ពលរដ្ឋនៅកំពង់ចាមចោទមេប៉ុស្តិ៍នគរបាលថារំលោភយកដីផ្លូវសាធារណៈ
2015.01.01
ពលរដ្ឋចង្អុលផ្លូវដែលពួកគាត់ចោទមេប៉ុស្តិ៍នគរបាលឃុំថារំលោភយកដីផ្លូវសាធារណៈ នាឃុំសូរគង ស្រុកកងមាស ខេត្តកំពង់ចាម កាលពីថ្ងៃទី១ ខែមករា ឆ្នាំ២០១៥។
ប្រជាពលរដ្ឋនៅឃុំសូរគង ស្រុកកងមាស ខេត្តកំពង់ចាម ចោទប្រកាន់មេប៉ុស្តិ៍នគរបាលឃុំ ថាបានរំលោភដីផ្លូវសាធារណៈដែលធ្វើឲ្យប៉ះពាល់ដល់ពលរដ្ឋប្រើប្រាស់ផ្លូវនោះចំនួន ៦ភូមិ។ ចំណែកមេប៉ុស្តិ៍នគរបាលវិញ បានបដិសេធថា លោកមិនបានរំលោភដីផ្លូវទេ ហើយកាលលោកទិញនោះ គឺមានការទទួលស្គាល់ពីឃុំទៀតផង។
ពលរដ្ឋ ៦ភូមិនៅក្នុងឃុំសូរគង ស្រុកកងមាស នាំគ្នាផ្ដិតមេដៃប្ដឹងទៅអាជ្ញាធរឲ្យជួយអន្តរាគមន៍ទៅមេប៉ុស្តិ៍ឃុំ ឲ្យបើកផ្លូវសាធារណៈដើម្បីឲ្យពួកគាត់ធ្វើដំណើរបានដូចដើមវិញ។ ការស្នើសុំនេះ បន្ទាប់ពីមេប៉ុស្តិ៍ឃុំសូរគង បានធ្វើរបងរំលោភលើដីផ្លូវជាច្រើនម៉ែត្រ ដោយទុកដីផ្លូវជាង ៣ម៉ែត្រ ទើបធ្វើឲ្យពលរដ្ឋបររទេះគោដឹកដំណាំមិនអាចជៀសគ្នារួច។
តំណាងពលរដ្ឋឃុំសូរគង លោក ទិត ភឿន អាយុ ៦៧ឆ្នាំ មានប្រសាសន៍ថា ពីដើមឡើយផ្លូវដែលពលរដ្ឋទាមទារឲ្យបើកវិញនោះ គឺមានទំហំជាង ១០ម៉ែត្រ ដែលអាចឲ្យអ្នកស្រុកបររទេះគោជៀសគ្នាបានយ៉ាងងាយស្រួយ ប៉ុន្តែចាប់ពីពេលមេប៉ុស្តិ៍ទិញដីនោះ ហើយធ្វើរបងលួសដោយទុកផ្លូវជាងបីម៉ែត្រ ទើបធ្វើឲ្យពលរដ្ឋពិបាកធ្វើដំណើរ៖ «បើកឲ្យហ្នឹងទៅខាងស្រុក គេសម្រួលឲ្យបើក ៨ម៉ែត្រលើ ៨ម៉ែត្រក្រោម តែវាៗឲ្យដីប្រជាពលរដ្ឋបើកពីរម៉ែត្រ វាបើកពីរម៉ែត្រ»។
លោកបន្តថា ពលរដ្ឋចង់ឲ្យមានការដោះស្រាយបញ្ហានេះឲ្យបានឆាប់រហ័ស ពីព្រោះពេលនេះជារដូវដែលពលរដ្ឋត្រូវការដឹកស្រូវចេញចូលឲ្យបាន ស្រួល ហើយប្រសិនបើគ្មានដំណោះស្រាយទេ ពលរដ្ឋនឹងឡើងទៅដល់ស្ថាប័នជាតិធំៗបន្តទៀត។
ពាក្យបណ្ដឹងដាក់ចូលទៅអាជ្ញាធរឃុំកាលពីខែតុលា ឆ្នាំ២០១៤ អមដោយស្នាមមេដៃពលរដ្ឋ ៦ភូមិ ក្នុងឃុំសូរគង ដែលមានពលរដ្ឋ ២០៨គ្រួសារ គឺបានប្ដឹងមេប៉ុស្តិ៍ថាបានរំលោភដីផ្លូវរទេះ។ ក្នុងពាក្យបណ្ដឹងនោះ ស្នើសុំឲ្យអាជ្ញាធរធ្វើយ៉ាងណាបើកផ្លូវឲ្យបានទទឹង ១៥ម៉ែត្រតាមលំនាំដើមវិញ។ ប៉ុន្តែក្រោយពេលតំណាងពលរដ្ឋបានទៅសម្របសម្រួលនៅថ្នាក់ស្រុក ហើយពួកគាត់ក៏យល់ព្រមថាឲ្យបើកផ្លូវប្រវែង ៨ម៉ែត្រ តាមការលើកឡើងរបស់អាជ្ញាធរ ប៉ុន្តែត្រឡប់មកវិញ មេប៉ុស្តិ៍មិនបានអនុវត្តតាមឡើយ។
