តុលាការ​កោះ​ហៅ​ពលរដ្ឋ​៣​នាក់​ដែល​មិន​ទទួល​សំណង​ពី​ក្រុមហ៊ុន​ទំនប់​សេសាន​ក្រោម​ពីរ

ដោយ ម៉ែន សុធីរ
2017-08-30
អ៊ីម៉ែល
មតិ
Share
បោះពុម្ព
កញ្ញា ជឿន ស្រីម៉ុម ជនជាតិ​ដើម​ភាគតិច​ព្នង​ដែល​អយ្យការ​ខេត្ត​ស្ទឹងត្រែង កោះ​ហៅ​ទៅ​សាកសួរ។ កញ្ញា​ផ្ដល់​បទសម្ភាសន៍​ឲ្យ​អាស៊ីសេរី កាល​ពី​ថ្ងៃ​ទី​១០ ខែ​សីហា ឆ្នាំ​២០១៧។
កញ្ញា ជឿន ស្រីម៉ុម ជនជាតិ​ដើម​ភាគតិច​ព្នង​ដែល​អយ្យការ​ខេត្ត​ស្ទឹងត្រែង កោះ​ហៅ​ទៅ​សាកសួរ។ កញ្ញា​ផ្ដល់​បទសម្ភាសន៍​ឲ្យ​អាស៊ីសេរី កាល​ពី​ថ្ងៃ​ទី​១០ ខែ​សីហា ឆ្នាំ​២០១៧។
RFA/Men Sothyr

ជនជាតិ​ដើម​ភាគតិច​ដែល​រង​ផល​ប៉ះពាល់​ដោយសារ​ទំនប់​វារីអគ្គិសនី​សេសាន​ក្រោម​ពីរ ៣​នាក់ ត្រូវ​បាន​តំណាង​អយ្យការ​ខែត្រ​ស្ទឹងត្រែង កោះ​ហៅ​ចូល​ស្រាយ​បំភ្លឺ​ពី​បទ​ញុះញង់​ឲ្យ​ប្រព្រឹត្ត​បទល្មើស​ឧក្រិដ្ឋ​ជាអាទិ៍ ដែល​បាន​កើត​ឡើង​កាល​ពី​ថ្ងៃ​ទី​២៣ ខែ​កក្កដា ឆ្នាំ​២០១៧។ ក្រុម​អង្គការ​សង្គម​ស៊ីវិល ចាត់​ទុក​ដីកា​នេះ​ថា​បំបាក់​ស្មារតី​ពលរដ្ឋ​ដែល​តែង​តវ៉ា​ទាមទារ​ដីធ្លី និង​សិទ្ធិ​រស់នៅ ខណៈ​ភូមិឋាន​ពួក​គាត់​នឹង​ក្លាយ​ជា​អាង​ស្តុក​ទឹក​នៃ​ទំនប់​វារីអគ្គិសនី​សេសាន​ក្រោម​ពីរ។

ជនជាតិ​ដើម​ភាគតិច​រស់នៅ​ភូមិ​ក្បាលរមាស​ចាស់ ឃុំ​ក្បាលរមាស ស្រុក​សេសាន ខែត្រ​ស្ទឹងត្រែង ៣​នាក់​នៅ​មិន​ទាន់​ត្រៀម​ខ្លួន​ស្រាយ​បំភ្លឺ​យ៉ាង​ណា​ទេ ហើយ​ពួក​គាត់​កំពុង​ស្វែងរក​ការ​អន្តរាគមន៍​ផ្នែក​ច្បាប់​ពី​អង្គការ​សិទ្ធិ​មនុស្ស។

