អ្នកស្រី ទេព វន្នី និងអ្នកបឹកកក់ ៥នាក់ ត្រូវផ្ដន្ទាទោសករណីមួយទៀត ៦ខែ តែត្រូវព្យួរទោស
2018.08.24
អ្នកស្រី ទេព វន្នី និងអ្នកសហគមន៍បឹងកក់ប្រាំនាក់ផ្សេងទៀត ត្រូវបានសាលាដំបូងក្រុងភ្នំពេញសម្រេចឲ្យជាប់ពន្ធនាគាររយៈ ៦ខែ លើសំណុំរឿងចាស់មួយកាលពីឆ្នាំ២០១២ ពីបទគំរាមសម្លាប់អតីតតំណាងសហគមន៍បឹងកក់ម្នាក់។ ការសម្រេចរបស់តុលាការបែបនេះធ្វើឡើងក្នុងសវនាការមួយនៅព្រឹកថ្ងៃទី២៤ ខែសីហា ប៉ុន្តែតុលាការអនុញ្ញាតឲ្យអ្នកស្រី ទេព វន្នី និងអ្នកសហគមន៍បឹងកក់ ៥នាក់ផ្សេងទៀត ឲ្យនៅក្រៅឃុំដោយត្រូវព្យួរទោស។
បួនថ្ងៃក្រោយចេញពីពន្ធនាគារសកម្មជនបឹងកក់ អ្នកស្រី ទេព វន្នី ត្រូវបានតុលាការក្រុងភ្នំពេញសម្រេចឲ្យមានទោស ៦ខែបន្តទៀត គិតចាប់ពីថ្ងៃទី២៤ ខែសីហាតទៅ ប៉ុន្តែក៏ត្រូវព្យួរទោស ពោលគឺពុំត្រូវជាប់ឃុំ។ អ្នកស្រី ទេព វន្នី និងពលរដ្ឋសហគមន៍បឹងកក់ប្រាំនាក់ផ្សេងទៀត ហៅការសម្រេចរបស់តុលាការថា មិនផ្ដល់យុត្តិធម៌ដល់ពួកគេ ដូច្នេះពួកគេនឹងប្តឹងទៅសាលាឧទ្ធរណ៍ឲ្យទម្លាក់ចោលការចោទប្រកាន់នេះ។
អ្នកស្រី ទេព វន្នី ថ្លែងឲ្យអាស៊ីសេរីដឹងនៅក្រោយការចោទប្រកាន់ថា សំណុំរឿងនេះភាគីដើមបណ្តឹងគឺអតីតតំណាងសកម្មជនបឹងកក់ លោកស្រី លី មុំ បានដកពាក្យបណ្តឹងរួចហើយ មិនគួរណាតុលាការនៅបន្តសំណុំរឿងនេះទៀតទេ។ អ្នកស្រីយល់ថា ការបន្តសំណុំរឿងនេះគឺប្រហែលជាក្រុមអ្នកស្រី ត្រូវជាប់បណ្ដឹងអាជ្ញាដែលបន្តឹងដោយព្រះរាជអាជ្ញា។ «»
ប្រជាសហគមន៍បឹងកក់ម្នាក់ទៀតដែលត្រូវតុលាការយកសំណុំរឿងចាស់មកដាក់ទោសដែរនោះ គឺលោកស្រី ង៉ែត ឃុន ហៅយាយម៉ាមី ដែលមានវ័យជរាណាស់ទៅហើយបានបដិសេធថា លោកស្រីនិងប្រជាសហគមន៍បឹងកក់ផ្សេងទៀតមិនបានប្រព្រឹត្តដូចការចោទប្រកាន់នោះទេ។ លោកស្រីអំពាវនាវទៅលោក ហ៊ុន សែន អន្តរាគមន៍លើកលែងទោសដល់លោកស្រី និងប្រជាសហគមន៍បឹងកក់ផ្សេងទៀត ដើម្បីជាការផ្ដល់យុត្តិធម៌ដល់ពលរដ្ឋបឹងកក់ស្លូតត្រង់។ «»
