថ្ងៃនេះ ក្រុមហ៊ុនឈូសឆាយដីធ្លី ហួសផ្លូវទំនប់ ៩០ ចូលដល់ដីលំនៅឋានពលរដ្ឋ ដែលនាំឲ្យមានការប៉ះទង្គិចពាក្យសំដីគ្នា រវាងក្រុមកម្មករ និងអ្នកភូមិ។
លោកបន្តថា អភិបាលស្រុកកណ្ដាលស្ទឹង លោក អ៊ូច សៅវឿន មិនបានឈប់រថយន្ត ចុះដោះស្រាយបញ្ហាជូនពលរដ្ឋ នៅទីតាំងដីមានទំនាស់ទេ បែរជាធ្វើដំណើរជិះចូលទៅក្នុងការដ្ឋានក្រុមហ៊ុនទៅវិញ។
លោកសោកស្ដាយនឹងទង្វើរបស់អាជ្ញាធរដែលបន្តអូសបន្លាយវិវាទនេះ ដោយពន្លឿនដំណោះស្រាយជូនពលរដ្ឋ បែរបើកដៃឲ្យភាគីក្រុមហ៊ុនធ្វើសកម្មភាពតាមអំពើចិត្ត៖ «គេអត់មានលទ្ធផលអ្វីទេ។ បើស្រុកគេចង់ជួបយើង គេនិយាយល្អ។ បើយើងតេទៅសួរគេ គេថា រវល់។ ម្សិលមិញប្រាប់បងប្អូនខ្ញុំហ្នឹង តេទៅចៅហ្វាយស្រុក គាត់ឆ្លើយថា គាត់រវល់ប្រជុំ។ គាត់បិទហើយ ចប់។ ដំណោះស្រាយខាងអាជ្ញាធរ ដូចអត់មានអ្វីចេញហ្មង។ អត់មានអីជាសាច់ដុំ កំភួន អីទេ!»។
វិទ្យុអាស៊ីសេរីមិនអាចសុំការឆ្លើយតបរឿងនេះពីតំណាងក្រុមហ៊ុន OCIC នៅវាលយន្តហោះភ្នំពេញថ្មី លោក ជូ កុកសាយ អភិបាលស្រុកកណ្ដាលស្ទឹង លោក អ៊ូច សៅវឿន ហើយនឹងអភិបាលខេត្តកណ្ដាល លោក គង់ សោភ័ណ បានទេ នៅថ្ងៃទី២២ ធ្នូ ដោយហៅទូរស័ព្ទចូលតែពុំមានអ្នកទទួល។
ជុំវិញរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត សង្កេតឃើញថា វិវាទដីធ្លីមួយនេះ នៅតែមិនមានអាជ្ញាធរ ឬស្ថាប័នរដ្ឋណា ហ៊ានចេញមុខពន្លឿនដំណោះស្រាយជូនប្រជាពលរដ្ឋ ក្រៅពីប្រាប់ឲ្យពលរដ្ឋលក់ដីឲ្យក្រុមហ៊ុន តម្លៃ ៨ដុល្លារ ក្នុង ១ម៉ែត្រការ៉េ។
លោកបន្តថា បញ្ហាដែលអាជ្ញាធរថ្នាក់ជាតិ និងក្រោមជាតិ មិនអាចហ៊ានអារកាត់ដោះស្រាយរឿងនេះបាន ដោយសារតែរដ្ឋាភិបាល គឺជាអ្នកផ្ដល់សិទ្ធិឲ្យក្រុមហ៊ុនអូ.ស៊ី.អាយ.ស៊ី ធ្វើការសាងសង់វាលយន្តហោះមួយនេះ។
លោកយល់ថា រដ្ឋាភិបាលគួរពន្លឿនដំណោះស្រាយជូនប្រជាពលរដ្ឋ ដោយផ្ដល់សំណងសមរម្យណាមួយជូនពួកគាត់ឲ្យបានឆាប់ ដើម្បីគាត់យកប្រាក់ទៅទិញដីនៅតំបន់ផ្សេងរស់នៅ ព្រោះពលរដ្ឋមិនដែលប្រឆាំងគម្រោងអភិវឌ្ឍន៍របស់រដ្ឋាភិបាលម្ដងណាឡើយ៖ «ធ្វើអ៊ីចឹង ធ្វើឲ្យប្រជាពលរដ្ឋ គាត់រងគ្រោះ ហើយបន្តិចទៀតទៅ គាត់រកដីនៅអត់បានទេ។ មិនដឹងជាគាត់ទៅនៅកន្លែងណា។ អាហ្នឹង! វាធ្វើឲ្យរដ្ឋាភិបាលកាន់តែឈឺក្បាល ដោយសារកំណើននៃភាពក្រីក្រ។ ហើយបើសិនជាមានការព្រងើយកន្តើយមិនមានការដោះស្រាយទេ ខ្ញុំឃើញថា បញ្ហាហ្នឹង កាន់តែធ្វើឲ្យធ្ងន់ធ្ងរថែមទៀត សម្រាប់យុវជនជំនាន់ក្រោយ។ ជាពិសេសសម្រាប់កូនចៅរបស់ថ្នាក់ដឹកនាំទាំងអស់ ដែលត្រូវក្លាយជាអ្នកដឹកនាំថ្ងៃក្រោយទៀត វានឹងទទួលទម្ងន់រងអំពីអ្នកដឹកនាំជំនាន់ហ្នឹង»។
កាលពីថ្ងៃទី៩ ខែធ្នូកន្លងទៅលោកនាយករដ្ឋមន្ត្រី ហ៊ុន សែន បានទៅទស្សនកិច្ចពិនិត្យមើលការដ្ឋានសាងសង់វាលយន្តហោះថ្មី ក្នុងខេត្តកណ្ដាល ប៉ុន្តែលោកមិនបានលើកឡើងជាសាធារណៈអំពីដំណោះស្រាយជូនប្រជាពលរដ្ឋ ដែលរងផលប៉ះពាល់ពីគម្រោងរបស់រដ្ឋាភិបាល នៅក្នុងតំបន់នោះទេ។
ពលរដ្ឋឲ្យដឹងថា ពួកគាត់តែងតែព្យាយាមស្វែងរកដំណោះស្រាយពីក្រសួងដែនដី ក្រសួងមហាផ្ទៃ ខុទ្ទកាល័យលោកនាយករដ្ឋមន្ត្រី និងមន្ទីររដ្ឋសភា យូរឆ្នាំមកហើយ ប៉ុន្តែគិតមកដល់ពេលនេះ គ្មានស្ថាប័នរដ្ឋណាមួយ ហៅតំណាងពួកគាត់ទៅពិភាក្សាស្វែងរកដំណោះស្រាយជាមួយភាគីក្រុមហ៊ុននោះទេ។
ជម្លោះដីធ្លីរវាងក្រុមហ៊ុន អូ.ស៊ី.អាយ.ស៊ី (OCIC) របស់ឧកញ៉ា ពុង ឃាវសែ ជាមួយនឹងប្រជាពលរដ្ឋសរុប ៣៣០គ្រួសារ នៅស្រុកកណ្ដាលស្ទឹង ខេត្តកណ្ដាល អូសបន្លាយជាង ៣ឆ្នាំមកហើយ ដោយពលរដ្ឋមិនព្រមទទួលយកសំណង ដែលអាជ្ញាធរផ្ដល់ឲ្យចន្លោះពី ៣ដុល្លារទៅ ៨ដុល្លារ ក្នុងដី ១ម៉ែត្រការ៉េ។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ អូ.ស៊ី.អាយ.ស៊ី (OCIC) របស់លោក ពុង ឃាវសែ ដែលជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់វាលយន្តហោះខ្នាតអន្តរជាតិមួយនៅទីនោះ។ តាមគម្រោងក្រុមហ៊ុននឹងសាងសង់រួចរាល់ នៅឆ្នាំ២០២៣។ វាលយន្តហោះថ្មីនេះ វិនិយោគក្នុងទឹកប្រាក់ប្រមាណ ១.៥០០លានដុល្លារ លើផ្ទៃដី ២.៦០០ហិកតារ។
ប្រជាពលរដ្ឋដែលរងផលប៉ះពាល់ពីគម្រោងនេះ ស្នើសុំលោកនាយករដ្ឋមន្ត្រី ហ៊ុន សែន ដោះស្រាយបញ្ចប់ជម្លោះដីធ្លីនេះ។ ពលរដ្ឋបញ្ជាក់ថា ពួកគាត់នៅបន្តការតវ៉ារហូតដល់មានដំណោះស្រាយសមរម្យ ដែលអាចទទួលយកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។