អ្នកកាសែតខេមបូឌា ដេលី ពីរនាក់ចូលបំភ្លឺរឿងក្ដីពាក់ព័ន្ធការចោទរបស់ពលរដ្ឋនៅរតនគិរី
2017.08.23
ផែនទីខេត្តរតនគិរី។
Photo: RFA
អ្នកយកព័ត៌មានកាសែត ឌឹ ខេមបូឌា ដេលី (The Cambodia Daily) បានចូលមកការិយាល័យអយ្យការសាលាដំបូងខេត្តរតនគិរី រួចហើយ ដើម្បីឆ្លើយបំភ្លឺអង្គហេតុពាក់ព័ន្ធបណ្ដឹងរបស់អ្នកភូមិជនជាតិដើមភាគតិចបីនាក់ ពីបទចោទញុះញង់ និងរំលោភសិទ្ធិរក្សាការសម្ងាត់បោះឆ្នោតក្នុងពេលគណបក្សនយោបាយកំពុងឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤។
អ្នកយកព័ត៌មានកាសែត ឌឹ ខេមបូឌា ដេលី ពីរនាក់ ស្នើសុំឲ្យអយ្យការអមសាលាដំបូងខេត្តរតនគិរី តម្កល់មិនចាត់ការពាក្យបណ្ដឹងរបស់ពលរដ្ឋនៅឃុំប៉ាតេ បីនាក់ ដែលចោទរូបគេទាំងពីរពីបទញុះញង់ និងរំលោភសិទ្ធិរក្សាការសម្ងាត់បោះឆ្នោត។ ការស្នើសុំនេះ ធ្វើឡើងគ្រាដែលអ្នកយកព័ត៌មានទាំងពីរ រួមទាំងមេធាវីការពារក្ដីបានចូលមកការិយាល័យអយ្យការអមសាលាដំបូងខេត្តរតនគិរី កាលពីថ្ងៃទី២២ ខែសីហា ដើម្បីឆ្លើយបំភ្លឺ និងបង្ហាញអង្គហេតុពាក់ព័ន្ធបណ្ដឹងចោទប្រកាន់នេះ។
មេធាវីការពារក្ដីអ្នកកាសែតគឺលោក សេក សោភ័ណ្ឌ បញ្ជាក់នៅថ្ងៃទី២៣ ខែសីហា ថា កូនក្ដីលោកជម្រាបអង្គហេតុទាក់ទិនការចោទប្រកាន់ទាំងអស់ទៅអយ្យការដើម្បីយកទីពិចារណា និងស្នើសុំឲ្យតម្កល់រឿងមិនចាត់ការ។ លោកបន្តថា កូនក្ដីលោកបានបដិសេធរាល់ការចោទប្រកាន់ទាំងអស់របស់ដើមចោទថា ជាការមិនពិត៖ «អត់ទាន់មានសេចក្ដីសម្រេចខាងតំណាងអយ្យការផង គាត់អត់ទាន់ធ្វើការសន្និដ្ឋានផង ប៉ុន្តែខាងកូនក្តីខ្ញុំ គាត់ស្នើសុំឲ្យតម្កល់ទុកឥតចាត់ការ ពីព្រោះគាត់បានបដិសេធរាល់ការចោទប្រកាន់របស់ពលរដ្ឋឲ្យគាំទ្របក្សប្រឆាំងហ្នឹងវាមិនមែនជាការពិត»។
កាលពីថ្ងៃទី២២ ខែឧសភា ប្រជាពលរដ្ឋរស់នៅភូមិគងយុ និងភូមិគងធំ រួមទាំងអតីតមេឃុំប៉ាតេ បានដាក់ពាក្យប្ដឹងអ្នកយកព័ត៌មានកាសែត ឌឹ ខេមបូឌា ដេលី ពីរនាក់ គឺលោក អូន ខាំភាព និងជនជាតិកាណាដា គឺលោក ភីតធ័រ ស៊ុមបឺរ (Pitter Zsomber) បន្ទាប់ពីអ្នកទាំងពីរចូលមកក្នុងភូមិ ហើយសួរអ្នកភូមិ និងមន្ត្រីឃុំដែលដើមបណ្ដឹងចាត់ទុកថា មានចេតនាញុះញង់ និងរំលោភសិទ្ធិរក្សាការសម្ងាត់បោះឆ្នោតក្នុងពេលគណបក្សនយោបាយកំពុងឃោសនាបោះឆ្នោត។ ពាក្យប្ដឹងនោះធ្វើឡើងពីរច្បាប់ មួយច្បាប់ដាក់ជូនគណៈកម្មការរៀបចំការបោះឆ្នោត ឃុំប៉ាតេ និងមួយច្បាប់ទៀតដាក់ជូនការិយាល័យអយ្យការអមសាលាដំបូងខេត្ត។ ដោយឡែកបណ្ដឹងនៅគណៈកម្មការរៀបចំការបោះឆ្នោតឃុំប៉ាតេ ដើមបណ្ដឹងយល់ព្រមបញ្ចប់ការប្ដឹងនោះវិញហើយ។
ព្រះរាជអាជ្ញាលោក ជា ពេជ្រ បញ្ជាក់នៅថ្ងទី២៣ ខែសីហា ថា មន្ត្រីលោកបានសាកសួរចុងចោទទាំងពីរនាក់ចប់សព្វគ្រប់ហើយ។ លោកថា នឹងពិនិត្យអង្គហេតុឆ្លើយបំភ្លឺនេះឲ្យបានត្រឹមត្រូវមុននឹងធ្វើការសម្រេចយ៉ាងណានោះ៖ «ខាងអយ្យការខ្ញុំបានសួរគាត់ចប់សព្វគ្រប់អស់ហើយ យើងចាំពិនិត្យមើលអង្គហេតុហ្នឹងពាក់ព័ន្ធអង្គច្បាប់ដែរ ឬទេ»។
ទោះបីជាយ៉ាងនេះក្ដី ព្រះរាជអាជ្ញាលោក ជា ពេជ្រ ឲ្យដឹងថា ដើមចោទគឺលោក រម៉ាម យួត សេវ បន និង រចំ យ៉ឺ ក៏បានចូលទៅបំភ្លឺនៅការិយាល័យអយ្យការរួចរាល់ដូចគ្នាកាលពីថ្ងៃទី១៤ ខែមិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