អ្នកស្រី ទេព វន្នី និង អ្នកបឹងកក់ដែលត្រូវជាប់ទោសជាថ្មីម្តងទៀតនេះប្រាប់ថា ការសម្រេចរបស់តុលាការបែបនេះគឺធ្វើឡើងមួយថ្ងៃក្រោយពីលោក ហ៊ុន សែន ព្រមានថាអ្នកដែលទើបត្រូវបានដោះលែងពីពន្ធនាគារគឺអាចនឹងត្រូវចាប់ដាក់ពន្ធនាគារជាថ្មីទៀតបើនៅតែហ៊ាននិយាយរិះគន់របបរបស់លោកនោះ។
ប្រធានគ្រប់គ្រងការិយាល័យឃ្លាំមើលការរំលោភសិទ្ធិមនុស្សនៃអង្គការសិទ្ធិមនុស្ស លី កាដូ លោក អំ សំអាត ដែលតាមដានដំណើររឿងនេះ និយាយថា តុលាការធ្លាប់កាត់ក្តីរឿងនេះម្ដងរួចមកហើយកាលពីឆ្នាំ២០១៧ ប៉ុន្តែ បានលើកពេល។ លោក អំ សំអាត សង្កេតឃើញថា បើផ្អែកទៅលើភស្តុតាងគឺមិនគ្រប់គ្រាន់សម្រាប់ធ្វើការចោទប្រកាន់នៅក្នុងរឿងនេះឡើយ។ «»
សកម្មជនដីធ្លីសហគមន៍បឹងកក់អ្នកស្រី ទេព វន្នី ដែលធ្លាប់បានជាប់ពន្ធនាគារ ជាច្រើនលើកមកហើយនោះទើបតែត្រូវបានព្រះមហាក្សត្រចេញព្រះរាជក្រឹត្យប្រទានការលើកលែងទោសជាថ្មីម្តងទៀតកាលពីយប់ថ្ងៃទី២០ ខែសីហា។ អ្នកស្រី ទេព វន្នី និងស្ត្រីអ្នកបឹងកក់ ៣នាក់ទៀត មានបីនាក់ផ្សេងទៀតត្រូវព្រះមហាក្សត្រលើកលែងទោសទៅតាមការស្នើរបស់លោក ហ៊ុន សែន ដែលអ្នកទាំង៤ ត្រូវបានតុលាការផ្ដន្ទាទោស ពីបទប្រមាថអ្នករាជការសាធារណៈ និងប្រឆាំងអ្នករាជការសាធារណៈ ដែលមានស្ថានទម្ងន់ទោស។
ចំពោះអ្នកស្រី ទេព វន្នី ព្រះរាជក្រឹត្យប្រទានការលើកលែងទោស ក៏គ្របដណ្តប់ទៅលើបទហិង្សាដោយចេតនាមានស្ថានទម្ងន់ទោស ដែលព្រះរាជអាជ្ញាបានចោទថា បានប្រព្រឹត្តទៅលើកងសន្តិសុខនៅក្បែរផ្ទះលោក ហ៊ុន សែន នាក្រុងភ្នំពេញដែរ។
មន្ត្រីជាន់ខ្ពស់អង្គការសិទ្ធិមនុស្ស លីកាដូ លោក អំ សំអាត ព្រួយបារម្ភថា ទោះបីតុលាការមិនឃុំខ្លួនសកម្មជនបឹងកក់ទាំងនោះក្តី ប៉ុន្តែការសម្រេចរបស់តុលាការដែលផ្ដន្ទាទោសឲ្យអ្នកស្រី ទេព វន្នី និងពលរដ្ឋបឹងកក់ ៥រូបផ្សេងទៀតអោយជាប់ ទោស៦ខែបន្ថែមនេះ គឺជាការដាក់បន្ទុកថ្មីមួយទៀតលើសកម្មជនដីធ្លីតំបន់បឹងកក់៕