ប្រជាពលរដ្ឋ​មាន​ជម្លោះ​ដី​ឡើង​តវ៉ា​មុខ​សាលា​ខេត្ត​កំពត

ដោយ វោហារ ជាតិ
2014.12.24
Share on WhatsApp
Share on WhatsApp
រង្វល់​ខេត្ត​កំពត ៦១០ រង្វង់​មូល​ទី​រួម​ខេត្ត​កំពត។ រូបថត​ថ្ងៃ​២១ មិថុនា ២០១៤
Photo: RFA

ប្រជាពលរដ្ឋ​មួយ​ចំនួន​រស់​នៅ​ស្រុក​ទឹកឈូ និង​ស្រុក​ឈូក ខេត្ត​កំពត នៅ​ថ្ងៃ​ទី​២៤ ធ្នូ នាំ​គ្នា​ឡើង​តវ៉ា​នៅ​មុខ​សាលា​ខេត្ត​កំពត ដើម្បី​ទាមទារ​ឲ្យ​អាជ្ញាធរ​ខេត្ត​ជួយ​អន្តរាគមន៍​ភាគី​ទំនាស់​ដី​ជាមួយ​ពួកគាត់​ គឺ​មន្ត្រី​រដ្ឋបាល​ព្រៃឈើ​ខេត្ត ដែល​បាន​ហាម​អ្នក​ភូមិ​មិន​ឲ្យ​អាស្រ័យផល​ដំណាំ​ដែល​​បាន​ដាំដុះ​លើ​ដី​ពួក​គាត់​យូរ​មក​ហើយ។

ប្រជាពលរដ្ឋ​ប្រមាណ ៦០​គ្រួសារ តំណាង​ឲ្យ​ប្រជាពលរដ្ឋ​សរុប​ជាង ២០០​គ្រួសារ រស់​នៅ​ក្នុង​ស្រុក​ទាំង​ពីរ​ដែល​មាន​ភូមិ​សាស្ត្រ​ព្រំដែន​ជាប់​គ្នា បាន​ទាមទារ​ឲ្យ​អាជ្ញាធរ​ខេត្ត​ចាត់​វិធានការ​យ៉ាងណា​បញ្ឈប់​មន្ត្រី​រដ្ឋបាល​ព្រៃឈើ​ខេត្ត​កំពត កុំ​ឲ្យ​ចុះ​ទៅ​ហាម​ប្រជាពលរដ្ឋ​ដែល​រស់​នៅ និង​ធ្វើ​កសិកម្ម​លើ​ដី​គាត់​បន្ត​ទៅ​ទៀត។

តំណាង​ប្រជាពលរដ្ឋ​តវ៉ា លោក បឿង សម្បូរ ឲ្យ​ដឹង​ថា កន្លងមក​ប្រជាពលរដ្ឋ​ជាង ២០០​គ្រួសារ​ដែល​ជា​ម្ចាស់​ដី​មិន​មាន​សិទ្ធិ​អ្វី​ទាំង​អស់​ក្នុង​ការ​កាន់​កាប់​អចលនទ្រព្យ​របស់​ខ្លួន៖ «តវ៉ា​ហ្នឹង​សុំ​ឲ្យ​មេព្រៃ​ហ្នឹង​ទៅ​រំខាន​ប្រជាពលរដ្ឋ​បង្កបង្កើន​ផល។ ចំណុច​មួយ​ទៀត សុំ​ឲ្យ​អភិបាល​ខេត្ត​ធ្វើ​ប្លង់​រឹង​កម្មសិទ្ធិ​កាន់​របស់​គាត់»

លោក​បន្ត​ថា ប្រជាពលរដ្ឋ​បាន​ស៊ូទ្រាំ​ការ​លំបាក​អត់​ឃ្លាន​ជា​ច្រើន​ឆ្នាំ​មក​ហើយ មុន​សម្រេច​ចិត្ត​នាំ​គ្នា​ឡើង​មក​តវ៉ា​នៅ​មុខ​សាលា​ខេត្ត​ថ្ងៃ​នេះ ដោយសារ​ពួកគាត់​មិន​អាច​អាស្រ័យ​ផល​ដំណាំ​ដែល​ដាំ​លើ​ដី​គាត់​បាន៖ «មេព្រៃ​គាត់​ទៅ​ហាមឃាត់​មិន​ឲ្យ​ក្រីក្រ​ដាំដុះ​ដូច​ជា ពោត សណ្ដែក ចេក ត្រាវ ហើយ​ប្រជាពលរដ្ឋ​នៅ​ព្រៃ​គាត់​មាន​តែ​បង្កបង្កើន​ផល​ទៀត គាត់​ដាច់​ពោះ​ស្លាប់​ហើយ»

