ពលរដ្ឋជាង៧០គ្រួសារត្រៀមចូលរួមសិក្ខាសាលារឿងដីធ្លីនៅឧត្ដរមានជ័យ
2014.04.27
សមាគមការពារសិទ្ធិមនុស្សអាដហុក (Adhoc) ខេត្តឧត្តរមានជ័យ គ្រោងនឹងរៀបចំធ្វើសិក្ខាសាលារឿងទំនាស់ដីធ្លីមួយ ដោយមានប្រជាពលរដ្ឋជាអ្នកប៉ះពាល់ដោយសារទំនាស់ដីធ្លីជាង ៧០គ្រួសារត្រៀមខ្លួនចូលរួម។
ក្នុងគម្រោងសិក្ខាសាលានោះ ក៏បានស្នើសុំកិច្ចសហការពីអភិបាលខេត្ត ប្រធានតុលាការ ព្រះរាជអាជ្ញា និងមន្ទីរដែនដីនគរូបនីយកម្ម ឱ្យចូលរួមជាវាគ្មិនដែរ ក៏ប៉ុន្តែគម្រោងនោះកំពុងមានឧបសគ្គ ដោយសារតែសាលាខេត្តឧត្តរមានជ័យ មិនចូលរួមសហការលើគ្រប់អ្វីទាំងអស់ទៅតាមសង្គមស៊ីវិលចង់បាន។
មន្ត្រីសមាគមការពារសិទ្ធិមនុស្សអាដហុក បានឱ្យដឹងថា សិក្ខាសាលាមួយស្ដីពីសិទ្ធិដីធ្លី និងការអនុវត្តច្បាប់ ដែលគ្រោងធ្វើឡើងនៅខេត្តឧត្តរមានជ័យ នាថ្ងៃទី២៩ ខែមេសា ខាងមុខ ទំនងជាមិនអាចដំណើរការបានទេ។ ការខកខាននោះ ដោយសារតែមន្ត្រីសាលាខេត្តឧត្តរមានជ័យ មិនបានអនុញ្ញាតច្បាប់ និងមិនធ្វើកិច្ចសហការបញ្ជូនមន្ត្រីជំនាញពាក់ព័ន្ធឱ្យចូលរួមដោះស្រាយទៅលើបញ្ហានានា ដែលប្រជាពលរដ្ឋគ្រោងនឹងលើកឡើង។
អ្នកសម្របសម្រួលរបស់សមាគមការពារសិទ្ធិមនុស្សអាដហុក ខេត្តឧត្តរមានជ័យ គឺលោក ស្រី ណារ៉េន។ លោកបានមានប្រសាសន៍កាលពីរសៀលថ្ងៃសៅរ៍ ទី២៦ ខែមេសា ថា លោកបានដាក់លិខិតទៅសាលាខេត្តឧត្តរមានជ័យ តាំងតែពីមុនថ្ងៃបុណ្យចូលឆ្នាំខ្មែរម្ល៉េះ ដើម្បីសុំការអនុញ្ញាតធ្វើសិក្ខាសាលាស្ដីពីជម្លោះដីធ្លី ព្រមទាំងស្នើសុំឱ្យអាជ្ញាធរខេត្តបញ្ជូនមន្ត្រីជំនាញពាក់ព័ន្ធចូលរួមសហការ ដើម្បីរកដំណោះស្រាយជាមួយគ្នា។ ក៏ប៉ុន្តែកាលពី ២-៣ ថ្ងៃមុននេះ អភិបាលរងខេត្តឧត្តរមានជ័យ លោក វ៉ាត ប៉ារ៉ានីន បានឆ្លើយតបលើលិខិតស្នើសុំនោះវិញថា វាហួសសមត្ថភាពនិងសិទ្ធិសម្រេចរបស់ថ្នាក់ខេត្ត។
លោក ស្រី ណារ៉េន៖ «ខ្ញុំដាក់ស្នើសុំធ្វើសិក្ខាសាលា សិទ្ធិដីធ្លីនិងការអនុវត្តច្បាប់ ហើយខាងសាលាខេត្តហ្នឹងគេឆ្លើយតបមកវិញ គេថា វាហួសសមត្ថភាព ហួសសិទ្ធិរបស់ខេត្ត អ៊ីចឹងគេនឹងស្នើសុំទៅក្រសួងមហាផ្ទៃ ហើយគេនឹងឆ្លើយតបនៅពេលក្រោយ។ គ្រាន់តែស្នើសុំកិច្ចសហការធ្វើសិក្ខាសាលា ហើយចាំដល់ក្រសួងមហាផ្ទៃ មើលទៅអាជ្ញាធរខេត្តនេះ ហាក់បីដូចជាមិនបើកចិត្តឱ្យទូលាយដូចខេត្តគេដទៃទៀតទេ»។
