អាជ្ញាធរ​ខេត្ត​កណ្តាល​ចាប់ខ្លួន​សកម្មជន​បក្ស​ប្រឆាំង​ម្នាក់​ទៀត​ដោយ​ចោទ​ប្រកាន់​ពី​បទ​ញុះញង់

ដោយ ខែ សុណង
2021-04-04
Share
អាជ្ញាធរ​ខេត្ត​កណ្តាល​ចាប់ខ្លួន​សកម្មជន​បក្ស​ប្រឆាំង​ម្នាក់​ទៀត​ដោយ​ចោទ​ប្រកាន់​ពី​បទ​ញុះញង់ សកម្មជន​គណបក្ស​សង្គ្រោះជាតិ ​នៅ​ឃុំ​ស្វាយ​រលំ ស្រុក​ស្អាង ខេត្តកណ្តាល លោក ម៉ី សោភ័ណ ​ ដែល​ត្រូវ​អាជ្ញាធរ​ចាប់ខ្លួន​។
Photo Provided

អាជ្ញាធរ​ខេត្ត​កណ្តាល ចាប់ខ្លួន​សកម្មជន​បក្ស​ប្រឆាំង​ម្នាក់ទៀត ដាក់​ពន្ធនាគារ កាលពី​ថ្ងៃទី​១ មេសា ដោយ​មិន​បង្ហាញ​ដីកា​ពី​តុលាការ ។ មន្ត្រី​សង្គម​ស៊ីវិល​ថា ប្រសិនបើ​ការ​ចាប់ខ្លួន​ដោយ​មិន​បង្ហាញ​ដីកា និង​មិន​បង្ហាញ​នូវ​ព័ត៌មាន​ជាក់លាក់ គឺជា​ការ​បំពាន​ច្បាប់។

សកម្មជន​គណបក្ស​សង្គ្រោះជាតិ ដែល​អាជ្ញាធរ​ចាប់ខ្លួន​នោះ គឺ លោក ម៉ី សោភ័ណ ដែល​ជា​យុវជន​បក្ស​ប្រឆាំង​នៅ​ឃុំ​ស្វាយ​រលំ ស្រុក​ស្អាង ខេត្តកណ្តាល​។ ក្រោយ​ពេល​ចាប់ខ្លួន តុលាការ​ខេត្តកណ្តាល​បាន​ចោទប្រកាន់​សកម្មជន​រូប​នេះ​ពី​បទ ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ៍។

ប្រពន្ធ​លោក ម៉ី សោភ័ណ គឺ​លោកស្រី អ៊ីន ហ៊ួត ប្រាប់​អាស៊ីសេរី​ថា ប៉ូលិស​ស្រុក​ស្អាង បាន​ចាប់​ប្តី​របស់​លោកស្រី កាលពី​ថ្ងៃទី​១ មេសា ដោយ​ពុំ​បង្ហាញ​ដីកា​ឡើយ រួច​បញ្ជូន​ទៅ​ស្នងការដ្ឋាន​នគរបាល​ខេត្តកណ្តាល​។ ប៉ូលិស​ប្រាប់​លោកស្រី​ថា ការ​ចាប់ខ្លួន​នេះ​ដោយសារ​ប្តី​លោកស្រី​បង្ហោះ​សារ​រឿង​នយោបាយ ជេរប្រមាថ​ថ្នាក់ដឹកនាំ​រដ្ឋាភិបាល និង​រឿង​វ៉ាក់សាំង នៅ​លើ​គណនី​ហ្វេសបុក។ ស្ត្រី​វ័យ​៣២​ឆ្នាំ​រូប​នេះ​ចាត់ទុក ការ​ចាប់​និង​ឃុំខ្លួន​ប្តី​លោកស្រី​នេះ​ថា ជា​រឿង​អយុត្តិធម៌ និង​ស្នើ​អាជ្ញាធរ​ដោះលែង​ប្តី​មកវិញ​៖ «ខ្ញុំ​សំណូមពរ​ឱ្យ​រដ្ឋាភិបាល និង​អ្នកធំៗ​ជួយ​ដោះស្រាយ​បញ្ហា​ប្តី​ខ្ញុំ​ផង ព្រោះ​អី​គាត់​អត់​មាន​ខុស​ទេ សុំ​ជួយ​ដោះលែង​ប្តី​ខ្ញុំ​វិញ​ផង រក​យុត្តិធម៌​ឱ្យ​ក្រុម​គ្រួសារ​ខ្ញុំ​ផង និង​សុំ​ឱ្យ​គាត់​ឆាប់​ចេញ​មក​ជួបជុំ​គ្រួសារ​តែ​ប៉ុណ្ណឹង​ទេ»

