អាជ្ញាធរខេត្តកំពង់ឆ្នាំងរងការរិះគន់ថាមិនអើពើដោះស្រាយបញ្ហាដីធ្លីជូនពលរដ្ឋ
2015.03.10
ជនរងគ្រោះក្នុងរឿងដីធ្លី និងមន្ត្រីសិទ្ធិមនុស្ស រិះគន់អាជ្ញាធរខេត្តកំពង់ឆ្នាំង ថាមិនអើពើដោះស្រាយវិវាទដីធ្លីជាច្រើនករណីនៅក្នុងខេត្ត ដែលបានអូសបន្លាយអស់រយៈពេលច្រើនឆ្នាំមកហើយនោះ។ ការថ្លែងរិះគន់នេះ បន្ទាប់តំណាងពលរដ្ឋ ៥គ្រួសារ ដែលមានបញ្ហាដីជាមួយក្រុមហ៊ុន អូ.ជេ.អាយ (OJI) ដាំដើមឈើម្សៅក្រដាសនៅស្រុកសាមគ្គីមានជ័យ ស្វែងរកអន្តរាគមន៍ពីមន្ត្រីសិទ្ធិមនុស្ស។
តំណាងពលរដ្ឋ ៥គ្រួសារក្នុងចំណោមពលរដ្ឋ ១៥៧គ្រួសារ ដែលភាគច្រើនមិនមែនជាអ្នករស់នៅឃុំត្បែងខ្ពស់ និងឃុំក្រាំងល្វា ស្រុកសាមគ្គីមានជ័យ កំពុងខ្វល់ចិត្តខ្លាចបាត់បង់ដីដែលខ្លួនទិញ ខណៈជីវភាពរបស់ពួកគាត់ខ្លះធ្លាក់ដុនដាបខ្លាំង។ ក្រុមពលរដ្ឋ ស្នើឲ្យរដ្ឋាភិបាលពិនិត្យករណីនេះ និងពន្លឿនការដោះស្រាយឲ្យបានឆាប់ ព្រោះអាជ្ញាធរមូលដ្ឋានមិនសូវគិតពីកង្វល់ពលរដ្ឋឡើយ។
តំណាងប្រជាពលរដ្ឋម្នាក់ អ្នកស្រី ឃុន ចរិយា ថ្លែងនៅថ្ងៃទី១០ ខែមីនា ថា អស់រយៈពេលជាង ៤ឆ្នាំដែលគ្រួសារគាត់ និងអ្នកស្រុកសាមគ្គីមានជ័យ ជាច្រើនទៀតមានបញ្ហាដីធ្លី ហើយអ្នកស្រីខ្នះខ្នែងរកអន្តរាគមន៍ពីគ្រប់ស្ថាប័នជាតិ និងស្ថាប័នពាក់ព័ន្ធនៅមូលដ្ឋាន។ អ្នកស្រីថា រហូតមកដល់ពេលនេះ ពុំមានពន្លឺនៃការដោះស្រាយអ្វីសោះ ហើយថ្មីៗនេះគាត់សុំជួបអភិបាលខេត្តកំពង់ឆ្នាំង ដើម្បីសួរនាំរឿងដីធ្លីរបស់ពួកគាត់ ប៉ុន្តែមន្ត្រីនៅការិយាល័យរដ្ឋបាលសាលាខេត្ត មិនឲ្យចូលជួប៖ «ក្មួយដែលគេធ្វើការរាជការហ្នឹង យើងប្រជាជនអត់អាចចូលបានទេ។ ដំបូងគេភរថាអត់នៅ ដល់ពេលអ៊ីចឹងខ្ញុំថាចុះខ្ញុំមានក្រដាសចេញពីរដ្ឋសភាហើយ ហេតុអីខ្ញុំចូលអត់បាន។ ឥឡូវឲ្យខ្ញុំទៅធ្វើខាងណា ដើម្បីឲ្យខ្ញុំជួបចៅហ្វាយខេត្ត គេឆ្លើយថា រឿងហ្នឹងគេអត់ដឹងទេ យើងជាប្រជាពលរដ្ឋមិនអាចមានសិទ្ធិជួបចៅហ្វាយខេត្ត គេឆ្លើយអ៊ីចឹងក្មួយ»។
ឯកសារ និងតួលេខដែលវិទ្យុអាស៊ីសេរី ទទួលបានបង្ហាញថា នៅក្នុងឆ្នាំ២០១៣ មានពលរដ្ឋក្នុងឃុំក្រាំងល្វា និងឃុំត្បែងខ្ពស់ នៃស្រុកសាមគ្គីមានជ័យ ចំនួន ៥៨គ្រួសារ និងមានពលរដ្ឋមកពីក្រៅស្រុកចំនួន ៩៩គ្រួសារទៀត មានដីនៅក្នុងតំបន់អភិវឌ្ឍន៍ដាំដើមឈើម្សៅក្រដាស ហ៊ុន សែន មានក តាមរយៈការទិញដូរមានលិខិតស្នាមទទួលស្គាល់ដោយអាជ្ញាធរភូមិឃុំ។ ពួកគាត់នាំគ្នាដាក់ពាក្យបណ្ដឹងទៅអាជ្ញាធរស្រុក ដើម្បីឲ្យជួយដោះស្រាយ ប៉ុន្តែពុំមានដំណោះស្រាយអ្វីឡើយ ដោយគេបញ្ជូនពាក្យបណ្ដឹង និងឯកសារពាក់ព័ន្ធមកគណៈកម្មការថ្នាក់ខេត្ត ដើម្បីពិនិត្យ និងដោះស្រាយបន្តទៀត។