ទោះយ៉ាងណា វិទ្យុអាស៊ីសេរី មិនអាចទាក់ទងអភិបាលរងលោក វ៉ាត ប៉ារ៉ានីន និងនាយករដ្ឋបាលសាលាខេត្តឧត្តរមានជ័យ លោក ហោ ជិនវិរៈយុទ្ធ ដើម្បីសុំការពន្យល់ជុំវិញការរិះគន់ពីអង្គការក្រៅរដ្ឋាភិបាលនេះ បានថាយ៉ាងណានៅឡើយ។
ចំណែកអ្នកនាំពាក្យក្រសួងមហាផ្ទៃ លោកឧត្ដមសេនីយ៍ ខៀវ សុភ័គ បានមានប្រសាសន៍ថា សាលាខេត្តឧត្តរមានជ័យ ដែលធ្វើការតាមបែបបទរដ្ឋបាលក្នុងរឿងនោះពិតជាត្រឹមត្រូវ ពីព្រោះក្នុងករណីខ្លះដែលសាលាខេត្តយល់មិនច្បាស់លើការសម្រេច គឺត្រូវធ្វើលិខិតបញ្ជូនបន្តមកក្រសួងមហាផ្ទៃ នេះរឿងម្យ៉ាង ឯរឿងម្យ៉ាងទៀត ប្រសិនបើអង្គការក្រៅរដ្ឋាភិបាលចង់ធ្វើអ្វីខ្លះនៅខេត្តណានោះ គួរតែដាក់ពាក្យស្នើសុំទៅក្រសួងមហាផ្ទៃ ដើម្បីឱ្យក្រសួងបានពិគ្រោះជាមួយខេត្តនោះជាមុន។
ខៀវ សុភ័គ៖ «ក្នុងករណីយល់ថា វាត្រឹមត្រូវហើយ វាច្បាស់លាស់ហើយ ខេត្តសម្រេចខ្លួនឯង បើសិនជាគាត់ថា ដូចជាមិនច្បាស់លាស់ ចង់បានបញ្ជាក់ថែមទៀត ខេត្តគួរទទួលពាក្យអង្គការ ហើយលើកយោបល់មកក្រសួងមហាផ្ទៃ»។
សមាគមការពារសិទ្ធិមនុស្សអាដហុក បានទទួលស្គាល់ការលើកឡើងរបស់អ្នកនាំពាក្យក្រសួងមហាផ្ទៃ លោក ខៀវ សុភ័គ ថា ជារឿងត្រឹមត្រូវ បើនិយាយពីឋានានុក្រមរបស់ខេត្តនីមួយៗដែលស្ថិតនៅក្រោមក្រសួងមហាផ្ទៃ ក៏ប៉ុន្តែបើនិយាយអំពីសិទ្ធិដីធ្លី និងការជួបប្រជុំនៅតាមមូលដ្ឋានវិញ គឺសមាគមការពារសិទ្ធិមនុស្សអាដហុក បានចុះបញ្ជី និងតម្កល់លក្ខន្តិកៈរបស់ខ្លួននៅឯក្រសួងមហាផ្ទៃ រួចហើយ ដូច្នេះមិនចាំបាច់ទៅសុំអនុញ្ញាតពីក្រសួងមហាផ្ទៃ ទៀតទេ គឺគ្រាន់តែជូនដំណឹងថា នឹងត្រូវធ្វើអ្វីនៅកន្លែងណានិងពេលណាប៉ុណ្ណោះ។
អនុប្រធានផ្នែកស៊ើបអង្កេតទទួលបន្ទុកដីធ្លី លោក ចាន់ សុវ៉េត បានហៅចំណាត់ការរបស់សាលាខេត្តឧត្តរមានជ័យ ដែលមិនអនុញ្ញាតឱ្យធ្វើ និងបញ្ជូនវាគ្មិនឱ្យចូលរួមសិក្ខាសាលានោះ ថា វាហាក់ដូចជាអន្ទង់វែងឆ្នាំងវែង ឬក៏សាលាខេត្តមានភាពទន់ខ្សោយផ្នែករដ្ឋបាល។
លោក ចាន់ សុវ៉េត បានរិះគន់ទៀតថា បើពិនិត្យមើលលើខ្លឹមសាររបស់សាលាខេត្តឧត្តរមានជ័យ ដែលបង្កឧបសគ្គដល់ដំណើរការសិក្ខាសាលាដីធ្លីនោះ ហាក់ដូចជាមិនទាន់មានកិច្ចសហការទូលំទូលាយជាមួយសង្គមស៊ីវិលនៅឡើយ ហើយហាក់ដូចជាមានចេតនាបិទបាំងរឿងទំនាស់ដីធ្លីមួយចំនួន ដែលកើតឡើងដោយសាលាខេត្តក៏បរាជ័យជាច្រើនក្នុងការដោះស្រាយដែរ៕