លោក គង់ គាំ អះអាងថា វត្តមានរបស់លោកនៅតុលាការដើម្បីរកយុត្តិធម៌ជូនលោក កឹម សុខា
2019.01.23
លោក គង់ គាំ អតីតមនុស្សជំនិតរបស់លោក សម រង្ស៊ី និងជាអតីតទីប្រឹក្សាជាន់ខ្ពស់គណបក្សសង្គ្រោះជាតិបានចូលបំភ្លឺនៅសាលាដំបូងក្រុងភ្នំពេញ ថ្ងៃទី២៣ ខែមករា ក្នុងនាមជាសាក្សី ដើម្បីរកយុត្តិធម៌ជូន លោក កឹម សុខា។
មេធាវីការពារក្ដីឱ្យលោក កឹម សុខា មិនធ្វើអត្ថាធិប្បាយទៅលើវត្តមានលោក គង់ គាំ ទេដោយយល់ថា នេះជានីតិវិធីរបស់ចៅក្រមស៊ើបសួរ។
លោក គង់ គាំ អះអាងថា លោកបានស្បថតាមសំណើចៅក្រមស៊ើបសួរសាលាដំបូងក្រុងភ្នំពេញ លោក គី ឬទ្ធី ដោយដឹងអីនិយាយហ្នឹង មិនបំភ្លៃបំផ្លើស ឬមួរបង្កាច់លោក កឹម សុខា។
លោក គង់ គាំ បានប្រាប់អ្នកសារព័ត៌មានក្រោយចូលបំភ្លឺនៅតុលាការថា ចៅក្រមស៊ើបសួរ បានសួរពីជីវិតនយោបាយរបស់លោក។ លោកបន្តថា លោកបានឆ្លើយតបនឹងចៅក្រមស៊ើបដែលបានសួរ ទាក់ទងសំណុំរឿងលោក កឹម សុខា ដោយឱ្យបញ្ជាក់ ប្រាប់ពីរបៀបនៃការរួបរួមគ្នារវាងគណបក្សសម រង្ស៊ី និងគណបក្សសិទ្ធិមនុស្ស ដែលបង្កើត បានមកជាគណបក្សសង្គ្រោះជាតិ។ ចៅក្រមដដែលសួរលោកទៀតថា ក្នុងពេលលោកជាទីប្រឹក្សាគណបក្សនេះ បានដឹង និងរួមចំណែកអ្វីខ្លះជាមួយលោក សម រង្ស៊ី និងលោក កឹម សុខា៖ «ការបំភ្លឺរបស់ខ្ញុំគ្រាន់តែជាជំនួយដើម្បីប្រភពជាច្រើនដល់តុលាការពិចារណាផ្ដល់យុត្តិធម៌ដល់ជនត្រូវចោទ (លោក កឹម សុខា) ប៉ុន្តែអ្វីៗអាស្រ័យលើលោក កឹម សុខា ខ្លួនឯង»។
លោក គង់ គាំ ក៏ទទួលស្គាល់ថា លោកធ្លាប់ធ្វើជាទីប្រឹក្សាជាន់ខ្ពស់គណបក្សសង្គ្រោះជាតិមែន ប៉ុន្តែលោកមិនបានដឹងរឿងរ៉ាវគណបក្សសង្គ្រោះជាតិច្រើនដូចលោក សម រង្ស៊ី ទេ។ លោកបន្តថា វត្តមានរបស់លោកនៅតុលាការក្នុងពេលនេះមិនមែនជាអ្នកដាក់បន្ទុក ឬដោះបន្ទុកឱ្យលោក កឹម សុខា ទេ ប៉ុន្តែលោកទៅឆ្លើយបំភ្លឺនេះដើម្បីឱ្យលោក កឹម សុខា ទទួលបានយុត្តិធម៌៖ «ដូចដែលសម រង្ស៊ី លើកឡើងថ្មីៗចុងក្រោយនេះគាត់ថា ចូលមកបំភ្លឺនេះ មិនសូវដឹង រឿង អីច្រើនទេ មានតែសម រង្ស៊ី ទេ ដឹងរឿងគ្រប់យ៉ាង ប៉ុន្តែអ្នកដឹងតិចក៏ត្រូវមានព័ត៌មាន អ្វីជូនចៅក្រមបាន ហើយអ្នកដឹងច្រើនក៏មានព័ត៌មានអីជូនចៅក្រមបាន ដើម្បីគោលដៅតែមួយគត់រកយុត្តិធម៌ឱ្យអ្នកត្រូវចោទ»។
លោក គង់ គាំ មិនមែនមនុស្សទីមួយដែលចៅក្រមស៊ើបសួរសាលាដំបូងក្រុងភ្នំពេញកោះហៅមកឆ្លើយបំភ្លឺក្នុងនាមជាសាក្សីនោះទេ កន្លងមកចៅក្រមបានកោះហៅអ្នកធ្លាប់ធ្វើការងារជាមួយលោក កឹម សុខា ដូចជាអ្នកនាំពាក្យគណបក្សប្រជាជនកម្ពុជា មន្ត្រីសង្គមស៊ីវិល និងសកម្មជនគណបក្សសង្គ្រោះជាតិ។
