ក្រសួងការពារជាតិ មិនស៊ើបអង្កេត និងគ្មានចំណាត់ការអ្វីទាំងអស់ចំពោះប្រធានតុលាការយោធា
2019.08.21
ក្រសួងការពារជាតិ ប្រកាសថា មិនបើកការស៊ើបអង្កេតជាផ្លូវការ និងមិនមានចំណាត់ការអ្វីទាំងអស់ ចំពោះប្រធានតុលាការយោធា ដែលរងការចោទប្រកាន់ថា ប្រព្រឹត្តអំពើពុករលួយនិងបានប្រមូលផ្តុំបក្ខពួកសាច់ញាតិធ្វើការក្នុងស្ថាប័នតែមួយអស់រយៈពេលច្រើនឆ្នាំមកហើយ។ សង្គមស៊ីវិល យល់ថា ក្រសួងការពារជាតិ និងអង្គភាពប្រឆាំងអំពើពុក រលួយ គួរតែបើកការស៊ើបអង្កេត និងមាន វិធានការច្បាប់ ដើម្បីប្រយុទ្ធប្រឆាំងអំពើពុករលួយជាប្រព័ន្ធនេះ និងកុំឲ្យប៉ះពាល់ដល់កំណែទម្រង់ស៊ីជម្រៅ។
ក្រសួងការពារជាតិ ដែលធ្លាប់ប្រកាសមិនគាំទ្រឲ្យមានបក្ខពួកគ្រួសារនិយមនោះ បែរជាប្រកាស ការពារស្ថាប័នតុលាការយោធាដែលរងការចោទប្រកាន់ថា ជាស្ថាប័នពុករលួយ និងគ្រួសារនិយម ក្រោមការដឹកនាំរបស់ឧត្ដមសេនីយ៍ឯក ផ្កាយ៣ លោក ន័យ ថុល ក្នុងរយៈពេលជាង ៣០ឆ្នាំទៅវិញ។
អ្នកនាំពាក្យក្រសួងការពារជាតិ លោក ឈុំ សុជាត ប្រាប់អាស៊ីសេរីថា ថ្វីដ្បិតតែគ្មានការស៊ើបអង្កេត ជាផ្លូវការក្តី ប៉ុន្តែលោកដឹងថា មន្ត្រីក្នុងស្ថាប័នតុលាការយោធា មានការចាត់តាំងតាមនីតិវិធីត្រឹមត្រូវ ទាំងអស់។ លោក បញ្ជាក់ថា ករណីនេះ បានបិទបញ្ចប់ និងគ្មានចំណាត់ការអ្វីទៀតឡើយ៖ «ខ្ញុំបានត្រួតពិនិត្យ និងបានពិចារណាហើយរឿងនេះ។ រឿងការចាត់តាំងក្នុងតុលាការយោធាវាមានអង្គការចាត់តាំងត្រឹមត្រូវ គឺជាស្ថាប័នរបស់ក្រសួងការពារជាតិ ដូច្នេះរាល់ការងារចាត់តាំងទាំងអស់វាត្រូវតែមានឆ្លងកាត់តាមនីតិវិធីត្រឹមត្រូវទាំងអស់ អត់មែនជារឿងគ្រួសារនិយមបក្ខពួកនិយមអីទេ។ ខ្ញុំគ្រាន់តែជម្រាបជូនប៉ុណ្ណឹង»។
ទោះយ៉ាងណាក្តី នៅពេលអាស៊ីសេរី សួរបញ្ជាក់ថា តើប្រធានតុលាការយោធា លោក ន័យ ថុល ពិតជាបានកេណ្ឌសែស្រឡាយបក្ខពួកគ្រួសារសាច់ញាតិជាង ១០នាក់ឱ្យមកកាន់តួនាទីនៅក្នុងតុលាការយោធាក្រោមការដឹកនាំរបស់លោកដូចជាការប្រកាន់ដែរឬទេ។ លោក ឈុំ សុជាត មិនឆ្លើយតបរឿងនេះដាច់ខាត និងបានឆ្លើយពង្វាងដដែលៗ ថា ការតែងតាំងមន្ត្រីក្នុងតុលាការ យោធា ធ្វើដោយត្រឹមត្រូវតាមនីតិវិធីទាំងអស់។
