នៅរសៀលថ្ងៃទី២៤ សីហា តុលាការក្រុងភ្នំពេញបានលើកយករឿងក្តីលោក សួន សេរីរដ្ឋា មកជំនុំជម្រះ។ ចៅក្រមជំនុំជម្រះនៃតុលាការក្រុងភ្នំពេញ លោក រស់ ពិសិដ្ឋ ប្រកាសមុនបិទសវនាការថា សំណុំរឿងនេះនឹងត្រូវប្រកាសឲ្យដឹងនៅរសៀលថ្ងៃទី២៥ សីហា។
នៅក្នុងបន្ទប់ជំនុំជម្រះមានការខ្វែងគំនិតគ្នាជុំវិញបទចោទប្រឆាំងប្រធានគណបក្សអំណាចខ្មែរ រវាងតំណាងអយ្យការរបស់តុលាការក្រុងភ្នំពេញ ២នាក់ ជាមួយនឹងមេធាវីការពារក្ដីឲ្យជនជាប់ចោទ គឺលោក សុក សំអឿន។
នៅមុនសេចក្ដីសម្រេចរបស់ចៅក្រមជំនុំជម្រះ លោក រស់ ពិសិដ្ឋ ប្រកាសបិទសវនាការនៅក្នុងសេចក្ដីសន្និដ្ឋានចុងក្រោយ សង្កេតឃើញថា មានការឡើងការពារលើបទចោទរបស់ខ្លួន ជាពិសេសខាងតំណាងអយ្យការ។ លោក សៀង សុខ តំណាងអយ្យការម្នាក់ក្នុងចំណោមអយ្យការទាំងពីរនាក់ នៅក្នុងបន្ទប់សវនាការដែលទទួលបន្ទុករឿងក្តីនេះ បានស្នើសុំឲ្យតុលាការរក្សាបទចោទប្រឆាំងលោក សួន សេរីរដ្ឋា និងផ្ដន្ទាទោសតាមបទល្មើសដែលបានប្រព្រឹត្ត។
ភ្លាមៗដល់វេនមេធាវីការពារក្ដីឲ្យជនជាប់ចោទវិញម្ដង។ ប្រធានការិយាល័យមេធាវីក្រុមអ្នកច្បាប់អមរិន្ទ្រ លោក សុក សំអឿន បានថ្លែងការពារដោយលើកពីសំអាងហេតុថា បទចោទរបស់តំណាងអយ្យការនៃតុលាការក្រុងភ្នំពេញប្រឆាំងលោក សួន សេរីរដ្ឋា នេះ គឺពុំមានធាតុផ្សំដែលអាចនាំឲ្យកើតបទល្មើសបានទេ។ មិនតែប៉ុណ្ណោះ ប្រសិនបើទស្សនៈដែលបានលើកឡើងនោះ វាមិនកើតទៅជាបទល្មើសទេ មានន័យថាជនជាប់ចោទគួរត្រូវរួចផុតពីការចោទប្រកាន់ហើយ។ ម្យ៉ាងវិញទៀត លោករិះគន់ថា ដោយសារការអនុវត្តច្បាប់កន្លងទៅ ជាពិសេសតំណាងអយ្យការចេះតែចោទប្រកាន់ច្បោលៗហ្នឹងហើយ ដែលនាំឲ្យកើតរឿងអយុត្តិធម៌សង្គមកាន់តែច្រើន។
ជំទាស់ទៅនឹងសំអាងហេតុនេះ តំណាងអយ្យការនៃតុលាការក្រុងភ្នំពេញម្នាក់ទៀត គឺលោក សេង ហៀង អះអាងថា ផ្អែកមាត្រា៤៧១ នៃក្រមព្រហ្មទណ្ឌ បើទោះជាបទល្មើសនោះមិនបង្កឲ្យជាមានបញ្ហា ក៏មានន័យគ្រប់គ្រាន់ក្នុងការចោទប្រកាន់បានដែរ។
លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានសមត្ថកិច្ចចាប់ខ្លួនកាលពីថ្ងៃទី១៣ សីហា ត្រង់ចំណុចជិតស្ពានព្រែកព្នៅ ជាយក្រុងភ្នំពេញ។ ការចាប់ខ្លួននេះ ធ្វើឡើងតាមដីកាបង្គាប់ពីព្រះរាជអាជ្ញារង លោក សៀង សុខ។ អ្នកនយោបាយដែលតែងរិះគន់ដោយមិនសំចៃមាត់រូបនេះ ត្រូវរងការចោទប្រកាន់ ៣បទល្មើស គឺបទធ្វើឲ្យខូចទឹកចិត្តកងទ័ព បទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទញុះញង់កុំឲ្យយោធិនស្ដាប់បង្គាប់នៃក្រមព្រហ្មទណ្ឌ។
ការចាប់ខ្លួននេះ ធ្វើឡើង ២ថ្ងៃបន្ទាប់ពីលោកសរសេររិះគន់នៅលើបណ្ដាញទំនាក់ទំនងសង្គមហ្វេសប៊ុក (facebook) របស់លោកដែលរងការចោទប្រកាន់ថា បានប្រមាថដល់កងទ័ព។ អង្គហេតុនេះហើយដែលត្រូវបានតុលាការក្រុងភ្នំពេញចោទប្រកាន់ប្រឆាំងលោក សួន សេរីរដ្ឋា នៅពេលកម្ពុជា កំពុងមានជម្លោះយោធាជាមួយឡាវ ត្រង់តំបន់អូរតាង៉ាវ និងអូរអាឡៃ ស្ថិតក្នុងសៀមប៉ាង ក្នុងទឹកដីកម្ពុជា។
ទាក់ទិនសវនាការលើអង្គសេចក្តីកាលពីរសៀលថ្ងៃទី២៤ សីហា លោក សួន សេរីរដ្ឋា អះអាងថា លោកបានបាត់ខ្សែក្រវាត់មួយក្នុងពេលដែលតុលាការបង្ហាញពីភស្តុតាងដែលឆែកឆេរបាន។
ចំណែកប្រធានស្ដីទីគណបក្សអំណាចខ្មែរ លោក សួង សុភ័ណ្ឌ បានប្រាប់អ្នកកាសែតក្រោយបញ្ចប់សវនាការថា ករណីនេះជារឿងនយោបាយច្រើនជាងបទល្មើសព្រហ្មទណ្ឌ។ លោកបន្តថា « ខ្ញុំយល់ថាវាមានលក្ខណៈនយោបាយ ទី១ ថ្ងៃនេះតុលាការបានបើកសវនាការបានសម្រេចហើយ ប៉ុន្តែពាក់ព័ន្ធនឹងការប្រកាសមិនមែនប្រកាសនៅថ្ងៃនេះទេ គឺប្រកាសនៅថ្ងៃស្អែកថ្ងៃទី២៥ ពេលរសៀល។ រឿងនេះហាក់បីដូចជាមានចេតនាចាំសួរអ្នកណាម្នាក់ ថាតើករណីគួរតែលើកលែង ឬក៏គួរតែចោទប្រកាន់ »។
នៅក្នុងបន្ទប់ជំនុំជម្រះ ទាំងចៅក្រម លោក រស់ ពិសិដ្ឋ និងតំណាងអយ្យការ ២រូបផ្សេងទៀត គឺលោក សៀង សុខ និងលោក សេង ហៀង បានសួរសំណួរសាចុះសាឡើងអំពីអត្ថន័យនៃពាក្យមួយចំនួន ដូចជាអ្វីទៅជាមេទ័ពចោរ និងឱនក្បាលដាក់បរទេសជាដើម។ បើទោះជាបែបណា រឿងក្ដីលោក សួន សេរីរដ្ឋា នេះ ត្រូវបានចៅក្រមជំនុំជម្រះ លោក រស់ ពិសិដ្ឋ ឲ្យដឹងថា នឹងត្រូវប្រកាសសាលក្រមនៅរសៀលថ្ងៃទី២៥ សីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។