ពលរដ្ឋនៅបាវិត៥គ្រួសារប្រតិកម្មនឹងការឲ្យរុះរើផ្ទះចេញពីដីរដ្ឋបាលព្រៃឈើ
2014.05.24
ប្រជាពលរដ្ឋនៅក្រុងបាវិត ខេត្តស្វាយរៀង ចំនួន ៥គ្រួសារ ប្រតិកម្មនឹងរដ្ឋបាលព្រៃឈើ ដែលជូនដំណឹងឲ្យរុះរើផ្ទះចេញពីដីដោយគ្មានសំណង ធ្វើឲ្យជួបការលំបាកគ្មានជម្រកស្នាក់នៅ។ ទាក់ទងបញ្ហានេះ ចៅសង្កាត់បញ្ជាក់ថា ប្រជាពលរដ្ឋទាំងនោះមកតាំងទីលំនៅលើដីព្រៃរបស់រដ្ឋបាលព្រៃឈើដោយខុសច្បាប់។
ចំណែកមន្ត្រីអង្គការសង្គមស៊ីវិលវិញ លើកឡើងថា ការបណ្ដេញប្រជាពលរដ្ឋដែលតាំងទីលំនៅលើសពី ៥ឆ្នាំឡើងទៅ ជារឿងខុសច្បាប់។
ពលរដ្ឋសម្ដែងការមិនពេញចិត្តទៅនឹងចំណាត់ការរបស់អាជ្ញាធររដ្ឋបាលព្រៃឈើ បង្ខំឲ្យប្រជាពលរដ្ឋចុះចេញពីដីដោយអយុត្តិធម៌។ ពួកគាត់អះអាងថា ដីដែលរដ្ឋបាលព្រៃឈើជូនដំណឹងឲ្យប្រជាពលរដ្ឋរុះរើលំនៅឋានចេញនោះ មានទំហំទទឹង ៣០ម៉ែត្រ បណ្ដោយ ៥០ម៉ែត្រ ស្ថិតនៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង។
អ្នកភូមិម្នាក់ លោក ញ៉ែម គា ថ្លែងនៅថ្ងៃទី២៤ ឧសភា ថា ប្រជាពលរដ្ឋរួមទាំងលោកផងចំនួន ៥គ្រួសារ បានមកតាំងទីលំនៅលើដីដែលរដ្ឋបាលព្រៃឈើឲ្យរើផ្ទះចេញនោះ តាំងពីឆ្នាំ១៩៩៩ មកម្ល៉េះ ពុំមែនទើបតែមកតាំងទីលំនៅនោះទេ។ លោក ញ៉ែម គា ចាត់ទុកសេចក្ដីជូនដំណឹងរបស់រដ្ឋបាលព្រៃឈើនេះ ថាជាការបង្ខំប្រជាពលរដ្ឋដោយខុសច្បាប់៖ «មានផ្ទះសម្បែងទាំងអស់គ្នាបង! បាទ! ខ្ញុំមិនពេញចិត្តត្រង់ថា ដីខ្ញុំកាន់កាប់តាំង៩៩ មកហើយ មកទល់សព្វថ្ងៃហ្នឹង។ ហើយខ្ញុំដាំដំណែដំណាំខ្ញុំច្រើនណាស់ ហើយខ្ញុំមិនចេញទេ អ៊ីចឹងហើយបានខ្ញុំរាយការណ៍ទៅ»។
សេចក្ដីជូនដំណឹងរបស់រដ្ឋបាលព្រៃឈើ ចុះថ្ងៃទី២០ ខែឧសភា ឆ្នាំ២០១៤ ឲ្យប្រជាពលរដ្ឋរើផ្ទះចេញពីដីចាប់ពីថ្ងៃទី២១ ខែមិថុនា ឆ្នាំ២០១៤ ជាធរមាន បើពុំដូចនោះទេ នឹងបញ្ជូនសំណុំរឿងទៅតុលាការឲ្យដោះស្រាយតាមផ្លូវច្បាប់។
វិទ្យុអាស៊ីសេរី ពុំអាចទាក់ទងមន្ត្រីរដ្ឋបាលព្រៃឈើខេត្តស្វាយរៀង ដើម្បីពន្យល់ជុំវិញបញ្ហានេះបានទេ នៅថ្ងៃទី២៤ ឧសភា។
