ពលរដ្ឋ​១៥០​គ្រួសារ​នៅ​បន្ទាយមានជ័យ​ប្រឈម​នឹង​ការ​រុះរើ​លំនៅឋាន​ទៅ​ទីតាំង​ថ្មី

អាជ្ញាធរ​មូលដ្ឋាន​មាន​គម្រោង​រុះរើ​លំនៅឋាន និង​សាលា​រៀន​របស់​អ្នក​ភូមិ​ចំនួន ១៥០​គ្រួសារ ទៅ​កាន់​ដី​ថ្មី ឋិត​ក្នុង​ភូមិ​ស្រឡៅជ្រំ ឃុំ​ទួលពង្រ ស្រុក​ម៉ាឡៃ ខេត្ត​បន្ទាយមានជ័យ។ គម្រោង​នេះ​បាន​ធ្វើ​ឡើង​ដោយ​យោង​លើ​ផែនទី​រៀប​ចំ​ភូមិ​ឋាន​មួយ ដែល​មាន​ចុះ​ហត្ថលេខា​ពី​លោក​នាយក​រដ្ឋមន្ត្រី ហ៊ុន សែន។
ដោយ សួន សុផលមុន្នី
2014.01.30
Share on WhatsApp
Share on WhatsApp

បញ្ហា​នេះ បាន​ធ្វើ​ឲ្យ​ក្រុម​អ្នក​ភូមិ​ទាំង​នោះ​មាន​ប្រតិកម្ម ដោយ​ចោទ​ថា អាជ្ញាធរ​មូលដ្ឋាន និង​មន្ត្រី​ពាក់ព័ន្ធ​សាលា​ខេត្ត​បន្ទាយមានជ័យ រៀប​ចំ​ឡើង​ដើម្បី​រឹប​អូស​យក​ដី​របស់​ពួក​គាត់​លក់​ទៅ​ឲ្យ​ក្រុម​ឈ្មួញ​ដែល​មាន​ពាក់ព័ន្ធ​នឹង​មន្ត្រី​យោធា។

ការ​រៀប​ចំ​ភូមិ​ឋាន និង​ការ​បែង​ចែក​ដី​ធ្លី​ជូន​ប្រជាពលរដ្ឋ​នៅ​តាម​ភូមិ​មួយ​ចំនួន ឋិត​នៅ​ឃុំ​ទួលពង្រ ស្រុក​ម៉ាឡៃ ខេត្ត​បន្ទាយមានជ័យ កំពុង​បង្ក​ឲ្យ​មាន​ភាព​ចម្រូងចម្រាស និង​មាន​ផល​ប៉ះពាល់​ធ្ងន់ធ្ងរ​ទៅ​លើ​អ្នក​ភូមិ។ ក្រុម​អ្នក​ភូមិ​ទាំង​នោះ​ទំនង​ត្រូវ​បាន​គេ​ប្រើប្រាស់​ធ្វើ​ជា​ខែល ដើម្បី​ការពារ​យុទ្ធសាស្ត្រ​ទន្ទ្រាន​រុករាន​យក​ដី​ព្រៃ​បរិស្ថាន​របស់​រដ្ឋ ឋិត​នៅ​ក្នុង​តំបន់​ដែន​ជម្រក​សត្វ​ព្រៃ​រនាម​ដូន​សំ ដែល​ជា​ព្រៃ​អភិរក្ស​ការពារ​ដោយ​ព្រះរាជក្រឹត្យ។

ក្រុម​អ្នក​ភូមិ​ទាំង​នោះ​បញ្ជាក់​ថា កាល​ពី​ថ្ងៃ​ទី​២៦ ខែ​មករា កន្លង​ទៅ ក្រុម​អាជ្ញាធរ​មូលដ្ឋាន​បាន​បើក​កិច្ច​ប្រជុំ​ជាមួយ​អ្នក​ភូមិ ដោយ​ប្រកាស​ប្រាប់​អ្នក​ភូមិ​ឲ្យ​ផ្លាស់​ទីតាំង​លំនៅឋាន ទៅ​រស់​នៅ​លើ​ដី​ថ្មី​ដែល​មាន​ព្រៃ ឋិត​នៅ​ភូមិ​ស្រឡៅជ្រំ ក្នុង​ភូមិសាស្ត្រ​ឃុំ​ទួលពង្រ ស្រុក​ម៉ាឡៃ ខេត្ត​បន្ទាយមានជ័យ។

