តុលាការ​កំពូល​សម្រេច​បន្ត​ឃុំ​ខ្លួន​យុវជន​ប្រកាស​ធ្វើ​បដិវត្តន៍​ពណ៌

ដោយ ថា កិត្យា
2016-12-29
អ៊ីម៉ែល
មតិ
Share
បោះពុម្ព
សមត្ថកិច្ច​បណ្ដើរ​យុវជន គង់ រ៉ៃយ៉ា ចេញ​ពី​បន្ទប់​សវនាការ​នៃ​តុលាការ​កំពូល កាល​ពី​ថ្ងៃ​ទី​២៣ ខែ​ធ្នូ ឆ្នាំ​២០១៦។ RFA/Uon Chhin
សមត្ថកិច្ច​បណ្ដើរ​យុវជន គង់ រ៉ៃយ៉ា ចេញ​ពី​បន្ទប់​សវនាការ​នៃ​តុលាការ​កំពូល កាល​ពី​ថ្ងៃ​ទី​២៣ ខែ​ធ្នូ ឆ្នាំ​២០១៦។ RFA/Uon Chhin
RFA/Uon Chhin

តុលាការ​កំពូល ប្រកាស​សាលដីកា​តម្កល់​ការ​សម្រេច​របស់​សាលាឧទ្ធរណ៍​ទុក​ជា​បាន​ការ​ដដែល ពោល​គឺ​ផ្ដន្ទាទោស​យុវជន គង់ រ៉ៃយ៉ា ដាក់​ពន្ធនាគារ ១​ឆ្នាំ ៦​ខែ ករណី​ប្រកាស​ធ្វើ​បដិវត្តន៍​ពណ៌​តាម​បណ្ដាញ​សង្គម​ហ្វេសប៊ុក (Facebook)។ គិត​ត្រឹម​ថ្ងៃ​ប្រកាស​សាលដីកា​នេះ គឺ​មាន​រយៈពេល​មិន​ដល់ ២​ខែ​ទៀត​ទេ ដែល​យុវជន​រូប​នេះ​ត្រូវ​មាន​សេរីភាព (បាន​ជាប់​ទោស​គ្រប់​ចំនួន)។ រី​ឯ​យុវជន គង់ រ៉ៃយ៉ា និង​មន្ត្រី​សិទ្ធិមនុស្ស ចាត់​ទុក​ការ​សម្រេច​របស់​តុលាការ​នេះ​ថា​ជា​រឿង​អយុត្តិធម៌។

សេចក្ដី​សម្រេច​របស់​តុលាការ​កំពូល​លើ​សំណុំរឿង​យុវជន គង់ រ៉ៃយ៉ា នៅ​ថ្ងៃ​ទី​២៩ ខែ​ធ្នូ គឺ​ពុំ​មាន​អ្វី​ប្រែប្រួល​ពី​ការ​សម្រេច​របស់​សាលាដំបូង និង​សាលាឧទ្ធរណ៍​ឡើយ ដោយ​ចាត់​ថា ការ​សម្រេច​នោះ​ត្រឹមត្រូវ​តាម​ផ្លូវ​ច្បាប់។

មេធាវី​ការពារ​ក្តី​យុវជន គង់ រ៉ៃយ៉ា គឺ​លោក សំ សុគង់ មាន​ប្រសាសន៍​ថា ការ​បន្ត​តម្កល់​សេចក្ដី​សម្រេច​របស់​សាលាដំបូង​ទុក​ជា​បាន​ការ​ដដែល​នេះ ជា​រឿង​អយុត្តិធម៌​សម្រាប់​កូន​ក្តី​របស់​លោក។ លោក​មេធាវី សំ សុគង់ បន្ត​ថា លោក​នឹង​ជជែក​ជាមួយ​កូន​ក្ដី​ដើម្បី​ស្នើ​សុំ​​ព្រះរាជ​អន្តរាគមន៍​ពី​ព្រះមហាក្សត្រ៖ «ដោយសារ​សេចក្ដី​សម្រេច​របស់​តុលាការ ជា​សេចក្ដី​សម្រេច​ចុង​ក្រោយ និង​បិទ​ផ្លូវ​តវ៉ា អ៊ីចឹង​មេធាវី​មិន​ទាន់​សិក្សា​ឲ្យ​បាន​លម្អិត​ថា នឹង​ត្រូវ​ធ្វើ​អ្វី​បន្ត​ទៀត ប៉ុន្តែ​អ្វី​ជា​ជំហាន​បន្ទាប់ គឺ​មេធាវី​នឹង​ពិភាក្សា​ជាមួយ​កូន​ក្ដី ហើយ​នឹង​ស្នើ​សុំ​អោយ​មាន​ការ​លើកលែង​ទោស​ពី​ព្រះមហាក្សត្រ​ចំពោះ​លោក គង់ រ៉ៃយ៉ា»