មេធាវីការពារក្តីឱ្យលោក កឹម សុខា លោក ផែង ហេង ឱ្យអាស៊ីសេរីដឹងថា លោកមិនទាន់ដឹងថា ចម្លើយរបស់លោក គង់ គាំ ជាការដាក់បន្ទុក ឬដោះបន្ទុកឱ្យលោក កឹម សុខា នោះទេ ព្រោះនៅពេលនេះ មិនទាន់ឃើញចម្លើយលោក គង់ គាំ ឆ្លើយបំភ្លឺនៅមុខចៅក្រមស៊ើបសួរនៅឡើយទេ។ មេធាវីការពារក្តីប្រធានគណបក្សប្រឆាំងរូបនេះឱ្យដឹងទៀតថា តាមនីតិវិធីក្រោយពេលចៅក្រមស៊ើប សួរចប់សព្វគ្រប់រួចហើយ ចៅក្រមនឹងចេញដីកាសន្និដ្ឋានចុងក្រោយមួយបញ្ជាក់ថា នឹងលើកលែងការចោទប្រកាន់ ឬត្រូវបញ្ជូនសំណុំរឿងលោក កឹម សុខា ទៅជំនុំជម្រះ ប៉ុន្តែលោកមិនទាន់ដឹងថាចៅក្រមនឹងបន្តស៊ើបអង្កេតដល់ពេលណានោះទេ៖ «ខ្ញុំមិនមានអីអត្ថាធិប្បាយទេ ព្រោះគាត់ហៅអ្នកណាៗជានីតិវិធីរបស់ចៅក្រមស៊ើបសួរគ្រាន់តែដឹង ថាការកោះហៅឯកឧត្ដម គង់ គាំ ពាក់ព័ន្ធនឹងការស្នើសុំបំពេញកិច្ចរបស់តំណាងអយ្យការ»។
លោក កឹម សុខា ត្រូវបានសមត្ថកិច្ចចូលឆ្មក់ចាប់ខ្លួន និងបញ្ជូនទៅឃុំខ្លួនភ្លាមៗនៅពន្ធនាគារត្រពាំងផ្លុង ខេត្តត្បូងឃ្មុំ កាលពីថ្ងៃទី៣ ខែកញ្ញា ឆ្នាំ២០១៧។ តុលាការចោទប្រកាន់លោកពីបទ ក្បត់ជាតិ។ កាលពីថ្ងៃទី១០ កញ្ញា ឆ្នាំ២០១៨ លោកត្រូវបានសមត្ថកិច្ចដឹកពីពន្ធនាគារ មកឃុំខ្លួននៅក្នុងផ្ទះរហូតមកដល់ពេលនេះ។ ការចោទប្រកាន់លោក កឹម សុខា គឺតុលាការ សំអាងលើវីដេអូឃ្លិបមួយមានរយៈពេលជាង ១៣នាទី ដែលផ្សព្វផ្សាយដោយប្រព័ន្ធ ឃោសនានៃរបបក្រុងភ្នំពេញ ពីសកម្មភាពរបស់លោក កឹម សុខា បានថ្លែងនៅប្រទេសអូស្ត្រាលីតាំងពីខែធ្នូ ឆ្នាំ២០១៣។ ក្នុងវីដេអូឃ្លិបនោះលោក កឹម សុខា និយាយថា បានតស៊ូ ២០ឆ្នាំហើយដើម្បីប្រឆាំងនឹងរបបដឹកនាំរបស់លោក ហ៊ុន សែន ដោយឈរលើគោលការណ៍ច្បាស់លាស់។
ប៉ុន្តែលោកមេធាវី ផែង ហេង និយាយថា ការកាត់ច្បិចយកសម្តីលោក កឹម សុខា តែបន្តិចបន្តួចមកចោទប្រកាន់បែបនេះធ្វើឱ្យមានច្រឡំទៅនឹងអត្ថន័យនៃខ្លឹមសារសន្ទរកថារបស់ លោក កឹម សុខា ដែលមានរយៈជាងពីរម៉ោង។
លោកបន្តទៀតថា ទោះតុលាការបានចោទប្រកាន់ថា លោក កឹម សុខា មានសន្ទិដ្ឋិភាពជាមួយបរទេស ឬត្រូវរ៉ូវជាមួយបរទេសដើម្បីផ្ដួលរំលំរដ្ឋាភិបាល ប៉ុន្តែមកដល់ពេលនេះមិនទាន់ឃើញចៅក្រមកោះហៅបរទេសណាមួយមកបំភ្លឺទេ។
មេធាវីការពារក្ដីឱ្យប្រធានគណបក្សប្រឆាំងរូបនេះនៅតែមានសង្ឃឹមថា តុលាការនឹងទម្លាក់បទចោទលើលោក កឹម សុខា ចោល ព្រោះលោកបានសិក្សាឯកសារនៅក្នុងសំណុំរឿងពិនិត្យឃើញថា គ្មានអង្គហេតុ ឬធាតុផ្សំណាមួយសម្រាប់ធ្វើការចោទប្រកាន់លើលោក កឹម សុខា នោះទេ។ លើសពីនេះ សហគមន៍អន្តរជាតិ រួមទាំងសមាជិកសភាអឺរ៉ុបទាំងមូលដែលបានឃើញឃ្លិបវីដេអូទាំងមូលដែលលោក កឹម សុខា និយាយនៅប្រទេសអូស្ត្រាលីនោះ បាននិយាយបញ្ជាក់ថា ពួកគេគ្មានឃើញចំណុចណាមួយជាសកម្មភាពក្បត់ជាតិ ឬជាការឃុបឃិតជាមួយបរទេសរបស់លោក កឹម សុខា ដូចរបបក្រុងភ្នំពេញចោទប្រកាន់ឡើយ៕