ពលរដ្ឋមានបញ្ហាដីធ្លីស្នើសុំទៅរបបក្រុងភ្នំពេញដោះស្រាយដីធ្លីដល់ពួកគេឲ្យបានល្អដូចការផ្លាស់ទីពលរដ្ឋវៀតណាម
2018.12.11
ពលរដ្ឋមានបញ្ហាដីធ្លី និងសង្គស៊ីវិល រិះគន់ថា អាជ្ញាធរនៃរបបក្រុងភ្នំពេញជុំវិញការស្វែងរកដោះស្រាយបញ្ហាដីធ្លីថា ការជួយពលរដ្ឋខ្លួនឯង មិនបានល្អត្រឹមត្រូវតាមច្បាប់ ដូចដែលរបបនេះ កំពុងដោះស្រាយរឿងផ្លាស់ទី អាណិកជនវៀតណាម ដែលកំពុងរស់នៅលើផ្ទៃទឹកទន្លេសាបនោះទេ។ ប៉ុន្តែ អ្នកនាំពាក្យរបបក្រុងភ្នំពេញព្រមានថា ការប្រៀបធៀបរបបការដោះស្រាយបញ្ហាដីធ្លីរបស់ពលរដ្ឋខ្មែរ និងការផ្លាស់ទីលំនៅពីផ្ទះបណ្ដែតទឹករបស់អនិកជនវៀតណាមពីទឹកមកដីគោក គឺជាគំនិតទុច្ចរិត។
ទោះជាអាណិកជនវៀតណាម ដែលកំពុងរស់នៅលើផ្ទៃបឹងទន្លេសាប ក្នុងខេត្តកំពង់ឆ្នាំង មិនបានចាកចេញពីទន្លេមករស់នៅលើដីតាមរៀបចំរបស់អាជ្ញាកម្ពុជា ប៉ុន្តែពួកគេមិនបានប្រឈមការបណ្តេញចេញដោយហិង្សា ដូចអាជ្ញាធរកម្ពុជាបានអនុវត្តមកលើពលរដ្ឋរបស់ខ្លួននាពេលកន្លងមកនោះទេ។ ការដោះស្រាយដោយមធ្យោបាយ ទន់ភ្លន់ និងការគោរពច្បាប់ គោរពសិទ្ធិមនុស្សរបស់សមត្ថកិច្ចកម្ពុជាបែបនេះហើយ ធ្វើឲ្យពលរដ្ឋខ្មែរមានបញ្ហាដីធ្លីចង់ឃើញអាជ្ញាធររបស់ខ្លួនផ្តល់ដំណោះស្រាយដូចគ្នា ទៅនឹងការដោះស្រាយឲ្យអាណិកជនវៀតណាមទាំងនោះដែរ។
ពលរដ្ឋមានបញ្ហាដីធ្លីតំបន់បុរីកីឡា លោកស្រី ស ស៊ន និយាយថា វិបត្តិដីធ្លីដែលលោកស្រីកំពុងជួបប្រទះជាច្រើនឆ្នាំមកនេះអាជ្ញាធរកម្ពុជាមិនបានយកចិត្តផ្តល់ដំណោះស្រាយសមរម្យនោះទេ។
លោកស្រីបន្តថា ចំពោះលោកស្រីជាពលរដ្ឋខ្មែរ ហាក់គ្មានសំណាងដូចជនជាតិវៀតណាម ដែលត្រូវអាជ្ញាធរកម្ពុជាយកចិត្តទុកដាក់ផ្តល់ជម្រកសមរម្យពីលើទឹកមកដីគោកនោះទេ៖ «ពួកមីងដឹងទាំងអស់គ្នាដឹងថា ការដោះស្រាយឲ្យវៀតណាមហ្នឹង មានសំណងសមរម្យ ហើយគេមិនទទូលទៀត។ ប៉ុន្តែសម្រាប់ពួកមីងអត់ដោះស្រាយអ៊ីចឹងទេ គេនិយាយយ៉ាងខ្លីថា បើយើងយកមិនយកគេចាត់វិធានការ»។
ពលរដ្ឋតំបន់បឹងកក់ កញ្ញា សុង ស្រីលាភ ដែលធ្លាប់រងគ្រោះព្រោះវិបត្តិដីធ្លីដែរនោះ ប្រាប់អាស៊ីសេរីថា កញ្ញាមិនដែលឃើញអាជ្ញាធរកម្ពុជាយកចិត្តទុកដាក់ផ្តល់សំណោះស្រាយដីធ្លីលើពលរដ្ឋរបស់ខ្លួន ដូចដែលរបបនេះបានដោះស្រាយដល់ជនជាតិវៀតណាមនោះទេ។ កញ្ញារំលឹកថា របៀបដោះស្រាយបញ្ហាដីធ្លីរបស់អាជ្ញាធរមកលើកញ្ញាកន្លងមក គឺជាការគៀបសង្កត់ គំរាមកំហែង និងចាប់ដាក់គុកជាដើម៖ «យើងឃើញហើយថា គម្លាតនៃការដោះស្រាយលើជនជាតិដទៃ និងយើងហ្នឹង ខុសគ្នារបៀបណា ប្រៀបដូចគេមានភួយរោមសត្វដ៏កក់ក្តៅពីឪពុកយើងយកដណ្តប់ឲ្យ។ ប៉ុន្តែ សម្រាប់ពួកគេ គឺមានផ្ទះភួយមានគ្រែដេកហើយ ប៉ុន្តែអាណាព្យាបាលរបស់យើងមកដកពីយើង»។