ទន្ទឹម​គ្នា​នេះ ពួក​គេ​ក៏​មាន​ផែន​ការ​រុះរើ​សាលា​បឋម​សិក្សា​មួយ​ខ្នង ដែល​ជា​ជំនួយ​របស់​អង្គការ ទៅ​សាងសង់​នៅ​លើ​ដី​ថ្មី​ដូច​គ្នា៖ «សព្វថ្ងៃ​គេ​កំពុង​ឈូស​ឆាយ​ដី​ព្រៃ ខាង​ដី​ព្រៃ​មាន​មេ​ភូមិ និង​មន្ត្រី​បរិស្ថាន។ តាម​ឮ​ដី​ជា​ដី លោក ភ្លន់ តារា ដី​នោះ​នៅ​ក្នុង​ចំណោម​ដី​ប្រជាពលរដ្ឋ​ដែល​គេ​កាត់​ឲ្យ ១​ពាន់​ហិកតារ សម្រាប់​ឲ្យ​ប្រជាពលរដ្ឋ​នៅ​ក្នុង​ភូមិ​ស្រឡៅជ្រំ។ ដី​ប្រជាពលរដ្ឋ​នៅ​ខាង​នេះ គេ​ធ្វើ​ផែនទី​ឡើង​ទៅ​សម្ដេច ហ៊ុន សែន ដាក់​ទីតាំង​នៅ​ខាង​នោះ​ខុស​ទីតាំង​ដី​ដែល​អ្នក​ភូមិ​រស់​នៅ ប្រជុំ​ម្សិលមិញ​រុះរើ​សាលា​រៀន​យក​ទៅ​ដាក់​នៅ​ក្នុង​ដី​ព្រៃ ឲ្យ​ប្រជាពលរដ្ឋ​ចេញ​មួយ​គ្រួសារ ២​ម៉ឺន​រៀល»

មាន​អ្នក​ភូមិ​ស្រឡៅជ្រំ ប្រហែល ១០​គ្រួសារ ដែល​ទទួល​បាន​លុយ​កាក់​ជា​ថ្នូរ​នឹង​ការ​ដោះ​ដូរ​ដី​ចាស់ បាន​សុខ​ចិត្ត​នាំ​គ្នា​ចូល​ទៅ​រស់​នៅ​លើ​ដី​ថ្មី ដែល​ហ៊ុមព័ទ្ធ​ដោយ​ព្រៃ។ ដោយ​ឡែក​នៅ​សល់​ប្រជាពលរដ្ឋ ១៥០​គ្រួសារ​ទៀត នៅ​ភូមិ​ស្រឡៅជ្រំ បាន​បដិសេធ​ទៅ​នឹង​ផែន​ការ​ដោះ​ដូរ​ដី​លំនៅឋាន​នេះ។

