មូលហេតុជំរុញឲ្យសកម្មជនដីធ្លីនៅបឹងកក់តវ៉ានៅខាងមុខសាលារាជធានីភ្នំពេញ
2014.11.24
ស្ត្រីជាសកម្មជនការពារដីធ្លីចំនួន ១០នាក់ កំពុងជាប់ឃុំនៅមណ្ឌលកែប្រែទី១ ឬព្រៃស បន្ទាប់ពីត្រូវសាលាដំបូងរាជធានីភ្នំពេញ កាត់អោយពួកគេជាប់ទោស ១ឆ្នាំម្នាក់ និងពិន័យជាប្រាក់ចំនួន ២លានរៀល។ ពួកគេមានទោសដោយសារបិទផ្លូវខាងមុខសាលារាជធានីភ្នំពេញ នៅពេលទៅតវ៉ារឿងទឹកលិចភូមិ។
ករណីនេះ ក្រុមអ្នកភូមិអំពាវនាវអោយស្ថាប័នពាក់ព័ន្ធ ជួយរកយុត្តិធម៌អោយពួកគេ និងត្រូវដោះលែងអ្នកដែលជាប់ឃុំដោយពុំមានលក្ខខណ្ឌ។
សម្រែកអំពាវនាវរបស់អ្នកមានជម្លោះដីធ្លី ដើម្បីអោយដោះលែងសកម្មជនរបស់ពួកគេពីពន្ធនាគារ ចាប់ផ្ដើមលាន់ឮសាជាថ្មីទៀត នៅក្រោយសកម្មជនពួកគេត្រូវចាប់ដាក់ពន្ធនាគារ៖ «សំឡេង»។
ពួកគេបានដាក់ញត្តិទៅតាមស្ថានទូតបណ្ដាប្រទេសដែលមានឥទ្ធិពលប្រចាំនៅកម្ពុជា។ ស្របគ្នានេះ ក៏បានដាក់បណ្ដឹងទៅគណៈកម្មការរដ្ឋសភា អោយជួយរកយុត្តិធម៌ ដោយស្នើអោយកោះហៅរដ្ឋមន្ត្រីក្រសួងយុត្តិធម៌ ប្រធានសាលាដំបូងរាជធានីភ្នំពេញ និងអភិបាលរាជធានីភ្នំពេញ មកសាកសួរ។ បើទោះជាមិនទាន់ទទួលលទ្ធផល ក៏ពួកគេរំពឹងថា បញ្ហានេះត្រូវដោះស្រាយ ហើយតំណាងពួកគេនឹងទទួលបានយុត្តិធម៌។
ក្រុមអ្នកភូមិដែលមានបញ្ហាដីធ្លីក្នុងរាជធានីភ្នំពេញ ជាពិសេសអ្នកភូមិបឹងកក់ ហៅចំណាត់ការរបស់តុលាការ និងអាជ្ញាធរក្រុងថា ជាការដាក់សម្ពាធអោយពួកគាត់ឈប់តវ៉ា និងបង្ខំអោយពួកគេលក់ដី ហើយចាកចេញពីតំបន់បឹងកក់។ អ្វីដែលពួកគេអះអាងថាជាដើមចម នៃការឈានទៅចាប់សកម្មជនដាក់ពន្ធនាគារនៅពេលនេះ គឺបញ្ហាទឹកជន់លិចភូមិក្នុងតំបន់បឹងកក់ ដែលអាជ្ញាធរហាក់ពុំបានរកមធ្យោបាយដោះស្រាយអោយបានត្រឹមត្រូវ៖ «សំឡេង»។
អ្នកភូមិបឹងកក់ បានទៅតវ៉ានៅខាងមុខសាលារាជធានីភ្នំពេញ ពីរលើក បន្ទាប់ពីមានទឹកជន់លិចភូមិកាលពីចុងខែកញ្ញា។ កាលពីថ្ងៃទី២៩ ខែកញ្ញា អ្នកភូមិបាននាំគ្នាទៅខាងមុខសាលារាជធានីភ្នំពេញ ដោយយកអង្ករ និងសម្ភារៈមួយចំនួនដែលខូចខាតដោយសារត្រូវទឹកលិច ទៅខាងមុខអគារសាលារាជធានីភ្នំពេញ។ ភ្លាមៗនោះ គ្រឿងចក្រប្រភេទអេស្កាវ៉ាទ័រចំនួន ៤គ្រឿង បានកាយបង្ហូរទឹកនៅតំបន់បឹងកក់។ អ្នកភូមិបានទៅខាងមុខសាលារាជធានីភ្នំពេញម្ដងទៀត កាលពីព្រឹកថ្ងៃទី១០ ខែវិច្ឆិកា ដោយសាររឿងទឹកលិចភូមិដដែលនោះ។ ពួកគេបានយកគ្រែឈើដែលហើមប៉ោងខូចដោយសារត្រូវទឹកលិច ទៅជាមួយក្នុងពេលតវ៉ា និងបានបិទផ្លូវព្រះមុនីវង្សដែរ។ ពួកគេទម្លាក់ការទទួលខុសត្រូវទៅលើសាលារាជធានីភ្នំពេញ ថាបានអភិវឌ្ឍក្រុងដោយពុំបានគិតពីផលប៉ះពាល់។