កាលពីដើមខែកក្កដាកន្លងទៅ មន្ត្រីជាន់ខ្ពស់នៅតុលាការយោធាដែលសុំលាក់អត្តសញ្ញាណ ព្រោះ បារម្ភពីសុវត្ថិភាព បានទម្លាយថា ប្រធានតុលាការយោធាឧត្ដមសេនីយ៍ឯកផ្កាយ៣ លោកន័យ ថុល ដែលកាន់តំណែងនេះតាំងពីឆ្នាំ១៩៨៧ មក និងជាចៅក្រមនៅសាលាក្ដីខ្មែរក្រហមផងបានតែងតាំងភរិយារបស់លោក គឺអ្នកស្រី ខឹម សម្បត្តិ និងកូនប្រុសបង្កើតពីរនាក់របស់ខ្លួនឱ្យធ្វើជាចៅក្រម និងជាអនុប្រធានតុលាការយោធា។ កូនប្រុសទាំងពីរនាក់ ឈ្មោះ ផូរ ភិរម្យ និង ឈ្មោះ ផូរ វីរៈនេះមិនត្រឹមតែមានតួនាទីជាអនុប្រធានតុលាការយោធានិងជាចៅក្រមដូចម្ដាយទេគឺពួកគេក៏ជានាយការិយាល័យចៅក្រមស៊ើបសួរព្រមទាំងជានាយទាហានមានឋានន្តរសក្ដិឧត្ដមសេនីយ៍ត្រីនិងទោទៀតផង។ ចំណែកកូនទី៣ លោក ន័យ ផូរច័ន្ទគង្គារ ក៏កំពុងធ្វើការនៅក្នុងតុលាការយោធាដែរ។ប្រភពដដែលឱ្យដឹងថាអំពើពុករលួយ និងគ្រួសារនិយមនេះបានធ្វើឡើងជាប្រព័ន្ធនិងលាក់បាំងបំផុតដែលសូម្បីតែឈ្មោះត្រកូលក៏ផ្លាស់ប្ដូរដែរ។
លោកន័យ ថុល ក៏ប្រមូលសាច់ញាតិមួយចំនួនទៀត ដូចជា ឧត្ដមសេនីយ៍ទោ នុត សោភ័ណ្ឌ ត្រូវជាប្អូនជីដូនមួយ កំពុងកាន់តួនាទីជាអនុប្រធានតុលាការយោធាជាចៅក្រម និងជានាយការិយាល័យហិរញ្ញវត្ថុ។ លោក នុត សោភ័ណ្ឌមានបងប្អូនបង្កើតម្នាក់ទៀតឈ្មោះនុត សុផែន កំពុងធ្វើការក្រោមបង្គាប់របស់លោក។ ប្រភពបន្តថា សូម្បីតែអ្នកបើកឡានឱ្យលោកន័យ ថុល ឈ្មោះ អ៊ូ សេរីក៏ត្រូវបានដំឡើងឱ្យធ្វើជាចៅក្រមដែរ។ ក្រៅពីនេះ ចៅក្រមមួយចំនួនទៀត ក៏ជាសាច់ញាតិ និងបក្ខពួករបស់លោក ន័យ ថុល ដែរ ដូចជាលោកចៅក្រម ង៉ូវ វុទ្ធី ចៅក្រម ឃឹម សុឃាននិងចៅក្រម ពិន សំអឿន។
រីឯមន្ត្រីគ្រាក់ៗ នៅក្នុងស្ថាប័ននេះមួយចំនួន ក៏យកគំរូតាមលោក ន័យ ថុល ដែរដោយពួកគេ ប្រមូល កូន និងសាច់ញាតិចូលធ្វើការជាហូរហែដែរ។ អនុរដ្ឋលេខាធិការក្រសួងការពារជាតិ និងជាចៅក្រមតុលាការយោធានាយឧត្ដមសេនីយ៍ ផ្កាយ៤ លោក សាវ សុខ ក៏មានកូនស្រីម្នាក់ឈ្មោះសុខ គីណូកត្តា ជាចៅក្រមតុលាការយោធានិងមានឋានន្តរសក្ដិវរសេនីយ៍ត្រី។រីឯអនុប្រធានតុលាការយោធានិងជាចៅក្រម ឧត្ដមសេនីយ៍ទោ ប៉ោក ប៉ន មានកូនប្រុសឈ្មោះ ប៉ុន វណ្ណៈ ជាច្រៅក្រម។
ប្រភពបន្តថាប្រធានតុលាការយោធាក៏ជាប់ពាក់ព័ន្ធនឹងអំពើពុករលួយជាច្រើនករណីទៀតដែរ ដូចជាកាត់ប្រាក់ខែចៅក្រមដែលមិនមែនជាសាច់ញាតិការដំឡើងតួនាទីឱ្យកូនចៅបក្ខពួករបស់ខ្លួននិងការពន្យារពេលចូលនិវត្តន៍ចំនួន ៧លើក និងស៊ីដាច់លុយមន្ត្រីខ្សែបណ្ដោយអស់ម្នាក់ៗ ប្រហែលជា ២ពាន់ដុល្លារទៅ ២ពាន់ ៥រយដុល្លារក្នុងការសូកប៉ាន់ឱ្យលោក ន័យ ថុល បញ្ចូលសាច់ញាតិជានាយទាហាន។ អ្នកដែលសូកលុយ ដើម្បីបានតំណែងទាំងនោះ ខ្លះត្រូវថ្នាក់លើជំទាស់ តែលុយសំណូកនោះក៏ត្រូវគេស៊ីដាច់ទៅដែរ។ ករណីទាំងនេះមន្ត្រីក្នុងតុលាការយោធាធ្លាប់ប្ដឹងទៅអង្គភាពប្រឆាំងអំពើពុករលួយដែរក្នុងអំឡុងឆ្នាំ២០១៦ ប៉ុន្តែពុំមានការស៊ើបអង្កេតអ្វីឡើយបន្ទាប់ពីមាន លិខិតឆ្លើយបំភ្លឺពីលោក ន័យ ថុល។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការឆ្លើយ តបរបស់ក្រសួងការពារជាតិនេះ មិនទាន់ទុកចិត្តបាន និងគ្រប់គ្រាន់ក្នុងការចូលរួមប្រយុទ្ធប្រឆាំង អំពើពុករលួយនោះទេ។ លោក យល់ថា ក្រសួងការពារជាតិ គួរតែឆ្លើយតបឲ្យបានច្បាស់លាស់ ជាងនេះ ដើម្បីចៀសវាងកុំឲ្យសាធារណជន យល់ថា ជាការឆ្លើយតបក្នុងរបៀបការពារគ្នាឯង។ ម្យ៉ាងវិញទៀត នៅពេលមានការបង្ហាញអំពីតម្រុយនៃអំពើពុករលួយរបស់មន្ត្រីរាជការបែបនេះ អង្គភាពប្រឆាំងអំពើពុករលួយ ក៏គួរតែចេញមុខស៊ើបអង្កេត និងមានចំណាត់ការដែរ៖ «ជាបច្ចេកទេស អង្គភាពប្រឆាំងអំពើពុករលួយ(ACU) មិនមែនប្រាកដតែចាំតែមានបណ្ដឹងទេ ឲ្យតែជាតម្រុយផ្សេងៗ អាចផ្ដល់ដូចជាបណ្ដឹងអនាមិកដូចជាការចុះផ្សាយក្នុងសារព័ត៌មាន។និយាយឲ្យចំទៅឲ្យតែមានរឿងអាស្រូវប៉ះពាល់ដល់កិច្ចការគ្រប់គ្រងផ្នែកសាធារណៈ គឺគេអាចស៊ើបអង្កេតបាន»។
លោក សន ជ័យ បន្តថា បញ្ហាបក្ខ ពួកនិយម សាច់ញាតិនិងគ្រួសារនិយមនៅក្នុងស្ថាប័នរដ្ឋនេះ កំពុងចាក់ឫសយ៉ាងជ្រៅក្នុងសង្គមខ្មែរដែលជាលទ្ធផលធ្វើឲ្យមានទំនាស់ផលប្រយោជន៍ ឬអំពើពុករលួយជាប្រព័ន្ធ និងអាចប៉ះពាល់ដល់កំណែទម្រង់ស៊ីជម្រៅ៖ «បើគ្រាន់តែបញ្ហាបក្ខពួកនិយមនេះដោះស្រាយមិនចេញទេ យើងមិនសង្ឃឹមទៅលើដំណើរការនៃការធ្វើកំណែទម្រង់ប៉ុន្មានទេ។ ផ្ទុយទៅវិញវាក៏លេចចេញលទ្ធផលបញ្ច្រាសមកវិញនូវភាពកម្សោយកាន់តែខ្លាំងទៅៗ នៃអភិបាលកិច្ចរបស់ស្ថាប័នសាធារណៈ។
មិនមែនតែក្រសួងការពារជាតិនោះទេ ដែលមិនចាត់វិធានការករណីពុករលួយ និងបញ្ហាបក្ខពួកនិយមគ្រួសារសាច់ញាតិនិយមនេះ។ ក្រសួងព័ត៌មាន កាលពីថ្ងៃទី១៩ ខែសីហា ក៏បានប្រកាសមិនខ្វាយខ្វល់ចំពោះរឿងពុករលួយ និងបញ្ហាបក្ខពួកគ្រួសារនិយមដែរ។ ក្រសួងព័ត៌មាន ចាត់ទុកថា ការតែងតាំងតួនាទីមន្ត្រីក្នុងក្រសួង ដែលសុទ្ធតែជាពូជពង្សអ្នកធំក្នុងក្រសួងព័ត៌មាន គឺជារឿងតូចតាច និងធម្មតា។
អាស៊ីសេរីបានព្យាយាមទាក់ទងទៅប្រធានអង្គភាពប្រឆាំងអំពើពុករលួយ លោក ឱម យិនទៀង ជាច្រើនលើក តែគ្មានអ្នកទទួលទូរស័ព្ទនោះទេ។
មេដឹកនាំរបបក្រុងភ្នំពេញលោក ហ៊ុន សែន ធ្លាប់បានប្រកាសយ៉ាងដាច់អហង្ការមិនឱ្យមានករណីក្រុមគ្រួសារនិយមនៅក្នុងស្ថាប័នតែមួយនោះឡើយក៏ប៉ុន្តែស្ថានភាពជាក់ស្ដែងស្ទើរគ្រប់ស្ថាប័នរដ្ឋទាំងអស់កំពុងតែចាក់ស្រេះដោយបញ្ហាគ្រួសារឬបក្ខពួកនិយមនេះ និងគ្មានចំណាត់ការអ្វីទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។