​កាល​ពី​ថ្ងៃ​ទី​​១៥ ខែ​មីនា យុវជន គង់ រ៉ៃយ៉ា និស្សិត​សាកលវិទ្យាល័យ​ខេមរៈ ត្រូវ​បាន​សាលាដំបូង​រាជធានី​ភ្នំពេញ សម្រេច​ផ្ដន្ទាទោស​ឱ្យ​ជាប់​ពន្ធនាគារ ១​ឆ្នាំ ៦​ខែ ពី​បទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍ បន្ទាប់​ពី​យុវជន​រូប​នេះ ប្រកាស​ធ្វើ​បដិវត្តន៍​ពណ៌​នៅ​លើ​បណ្ដាញ​សង្គម​ហ្វេសប៊ុក កាល​ពី​ឆ្នាំ​មុន។

ក្រោយ​ចេញ​ពី​បន្ទប់​សវនាការ យុវជន គង់ រ៉ៃយ៉ា ស្រែក​ប្រាប់​អ្នក​សារព័ត៌មាន​ថា ការ​ដែល​តុលាការ​កំពូល​មិន​ព្រម​ដោះលែង​រូប​លោក​ដែល​នៅ​សល់​កម្រិត​ទោស​មិន​ដល់​ពីរ​ខែ​ទៀត​នោះ គឺ​លោក​មិន​មាន​ការ​សោកស្ដាយ​នោះ​ទេ ប៉ុន្តែ​លោក​ពិត​ជា​មាន​សោកស្ដាយ និង​ខ្មាសអៀន​ដែល​តុលាការ​នៅ​បន្ត​រក្សា​កេរ្តិ៍ឈ្មោះ​ស្អុយ​រលួយ​ទៀត៖ «អ្វី​ដែល​ខ្ញុំ​សោកស្ដាយ និង​ឈឺ​ចាប់​បំផុត គឺ​កេរ្តិ៍ឈ្មោះ​ដ៏​អសោច​កំពុង​តែ​ស្អុយ​រលួយ​របស់​ប្រព័ន្ធ​យុត្តិធម៌​នៅ​កម្ពុជា ដែល​ធ្វើ​ឲ្យ​ខ្ញុំ​មិន​មាន​កិត្តិយស​គ្រប់គ្រាន់​ដើម្បី​ងើយ​មុខ​មើល​លើ​ឆាក​អន្តរជាតិ និង​មិន​ហ៊ាន​ងើយ​មុខ​មើល​ជនបរទេស នៅ​ពេល​ដែល​គេ​សួរ​ខ្ញុំ​អំពី​ប្រព័ន្ធ​យុត្តិធម៌​នៅ​កម្ពុជា»

ប្រធាន​គ្រប់គ្រង​ការិយាល័យ​ស៊ើប​អង្កេត​សិទ្ធិមនុស្ស​នៃ​អង្គការ​សិទ្ធិ​មនុស្ស​លីកាដូ (LICADHO) លោក អំ សំអាត នៅ​តែ​គិត​ថា ការ​សម្រេច​របស់​តុលាការ​កំពូល​​នៅ​តែ​មាន​ភាព​អយុត្តិធម៌ សម្រាប់​លោក គង់ រ៉ៃយ៉ា ដែល​គ្រាន់​តែ​បញ្ចេញ​ទស្សនៈ​នៅ​តាម​បណ្ដាញ​ហ្វេសប៊ុក៖ «យើង​មើល​ថា អ្នក​ដែល​មាន​និន្នាការ​ហ៊ាន​រិះគន់​បក្ស​កាន់​អំណាច ឬ​រដ្ឋាភិបាល ឬ​ក៏​អ្នក​ដែល​មាន​និន្នាការ​គាំទ្រ​បក្ស​ប្រឆាំង គឺ​ការ​ផ្ដន្ទាទោស​នោះ​ដាក់​សឹង​តែ​ពេញៗ​តែម្ដង មិន​មាន​ការ​ព្យួរ ឬ​ស្ថាន​សម្រាល​ទោស​ទេ តែ​បើ​យើង​មើល​ទៅ​លើ​អ្នក​គាំទ្រ​បក្ស​កាន់​អំណាច​វិញ គឺ​ដូចជា​អង្គរក្ស​បី​នាក់​ដែល​វាយ​លើ​តំណាងរាស្ត្រ​នោះ បើ​ទោះ​បី​ជា​កាត់​ទោស ៤​ឆ្នាំ​ក្តី តែ​អនុវត្ត​ទោស​តែ​មួយ​ឆ្នាំ​ទេ នៅ​សល់ ៣​ឆ្នាំ​ព្យួរ អ៊ីចឹង​ប្រៀបធៀប​ជាមួយ​រឿង គង់ រ៉ៃយ៉ា នេះ វា​មាន​ភាព​អយុត្តិធម៌»