តំណាងអ្នកភូមិ លោក ចាន់ ពុទ្ធិស័ក មានប្រសាសន៍ថា ប្រសិនបើអាជ្ញាធរដោះស្រាយបញ្ហាទឹកជន់លិចភូមិបានទាន់ពេលវេលា ម្ល៉េះអ្នកភូមិមិនលើកគ្នាទៅតវ៉ានៅខាងមុខសាលាក្រុងឡើយ៖ «សំឡេង»។
នៅក្រោយពេលអ្នក ១០នាក់ត្រូវចាប់ខ្លួន ទឹកស្អុយបានស្រកវិញមែន ប៉ុន្តែក្តីបារម្ភពីការជន់លិចនៅមិនទាន់បញ្ចប់នៅឡើយ។ អ្នកភូមិខ្លះមិនទាន់ដាក់ទូទឹកកក ពូក ខ្នើយ និងសម្ភារៈមួយចំនួនទៀតចុះពីលើធ្នើរនៅឡើយ។ ស្របគ្នានេះ អ្នកភូមិជាច្រើនបាននាំគ្នាទិញដីចាក់ក្នុងផ្ទះលើកអោយខ្ពស់។
អ្នកលក់គ្រឿងទេសនៅក្នុងភូមិ២០ ថ្លែងថា លោកស្រីបានទិញអាចម៍ដីក្នុងតម្លៃ ១០ម៉ឺនរៀល ដើម្បីបំពេញផ្ទះតូចរបស់គាត់អោយខ្ពស់បន្តិច៖ «សំឡេង»។
នៅតាមផ្លូវដើរនៅក្នុងភូមិ២៣ ទឹកសំអុយនៅក្នុងលូបានភាយចេញពីលូដែលនៅកណ្ដាលផ្លូវនោះមិនឈប់ ហើយហូរចេញទៅរកកន្លែងទាបៗក្នុងភូមិ៖ «សំឡេងទឹកហូរតាមផ្លូវ»។
នៅក្នុងភូមិ២៣ នេះហើយ ដែលទឹកបានឡើងដល់ត្រឹមចង្កេះនៅក្រោយធ្លាក់ភ្លៀង មុនពេលអ្នកភូមិបានចេញតវ៉ាអោយអាជ្ញាធរជួយរំដោះទឹក កាលពីខែកញ្ញា។
អ្នកភូមិម្នាក់ដែលខាងមុខផ្ទះគាត់ទឹកស្អុយឋិតនៅត្រឹមកំភួនជើង និងភាយក្លិនស្អុយចូលដល់ក្នុងផ្ទះ លោកស្រីបានរំឭកថា ទឹកលិចផ្ទះមានការលំបាកច្រើន ពិសេសចំពោះកូនតូចៗ៖ «សំឡេង»។
អ្នកភូមិម្នាក់ទៀត លោកស្រី ឈឺន ចាន់ថន គិតថា បញ្ហាកើតចេញពីការអភិវឌ្ឍដែលមិនបានប៉ាន់ប្រមាណពីផលប៉ះពាល់៖ «សំឡេង»។
ក្រុមអ្នកភូមិចាត់ទុកការចាប់ខ្លួនតំណាងពួកគេ ថាជារឿងអយុត្តិធម៌ ពោល គឺសាលាក្រុងត្រូវទទួលខុសត្រូវចំពោះផលប៉ះពាល់ដែលកើតមានចំពោះអ្នកភូមិ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ការចាប់ខ្លួនតំណាងសហគមន៍ គឺដោយសារពួកគាត់រំលោភច្បាប់៖ «សំឡេង»។
ចំពោះបញ្ហាទឹកជន់លិចនេះ តំណាងរាស្ត្រគណបក្សសង្គ្រោះជាតិ ២រូប បានដាក់លិខិតតាមរយៈប្រធានសភា នៅថ្ងៃទី១៨ ខែវិច្ឆិកា ដោយស្នើអោយអភិបាលរាជធានីភ្នំពេញ សាងសង់ប្រព័ន្ធលូដើម្បីបញ្ចៀសការជន់លិច។
ករណីនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បញ្ជាក់ថា សាលារាជធានីភ្នំពេញតែងតែយកចិត្តទុកដាក់ចំពោះបញ្ហានេះ គឺពុំព្រងើយកន្តើយឡើយ៖ «សំឡេង»។
ទោះយ៉ាងណា អ្នកភូមិរំឭកថា ប្រព័ន្ធលូក្នុងតំបន់បឹងកក់ ដែលកែសម្រួលកាលពីឆ្នាំ២០១០ តែងតែត្រូវកកស្ទះដោយខ្សាច់ ដែលចាំបាច់ត្រូវប្រើគ្រឿងចក្រកាយដីខ្សាច់ទាំងនោះចេញ ទើបទឹកអាចហូរបាន។ អ្នកភូមិបានគិតដោយងាយៗថា ពីមុនទឹកហូរចូលទៅក្នុងបឹងកក់ ប៉ុន្តែនៅពេលលុបបឹង គឺទឹកបន្តឋិតនៅក្នុងភូមិ ដែលមានន័យថា ក្នុងភូមិទំនងកំពុងប្រែក្លាយជាបឹងជំនួសវិញ៕