ប្រជាពលរដ្ឋ​តវ៉ា​ទាំង​នោះ​មក​ពី​តំបន់​ពីរ​ខុស​គ្នា គឺ​ខ្លះ​មក​ពី​ឃុំ​ត្រពាំងភ្លាំង ស្រុក​ឈូក ខ្លះ​ទៀត​មក​ពី​ឃុំ​ស្ទឹងកែវ ស្រុក​ទឹកឈូ ដែល​ទីតាំង​ដី​ទំនាស់​នៅ​ជាប់គ្នា។ ពួកគាត់​អះអាង​ថា ពួកគាត់​បាន​កាន់​កាប់​ដី​ទាំង​នោះ​តាំង​ពី​ឆ្នាំ​២០០៥ និង ២០០៦ មក ដោយ​ក្នុង​មួយ​គ្រួសារៗ ​បាន​រាន​ព្រៃ​ធ្វើ​ចម្ការ ខ្លះ​បាន​ទំហំ​មួយ​ហិកតារ ខ្លះ​ទៀត​បី​ហិកតារ ដើម្បី​ដាំដំណាំ​គ្រាន់​ចិញ្ចឹម​ជីវិត​ប្រចាំ​ថ្ងៃ។

បន្ទាប់​ពី​ឈរ​តវ៉ា​ជិត​មួយ​ព្រឹក​រួច​មក តំណាង​ប្រជាពលរដ្ឋ ៣​នាក់ ត្រូវ​បាន​អនុញ្ញាត​ឲ្យ​ចូល​ទៅ​ជួប​លោក ជឹម ផល្លា អភិបាល​ខេត្ត​រង​ទទួល​បន្ទុក​ដោះស្រាយ​វិវាទ​ដីធ្លី។ ក៏ប៉ុន្តែ​លោក បឿង សម្បូរ ដែល​ជា​តំណាង​ប្រជាពលរដ្ឋ​ម្នាក់​ក្នុង​ចំណោម​បី​នាក់​បញ្ជាក់​ថា ជំនួប​មិន​មាន​លទ្ធផល​អ្វី​ទេ៖ «លោក​ចៅហ្វាយ​ខេត្ត​ហ្នឹង​គាត់​ថា ឲ្យ​បងប្អូន​ប្រជាពលរដ្ឋ​ដែល​ខ្ញុំ​នាំ​ទៅ​ហ្នឹង​ត្រឡប់​ទៅ​ក្រោយ​វិញ ​ឲ្យ​ទៅ​ភូមិ​ទៅ​ផ្ទះ​វិញ ចាំ​គាត់​ដោះស្រាយ​ជូន​ពេល​ក្រោយ»

ទាំង​លោក បឿង សម្បូរ ទាំង​ប្រជាពលរដ្ឋ​តវ៉ា​បញ្ជាក់​ថា​ មន្ត្រី​ព្រៃ​ឈឺ​ខេត្ត​កំពត បាន​ហាម​ពួក​គាត់​កុំឲ្យ​អាស្រ័យ​ផល​ដំណាំ​ តាំង​ពី​ឆ្នាំ​២០១០​មក។

វិទ្យុ​អាស៊ីសេរី មិន​អាច​ទាក់ទង​លោក ជឹម ផល្លា បាន​នៅ​រសៀល​ថ្ងៃ​ទី​២៤ ធ្នូ ដើម្បី​សុំ​ការ​បញ្ជាក់​បន្ថែម​អំពី​ការ​ដោះស្រាយ​​នៃ​ការ​តវ៉ា​នេះ។ ក៏ប៉ុន្តែ​កន្លង​មក មន្ត្រី​អាជ្ញាធរ​ស្រុក​ទាំង​ពីរ គឺ​ស្រុក​ទឹកឈូ និង​ស្រុក​ឈូក បាន​អះអាង​ថា ប្រជាពលរដ្ឋ​ជាង ២០០​គ្រួសារ​នោះ បាន​នាំ​គ្នា​ទៅ​រុករាន​ដី​ព្រៃ​ដែល​ជា​ដី​រដ្ឋ​មក​ធ្វើ​ជា​កម្មសិទ្ធិ​របស់​ខ្លួន​ខុស​ច្បាប់។

ទោះ​យ៉ាងណា មន្ត្រី​ការពារ​សិទ្ធិ​មនុស្ស​លីកាដូ (Licadho) ប្រចាំ​ខេត្ត​កំពត លោក ម៉ម កេសី ដែល​បាន​តាមដាន​រឿង​ទំនាស់​ដី​នេះ​យូរ​មក​ហើយ​នោះ ​យល់ថា ប្រជាពលរដ្ឋ​ទាំង​ជាង ២០០​គ្រួសារ​នោះ​ គួរ​ទទួល​បាន​សិទ្ធិ​កាន់កាប់​ដី​ស្របច្បាប់ ព្រោះ​ពួក​គាត់​បាន​កាន់កាប់​ដី​នោះ​និង​បាន​អាស្រ័យ​ផល ​អស់​ជាច្រើន​ឆ្នាំ​មក​ហើយ។

ប្រជាពលរដ្ឋ​តវ៉ា​បាន​នាំគ្នា​ត្រឡប់​ទៅ​ផ្ទះ​វិញ​នៅ​ពេល​ថ្ងៃ​ត្រង់ ដោយ​បញ្ជាក់​ថា ពួកគាត់​នឹង​ឡើង​មក​តវ៉ា​ម្ដង​ទៀត បើ​អាជ្ញាធរ​ខេត្ត​មិន​ចុះទៅ​ដោះស្រាយ​ឲ្យ​ពួក​គាត់​បាន​ឆាប់ៗ​នេះ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។