មួយ​រយៈ​ពេល​ចុង​ក្រោយនេះ លោក ម៉ី សោភ័ណ បាន​បង្ហោះ​សារ​ជា​បន្តបន្ទាប់​នៅ​លើ​ហ្វេសប៊ុក ដោយ​រិះគន់​ទៅលើ​ភាព​អយុត្តិធម៌​ក្នុង​សង្គម បញ្ហា​ជំងឺ​កូវីដ-១៩ ការ​បាញ់​បង្ក្រាប​របស់​អាជ្ញាធរ​លើ​កម្មករ​នៅ​ផ្លូវ​វេងស្រេង ការ​បំបិទ​សិទ្ធិ​សេរីភាព​ពលរដ្ឋ និង​មរណភាព​របស់​អ្នកស្រី ស៊ុយ សុផាន ដែល​មាន​ទំនាស់​ដីធ្លី​ច្រើន​ជាមួយ​ពលរដ្ឋ។

អាស៊ីសេរី​មិនអាច​ទាក់ទង ស្នងការ​ប៉ូលិស​ខេត្តកណ្តាល លោក ឈឿន សុចិត្ត ដើម្បី​សាកសួរ​ព័ត៌មាន​អំពី​ការ​ចាប់ខ្លួន​នេះ​បានទេ នៅ​ថ្ងៃទី​០៣ មេសា​។ ប៉ុន្តែ អ្នកនាំពាក្យ​តុលាការ​ខេត្តកណ្តាល លោក សូ សារិន បញ្ជាក់​ប្រាប់​ថា​អាស៊ីសេរី​យ៉ាង​ខ្លី​ថា តំណាង​អយ្យការ​បាន​ចោទប្រកាន់​លោក ម៉ី សុភ័ណ្ឌ ពី​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ៍ ហើយ​បញ្ជូន​ទៅ​ឃុំខ្លួន​នៅ​ពន្ធនាគារ​ខេត្តកណ្តាល​៖ «ខ្ញុំ​អាច​បញ្ជាក់​ជូន​បាន​ត្រឹម​ថា​មានការ​ឃុំខ្លួន​ឈ្មោះ ម៉ី សុភ័ណ ពិតប្រាកដ»

កន្លងមក​អាជ្ញាធរ​របប​លោក ហ៊ុន សែន បាន​បើក​យុទ្ធនាការ​ចាប់ខ្លួន សកម្មជន​នយោបាយ សកម្មជន​សង្គម និង​យុវជន ដោយ​លាក់បាំង​ព័ត៌មាន មិន​បង្ហាញ​ដីកា និង​ជូនដំណឹង​ទៅ​ក្រុម​គ្រួសារ​ពួកគេ ឱ្យ​បានដឹង​នោះ​ឡើយ។

ជុំវិញ​រឿង​នេះ នាយករង​ទទួលបន្ទុក​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មានប្រសាសន៍ថា ប្រសិនបើ​បទល្មើស​នេះ​មិន​ជាក់ស្តែង ហើយ​សមត្ថកិច្ច​មិនបាន​បង្ហាញ​ដីកាចាប់ខ្លួន ឬ​មិន​ប្រាប់​ពី​មូលហេតុ​នៃ​ការ​ចាប់ខ្លួន គឺជា​ការ​អនុវត្ត​ខុស​នីតិវិធី ដែល​ធ្វើ​ឱ្យ​ប៉ះពាល់​ដល់​សិទ្ធិ​របស់​គាត់​។ លោ​កថា​ប្រសិនបើ​ប្រជាពលរដ្ឋ​រិះគន់​ក្នុង​ន័យ​ស្ថាបនា ហើយ​ត្រូវ​បាន​អាជ្ញាធរ​ចាប់ខ្លួន គឺ​បង្ហាញ​ថា ប្រទេស​នោះ​មិន​គោរព​ច្បាប់។