វិទ្យុអាស៊ីសេរី មិនអាចសុំការអត្ថាធិប្បាយអំពីបញ្ហានេះពីអភិបាលខេត្តកំពង់ឆ្នាំង លោក ឈួរ ច័ន្ទឌឿន និងអភិបាលរងខេត្ត លោក ចេញ ញ៉ាន់ បានទេនៅថ្ងៃទី១០ ខែមីនា ដោយម្នាក់ចុចផ្ដាច់ទូរស័ព្ទ និងម្នាក់ទៀតប្រាប់ថាកំពុងជាប់រវល់ប្រជុំ។
ប៉ុន្តែ អភិបាលស្រុកសាមគ្គីមានជ័យ លោក វន ស៊ីផា ថ្លែងថា ករណីនេះហួសពីសមត្ថកិច្ចដោះស្រាយរបស់ស្រុក ហើយអាជ្ញាធរខេត្តកំពុងប្រមូលឯកសារ និងព័ត៌មានបន្ថែមទៀតបញ្ជូនទៅថ្នាក់ជាតិ ដើម្បីដោះស្រាយ៖ «ថ្នាក់ស្រុកដោះវាមិនចេញទេ ព្រោះសុទ្ធតែមានលិខិតថ្នាក់ជាតិ ប៉ុន្តែខ្ញុំសូមជម្រាបថា ដូចថាយើងក្រដាសមួយសន្លឹកថា មានអាជ្ញាធរឃុំបញ្ជាក់ បានហ៊ានទិញ (ដី) មិនមែនទេ ជួលកាលហ្នឹងគាត់ផ្ដិតមេដៃជាមួយគ្នាយកទៅឲ្យមេឃុំស៊ីញេ អ្នកទិញមិនទាំងទៅផង មែនទែន! គាត់ទៅទារលុយពីហ្នឹងវិញទៅ (អ្នកលក់)»។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តកំពង់ឆ្នាំង លោក សំ ច័ន្ទគា មានប្រសាសន៍ថា គណៈកម្មការសុរិយោដីដែលរដ្ឋាភិបាលបានបង្កើតតាមអនុក្រឹត្យតាំងពីថ្នាក់ស្រុករហូតដល់ថ្នាក់ជាតិនោះ សម្រាប់ខេត្តកំពង់ឆ្នាំង មិនទាន់ឃើញមានករណីដីធ្លីណាមួយត្រូវបានដោះស្រាយដោយគណៈកម្មការនោះទេ។ ករណីដីធ្លីនេះ លោកសង្កេតឃើញថា រដ្ឋបាលស្រុកមិនហ៊ានដោះស្រាយអ្វីទាំងអស់ ក្រៅពីរង់ចាំបញ្ជាពីអាជ្ញាធរថ្នាក់ខេត្តមកវិញ៖ «ខ្ញុំយល់ថា បើរដ្ឋាភិបាល ជាពិសេសគណបក្សកាន់អំណាចនេះបើលោកនៅតែបណ្ដែតបណ្ដោយអ៊ីចឹងទៀតទេ វានឹងកើតការមិនគោរពច្បាប់»។
ក្រុមហ៊ុនជប៉ុន អូ.ជេ.អាយ ទទួលបានដីវិនិយោគទំហំ ១ម៉ឺនហិកតារពីរដ្ឋាភិបាលកម្ពុជា ដើម្បីដាំដើមអាកាស្យា និងប្រភេទឈើម្សៅក្រដាស នៅស្រុកសាមគ្គីមានជ័យ កាលពីអំឡុងឆ្នាំ១៩៩៣។
មន្ត្រីមូលដ្ឋានអះអាងថា បច្ចុប្បន្នក្រុមហ៊ុនអនុវត្តការដាំដុះរបស់ខ្លួនបានទំហំដីជាង ៥ពាន់ហិកតារហើយ ចំណែកផ្ទៃដី ៥ពាន់ហិកតារទៀត កំពុងឈូសឆាយដាំបន្ត តែប៉ះពាល់ដីពលរដ្ឋមិនទាន់ដោះស្រាយចប់៕