តំណាង​អយ្យការ និង​ជា​អ្នក​នាំ​ពាក្យ​សាលា​ដំបូង​ខែត្រ​ស្ទឹងត្រែង លោក គឹម ហុងសាន ឲ្យ​ដឹង​នៅ​ថ្ងៃ​ទី​៣០ សីហា ថា ដីកា​កោះ​ហៅ​ពលរដ្ឋ​ចូល​ស្រាយ​បំភ្លឺ​នេះ ដោយ​មាន​ពាក្យ​បណ្តឹង​របស់​សមត្ថកិច្ច​ដែល​ប្រចាំ​ការ​នៅ​តំបន់​នោះ ដែល​ចោទ​ថា​អ្នក​ទាំងនោះ​ប្រឆាំង​រាជការ​សាធារណៈ។ លោក​បញ្ជាក់​ថា ដើម​បណ្តឹង គឺ​ជា​សមត្ថកិច្ច​ពាក់ព័ន្ធ​ដែល​មាន​អាជ្ញាធរ​មូលដ្ឋាន​ភូមិ ឃុំ ស្រុក និង​ខែត្រ«យើង​និយាយ​ថា កម្លាំង​សមត្ថកិច្ច​ដែល​គាត់​ប្រចាំ​ការ​នៅ​ទី​ហ្នឹង គាត់​ប្រឆាំង​រាជការ​សាធារណៈ ម៉្លេះ​ហើយ​គាត់​កសាង​សំណុំ​រឿង​ឡើង​មក យើង​គ្រាន់​តែ​កោះ​ហៅ​គាត់​មក​បំភ្លឺ​ទេ អត់​មាន​យក​នេះ​ទេ»

ដីកា​កោះ​ហៅ​របស់​តំណាង​អយ្យការ​ខែត្រ​ស្ទឹងត្រែង ចុះ​ថ្ងៃ​ទី​២៣ ខែ​សីហា ឆ្នាំ​២០១៧ បាន​សម្រេច​ឲ្យ​ជនជាតិ​ដើម​ភាគតិច​ព្នង ៣​នាក់ រស់នៅ​ភូមិ​ស្រែគរ​ចាស់ ឃុំ​ស្រែគរ ស្រុក​សេសាន ចូល​ស្រាយ​បំភ្លឺ​នៅ​សាលា​ដំបូង​ខែត្រ​ស្ទឹងត្រែង នៅ​ថ្ងៃ​ទី​១២ ខែ​កញ្ញា ឆ្នាំ​២០១៧ ដើម្បី​សាកសួរ​ពី​បទ​ញុះញង់​ឲ្យ​ប្រព្រឹត្ត​បទល្មើស​ឧក្រិដ្ឋ​ជាអាទិ៍ កាល​ពី​ថ្ងៃ​ទី​២៣ ខែ​សីហា ឆ្នាំ​២០១៧។

ជនជាតិ​ដើម​ភាគតិច​ព្នង ម្នាក់​ដែល​អយ្យការ​កោះ​ហៅ​កញ្ញា ជឿន ស្រីម៉ុម វ័យ ២១​ឆ្នាំ ហាក់​មិន​ភ័យ​ព្រួយ​ចំពោះ​ដីកា​នេះ​ទេ ហើយ​សហគមន៍​ដែល​បដិសេធ​មិន​ទទួល​សំណង​ជាង ១០០​គ្រួសារ​រស់នៅ​ភូមិ​ក្បាលរមាស និង​ឃុំ​ស្រែគរ នឹង​លើក​គ្នា​ទៅ​ស្រាយ​បំភ្លឺ​រួម​គ្នា ព្រោះ​ពលរដ្ឋ​ដែល​មាន​វិបត្តិ​ដីធ្លី​ជាមួយ​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពីរ ពុំ​មែន​កើត​មាន​តែ​ចំពោះ​មនុស្ស ៣​នាក់​ទេ«អាជ្ញាធរ​ណា​ដែល​ពាក់ព័ន្ធ ពេល​និយាយ​បែរ​ជា​ចោទ​យើង​មាន​ន័យ​ថា គេ​រំលោភ​ខ្ញុំ​រួច​ហើយ គេ​ចោទ​យើង​ទៀត។ គេ​មិន​គួរ​ធ្វើ​ចឹង​ដាក់​ពលរដ្ឋ​ទេ បើ​គ្រាន់​បើ ជនល្មើស​ក្នុង​ព្រៃ​ទៅ​ទប់ស្កាត់​ទៅ»