អ្នក​ភូមិ​ឈ្មោះ អ៊ាម មុនី បាន​បញ្ជាក់​ថា ដី​លំនៅឋាន និង​ដី​ស្រែ​ចម្ការ​នៅ​ក្នុង​ភូមិ​ស្រឡៅជ្រំ នោះ គឺ​ពួក​គាត់​បាន​ចូល​ទៅ​រស់​នៅ​តាំង​ពី​ឆ្នាំ​២០០១ មក។ ឥឡូវ​នេះ ក្រុម​អាជ្ញាធរ​មូលដ្ឋាន​មាន​គម្រោង​ឲ្យ​អ្នក​ភូមិ​រុះរើ​លំនៅឋាន ទៅ​រស់​នៅ​លើ​ដី​ថ្មី ដែល​មាន​ព្រៃ។ បញ្ហា​នេះ ត្រូវ​បាន​ពួក​គាត់​បដិសេធ ព្រោះ​នៅ​លើ​ដី​ភូមិ​ចាស់​ដែល​ពួក​គាត់​កំពុង​រស់​នៅ​សព្វថ្ងៃ​នោះ គឺ​គាត់​តស៊ូ​កាប់​ព្រៃ​វាល​ស្រឡះ និង​មាន​ការ​ដាំដុះ​ផល​ដំណាំ​យ៉ាង​ច្រើន៖ «ដី​ចាស់ បើ​សិន​ជា​អោយ​ដោះ​ដូរ​ទៅ​នៅ​ដី​ថ្មី​តែ​ម្ដង ព្រោះ​ដី​ហ្នឹង​មាន​ដាំ​ស្វាយ ដាំ​ស្វាយ ដាំ​ខ្នុរ បាន​ផ្លែ​ហូប​ហើយ អត់​ទៅ​ទេ សុំ​នៅ​លើ​ដី​ចាស់​នៅ​កន្លែង​ដដែល គេ​ចង់​អោយ​ទៅ​ដី​ថ្មី​ដី​ព្រៃ ហើយ​ដី​ចាស់​នេះ​កើត​ជា​ដី​វាល ហើយ​យក​យើង​ទៅ​នៅ​ដី​ថ្មី​ដូច​ធ្វើ​របង​ឲ្យ​គេ»

អ្នកស្រី លី ឆែម ជា​អ្នកភូមិ​ស្រឡៅជ្រំ ម្នាក់​ទៀត​ថ្លែង​ថា គាត់​មិន​ចង់​ទៅ​រស់​នៅ​លើ​ដី​ថ្មី​នោះ​ទេ ព្រោះ​នៅ​ដី​ភូមិ​ចាស់​ដែល​ពួក​គាត់​កំពុង​រស់​នៅ​នោះ​មាន​ផ្ទះ មាន​ដំណាំ​ហូប​ផ្លែ ដែល​មាន​ដើម​ធំៗ​អស់​ហើយ។ ម្យ៉ាង​វិញ​ទៀត អ្នកស្រី​ថា ការ​តម្រូវ​ឲ្យ​អ្នក​ភូមិ​ផ្លាស់​ប្ដូរ​ទៅ​រស់​នៅ​លើ​ដី​ថ្មី​នោះ គឺ​ជា​គម្រោង​រៀប​ចំ​របស់​អាជ្ញាធរ​មូលដ្ឋាន និង​អាជ្ញាធរ​ខេត្ត ដើម្បី​យក​ដី​របស់​ពួក​គាត់​លក់​ទៅ​ក្រុមហ៊ុន៖ «ព្រោះ​អី​អា​នោះ​ជា​មនុស្ស​ចំណូល​ថ្មី អ៊ីចឹង​គេ​ចេះ​តែ​អោយ​ដី​នៅ​បាន​កើត​ជា​ភូមិ​ថ្មី ដី​ចាស់​ប្រជាជន​គេ​ក្រាញ​អត់​ទៅ​ទេ សុំ​នៅ​ភូមិ​ចាស់​ដដែល ឲ្យ​រៀប​ចំ​ថ្នល់​អី​ឲ្យ​ដាក់​នៅ​ភូមិ​ចាស់​ហ្នឹង​ទៅ គាត់​យក​ទៅ​ដាក់​នៅ​ក្នុង​ព្រៃ មាន​កូន​ចៅ​ណា​ទៅ​រៀន​កើត ប្រជាពលរដ្ឋ​រស់​នៅ​តាំង​ពី​២០០១ គ្នា​វេទនា​ខ្លាំង​ណាស់ គ្នា​ខំ​បង្កបង្កើន​ផល​ដាំ​ស្វាយ បាន​ហូប​ត្រឹមត្រូវ​ហើយ»

