ពលរដ្ឋមានជម្លោះដីធ្លីនៅបឹងតាមោក ដាក់ញត្តិស្វែងរកដំណោះស្រាយដីធ្លីពីក្រសួងដែនដីជាថ្មី
2023.01.12
ពលរដ្ឋរស់នៅក្បែរបឹងតាមោកដាក់ញត្តិនៅក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី១២ មករា ២០២៣។
រូប៖ ពលរដ្ឋផ្ដល់ឱ្យ
ប្រជាពលរដ្ឋរស់នៅក្បែរបឹងតាមោកជាងមួយរយ (១០៤)ខ្នងផ្ទះ ស្មើនឹង ២៤៥គ្រួសារ ដាក់ញត្តិនៅក្រសួងរៀបចំដែនដី នគរូបនីយកម្ម និងសំណង់ ដើម្បីសុំប្លង់កម្មសិទ្ធិដីធ្លីសៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណ ព្រោះពួកគាត់កំពុងប្រឈមនឹងការបណ្ដេញចេញទាំងបង្ខំពីផ្ទះសម្បែង។ មន្ត្រីសង្គមស៊ីវិលថា រដ្ឋាភិបាលគ្មានឆន្ទៈដោះស្រាយវិវាទដីធ្លីជូនពលរដ្ឋពិតប្រាកដ ទើបពលរដ្ឋនៅតែស្រែករកយុត្តិធម៌ពីអ្នកមានអំណាច។
ពលរដ្ឋប្រមាណ៣០នាក់តំណាងឲ្យ ២៤៥គ្រួសារ យកញត្តិមកដាក់ជាលើកទី២ អមដោយការលើកបដារូបលោកនាយករដ្ឋមន្ត្រី ហ៊ុន សែន ភ្ជាប់នឹងពាក្យ អរគុណសន្តិភាព នៅមុខក្រសួងរៀបចំដែនដី និងខុទ្ទកាល័យនាយករដ្ឋមន្ត្រី នៅថ្ងៃទី១២ ខែមករា ដើម្បីឲ្យក្រសួងដោះស្រាយសំណើរបស់ពួកគាត់ ឲ្យបានឆាប់។
តំណាងពលរដ្ឋនៅបឹងតាមោក លោកស្រី ប្រាក់ សុភា ប្រាប់វិទ្យុអាស៊ីសេរី ថា លោកស្រី និងពលរដ្ឋផ្សេងទៀតនៅបឹងតាមោក មិនព្រមទៅរស់នៅកន្លែងដែលរដ្ឋាភិបាលដោះដូរឲ្យនោះទេ ព្រោះទីតាំងថ្មីនោះឆ្ងាយពីផ្លូវមិនអាចប្រកបរបរចិញ្ចឹមជីវិតបាន។ លោកស្រីបន្តថា ទោះជាលោកស្រីស្លាប់ក៏មិនចាកចេញពីទឹកដីនេះដែរ ហើយលោកស្រីស្នើដល់លោកនាយករដ្ឋមន្ត្រី ហ៊ុន សែន ផ្ដល់សិទ្ធិឲ្យលោកស្រី និងពលរដ្ឋដទៃបានរស់នៅលើដី៥ហិកតារនេះផង។
លោកស្រី ប្រាក់ សុភា៖ «នៅតែទទូចសុំឲ្យសម្ដេចនាយកមេត្តាពិចារណា ចំណាត់ការ(ថ្នាក់)ក្រោមរបស់លោកសុំឲ្យកាត់ឃ្វាលឲ្យពួកយើងទៅ។ សុំកុំឲ្យមានការឃុបឃិតលក់កញ្ចប់ក្រោមតុ ព្រោះអីក្រោយសហគមន៍យើងគឺអភិបាល ឃួង ស្រេង ហើយនិងដន្លង ឃួង ស្រេង ហើយយើងចង់បញ្ជាក់ថា ពួកយើងអត់បាននៅប៉ះដីអនុក្រឹត្យផ្ទៃបឹងរបស់រាជរដ្ឋាភិបាលទេ គឺយើងនៅលើដីស្រែប្រាំង ដែលពួកយើងកាន់កាប់អាស្រ័យផល តាំងពីឆ្នាំ១៩៩០ – ៩០ជាង រហូតមកដល់២០២៣»។
ស្រដៀងគ្នានេះដែរ ពលរដ្ឋម្នាក់ទៀតរស់នៅបឹងតាមោក លោកស្រី ស៊ា ដាវី ឲ្យដឹងថា លោកស្រីអស់ជំនឿលើអាជ្ញាធរថ្នាក់ក្រោមដោះស្រាយវិបត្តិដីធ្លីឲ្យលោកស្រីទៀតហើយ គឺមានតែសង្ឃឹមលើលោក ហ៊ុន សែន ម្នាក់ប៉ុណ្ណោះ ដែលអាចជួយពលរដ្ឋបាន។ លោកស្រីបញ្ជាក់ថា លោកស្រីមកដាក់ញត្តិនៅក្រសួងរៀបចំដែនដី ដើម្បីឲ្យក្រសួងពន្លឿនការចេញប័ណ្ណកម្មសិទ្ធិ និងសុំអភិវឌ្ឍន៍នៅនឹងកន្លែង។
លោកស្រី ស៊ា ដាវី៖ «ពិបាកចិត្ត យើងខ្លាចមានការបណ្ដេញចេញដោយបង្ខំ ដោយប្រើប្រព័ន្ធច្បាប់ ផ្លូវតុលាការអ៊ីចឹង ហើយនិងចំណាត់ការដូចកាលពីឆ្នាំទៅមានប្ដឹងតំណាងសហគមន៍របស់ពួកយើងចំនួន ៧នាក់ ហើយយើងបារម្ភខ្លាចពីការបណ្ដេញចេញដោយបង្ខំ ដោយសារតែយើងមិនព្រមទទួលដំណោះស្រាយតាមអាជ្ញាធរខណ្ឌ ដែលគាត់តម្រូវឲ្យយើងទៅទីតាំងថ្មី»។
ដីប្រមាណប្រាំហិកតារជាលំនៅឋាន របស់ពលរដ្ឋបឹងតាមោក ឃុំសំរោង ខណ្ឌព្រែកព្នៅ រាជធានីភ្នំពេញ ដែលពួកគាត់មករស់នៅ និងអាស្រ័យផលតាំងពីឆ្នាំ១៩៩០ ឥឡូវប្រឈមនឹងការបណ្ដេញចេញទាំងបង្ខំ ពីសំណាក់អាជ្ញាធរនៅទីនោះ។ ពួកគាត់ប្រមាណ ៣០នាក់ មានទាំងកុមារតូចៗផង ស្នើសុំក្រសួងរៀបចំដែនដី និងលោក ហ៊ុន សែន អនុញ្ញាតឲ្យពួកគាត់រស់នៅក្បែរបឹងតាមោកបន្តទៀត។
អាជ្ញាធរបង្ខំឲ្យពលរដ្ឋទៅរស់នៅទីតាំងថ្មី ទី១ ខាងភូមិសំរោង ទី២ ទៅខាងបឹងតាមោក ពញាពន់ ដែលជាដីប្រឡាយចាស់ នៅឆ្ងាយពីផ្លូវជាតិលេខ១៣០ ប្រមាណ៣០០ម៉ែត្រ ដែលធ្វើឲ្យពួកគាត់ពិបាកប្រកបរបរចិញ្ចឹមជីវិត និងកូនចៅពិបាកទៅរៀនសូត្រ។ សម្រាប់មួយគ្រួសារមានដីអាចសង់ផ្ទះមួយបាន។
វិទ្យុអាស៊ីសេរី មិនទាន់អាចទាក់ទងសុំការអត្ថាធិប្បាយជុំវិញបញ្ហានេះ ពីអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត និងអភិបាលក្រុងភ្នំពេញ លោក ឃួង ស្រេង បានទេ នៅថ្ងៃទី១២ ខែមករា ដោយទូរស័ព្ទហៅចូលតែពុំមានអ្នកទទួល។
ជុំវិញរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា រដ្ឋាភិបាលមិនមានចិត្តចង់ដោះស្រាយវិវាទដីធ្លីនៅបឹងតាមោកជូនពលរដ្ឋទេ ព្រោះជម្លោះនេះអូសបន្លាយជាច្រើនឆ្នាំហើយ។ លោកបន្តថា ដីបឹងនេះជាតំបន់គោលដៅអភិវឌ្ឍន៍ ដែលក្រុមអ្នកមានលុយ មានអំណាចកំពុងប្រកួតប្រជែង ដើម្បីកាន់កាប់រៀងៗខ្លួន ហើយពលរដ្ឋក្រីក្រមិនងាយទទួលប្រយោជន៍ពីការអភិវឌ្ឍន៍នេះទេ។
លោក វណ្ណ សូផាត៖ «អ្នកមានអំណាចអ៊ីចឹងសុទ្ធតែឲ្យដីណា!រាប់ហិកតារ អ៊ីចឹងទៅឲ្យប្រជាពលរដ្ឋអត់មានរវីរវល់ដោះស្រាយ។ អ៊ីចឹងខ្ញុំឃើញ អ្នកដែលបង្កធ្វើឲ្យមានអតុល្យភាពសង្គម អតុល្យភាពយុត្តិធម៌សង្គម មិនមានយុត្តិធម៌សង្គម គ្មាននរណាក្រៅពីរដ្ឋ ក្រៅពីអាជ្ញាធរទេ»។
ពលរដ្ឋនៅបឹងតាមោក មិនសុខចិត្ត ដែលលោកអភិបាលក្រុងភ្នំពេញ លោក ឃួង ស្រេង អនុញ្ញាតឲ្យក្រុមហ៊ុនបុរី ប៊ុន ជេស្ឋ មានប្លង់កម្មសិទ្ធិត្រឹមត្រូវ ចំណែកពលរដ្ឋក្រីក្រស្នើសុំប័ណ្ណស្នាក់នៅ និងប័ណ្ណកម្មសិទ្ធិដីធ្លី លោកអភិបាលក្រុងរូបនេះមិនចេញឲ្យពួកគេនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម