តុលាការក្រុងភ្នំពេញពន្យារពេលចាត់ការបណ្ដឹងក្រុមគ្រូបង្រៀន ដោយសាររឿងមិនទាន់បង់លុយបណ្ដឹង
2019.01.29
សាលាដំបូងរាជធានីភ្នំពេញពន្យារពេលចាត់ការបណ្ដឹងរបស់ក្រុមគ្រូបង្រៀន ដោយសារបញ្ហានីតិវិធីនៃការបង់ប្រាក់ពន្ធលើពាក្យបណ្ដឹង។ ក្រុមគ្រូបង្រៀនសម្ដែងការហួសចិត្តនឹងរឿងនេះ ដោយសារពួកគាត់បានសួរទៅខាងមន្ត្រីតុលាការដែលទទួលពាក្យបណ្ដឹងដែរថា តើពួកគាត់ត្រូវបង់ប្រាក់ដែរឬទេ ប៉ុន្តែមន្ត្រីរូបនោះបានឆ្លើយថា មិនចាំបាច់បង់ប្រាក់អ្វីឡើយ ស្រាប់តែពេលនេះឃើញមានដីកាបង្គាប់ឱ្យបង់ប្រាក់ទៅវិញ។
ចៅក្រមតុលាការក្រុងភ្នំពេញ លោក រស់ ពិសិដ្ឋ ចេញដីកាបង្គាប់ឱ្យក្រុមបង្រៀនបង់លុយចំនួន ៥ម៉ឺន ៥ពាន់រៀលជាមុនសិន ទើបសំណុំរឿងនេះអាចដំណើរការបាន។ ថវិកាជាង ៥ម៉ឺនរៀលនេះ គឺជាពន្ធលើកម្មវត្ថុបណ្ដឹង ដែលមានចែងក្នុងក្រមនីតិវិធីរដ្ឋប្បវេណី ហើយចៅក្រមបានទុកពេល ២សប្ដាហ៍ ឱ្យក្រុមគ្រូបង្រៀន ដើម្បីបង់ប្រាក់ពន្ធនេះ។
ក្រុមគ្រូបង្រៀនចំនួន ១១នាក់ បាននាំគ្នាដាក់បណ្ដឹងទៅតុលាការក្រុងភ្នំពេញ កាលពីថ្ងៃទី១៦ មករាកន្លងទៅ ជុំវិញករណីក្រសួងអប់រំលុបឈ្មោះពួកគាត់ចេញពីក្របខណ្ឌ ដោយក្រសួងលើកហេតុផលថា ពួកគាត់បោះបង់ចោលការងារ និងមួយចំនួនទៀតអវត្តមានដោយគ្មានច្បាប់អនុញ្ញាត។
ប្រធានសហភាពសហជីពកម្ពុជា និងជាតំណាងក្រុមគ្រូបង្រៀនដែលត្រូវក្រសួងលុបឈ្មោះចេញពីក្របខ័ណ្ឌ លោក រ៉ុង ឈុន ថ្លែងថា មន្ត្រីតុលាការក្រុងភ្នំពេញគួរតែពន្យល់ពលរដ្ឋឱ្យបានដឹងច្បាស់ពីនីតិវិធីនៃការដាក់បណ្ដឹងនេះ។ លោកអះអាងថា លោកបានបញ្ជាក់ជាមួយមន្ត្រីទទួលពាក្យបណ្ដឹងអំពីការបង់ប្រាក់នេះដែរ ក៏ប៉ុន្តែមន្ត្រីរូបនោះបានប្រាប់លោកវិញថា មិនតម្រូវឱ្យមានការបង់ប្រាក់ឡើយ ដូច្នេះទើបលោកមិនបានបង់ប្រាក់នៅពេលដាក់បណ្ដឹងនោះ៖ «អ្នកដែលទៅដាក់បណ្ដឹងនៅក្បែរខ្ញុំហ្នឹង ឃើញគាត់បង់លុយ អ៊ីចឹងហើយបានជាខ្ញុំសួរមន្ត្រីដែលទទួលពាក្យបណ្ដឹងខ្ញុំហ្នឹង សួរថាខ្ញុំត្រូវបង់លុយដែរឬអត់? ហើយបើបង់ តើបង់ប៉ុន្មាន? គាត់បានជម្រាបមកវិញថា អត់មានបង់អ្វីនោះទេ លោកគ្រូអាចអញ្ជើញទៅវិញបាន។ ដល់ពេលនេះ ទើបតែបង្គាប់ឱ្យទៅបង់លុយ អាហ្នឹងវាជាការធ្វើការងារដោយមិនច្បាស់លាស់ ហើយការណែនាំមន្ត្រីថ្នាក់ក្រោមបង្គាប់ហ្នឹង អត់មានភាពជាក់លាក់។ គួរតែធ្វើយ៉ាងម៉េច ឱ្យវាប្រាកដប្រជា»។
មេធាវីសមាគម អាដហុក (ADHOC) លោក សំ ទិត្យសីហា ថ្លែងថា បណ្ដឹងរដ្ឋប្បវេណីតម្រូវឱ្យមានការបង់ប្រាក់ពន្ធលើកម្មវត្ថុបណ្ដឹង ហើយការបង់ប្រាក់នេះត្រូវធ្វើឡើងនៅពេលដាក់បណ្ដឹង ដោយមានវិក្កយបត្រត្រឹមត្រូវពីមន្ត្រីរដ្ឋបាលតុលាការ។ លោកថា ការខកខានមិនបានប្រាប់ពលរដ្ឋអំពីនីតិវិធីបែបនេះ គឺជាកំហុសរបស់មន្ត្រីតុលាការ៖ «គាត់ត្រូវប្រាប់អ្នកដើមបណ្ដឹងថា ត្រូវបំពេញលក្ខខណ្ឌអ្វីខ្លះ ឬបំពេញកាតព្វកិច្ចអ្វីខ្លះ ដើម្បីឱ្យបណ្ដឹងហ្នឹងវាអាចទៅជាបណ្ដឹងដែលអាចយកជាផ្លូវការ ហើយតុលាការមានចំណាត់ការទៅលើករណីហ្នឹង។ ហើយមួយទៀត វាខាតពេលវេលា ព្រោះរឿងរដ្ឋប្បវេណីសំខាន់ណាស់ទាក់ទងនឹងផលប្រយោជន៍របស់គូភាគីនៅក្នុងការទាមទារ ដូចជានៅក្នុងដំណើរការនីតិវិធីហ្នឹងដែរ»។
អាស៊ីសេរីមិនទាន់អាចរកប្រភពទាក់ទងមន្ត្រីទទួលពាក្យបណ្ដឹងនៅតុលាការក្រុងភ្នំពេញបាននៅឡើយទេ នៅថ្ងៃទី២៩ មករា ចំណែកអ្នកនាំពាក្យតុលាការតុលាការក្រុងភ្នំពេញក៏មិនអាចទាក់ទងបានដូចគ្នា។
លោក រ៉ុង ឈុន ថ្លែងថា លោកនឹងបង់ប្រាក់ពន្ធនេះ ដើម្បីឱ្យតុលាការដំណើរការរឿងក្ដីរបស់លោក និងគ្រូបង្រៀនដទៃទៀត ហើយលោករំពឹងថា តុលាការនឹងផ្ដល់យុត្តិធម៌ដល់ពួកលោកទាំងអស់គ្នា៖ «យើងអត់មានកំហុសអ្វី ដូច្នេះបើតុលាការអនុវត្តតាមវិជ្ជាជីវៈដោយពុំមានពាក់ព័ន្ធនឹងនយោបាយ ពេលនោះយើងនឹងទទួលបានយុត្តិធម៌។ យើងនឹងទទួលបានទៅតាមអ្វីដែលយើងបានទាមទារ»។
ក្រុមគ្រូបង្រៀនបានប្ដឹងសុំឱ្យតុលាការបដិសេធចោលនូវប្រកាសស្ដីពីការលុបឈ្មោះបុគ្គលិកអប់រំ ដែលក្រសួងអប់រំបានចេញ កាលពីចុងខែមករា ឆ្នាំ ២០១៨ កន្លងទៅ និងបានស្នើសុំឱ្យតុលាការផ្ដល់ក្របខ័ណ្ឌក្រសួងអប់រំជូនពួកគាត់ឡើងវិញ។ ពួកគាត់អះអាងថា ចំណាត់ការរបស់ក្រសួងអប់រំនោះ គឺជារឿងអយុត្តិធម៌ និងមិនបានអនុវត្តត្រឹមត្រូវតាមនីតិវិធីរដ្ឋបាល ដូចដែលមានមានចែងនៅក្នុងច្បាប់ស្ដីពីសហលក្ខន្តិកៈមន្ត្រីរាជការស៊ីវិលនោះឡើយ។
អ្នកឃ្លាំមើលសង្គមជំរុញឱ្យក្រសួងអប់រំផ្ដល់ក្របខ័ណ្ឌដល់ក្រុមគ្រូបង្រៀនវិញ ដោយសារពួកគាត់ជាធនធានមនុស្សដ៏សំខាន់ និងមានសក្ដានុពល សម្រាប់ជួយអភិវឌ្ឍប្រទេសជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។