អាជ្ញាធរព្រះវិហារដាក់វិធានការដោះស្រាយជម្លោះដីធ្លីរវៀងក្រុមហ៊ុនមេត្រីភាព និងពលរដ្ឋ
2019.02.08
អាជ្ញាធរខេត្តព្រះវិហារថ្មីៗនេះ បានកោះហៅភាគីពាក់ព័ន្ធរួមមាន ប្រធានមន្ទីរបរិស្ថាន មន្ទីរកសិកម្ម តំណាងក្រុមហ៊ុន និងមន្ត្រីសង្គមស៊ីវិលមកប្រជុំពិភាក្សារកដំណោះស្រាយជម្លោះដីធ្លីរវៀងពលរដ្ឋ ៣៣០គ្រួសារ និង ក្រុមហ៊ុនមេត្រីភាពដែលកើតមានឡើងកាលពីឆ្នាំ ២០១៨។ មន្ត្រីសង្គមស៊ីវិលសាទរវិធានការនេះ ក៏ប៉ុន្តែស្នើឱ្យអាជ្ញាធរ និងតុលាការដោះលែងពលរដ្ឋ ១៤នាក់ ហើយមានម្នាក់បានបាត់ខ្លួន។
វិវាទដីធ្លីរវៀងពលរដ្ឋ ៣៣០គ្រួសារ រស់នៅភូមិអន្ទិល ឃុំយាង ស្រុកជាំក្សាន្ត ខេត្តព្រះវិហារ ជាមួយ ក្រុមហ៊ុនមេត្រីភាព របស់ឧកញ៉ា អាន ម៉ារឌី រហូតឈានដល់ការចាប់ខ្លួនពលរដ្ឋ ១៤នាក់បញ្ជូនទៅតុលាការ ត្រូវបានអភិបាលខេត្តព្រះវិហារ លោក អ៊ុន ចាន់ដា ដាក់ចេញវិធានការ ៥ចំណុច ដើម្បីបញ្ចប់ជម្លោះកាលពីពេលថ្មីៗនេះ។
វិធានការ ៥ចំណុចទាំងនោះរួមមាន បង្កើតក្រុមការងារ វាស់វែងនិងដោះស្រាយផលប៉ះពាល់ជាក់ស្ដែង ជំរុញឱ្យមានការចុះបញ្ជីដីក្រុមហ៊ុនមេត្រីភាព ស្នើឱ្យក្រុមហ៊ុន កំណត់ព្រំដី ឱ្យបានច្បាស់លាស់ និងត្រូវមានកម្លាំងការពារសន្តិសុខរបស់ខ្លួន។ ស្នើឱ្យពលរដ្ឋ ដែលបានអាស្រ័យផលហើយ ត្រូវរក្សាភាពស្ងប់ស្ងាត់ និងបញ្ឈប់ការកាប់ទន្ទ្រានលើដីមានជម្លោះបន្តទៀត ត្រូវរង់ចាំអាជ្ញាធរពាក់ព័ន្ធសម្របសម្រួល និងស្នើឱ្យតុលាការខេត្តនេះ បញ្ឈប់ការចេញដីកាកោះហៅ ឬចាប់ខ្លួនពលរដ្ឋបន្តទៀត។
មន្ត្រីសម្របសម្រួលសមាគមអាដហុក (Adhoc) ខេត្តព្រះវិហារ លោក ឡោ ចាន់ ប្រាប់អាស៊ីសេរី នៅថ្ងៃទី៧ កុម្ភៈថា ក្រុមហ៊ុនមេត្រីភាព និងក្រសួងពាក់ព័ន្ធមិនបានកំណត់ព្រំប្រទល់ដី ដែលក្រុមហ៊ុនវិនិយោគ ឱ្យបានច្បាស់លាស់នោះទេ ដែលជាដើមចម នាំឱ្យកើតមានជម្លោះដីធ្លី។ លោកថា អាជ្ញាធរខេត្តនឹងកាត់ឆ្វៀលផលប៉ះពាល់សម្រាប់ពលរដ្ឋដែលរស់នៅលើដីមុនពេលដែលក្រុមហ៊ុនមិនទាន់មកវិនិយោគ ក៏ប៉ុន្តែពលរដ្ឋដែលទើបតែមកតាំងទីលំនៅថ្មី អាជ្ញាធរនឹងធ្វើអត្តសញ្ញាណកម្ម។ លោករំពឹងថា វិធានការ ៥ចំណុចនេះ នឹងអាចដោះស្រាយជម្លោះដីធ្លីត្រឹមត្រូវ និងយុត្តិធម៌។ តែទោះយ៉ាងណា មន្ត្រីសង្គមស៊ីវិលរូបនេះបារម្ភថា ពលរដ្ឋដែលក្រុមយោធាវារៈ ២៦១ ចាប់ខ្លួន ១៤នាក់ បញ្ជូនទៅតុលាការ ក្នុងនោះមានម្នាក់ឈ្មោះ សុំ មឿន បាត់ខ្លួន រកមិនទាន់ឃើញនៅឡើយទេមកទល់ពេលនេះ៖ «ក្រុមហ៊ុនមកវិនិយោគត្រូវមិនទាន់បានវាយតម្លៃផលប៉ះពាល់បរិស្ថានរួចហើយ និងមានការកំណត់ឱ្យច្បាស់លាស់រួចសិនចាំធ្វើនោះទេ។ នេះសំដៅលើក្រុមហ៊ុនអនុវត្តសិនទៅ ហើយមានផលប៉ះពាល់ហើយ បាននាំគ្នាចុះកំណត់តាមក្រោយ។ ធ្វើមុននៅពេលមានបញ្ហា បានក្រុមហ៊ុនធ្វើការដោះស្រាយ និងការកំណត់តាមក្រោយ គឺខុសគោលការណ៍ច្បាប់ ត្រូវវាយតម្លៃផលប៉ះពាល់បរិស្ថាន និងកំណត់ព្រំប្រទល់អស់ហើយបានធ្វើ»។
ចំណែកអភិបាលខេត្តព្រះវិហារ លោក អ៊ុន ចាន់ដា បានប្រាប់កាសែតក្នុងស្រុកថា គោលការណ៍ចំនួន ៥ ជាវិធានការ ឈានទៅរកការដោះស្រាយបញ្ចប់បញ្ហាវិវាទដីធ្លី ក្នុងតំបន់នេះដែលបានកើតឡើងចាប់តាំងពីឆ្នាំ ២០១៨។ លោកថា អាជ្ញាធរខេត្តបានស្នើឱ្យតុលាការបញ្ឈប់ការចាប់ខ្លួនពលរដ្ឋជាបន្តទៀត។
តំណាងពលរដ្ឋ លោក ឡយ លីហួរ ឱ្យដឹងថា ពួកគេព្រមទទួលយកគោលការណ៍ទាំង ៥ចំណុចនេះ ក៏ប៉ុន្តែអ្នកភូមិស្នើអាជ្ញាធរដោះលែងពលរដ្ឋ ១៤នាក់ (ក្នុងនោះម្នាក់បាត់ខ្លួន) និងទម្លាក់បទចោទលើពលរដ្ឋ ២៥នាក់ផ្សេងទៀត។ លោកសង្ស័យថា ពលរដ្ឋម្នាក់ដែលបាត់ខ្លួន បន្ទាប់ពីក្រុមទាហានវារៈ ២៦១ នៅខេត្តឧត្តរមានជ័យ ចាប់ខ្លួនកាលពីចុងខែមករាកន្លងទៅ ទំនងជាត្រូវស្លាប់ព្រោះជាង ២សប្ដាហ៍មកហើយពួកគេរកមិនទាន់ឃើញនៅឡើយទេ៖ «គោលការណ៍ទាំង ៥ចំណុចហ្នឹងនៅខ្វះចំណុចមួយទៀត ដែលពួកខ្ញុំកំពុងចង់បាន គាត់អត់មានលើកឡើងបញ្ហាដោះលែងពលរដ្ឋដែលជាប់ពន្ធនាគារ និងអ្នកដែលជាប់ពាក្យបណ្តឹង ២៥នាក់។ ប្តឹងពលរដ្ឋទន្ទ្រានកាប់ព្រៃ និងរារាំងគ្រឿងចក្រមិនឱ្យឈូសឆាយ»។
ចំណែកតំណាងក្រុមហ៊ុនមេត្រីភាព លោក រីម ខេម ប្រាប់អាស៊ីសេរីថា ក្រុមពលរដ្ឋ ៣៣០គ្រួសារមកពីខេត្តផ្សេងៗ បានមកកាប់ទន្ទ្រានដី ក្រោយពេលដែលក្រុមហ៊ុនមកវិនិយោគតំបន់នោះកាលពីមិថុនា ឆ្នាំ២០១២។ លោកអះអាងថា ក្រុមពលរដ្ឋទាំងនោះបានកាប់ទន្ទ្រានដីរបស់ក្រុមហ៊ុនធ្វើចម្ការ អំឡុងឆ្នាំ ២០១៧ និង ២០១៨ អស់ជាង ១ពាន់ហិកតារ។ លើសពីនេះ លោកចោទប្រកាន់ថា តំណាងពលរដ្ឋឈ្មោះ ឡយ លីហ៊ូរ គឺជាមេខ្លោងដឹកនាំពលរដ្ឋកាប់ទន្ទ្រានព្រៃ និងលក់ដីនៅតំបន់នោះឱ្យអ្នកផ្សេងទៀតខុសច្បាប់៖ «កាប់ឈើក្នុងដីហ្នឹង ធ្វើជាកូនតង់ ហើយភ្លើងឆេះហ្នឹងកាប់ព្រៃរំលំហើយ ដុតប្រញាប់យកដី គេថា យើងបង្កបង្កើនផលយូរហើយ ឱ្យរដ្ឋាភិបាលដោះស្រាយ ហើយឆេះផ្ទះខ្លួនឯងចេះតែចោទសមត្ថកិច្ច ហើយសមត្ថកិច្ចអីណាបំផ្លាញផ្ទះពលរដ្ឋ បើពលរដ្ឋធ្វើស្របច្បាប់ គេទៅធ្វើអ? ក្នុងបទបញ្ជា ០១ គឺគេវាស់កាត់កែងឱ្យហើយ។ នេះគាត់មកក្រោយ ២០១៣ និង ២០១៤ ក៏អត់មានដែរ មកកាប់ព្រៃឆ្នាំ ២០១៧ និង ២០១៨នេះទេ»។
កាលពីចុងខែមករា ឆ្នាំ២០១៩ ក្រុមពលរដ្ឋនៅខេត្តព្រះវិហារ ៣៣០គ្រួសារ ដែលមានជម្លោះដីធ្លីជាមួយក្រុមហ៊ុនមេត្រីភាព នាំគ្នាមកភ្នំពេញដើម្បីដាក់ញត្តិជូនមេដឹកនាំរបបក្រុងភ្នំពេញ និងរដ្ឋមន្ត្រីក្រសួងដែនដី ឱ្យជួយអន្តរាគមន៍ដោះស្រាយជម្លោះដីធ្លី ទម្លាក់បទចោទលើពលរដ្ឋ ២៥នាក់ និងទាមទារឱ្យដោះលែងពលរដ្ឋ ១៤នាក់ កំពុងជាប់ឃុំក្នុងពន្ធនាគារខេត្តព្រះវិហារ ហើយមានម្នាក់បាត់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
