RFA/Sorn Chanratha
ចៅក្រមសាលាដំបូងរាជធានីភ្នំពេញ លោក កោ វណ្ឌី នៅព្រឹកថ្ងៃទី៥ ធ្នូ នេះ សម្រេចផ្ដន្ទាទោសមេឃុំរបស់គណបក្ស សម រង្ស៊ី លោក ស៊ាង ចែត ឲ្យជាប់ពន្ធនាគាររយៈពេល ៥ឆ្នាំ ពីបទសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ។
ក្រុមមេធាវីការពារក្តីឲ្យលោក ស៊ាង ចែត ហៅការសម្រេចរបស់តុលាការនេះ ថាជារឿងអយុត្តិធម៌។
ក្រុមមេធាវីការពារក្តីឲ្យមេឃុំស្រក ស្រុកកំពង់សៀម ខេត្តកំពង់ចាម មកពីគណបក្ស សម រង្ស៊ី គឺលោក ស៊ាង ចែត ចាត់ទុកថា ការសម្រេចដាក់ទោសកូនក្តីរបស់លោកឲ្យជាប់ពន្ធនាគារ ៥ឆ្នាំ គឺជាកម្រិតទោសមួយធ្ងន់ធ្ងរ ដែលមិនអាចទទួលយកបាន។
លោក សំ សុគង់ មេធាវីរបស់លោក ស៊ាង ចែត ថ្លែងបន្ទាប់ពីស្តាប់ការសម្រេចរបស់តុលាការ នៅព្រឹកថ្ងៃទី៥ ខែធ្នូ ថា លទ្ធផលសួរដេញដោលនៅក្នុងសវនាការជម្រះក្តីនៅមិនទាន់បង្ហាញភស្តុតាងគ្រប់គ្រាន់ ដើម្បីដាក់ទោសកូនក្តីរបស់លោកនៅឡើយទេ។ លោកថា ក្នុងសំណុំរឿងនេះនៅមានចំណុចសង្ស័យ៖ «ការដាក់ផ្ដន្ទាទោសដាក់ពន្ធនាគារហ្នឹង វារយៈពេលដប់ប្រាំឆ្នាំ គឺកម្រិតទោសមួយធ្ងន់ធ្ងរ។ បើយើងនិយាយពីអង្គហេតុជាក់ស្តែង អំពីការប្រព្រឹត្តនោះ គឺកូនក្តីមិនបានប្រព្រឹត្តដូចការចោទប្រកាន់ទេ។ ដោយសាររឿងនេះវាមានវិមតិសង្ស័យទាក់ទងទៅនឹងគោលការណ៍អន្តរជាតិ ជាពិសេសរដ្ឋធម្មនុញ្ញហ្នឹង បើកាលណាមានវិមតិសង្ស័យ ត្រូវផ្តល់ប្រយោជន៍ដល់ជនជាប់ចោទ។ ចឹងក្នុងសំណុំរឿងនេះ គួរតែតុលាការលើកលែង ឬក៏ទម្លាក់បទចោទចំពោះលោក ស៊ាង ចែត ឲ្យមានសេរីភាពឡើងវិញ»។
នៅថ្ងៃទី២៧ ខែមេសា ឆ្នាំ២០១៦ លោក ស៊ាង ចែត ត្រូវបានព្រះរាជអាជ្ញារងសាលាដំបូងរាជធានីភ្នំពេញ ចោទប្រកាន់ពីបទសូកប៉ាន់សាក្សីក្នុងសំណុំរឿងពាក់ព័ន្ធចោទប្រកាន់នៃទំនាក់ទំនងស្នេហារវាងលោក កឹម សុខា អនុប្រធានគណបក្សសង្គ្រោះជាតិ និងអ្នកនាង ខុម ចាន់តារាទី ហៅស្រីមុំ។
អនុប្រធានគណបក្សសង្គ្រោះជាតិ លោក កឹម សុខា ដែលត្រូវតុលាការផ្ដន្ទាទោសពីបទមិនចូលខ្លួនជាសាក្សីក្នុងសំណុំរឿងសញ្ចារកម្ម ករណីស្រីមុំ ដដែល បានបញ្ចប់ការឃុំខ្លួនឯងក្នុងទីស្នាក់ការនៅថ្ងៃទី៣ ធ្នូ បន្ទាប់ពីទទួលបានការប្រទានលើកលែងទោសពីព្រះមហាក្សត្រ នៅថ្ងៃទី២ ធ្នូ តាមសំណើរបស់លោកនាយករដ្ឋមន្ត្រី ហ៊ុន សែន។
ចំណែកលោក ស៊ាង ចែត ក៏សង្ឃឹមថា គណបក្សនយោបាយទាំងពីរនឹងចរចាត្រូវរ៉ូវគ្នា និងស្នើទៅព្រះមហាក្សត្រ ដើម្បីប្រទានការលើកលែងទោសដល់រូបលោកផងដែរ៖ «ពាក់ព័ន្ធរឿងសូកប៉ាន់សាក្សីនេះ ខ្ញុំគ្មានបានទៅសូកប៉ាន់អីទេ គ្រាន់តែគេផ្ញើលុយមនុស្សធម៌ទេ ប៉ុន្តែតុលាការហ្នឹងចោទប្រកាន់លើខ្ញុំ។ ចឹងខ្ញុំសង្ឃឹមលើគណបក្សទាំងពីរដែលចរចាត្រូវរ៉ូវគ្នានៅថ្ងៃខាងមុខឆាប់ៗ និងស្នើទៅព្រះមហាក្សត្រឲ្យលើកលែងការចោទប្រកាន់មកលើខ្ញុំ»។
មេធាវីការពារក្តីឲ្យលោក ស៊ាង ចែត ថ្លែងថា ក្រុមមេធាវីនឹងពិភាក្សាជាមួយកូនក្តីរបស់លោក ថាគួរបន្តប្ដឹងទាស់ទៅសាលាឧទ្ធរណ៍ ដើម្បីប្រឆាំងនឹងការសម្រេចរបស់សាលាដំបូង ឬទទួលយកការសម្រេចមួយនេះ និងរង់ចាំព្រះរាជប្រទានលើកលែងទោសពីព្រះមហាក្សត្រ?៕