ការលើកឡើងរបស់ពលរដ្ឋបែបនេះ ខណៈរបបក្រុងភ្នំពេញកំពុងពន្លឿន ផែនការផ្លាស់ទីពីផ្ទះបណ្ដែតទឹករបស់អាណិកជនវៀតណាម ដែលកំពុងរស់នៅលើផ្ទៃបឹងទន្លេសាប ក្នុងខេត្តកំពង់ឆ្នាំង ដើម្បីឲ្យពួកគេមកតាំងលំនៅលើដីគោកវិញ។ របបនេះថែមទាំងអះអាងថា នឹងរៀបចំឲ្យមានហេដ្ឋរចនាសម័្ពន រួមមាន៖ ផ្លូវ ទឹក ភ្លើង សាលារៀន ឬមន្ទីរពេទ្យជាដើម ដល់ជនជាតិវៀតណាមទាំងនោះ។
អ្នកនាំពាក្យរបបក្រុងភ្នំពេញលោក ផៃ ស៊ីផាន ឲ្យដឹងថា អាជ្ញាកម្ពុជាដោះស្រាយបញ្ហាដីធ្លី គឺតាមច្បាប់ និងគ្មានការរើសអើងនោះទេ។ លោកថែមទាំងចោទប្រកាន់ថា ការប្រៀបធៀបការដោះស្រាយបញ្ហាដីធ្លីរបស់ពលរដ្ឋខ្មែរទៅនឹងការផ្លាស់ទីជនជាតិវៀតណាមពីទឹកមកដីគោគនោះ គឺជាគំនិតទុច្ចរិតថែមទៀតផង៖ «ពលរដ្ឋដែលបញ្ហាដីធ្លីទៅតុលាការទៅ ទៅអង្គភាពដោះស្រាយដីធ្លីទៅ កុំយករឿងពីរហ្នឹងបូកបញ្ចូលគ្នា»។
ប៉ុន្តែ អ្នកនាំពាក្យសមាគម អាដហុក លោក ស៊ឹង សែនករុណា ចង់ឃើញអាជ្ញាធរកម្ពុជាផ្តល់ដំណោះស្រាយបញ្ហាដីធ្លីដល់ពលរដ្ឋខ្លួនជាចំណុចអាទិភាពជាងជនបរទស។ មន្រ្តីសង្គមស៊ីវិលរូបនេះ សង្កេតឃើញថា ការដោះស្រាយបញ្ហាដីធ្លីរបស់អាជ្ញាធរកម្ពុជាកន្លងមកមិនមកលើពលរដ្ឋរបស់ខ្លួនបានគោរពតាមច្បាប់ ដែលមានស្រាប់នោះទេ ដែលទង្វើនេះខុសពីអ្វី ដែលអាជ្ញាធរបានធ្វើចំពោះពលរដ្ឋវៀតណាមរស់នៅកម្ពុជា៖ «ឃើញថា ហាក់ដូចជាបង្ហាញថា រដ្ឋាភិបាលកម្ពុជាខ្វះការយកចិត្តទុកទៅលើសិទ្ធិពលរដ្ឋរបស់ខ្លួនជាងសិទ្ធិជនបរទេស ដែលមករស់នៅលើទឹកដីរបស់យើង»។
របាយការណ៍អាជ្ញាធរខែត្រកំពង់ឆ្នាំងបង្ហាញថា មានជនអន្តោប្រវេសន៍វៀតណាម រស់នៅលើទឹកចំនួន ២.៣៩៧គ្រួសារ ក្នុងនោះមានផ្ទះបណ្ដែតទឹកជាង ១ពាន់ខ្នង។
សមាគមវៀតណាមធ្លាប់បានស្នើទៅក្រសួងមហាផ្ទៃ ដើម្បីសុំពន្យារពេលផ្លាស់ទីពលរដ្ឋវៀតណាមពីផ្ទៃបឹងទន្លេសាបក្នុងខេត្តកំពង់ឆ្នាំងឲ្យមករស់នៅលើគោកវិញ ដោយលើកហេតុផលថា ទីតាំងថ្មីនោះ គ្មានហេដ្ឋារចនាសម្ព័ន្ធ ប្រព័ន្ធទឹកភ្លើង និងមន្ទីរពេទ្យជាដើម។
ប៉ុន្តែ ក្រសួងមហាផ្ទៃបដិសេធសំណើនេះ។ ស្របពេលដែលអាជ្ញាធរកម្ពុជាកំពុងបញ្ជូនជនជាតិវៀតណាមឡើងគោក នាយករដ្ឋមន្ត្រីវៀតណាមបានបង្គាប់ប្រមុខការទូតកម្ពុជាដោះស្រាយឲ្យដិតដល់រឿងវៀតណាមរស់លើបឹងទន្លេសាបនេះ។ ចំណែករដ្ឋមន្រ្តីក្រសួងការបរទេស លោក ប្រាក់ សុខុន បានធានាអះអាងប្រាប់ទៅនាយករដ្ឋមន្ត្រីវៀតណាមវិញថា អាជ្ញាធរខេត្តរបស់កម្ពុជា មានគម្រោងសាងសង់លំនៅឋានថ្មី សម្រាប់ផ្ដល់ដល់អាណិកជនវៀតណាម ដែលនឹងត្រូវរើទីលំនៅទៅនៅទីគោកវិញទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។