ក្រុម​អ្នក​ភូមិ​ថ្លែង​ថា ដី​ស្រែ​ចម្ការ​របស់​អ្នក​ភូមិ​ស្រឡៅជ្រំ ជា​ច្រើន​គ្រួសារ ត្រូវ​បាន​ក្រុម​អាជ្ញាធរ​មូលដ្ឋាន​រឹប​អូស​យក​ជា​បណ្ដើរៗ ដើម្បី​ដាក់​សម្ពាធ​ឲ្យ​អ្នក​ភូមិ​ផ្សេង​ទៀត​ចាក​ចេញ​ទៅ​រស់​នៅ​លើ​ដី​ថ្មី។

វិទ្យុ​អាស៊ីសេរី នៅ​មិន​អាច​ទាក់ទង លោក ហេង ស៊ីណា ជា​មេ​ភូមិ​ស្រឡៅជ្រំ ស្ដីទី ដើម្បី​បញ្ជាក់​ជុំវិញ​បញ្ហា​នេះ​បាន​ទេ ប៉ុន្តែ​មេ​ឃុំ​ទួលពង្រ លោក ទឹម មន បាន​បដិសេធ​ថា អាជ្ញាធរ​ពុំ​មាន​គម្រោង​រុះរើ​ភូមិ​ចាស់​ផ្លាស់​ទៅ​ភូមិ​ថ្មី​នោះ​ទេ។ លោក​ថា នៅ​ឃុំ​ទួលពង្រ មាន​ភូមិ​ចំនួន ៩​ភូមិ។ ក្នុង​នោះ មាន​ភូមិ​ចំនួន​បី​ដែល​មាន​ពាក់ព័ន្ធ​បញ្ហា​ដីធ្លី គឺ​ភូមិ​បន្ទាយ​ទី​១ ភូមិ​រស្មីមានជ័យ និង​ភូមិ​ស្រឡៅជ្រំ។ យ៉ាង​ណា​ក៏ លោក ទឹម មន ពុំ​បាន​បញ្ជាក់​បញ្ហា​នេះ​ឲ្យ​បាន​ពិស្ដារ​នោះ​ទេ។

អ្នក​សម្រប​សម្រួល​អង្គការ​លីកាដូ (Licadho) ប្រចាំ​ខេត្ត​បន្ទាយមានជ័យ លោក ភុន ឈិន ថ្លែង​ថា ក្រុម​អ្នក​ភូមិ​មាន​ការ​ព្រួយ​បារម្ភ​ពី​ការ​ដក​ហូត​ដី​របស់​ពួក​គាត់​ដែល​បាន​កាន់​កាប់​កន្លង​មក។ លោក​ថា រហូត​មក​ដល់​ពេល​នេះ គម្រោង​រៀប​ចំ​ដី​ចែក​ជូន​ប្រជាពលរដ្ឋ ឋិត​នៅ​ក្នុង​ស្ថានភាព​ចម្រូងចម្រាស​នៅ​ឡើយ៖ «រាល់​ថ្ងៃ​គាត់​អត់​ទាន់​ទទួល​បាន​ចំណែក​ដី មាន​ន័យ​ថា អ្នក​ភូមិ​នៅ​ទី​ហ្នឹង​គាត់​បាត់​បង់​ផល​ប្រយោជន៍ ប៉ុន្តែ​ឃើញ​មាន​ក្រុម​ឈ្មួញ​គេ​បាន​ទៅ​ឈូស​ឆាយ​ដី​នៅ​ទី​ហ្នឹង ដើម្បី​ធ្វើ​ចម្ការ ប៉ះពាល់​ដល់​ដី​ពួក​គាត់ ហើយ​អ្នក​ដែល​ទទួល​បាន​ផល​ពី​ដី​ហ្នឹង គាត់​អត់​ទាន់​បាន​ទទួល​គ្រប់​គ្នា។ អ៊ីចឹង​ទៅ គាត់​ចាប់​ផ្ដើម​ធ្វើ​ការ​តវ៉ា។ គាត់​ព្យាយាម​ស្រែក ប៉ុន្តែ​អត់​មាន​ចម្លើយ​ឆ្លើយ​តប​មក​វិញ​ថា គួរ​តែ​ដោះ​យ៉ាង​ម៉េច​អី​យ៉ាង​ម៉េច»