ឆ្លើយតបបញ្ហានេះ នាយប៉ុស្តិ៍នគរបាលឃុំសូរគង លោក ហ៊ិន ម៉ារ៉ា មានប្រសាសន៍បដិសេធការចោទប្រកាន់នោះ ពីព្រោះលោកថាលោកមិនបានរំលោភយកដីផ្លូវសាធារណៈដូចការចោទនោះទេ គឺលោកធ្វើរបងលើដីនោះទៅតាមលិខិតទិញលក់ដែលមានអាជ្ញាធរឃុំទទួល ស្គាល់។ លោកបន្តថា ពលរដ្ឋដែលប្រឆាំងនឹងលោកខ្លាំង គឺមានចេតនាឈ្នានីសលោកប៉ុណ្ណោះ។ ទោះយ៉ាងណាលោកថា រឿងនេះក៏មានការសម្របសម្រួលនៅថ្នាក់ស្រុក ដើម្បីឲ្យបើកផ្លូវ ហើយលោកក៏យល់ព្រមបើកដល់ ៧ម៉ែត្រ ដោយយល់ថា ៧ម៉ែត្ររទេះគោអាចជៀសគ្នាបាន ប៉ុន្តែការស្នើលើសពីនេះ លោកមិនយល់ព្រមទេ៖ «បងឲ្យយោបល់ខ្ញុំម៉ាម៉ាត់មើល! របងខ្ញុំធ្វើជាមធ្យមថា ៤ឆ្នាំចុះ បើខ្ញុំធ្វើខុសម្ដេចមិនប្រាប់ខ្ញុំ។ ដល់ពេលខ្ញុំធ្វើរបងព័ទ្ធលួសបានស្រែក»។
យ៉ាងណា មេភូមិអន្លង់អកខាងកើត លោក ប៉ិល ពៅ មានប្រសាសន៍ថា មេប៉ុស្តិ៍រូបនោះពិតជាធ្វើរបងចូលលើដីផ្លូវមែន។ លោកថា ពលរដ្ឋត្រូវការដីផ្លូវឲ្យបានសមរម្យសម្រាប់ធ្វើដំណើរ ហើយការយល់ព្រមយ៉ាងណានោះ គឺអាស្រ័យលើពួកគាត់៖ «២ឆ្នាំហើយ ប៉ុន្តែប្រជាជនប្រាប់ទៅគាត់មិនស្តាប់ គាត់ថាម៉េចគេរានដីបឹងម៉ាគ្នោពីគ្នោហើយមកយកតោងទាមខ្ញុំ»។
ទាក់ទងបញ្ហានេះ អភិបាលស្រុកកងមាស លោក មឿន ផា មានប្រសាសន៍ថា អាជ្ញាធរស្រុកអស់លទ្ធភាពសម្របសម្រួលហើយ ពីព្រោះអាជ្ញាធរបានសម្របសម្រួលបីដង ប៉ុន្តែនៅមិនអាចរកចំណុចរួមបាន។ ដូច្នេះ សំណុំរឿងនេះលោកថាមានតែបញ្ជូនទៅថ្នាក់លើតែប៉ុណ្ណោះ។
ដោយឡែកមន្ត្រីអង្កេតរបស់អង្គការការពារសិទ្ធិមនុស្សលីកាដូ (Licadho) ខេត្តកំពង់ចាម លោក វ៉ន សេងធុយ ឲ្យដឹងថា ការទាមទាររបស់ពលរដ្ឋ គឺជារឿងត្រឹមត្រូវ ពីព្រោះពួកគាត់មានសិទ្ធិទាមទារតាមបណ្ដឹងទៅតុលាការ។ តាមការអង្កេតរបស់លោកឃើញថា ករណីនេះមានភាពមិនប្រក្រតីមួយចំនួនរវាងទំហំក្បាលដីរបស់មេ ប៉ុស្តិ៍ និងឯកសាររបស់ប្រធានក្រុមបែងចែកដីមានជម្លោះនោះ កាលពីសម័យរដ្ឋកម្ពុជា។ លោកបញ្ជាក់ថា ខាងលោកគ្រោងដាក់ពាក្យបណ្ដឹងបញ្ហានេះទៅតុលាការតាមការស្នើសុំ របស់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