ប៉ុន្តែ ចៅសង្កាត់បាទី លោក ចាន់ សារ៉ុន មានប្រសាសន៍ថា ដីដែលប្រជាពលរដ្ឋមកតាំងទីលំនៅនោះ ជាដីរបស់រដ្ឋបាលព្រៃឈើ ពុំមែនជាដីលំនៅឋានទេ ហើយប្រជាពលរដ្ឋទាំងនោះមកសង់លំនៅឋានលើដីនោះដោយខុសច្បាប់។ លោកថា អាជ្ញាធរពុំទទួលខុសត្រូវចំពោះអ្នកដែលមកតាំងទីលំនៅលើដីរបស់រដ្ឋបាលព្រៃឈើដែលខុសច្បាប់ទាំងនោះឡើយ៖ «ដេញគាត់ចេញមិនឲ្យគាត់នៅ ព្រោះដីផ្ទះគាត់ដីគាត់មានគាត់លក់អស់រលីង មកនៅដីព្រៃម៉េច។ ហើយមនុស្សនៅណាៗ នៅស្រុកស្វាយទាប ណាណោះ នរណាគេទទួលស្គាល់ លោកឯងមកនៅហ្នឹងលោកឯងមិនផ្លាស់ទីលំនៅឲ្យគេទទួលស្គាល់ ឲ្យដឹងផងថា ឯងមកនៅហ្នឹង។ ដើរអាវាសែមិនដឹងកន្លែងណាជាកន្លែងណា លក់ដីអស់មកនៅអ៊ីចឹងនរណាគេនៅ»។
ទាក់ទងបញ្ហានេះ មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង លោក នុត ប៊ូពិណារ័ត្ន មានប្រសាសន៍ថា ដីរបស់រដ្ឋបាលព្រៃឈើ បើទោះជាប្រជាពលរដ្ឋមកតាំងទីលំនៅមុនច្បាប់រដ្ឋបាលព្រៃឈើចេញក៏ដោយ ក៏ជាដីរបស់រដ្ឋបាលព្រៃឈើដដែល ប៉ុន្តែអាជ្ញាធរមិនបានបណ្ដេញប្រជាពលរដ្ឋភ្លាមទេ គឺបណ្ដោយឲ្យពួកគាត់រស់នៅលើដីនោះជាច្រើនឆ្នាំបន្តបន្ទាប់ តាំងពីឆ្នាំ១៩៩៩ មក។ លោកថា ប្រជាពលរដ្ឋបានមករស់នៅដីនោះលើសពី ៥ឆ្នាំទៅហើយ ប្រសិនបើការរស់នោះពុំមានការប្រើអំពើហិង្សាទេ អាជ្ញាធរបណ្ដេញពួកគាត់ចេញពីដីដោយគ្មានសំណងសមរម្យថាជារឿងខុសច្បាប់៖ «ពេលនេះយើងគិតថា បើសិនជាគាត់នៅហើយ ដីហ្នឹងជាដីព្រៃជាដីឯកជនរបស់រដ្ឋ គឺជាសិទ្ធិគ្រប់គ្រងស្របច្បាប់របស់ ហើយមិនអាចដេញគាត់បានទេ តែបើជារដ្ឋត្រូវការដីហ្នឹងយកទៅធ្វើអី គួរតែរដ្ឋហ្នឹងត្រូវអនុវត្តតាមផ្លូវច្បាប់ គឺដោះស្រាយសំណងឲ្យសមរម្យទៅឲ្យគាត់ហ្នឹងបានត្រឹមត្រូវ។ តែបើសិនជាមិនបានដោះស្រាយសំណងឲ្យគាត់ទេ នេះជាករណីមួយ គឺថាដេញគាត់ចេញពីលំនៅឋានដោយមិនត្រឹមត្រូវតាមគតិច្បាប់ទេណាស់!»។
ប្រជាពលរដ្ឋដែលត្រូវបណ្ដេញឲ្យរើផ្ទះចេញពីដី អំពាវនាវសុំឲ្យអាជ្ញាធរពាក់ព័ន្ធ ជួយអន្តរាគមន៍បញ្ឈប់ការបណ្ដេញពួកគាត់ចេញពីដី។ ប្រជាពលរដ្ឋបញ្ជាក់ថា ពួកគាត់ក្រីក្រ គ្មានដីសម្រាប់សង់លំនៅឋានទេ ប្រសិនបើអាជ្ញាធរបណ្ដេញដោយពុំមានផ្ដល់សំណងសមរម្យនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