អ្នក​នាំ​ពាក្យ​សាលា​ខែត្រ​ស្ទឹងត្រែង លោក ម៉ែន គុង បាន​ផ្តាច់​ទូរស័ព្ទ​នៅ​ពេល​អាស៊ីសេរី​ទូរស័ព្ទ​ចូល ក៏ប៉ុន្តែ​លោក​ធ្លាប់​ប្រាប់​អាស៊ីសេរី​កាល​ពី​ថ្ងៃ​ទី​២៣ កក្កដា ថា សមត្ថកិច្ច​បាន​ឃាត់​ខ្លួន​ពលរដ្ឋ​ជាង ២០​នាក់​កាល​ពី​ថ្ងៃ​ទី​២៣ កក្កដា ដោយ​គ្រាន់​តែ​អប់រំ​ណែនាំ ព្រោះ​ពលរដ្ឋ​ទាំងនោះ​បាន​សារភាព​ថា ពួក​គេ​ធ្វើ​ដំណើរ​ពី​ខែត្រ​មណ្ឌលគិរី ទៅ​ភូមិ​ក្បាលរមាស ដោយសារ​បុរស​ឈ្មោះ ដាំ សំណាង កៀរគរ​សហគមន៍​របស់​ពួក​គាត់​ឲ្យ​ចូលរួម​សកម្មភាព​ជាមួយ​អ្នក​ភូមិ​ក្បាលរមាស ហើយ​ផល​ប្រយោជន៍ ពួក​គាត់​នឹង​បាន​ដីធ្លី​នៅ​តំបន់​នោះ។ លោក​ថា ក្រោយ​ពី​សមត្ថកិច្ច​សាកសួរ​រួច បាន​ដោះលែង​ពលរដ្ឋ​ឲ្យ​ត្រឡប់​ទៅ​លំនៅឋាន​វិញ លើកលែង​តែ​ប្រធាន​ក្រុម សមត្ថកិច្ច​នឹង​ធ្វើ​ការ​ឃាត់​ខ្លួន​តាម​ច្បាប់«សមត្ថកិច្ច​សាកសួរ​នេះ គាត់​បាន​សារភាព​ថា លោក ដាំ សំណាង ដែល​ជា​ពលរដ្ឋ​នៅ​ឃុំ​ក្បាលរមាស បាន​ទៅ​កៀរគរ​គាត់ សហគមន៍​គាត់​ឲ្យ​មក​ដើម្បី​ចូលរួម​ធ្វើ​សកម្មភាព ហើយ​ផល​ប្រយោជន៍​នឹង​បាន​ដីធ្លី​នៅ​ឃុំ​ស្រែគរ​ចាស់។ ឃើញ​សកម្មភាព​បែប​នេះ កុំ​ឲ្យ​មាន​សភាពការណ៍​មិន​ល្អ​នៅ​ក្នុង​មូលដ្ឋាន សមត្ថកិច្ច​ត្រូវ​ឃាត់​ខ្លួន​ពលរដ្ឋ​មក​ពី​ឆ្ងាយ​សិន សាកសួរ​ព័ត៌មាន​រួច​ហើយ នឹង​បញ្ជូន​គាត់​ត្រឡប់​ទៅ​វិញ លើកលែង​តែ​ប្រធាន​ក្រុម នឹង​ធ្វើ​ការ​ឃាត់​ខ្លួន​តាម​ច្បាប់»

មន្ត្រី​សម្របសម្រួល​សមាគម​អាដហុក (ADHOC) ខែត្រ​ស្ទឹងត្រែង លោក ហូ សំអុល ថ្លែង​ថា អង្គការ​លោក​នឹង​ត្រៀម​ប្រឹក្សា​ផ្នែក​ច្បាប់​ជុំវិញ​រឿង​នេះ និង​ព្យាយាម​ស្វែងរក​មេធាវី​ឲ្យ​ជនជាតិ​ដើម​ភាគតិច។ លោក​យល់​ថា ដីកា​កោះ​នោះ​ជា​ការ​បំបាក់​ស្មារតី​ពលរដ្ឋ​ដែល​បដិសេធ​មិន​ទទួល​សំណង​ពី​ក្រុមហ៊ុន ដែល​លោក​ចាត់​ទុក​ថា ចំណាត់ការ​របស់​អាជ្ញាធរ​កំពុង​ធ្វើ​ឲ្យ​ពលរដ្ឋ​រឹត​តែ​ខឹងសម្បា ដែល​ជា​ដើម​ហេតុ​នាំ​ឲ្យ​គោល​នយោបាយ​ផ្តល់​សំណង​របស់​រដ្ឋាភិបាល​កាន់​តែ​ស្មុគស្មាញ«មិន​គួរ​ថា​លោក​ព្រះរាជអាជ្ញា​ចេញ​ដីកា​ហៅ​ពលរដ្ឋ​ហ្នឹង​ទេ វា​ដូចជា​មិន​សម»

ប្រធាន​គ្រប់គ្រង​ការិយាល័យ​ឃ្លាំ​មើល​សិទ្ធិ​មនុស្ស​កម្ពុជា នៃ​អង្គការ​លីកាដូ (LICADHO) លោក អំ សំអាត យល់​ថា អាជ្ញាធរ​គួរ​តែ​រក​មធ្យោបាយ​ណា​ដោះស្រាយ​វិវាទ​ដីធ្លី​ដោយ​សន្តិវិធី ប្រសើរ​ជាង​ប្រើ​ប្រព័ន្ធ​តុលាការ​ដែល​នាំ​ឲ្យ​គេ​រិះគន់​ថា អាជ្ញាធរ​បាន​គំរាម​កំហែង និង​ធ្វើ​ទុក្ខបុកម្នេញ​ជនជាតិ​ដើម​ភាគតិច បង្ក​ឲ្យ​ប៉ះពាល់​ដល់​មុខ​មាត់​អាជ្ញាធរ និង​រដ្ឋាភិបាល«បើ​សិន​ជា​មាន​បញ្ហា​ចឹង​ទៅ មាន​ការ​តវ៉ា​នាំ​តែ​មាន​ការ​ចោទ​ប្រកាន់​វែង​ឆ្ងាយ​ទៀត​ទៅ​លើ​អ្នក​នេះ ទៅ​លើ​អ្នក​នោះ នៅ​ពី​ក្រោយ នៅ​ពី​មុខ»

អគ្គលេខាធិការ​សម្ព័ន្ធ​ជនជាតិ​ដើម​ភាគតិច​កម្ពុជា លោក ឡូ រ៉ង់ ចាត់​ទុក​ដីកា​កោះ​នេះ​ថា​ជា​រឿង​អយុត្តិធម៌។ លោក​ថា បណ្តឹង​នេះ​កំពុង​គំរាម​កំហែង​ធ្ងន់ធ្ងរ​ដល់​សិទ្ធិ​ជនជាតិ​ដើម​ភាគតិច​មួយ​កម្រិត​ទៀត ដែល​លោក​ចាត់​ទុក​ថា​ជា​បណ្តឹង​គ្មាន​ហេតុផល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

Is this human right in Hun Sen regime ? When people don't accept what this rouge regime wants, the puppet court forces them to accept or throws them in jail by accusing them incite other to commit crime. Oh God ! This regime doesn't know what is right what is wrong now. Please Khmer people vote to oust it the next election or you will suffer badly afterward.

Aug 30, 2017 09:03 AM

គេហទំព័រ​ទាំងមូល