កន្លង​មក អាជ្ញាធរ​ខេត្ត​បាន​អនុញ្ញាត​ឲ្យ​មាន​ការ​វាស់វែង​បែង​ចែក​ដី​ធ្លី​នៅ​តំបន់​នោះ ហើយ​ប្រកាស​ឲ្យ​អ្នក​ភូមិ​កាន់​កាប់​ដី​នៅ​ទី​ណា​រក្សា​ទុក​នៅ​ទី​នោះ។ ចំណែក​ប្រជាពលរដ្ឋ​ដែល​អត់​ទាន់​បាន​ទទួល​ដី ត្រូវ​រៀប​ចំ​វាស់​ទៅ​កន្លែង​ផ្សេង។ ប៉ុន្តែ សកម្មភាព​ជាក់​ស្ដែង ក្រុម​អាជ្ញាធរ​ពុំ​អនុវត្ត​ដូច្នេះ​ឡើយ ពួក​គេ​បាន​វាស់​ដី​រំកិល​ឲ្យ​អ្នក​ភូមិ​ចាស់ ទៅ​នៅ​កន្លែង​ផ្សេង ចំណែក​ឯ​អ្នក​ភូមិ​ជា​អ្នក​ចំណូល​ថ្មី ទទួល​បាន​ដី​នៅ​កន្លែង​ដី​ចាស់។ បញ្ហា​នេះ បាន​ធ្វើ​ឲ្យ​កើត​មាន​បញ្ហា​ជា​បន្តបន្ទាប់។

មន្ត្រី​អង្គការ​លីកាដូ ដដែល​អត្ថាធិប្បាយ​ថា ផ្អែក​លើ​គោលការណ៍​ច្បាប់ ដី​នៅ​តំបន់​នោះ​ឋិត​នៅ​ជា​ដី​របស់​សហគមន៍។ ក្រុម​អាជ្ញាធរ​មិន​អាច​ធ្វើ​ការ​បែង​ចែក​ធ្វើ​ជា​កម្មសិទ្ធិ​ឯកជន​បាន​នោះ​ទេ។ ប៉ុន្តែ ក្នុង​រយៈពេល​កន្លង​មក គេ​សង្កេត​ឃើញ​ថា ក្រុម​អាជ្ញាធរ​បាន​បែង​ចែក​ដី​នៅ​តំបន់​នោះ​ឲ្យ​ប្រជាពលរដ្ឋ​ក្នុង​មួយ​គ្រួសារ​បាន ៥​ហិកតារ៖ «បើ​វា​ជា​ដី​សម្បទាន​សង្គម​កិច្ច វា​គួរ​មាន​គណៈកម្មការ​ជាក់​លាក់​មួយ ហើយ​កន្លង​មក​យើង​ឃើញ​មាន​តែ​ខាង​មន្ត្រី​បរិស្ថាន និង​ខាង​សាលា​ស្រុក​ម៉ាឡៃ គេ​ជា​អ្នក​ចុះ​វាស់វែង​បែង​ចែក ពិគ្រោះ​ជាមួយ​មេ​ភូមិ​នៅ​ហ្នឹង ដែល​ជា​អ្នក​ភូមិ​អះអាង​ថា ធ្លាប់​មាន​ទំនាស់​ជាមួយ​អ្នក​ភូមិ​គាត់​ចាប់​ផ្ដើម​បង្ក​បញ្ហា​យក​ដី​របស់​គាត់​ទៅ​លក់​ឲ្យ​អ្នក​ផ្សេង ធ្វើ​ឲ្យ​គាត់​បាត់​បង់​ផល​ប្រយោជន៍»

អតីត​អភិបាល​ស្រុក​ម៉ាឡៃ លោក ទេព ឃុនណាល់ បាន​ធ្វើ​ពាក្យ​ស្នើ​សុំ​ទៅ​រដ្ឋាភិបាល កាត់​ដី​ព្រៃ​បរិស្ថាន​ក្នុង​ដែន​ជម្រក​សត្វ​ព្រៃ​រនាម​ដូន​សំ ទំហំ ១.៥០០​ហិកតារ។ ក្រោយ​មក លោក​នាយក​រដ្ឋមន្ត្រី ហ៊ុន សែន ក៏​បាន​ចេញ​អនុក្រឹត្យ​កាត់​ដី​នោះ​ចែក​ជូន​ប្រជាពលរដ្ឋ​ជាង ៥០០​គ្រួសារ។ ទីតាំង​ដី​នោះ ស្ថិត​នៅ​ភូមិ​ស្រឡៅជ្រំ ១​ពាន់​ហិកតារ និង​នៅ​ចំណុច​ភ្នំ​យាយ​សំ ៥០០​ហិកតារ ក្នុង​ឃុំ​ទួលពង្រ ស្រុក​ម៉ាឡៃ ខេត្ត​បន្ទាយមានជ័យ។

ប៉ុន្តែ ក្នុង​រយៈពេល​កន្លង​មក មាន​ប្រជាពលរដ្ឋ​ជា​ច្រើន​គ្រួសារ​បាន​លើក​គ្នា​ឡើង​មក​តវ៉ា​ករណី​ទំនាស់​ដីធ្លី​នេះ​ជា​បន្តបន្ទាប់ ដើម្បី​ទាមទារ​ឲ្យ​អាជ្ញាធរ​ខេត្ត​បន្ទាយមានជ័យ ចុះ​ដោះស្រាយ​ជូន​ពួក​គាត់។ ក្រុម​អ្នក​ភូមិ​ចោទ​ថា ដី​នោះ​ត្រូវ​បាន​អាជ្ញាធរ​មូលដ្ឋាន​ឃុបឃិត​យក​ទៅ​លក់​ឲ្យ​ឈ្មួញ។

ចំណែក​ឯ​អាជ្ញាធរ​ខេត្ត ធ្លាប់​បាន​បញ្ជាក់​ថា ក្រុម​ការងារ​របស់​ខេត្ត​រួម​ជាមួយ​ស្ថាប័ន​ជំនាញ​ទាំងអស់ នឹង​រួម​គ្នា​ដោះស្រាយ​ជូន​ប្រជាពលរដ្ឋ។ ប៉ុន្តែ មន្ត្រី​អង្គការ​បញ្ជាក់​ថា រហូត​មក​ដល់​ពេល​នេះ ការ​រៀប​ចំ​ដីធ្លី​នៅ​តំបន់​នោះ​ពុំ​ទាន់​បាន​ត្រឹមត្រូវ​នៅ​ឡើយ។ លោក​បន្ត​ថា ដើម្បី​រក្សា​គោលការណ៍​ផ្ដល់​ផល​ប្រយោជន៍​ជូន​ប្រជាពលរដ្ឋ អាជ្ញាធរ​គួរ​រក្សា​ទុក​ដី​ឲ្យ​ប្រជាពលរដ្ឋ​រស់​នៅ​កន្លែង​ណា កាន់​កាប់​ដី​ជាក់​ស្ដែង​នៅ​កន្លែង​នោះ​សិន។ ចំណែក​ឯ​អ្នក​ចូល​ទៅ​ឈូស​ឆាយ​ដី​ព្រៃ​នោះ គឺ​ជា​ការ​រំលោភ​ច្បាប់។ ហើយ​បញ្ហា​នេះ ទាមទារ​អាជ្ញាធរ​ខេត្ត​បន្ទាយមានជ័យ ត្រូវ​មាន​វិធាន​ការ​ហាម​ឃាត់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។