មន្ត្រី​សង្គម​ស៊ីវិល​រូប​នេះ​បន្ថែម​ថា នៅក្នុង​កាលៈទេសៈ​ដែល​ប្រជាពលរដ្ឋ​មិនទាន់​យល់ និង​មិន​ទទួល​បាន​ព័ត៌មាន​ច្បាស់លាស់ អាជ្ញាធរ​ត្រូវ​ផ្តល់​ព័ត៌មាន​ឱ្យ​បាន​គ្រប់គ្រាន់​ទៅ​ភាគី​ពាក់ព័ន្ធ ដើម្បី​កុំឱ្យ​ពួកគាត់​បញ្ចេញមតិ​ខុស​ទៀត ប្រសើរ​ជាង​ការ​ចាប់ ឬ​បង្ក្រាប​ទៅលើ​ការ​បញ្ចេញ​មតិ​ទាំងនោះ​៖ «ខ្ញុំ​គិតថា​នៅក្នុង​កាលៈទេសៈ​នេះ ដែល​ប្រជាពលរដ្ឋ​មិនទាន់​យល់​គ្រប់គ្រាន់​ពី​ព័ត៌មាន​ចាំបាច់​ហ្នឹង អ្វី​ជា​រឿង​សំខាន់​គឺ​ការ​ផ្តល់​ព័ត៌មាន​ឱ្យ​បាន​គ្រប់គ្រាន់​ពី​អាជ្ញាធរ ដែល​ពាក់ព័ន្ធ​គឺ​សំខាន់ ប្រសិនជា​យើង​ពន្យល់​ឱ្យ​គ្រប់គ្រាន់​សម្រាប់​ពួកគាត់​ទៅ ខ្ញុំ​គិតថា​ការ​បញ្ចេញ​មតិ​របស់​គាត់​អាច​ត្រឹមត្រូវ​ហើយ យើង​អាច​ចេញ​ជា​ព័ត៌មាន​ពន្យល់​ឱ្យ​ពលរដ្ឋ​បាន​យល់​វិញ ដើម្បី​កុំឱ្យ​គាត់​បញ្ចេញ​មតិ​ខុស​តទៅ​ទៀត»

ចាប់តាំងពី​ឆ្នាំ​២០២០ មកដល់​ខែមេសា មាន​សកម្មជន​នយោបាយ សកម្មជន​បរិស្ថាន សកម្មជន​សង្គម ព្រះសង្ឃ​ខ្មែរ​ថាវរៈ និង​យុវជន​ជិត​១​រយ​នាក់​ហើយ ដែល​ត្រូវ​បាន​អាជ្ញាធរ​របប​ក្រុងភ្នំពេញ​ចាប់ខ្លួន​ដាក់​ពន្ធនាគារ​ជា​បន្តបន្ទាប់ ដោយសារ​ការអនុវត្ត​សិទ្ធិ​សេរីភាព​នៅក្នុង​សង្គម និង​តាម​បណ្ដាញ​អ៊ីនធឺណិត​។ តុលាការ បាន​ចោទប្រកាន់​ពួកគេ​ពី​បទ រួមគំនិត​ក្បត់ ញុះញង់ និង​ប្រមាថ​ថ្នាក់​ដឹកនាំ ជាដើម។

អ្នក​តាមដាន​ស្ថានការណ៍​យល់ថា ការ​ចាប់ខ្លួន​ពលរដ្ឋ ពិសេស​សកម្មជន​នយោបាយ​បក្ស​ប្រឆាំង ជា​បន្តបន្ទាប់​នេះ ជា​ការ​ធ្វើទុក្ខបុកម្នេញ​ផ្នែក​នយោបាយ ដើម្បី​កម្ទេច​សម្លេង​ប្រឆាំង ដែល​នៅ​សេសសល់​ចុងក្រោយ​របស់​គណបក្ស​សង្គ្រោះជាតិ​ឱ្យ​អស់​ពី​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល