អតីតអ្នកបឹងកក់និងបុរីកីឡាដាក់ញត្តិសុំអន្តរាគមន៍ពីតំណាងអង្គការសហប្រជាជាតិ
2018.11.02
ពលរដ្ឋមានជម្លោះដីធ្លី ចំនួនពីរសហគមន៍នៅរាជធានីភ្នំពេញ បាននាំគ្នាដាក់ញត្តិស្វែងរកកិច្ចអន្តរាគមន៍ពីតំណាងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) នៅការិយាល័យឧត្ដមស្នងការអង្គការសហប្រជាជាតិ ប្រចាំនៅទីក្រុងភ្នំពេញ។ មន្ត្រីការិយាល័យឧត្ដមស្នងការអង្គការសហប្រជាជាតិ បានចេញមកទទួលញត្តិ និងសន្យាដាក់ជូនអ្នកស្រី រ៉ូណា ស្មីត ហើយប្រាប់ក្រុមអ្នកមានជម្លោះដីធ្លី ថា ស្ថាប័នអន្តរជាតិមួយនេះ តែងឃ្លាំមើលបញ្ហាជម្លោះដីធ្លីនេះជានិច្ច។
ក្រុមស្ត្រីមានជម្លោះដីធ្លីនៅសហគមន៍អតីតបឹងកក់ និងបុរីកីឡា សង្ឃឹមថា របបក្រុងភ្នំពេញ នឹងទទួលយកសំណើរបស់អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត ករណីជម្លោះដីធ្លីរ៉ាំរ៉ៃរបស់ពួកគេ។
តំណាងអតីតអ្នកបឹងកក់ម្នាក់ អ្នកស្រី ស៊ា ណារ៉េត ប្រាប់ថា ក្នុងការដាក់ញត្តិទៅឧត្ដមស្នងការអង្គការសហប្រជាជាតិនៅក្រុងភ្នំពេញ មន្ត្រីម្នាក់នៃអង្គការនេះ បានចេញមកទទួលញត្តិ និងសន្យាដាក់ជូនអ្នកស្រី រ៉ូណា ស្មីត។ អ្នកមានជម្លោះដីធ្លីរូបនេះ បន្តថា ជំនួយការអ្នកស្រី រ៉ូណា ស្មីត ប្រាប់ថា ស្ថាប័នអន្តរជាតិមួយនេះ តែងតាមដានជានិច្ចករណីជម្លោះដីធ្លីនៅបឹងកក់ បុរីកីឡា និងសហគមន៍ដទៃទៀត ទូទាំងប្រទេស៖ «ជួបជំនួយការ គាត់ជាបរទេសគាត់ថាគាត់ នឹងយកលិខិតទាំងនឹងទៅដាក់ជូនទៅអ្នកស្រី រ៉ូណា ស្មីត លើកនឹងគាត់និងជួយឃ្លាំមើលសិទ្ធិមនុស្ស និងសិទ្ធិលំនៅឋាន»។
អ្នកស្រី ស៊ា ណារ៉េត បន្ដថា ក្នុងញត្តិរួមគ្នារបស់ពលរដ្ឋអតីតបឹងកក់ និងបុរីកីឡា បានស្នើសុំឲ្យ លោកស្រី រ៉ូណា ស្មីត ដោះស្រាយបញ្ហាដីធ្លី នៅបឹងកក់ និងបុរីកីឡា ឲ្យបានឆាប់រហ័ស។ ជាងនេះ ទៅទៀត ពលរដ្ឋទាំងពីរ សហគមន៍បានស្នើសុំឲ្យអ្នករាយការណ៍ពិសេសទទួលបន្ទុកសិទ្ធិមនុស្ស ឃ្លាំមើលសវនាការ និងដីកាកោះហៅ ពលរដ្ឋមានជម្លោះដីធ្លីទាំងពីរសហគមន៍ ឲ្យឡើងតុលាការនៅថ្ងៃទី១ និងថ្ងៃទី២ វិច្ឆិកា ក្រោមការចោទប្រកាន់ពីម្ចាស់ក្រុមហ៊ុនអភិវឌ្ឍន៍តំបន់បុរីកីឡា ថាពលរដ្ឋទាំងពីរសហគមន៍ បានបំផ្លិចបំផ្លាញទ្រព្យសម្បត្តិឯកជន និងបទគំរាមកំហែងបញ្ជា ដោយមានលក្ខខណ្ឌ។
អ្នកស្រី រ៉ូណា ស្មីត មកបំពេញបេសកកម្មនៅប្រទេសកម្ពុជា ចាប់ពីថ្ងៃទី២៩ ខែតុលា ដល់ថ្ងៃទី៨ ខែ វិច្ឆិកា ឆ្នាំ២០១៨ ដើម្បីធ្វើរបាយការណ៍ស្ដីពីស្ថានភាពសិទ្ធិមនុស្សនៅកម្ពុជា ដាក់ទៅអង្គការសហប្រជាជាតិប្រចាំឆ្នាំ។ ក្នុងដំណើរបេសកកម្មអ្នកស្រី នឹងទទួលជួបតំណាងអង្គការសង្គមស៊ីវិល ភាគីរបបក្រុងភ្នំពេញ និងចង់ជួបប្រធានគណបក្សសង្គ្រោះជាតិ លោក កឹម សុខា ដែលកំពុងជាប់ឃុំឃាំងនៅក្នុងផ្ទះ ប៉ុន្តែ ត្រូវបានបដិសេធពីតុលាការក្នុងរបបលោក ហ៊ុន សែន។
ក្រុមពលរដ្ឋមានជម្លោះដីធ្លី អះអាងថា រាល់ពេលអ្នករាយការណ៍ពិសេសទទួលបន្ទុកសិទ្ធិមនុស្សមកបំពេញបេសកកម្មនៅកម្ពុជា ពួកគាត់តែងបានដាក់ញត្តិ ស្វែងរកកិច្ចអន្តរាគមន៍ជម្លោះដីធ្លីជានិច្ច និងសង្ឃឹមថា លើកនេះ របបលោក ហ៊ុន សែន នឹងយកចិត្តទុកដាក់លើសំណើរបស់ពួកគាត់ តាមរយៈអ្នកស្រី រ៉ូណា ស្មីត ទៅពិចារណា និងដោះស្រាយមិនដូចលើកមុនៗ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត យល់ថា នេះជាសិទ្ធិរបស់ពលរដ្ឋក្នុងការដាក់ញត្តិទាមទាររកដំណោះស្រាយជម្លោះដីធ្លី។ សង្គមស៊ីវិលរូបនេះ ជឿជាក់ថា អ្នករាយការណ៍ពិសេស នឹងយកសំណើពលរដ្ឋទៅជជែកជាមួយមន្ត្រីក្នុងរបបក្រុងភ្នំពេញ និងក្រសួងយុត្តិធម៌ លើករណីដំណោះស្រាយជម្លោះដីធ្លីរ៉ាំរ៉ៃ និង ពាក្យបណ្ដឹងលើពលរដ្ឋទាំងនោះ។ ប៉ុន្តែ លោកជឿថា ខាងរបបក្រុងភ្នំពេញ នឹងប្រើហេតុផលដូចមុនដដែល គឺ រុញការទទួលខុសត្រូវ ទៅខាងតុលាការ ព្រោះនេះជាអំណាចតុលាការ ដែលរបបក្រុងភ្នំពេញ មិនមានសិទ្ធិជ្រៀតជ្រែកជាដើម។ លោក វណ្ណ សូផាត បន្ដថា ប្រសិនបើរបបក្រុងភ្នំពេញនៅបន្តប្រើប្រាស់ហេតុផល ជាជាងការដោះស្រាយ ជាការគួរឲ្យសោកស្ដាយ ហើយនឹងធ្វើឲ្យជម្លោះកាន់តែអូសបន្លាយ ការតវ៉ានឹងនៅតែបន្ដ៖ «យើងខាងអង្គការសង្គមស៊ីវិលនេះយើងយល់ឃើញ ថារឿងនេះជាការប្រើប្រាស់សិទ្ធិរបស់គាត់ប៉ុន្តែសំខាន់នៅលើឆន្ទៈផ្ទាល់របស់ស្ថាប័នដែលពាក់ព័ន្ធ របស់រដ្ឋាភិបាលក៏ដូចជាតុលាការផងដែរ អាហ្នឹងពាក់ព័ន្ធហើយអ្នកស្រី រ៉ូណា ស្មីត គាត់តែងតែលើក យោបល់ទៅរដ្ឋាភិបាល អាហ្នឹងអាស្រ័យលើស្ថាប័ននោះនិងតុលាការនោះទេ»។
ទោះយ៉ាងណា ពលរដ្ឋមានជម្លោះដីធ្លី សហគមន៍អតីតបឹងកក់ និងបុរីកីឡា ដែលបានចងក្រងជួយគ្នាទៅវិញទៅមកនោះ ប្ដេជ្ញាថា ប្រសិនបើ មន្ត្រីរបបក្រុងភ្នំពេញមិនយកចិត្តទុកដាក់ដោះស្រាយ សំណើរបស់ពួកគេ តាមរយៈអ្នករាយការណ៍ពិសេស អ្នកស្រី រ៉ូណា ស្មីត ទេ ពួកគេនឹងបន្តការទាមទារ និងដាក់ញត្តិនៅមុខភូមិគ្រឹះ មេដឹកនាំរបបក្រុងភ្នំពេញ លោក ហ៊ុន សែន នៅជិតវិមានឯករាជ្យបន្ដទៀត៕