តុលាការខេត្តកំពង់ឆ្នាំងកោះហៅពលរដ្ឋ៨នាក់ទៀតចូលបំភ្លឺរឿងទំនាស់ដីនៅភូមិឡពាង
2014.07.30
សាលាដំបូងខេត្តកំពង់ឆ្នាំង
ចៅក្រមស៊ើបសួរនៃសាលាដំបូងខេត្តកំពង់ឆ្នាំង បានចេញដីកាបង្គាប់ឲ្យពលរដ្ឋមានទំនាស់ដីធ្លីជាមួយក្រុមហ៊ុន ខេ.ឌី.ស៊ី (KDC) ចំនួន ៨នាក់ ចូលខ្លួនទៅបំភ្លឺក្នុងតុលាការ នៅថ្ងៃទី៥ ខែសីហា ឆ្នាំ២០១៤ បន្ទាប់ពីសម្រេចឃុំខ្លួនពលរដ្ឋចំនួនពីរនាក់បណ្ដោះអាសន្ន ទាក់ទងនឹងរឿងដីធ្លីដូចគ្នានេះដែរ។
តំណាងប្រជាពលរដ្ឋ និងមន្ត្រីសិទ្ធិមនុស្ស ចាត់ទុកការចេញដីកានេះ គឺជាការគំរាមកំហែងបំបាក់ស្មារតី និងមិនឲ្យពលរដ្ឋហ៊ានងើបឡើងតវ៉ាក្នុងរឿងដីធ្លីរបស់ពួកគាត់។
ពលរដ្ឋភូមិឡពាង និងបឹងកក់ ដែលមានឈ្មោះក្នុងដីកាបង្គាប់ឲ្យចូលខ្លួនរបស់តុលាការ អះអាងនៅថ្ងៃទី៣០ ខែកក្កដា ថា ខ្លួននឹងចូលទៅបំភ្លឺតាមកាលកំណត់ ប៉ុន្តែត្រូវធ្វើដំណើរដោយថ្មើរជើងចេញពីភូមិឡពាង ក្បែរដីមានជម្លោះនោះ រហូតដល់មុខតុលាការជាមួយប្រជាពលរដ្ឋជាង ៤០គ្រួសារផ្សេងទៀត នៅថ្ងៃទី៥ ខែសីហា ខាងមុខ។
តំណាងពលរដ្ឋភូមិឡពាង និងជាអ្នកដែលត្រូវចូលខ្លួនទៅបំភ្លឺម្នាក់ដែរនោះ លោក ស្ងួន ញឿន ចាត់ទុកតុលាការខេត្តកំពង់ឆ្នាំង នាពេលនេះថា ជាតុលាការក្រុមហ៊ុន ខេ.ឌី.ស៊ី ដោយធ្វើការទៅតាមអ្នកមានលុយ ឬមានអំណាច។ លោកថា ការចេញដីកានេះ គឺជាការគំរាមកំហែងអ្នកភូមិ ដែលរងគ្រោះក្នុងរឿងដីធ្លី ប៉ុន្តែអ្នកភូមិនៅតែប្ដេជ្ញាបន្តការទាមទាររហូតដល់មានដំណោះស្រាយ៖ «យល់ថា នេះជាការគាបសង្កត់ ជាការគំរាមកំហែង ព្រោះតុលាការនេះ គឺជាតុលាការរបស់ក្រុមហ៊ុន ខេ.ឌី.ស៊ី ធ្វើតាមបញ្ជារបស់លោកជំទាវ ជា ខេង តែប៉ុណ្ណោះ។ អ៊ីចឹង សំណូមពរដល់អង្គការជាតិ និងអន្តជាតិ មេត្តាជួយទៅឃ្លាំមើលតុលាការ ដែលហៅពួកខ្ញុំទាំង ៨នាក់ ដែលបានចូលខ្លួនទៅបំភ្លឺនៅក្នុងតុលាការនេះ»។
នៅក្នុងដីកាបង្គាប់ឲ្យចូលខ្លួនចេញដោយចៅក្រមស៊ើបសួរ លោក ញូង ចន្ធី ចុះថ្ងៃទី២៥ ខែកក្កដា ឆ្នាំ២០១៤ និងទើបបញ្ជូនដល់ដៃពលរដ្ឋទាំង ៨នាក់ នៅរសៀលថ្ងៃទី៣០ ខែកក្កដា គឺមានទី១ ឈ្មោះ ស្ងួន ញឿន ទី២ ស្រ៊ុន ថា ទី៣ ឡៅ អេន ទី៤ គឹម ពុទ្ធដារ៉ា ទី៥ ហុង ដារ៉ូ ទី៦ ផាន សុផាន់ណា ទី៧ គុជ ហុក និងទី៨ឈ្មោះ អ៊ុន រ៉េន។ បុរសទាំង ៨នាក់ មាន ២នាក់រស់នៅភូមិឡពាង និង ៦នាក់ រស់នៅភូមិបឹងកក់ នៃឃុំតាជេស ស្រុកកំពង់ត្រឡាច ខេត្តកំពង់ឆ្នាំង។
ទាក់ទងបញ្ហានេះ វិទ្យុអាស៊ីសេរី បានព្យាយាមទាក់ទងតាមរយៈទូរស័ព្ទផង និងទៅដល់សាលាដំបូងផ្ទាល់ផង ប៉ុន្តែមិនអាចជួបប្រធានសាលាដំបូងខេត្តកំពង់ឆ្នាំង លោក តេង រតនា បានទេ ដោយជំនួយការរបស់លោកប្រាប់ថា កំពុងជាប់រវល់ផ្សះផ្សារឿងក្ដី។ ចំណែកចៅក្រមកាន់សំណុំរឿងនេះ លោក ញូង ចន្ធី ក៏ត្រូវជំនួយការប្រាប់ថា លោកមិនទាន់មកដល់កន្លែងធ្វើការដែរ នៅម៉ោងប្រហែល ៣រសៀលថ្ងៃទី៣០ ខែកក្កដា។
អនុប្រធានកម្មវិធីដីធ្លី និងធនធានធម្មជាតិនៃសមាគមអាដហុក (Adhoc) លោក ចាន់ សុវ៉េត ថ្លែងបញ្ជាក់ថា តុលាការមានឆន្ទានុសិទ្ធិក្នុងការលើកយកសំណុំរឿងណាមួយមកចាត់ការ ប៉ុន្តែក្នុងករណីនេះ ប្រសិនបើតុលាការបង្អង់សំណុំរឿងព្រហ្មទណ្ឌ រួចលើកយកសំណុំរឿងស៊ីវិលមកចាត់ការ ទើបជាការប្រសើរ ពីព្រោះហិង្សាដែលបានកើតឡើង គឺចេញមកពីរឿងដីធ្លីរវាងប្រជាពលរដ្ឋ និងក្រុមហ៊ុន៖ «ការតវ៉ាទាមទារដោយសន្តិវិធី វាជារឿងមួយចាំបាច់ត្រូវតែធ្វើ ក៏ប៉ុន្តែអាជ្ញាធរ ភ្នាក់ងារដែលមានសមត្ថកិច្ចនៅតំបន់នោះ ក្លាយទៅជាឧបករណ៍មួយដែលជំរុញឲ្យមានវប្បធម៌អំពើហិង្សាកើតឡើង។ ឃើញនឹងភ្នែកតែម្ដង គឺភ្នាក់ងាររដ្ឋដែលនៅតំបន់ហ្នឹង គឺគាត់មើលនឹងភ្នែកឃើញពលរដ្ឋទាំងសងខាង ឈ្លោះគ្នាប្រើអំពើហិង្សាដាក់គ្នាទៅវិញទៅមក តែផ្ទុយទៅវិញ អ្នកដែលទទួលរងគ្រោះថ្នាក់ គឺអ្នកភូមិឡពាង ទៅវិញទេ ដែលគ្រោះថ្នាក់ក្នុងការដែលតុលាការបានចេញដីកាកោះហៅ»។
កាលពីថ្ងៃទី២២ ខែកក្កដា ឆ្នាំ២០១៤ ចៅក្រមសម្រេចឃុំខ្លួនពលរដ្ឋចំនួន ២នាក់បណ្ដោះអាសន្ន ដែលមានទី១ឈ្មោះ ម៉ាង យ៉ាវ រស់នៅភូមិសំរោង និងទី២ឈ្មោះ សៀង ហេង រស់នៅភូមិបឹងកក់ ក្រោមបទចោទដូចគ្នា គឺប្រើអំពើហិង្សាដោយចេតនា និងបង្កឲ្យខូចខាតទ្រព្យសម្បត្តិអ្នកដទៃ។ ការឃុំខ្លួននេះ បន្ទាប់ពីក្រុមអ្នកភូមិព្យាយាមវាយទម្លុះរបងថ្មក្រុមហ៊ុន ដែលពួកគាត់អះអាងថា សង់រំលោភលើដីអ្នកភូមិ ហើយក៏មានការប៉ះទង្គិចគ្នាដោយចម្ពាមកៅស៊ូប្រើគ្រាប់ដែក និងដុំថ្ម បណ្ដាលឲ្យរងរបួសទាំងសងខាងជាង ២០នាក់ កាលពីរសៀលថ្ងៃទី១៧ ខែកក្កដា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