យុវជន គង់ រ៉ៃយ៉ា អាយុ ២៤​ឆ្នាំ ត្រូវ​បាន​សមត្ថកិច្ច​ចាប់​ខ្លួន​កាល​ពី​ថ្ងៃ​ទី​២០ ខែ​សីហា ឆ្នាំ​២០១៥ ក្រោយ​ពី​បង្ហោះ​សារ​ក្នុង​គណនេយ្យ​ហ្វេសប៊ុក ឈ្មោះ សូរីយា កូកូ (Soriya Koko) ថា "តើ​មាន​បង​ប្អូន​ណា​ហ៊ាន​ធ្វើ​បដិវត្តន៍​ពណ៌​ជាមួយ​ខ្ញុំ​ទេ? ថ្ងៃ​ណា​មួយ​នៅ​ពេល​ខាង​មុខ​នេះ ខ្ញុំ​នឹង​ធ្វើ​បដិវត្តន៍​ពណ៌​ដើម្បី​ផ្លាស់ប្ដូរ​របប​ដ៏​ថោកទាប​មួយ​នេះ​ចេញ​ពី​សង្គម​ខ្មែរ ទោះ​បី​ជា​ត្រូវ​ជាប់​គុក ឬ​ស្លាប់​ក៏ដោយ ក៏​ខ្ញុំ​ត្រូវ​តែ​ធ្វើ​ដែរ"។

មេធាវី និង​សង្គម​ស៊ីវិល​យល់​ថា សារ​របស់​យុវជន គង់ រ៉ៃយ៉ា នេះ គ្រាន់​តែ​សេរីភាព​បញ្ចេញ​មតិ​ដែល​ធានា​ដោយ​ច្បាប់​រដ្ឋធម្មនុញ្ញ និង​កាតិក​សញ្ញា​ស្ដីពី​សិទ្ធិ​ពលរដ្ឋ និង​នយោបាយ។ លើស​ពី​នេះ ​ទៀត ថ្វី​ត្បិតតែ​យុវជន គង់ រ៉ៃយ៉ា បង្ហោះ​សារ​នោះ​ក៏ដោយ ក៏​ពុំ​បាន​បណ្ដាល​មាន​ព្យសនកម្ម ឬ​បណ្ដាល​ឲ្យ​ខូចខាត និង​ប៉ះពាល់​ដល់​សន្តិសុខ​ជាតិ​នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អ្នក​អាន​អនាមិក

ដើម្បីប្រជាជននិងប្រទេសជាតិបានសុខសន្តិភាពនិងរីកចំរើន​ យើងទាំងអស់គ្នាជាខ្មែរត្រូវចេះគោរពច្បាប់។មានន័យថា៖ត្រូវចេះធ្វើអ្វីៗស្របតាមច្បាប់ រាប់ទាំងមហិច្ចតាចង់ធ្វើធំចង់ផ្លាស់ប្តូរការដឹកនាំ......។បើស្អីឡើងយកសង្គ្រាមមកដាក់មុខដើម្បីមហិច្ចតារបស់ខ្លួនដូចទស្សនៈរបស់យុវជនCNRPគ្រប់ៗរូបកន្លងមកដោយពឹងពាក់បរទេសទៀតនោះ​ ខ្មែរនឹងបាត់ឈ្មោះបាត់ប្រទេសឆាប់ៗហើយ។

Dec 29, 2016 09:38 PM

Kem Ley

ពី California, USA

I see and I believe this young man will be a fame and could be a prime minister in the future, because this young man can see the corruptions all level in governments, the un-lawful practiced by the justice systems and the rich and powerful people taken the poor people’s lands, etc… The resolution could be possible, you keep its up!

Dec 29, 2016 02:44 PM

អ្នក​អាន​អនាមិក

In 2018 if Khmer still vote for CPP Hunsen that means in Cambodia still have a lot people uneducated ...

Dec 29, 2016 07:45 AM

គេហទំព័រ​ទាំងមូល