តុលាការរតនគិរីរងការរិះគន់ករណីដោះលែងវៀតណាម ១២នាក់ដែលប្រព្រឹត្តបទល្មើសព្រៃឈើ
2019.06.02
ជនជាតិវៀតណាម ១២នាក់ ត្រូវបានតុលាការបង្គាប់ឱ្យឃុំខ្លួន ក្នុងពន្ធនាគារខេត្តរតនគិរី អំឡុងខែមេសា ឆ្នាំ២០១៩។
Photo provided
មន្ត្រីសង្គមស៊ីវិល និងជនជាតិដើមភាគតិចទំពូនខេត្តរតនគិរីរិះគន់តុលាការខេត្តនេះ ដោះលែងជនជាតិវៀតណាម ១២នាក់ ដែលជាប់ចោទពីបទឆ្លងដែនខុសច្បាប់ នាំគ្រឿងចក្រចូលដីខ្មែរគ្មានលិខិតអនុញ្ញាត និងឈូសឆាយព្រៃក្នុងតំបន់ហាមឃាត់។ ពួកគាត់ចាត់ទុកការដោះលែងនេះថា ជាសញ្ញាបង្ហាញពីភាពទន់ខ្សោយ នៃការអនុវត្តច្បាប់នៅកម្ពុជា។
មន្ត្រីសង្គមស៊ីវិល និងជនជាតិដើមភាគតិចទំពួន កាន់តែអស់ជំនឿចិត្តលើប្រសិទ្ធភាពការងាររបស់ តុលាការខេត្តរតនគិរីថា មិនបានការពារផលប្រយោជន៍ជាតិ ដើរតាមបន្ទាត់ច្បាប់នោះទេ ផ្ទុយទៅវិញ បែរជាមានចេតនា ដោះលែងជនល្មើសច្បាប់ ជាជនជាតិវៀតណាម ១២នាក់ ឆ្លងដែនចូលដីខ្មែរខុសច្បាប់ ប្រព្រឹត្តបទល្មើសឧក្រិដ្ឋបំផ្លាញធនធានធម្មជាតិក្នុងតំបន់ឧទ្យានជាតិវីរៈជ័យ ឋិតក្នុងស្រុកតាវែង ជាប់ព្រំដែនកម្ពុជា-វៀតណាម។
មន្ត្រីពង្រឹងសិទ្ធិអំណាចសហគមន៍នៃសមាគម អាដហុក (Adhoc) លោក ប៉ែន ប៊ុណ្ណារ៍ ពន្យល់ថា ការយកគ្រឿងចក្រឈូសឆាយព្រៃការពារធម្មជាតិ ជាទម្រង់នៃបទល្មើសឧក្រិដ្ឋព្រៃឈើ ដែលមានចែងក្នុងមាត្រា ៩៧ នៃច្បាប់ស្ដីពីព្រៃឈើ។ ករណីនេះ ប្រសិនតុលាការរកឃើញថា មានកំហុសជាក់លាក់ ជននោះត្រូវជាប់គុកពី ៥ឆ្នាំ ដល់ ១០ឆ្នាំ។ លោកថា សមត្ថកិច្ចការពារព្រំដែនខ្មែរ ដែលឃុបឃិតអនុញ្ញាតឱ្យជនជាតិវៀតណាម ចូលដីខ្មែរដោយខុសច្បាប់ ក៏ត្រូវទទួលទោសព្រហ្មទណ្ឌ និងវិន័យរដ្ឋបាលដែរ តែលោកនៅពុំទាន់ឃើញអាជ្ញាធរចាត់វិធានការនៅឡើយទេ។ លោកសង្ស័យថា ការដោះលែងជនជាតិវៀតណាមទាំងនេះ អាចជាប់ពាក់ព័ន្ធ អំពើពុករលួយក្នុងស្ថាប័នតុលាការ ៖ «ជាបទល្មើសឧក្រិដ្ឋថ្នាក់ទី១ ក្នុងច្បាប់ ព្រៃឈើ មិនថា ជនបរទេស និងខ្មែរដែរ ប្រព្រឹត្តបទល្មើសក្នុងដែនកម្ពុជាហ្នឹងក៏ត្រូវទទួលទោសដូចគ្នាដែរ។ ការចូលមកធ្វើហ្នឹងប្រាកដជាមានអំពើពុករលួយហើយ ជនជាតិវៀតណាមដែលចូលមកខុសច្បាប់ មិនដែលបានឃុំខ្លួន បើកសាវនាការផ្តន្ទាទោសដែរ ដូចករណីហ្នឹងជិត ២ខែត្រូវបានដោះលែង»។
កាលពីថ្ងៃទី៣០ ឧសភា ឆ្នាំ ២០១៩ ចៅក្រមស៊ើបសួរនៃសាលាដំបូង ខេត្តរតនគិរី លោក ឡេង វណ្ណារិទ្ធិ បានចេញដីកាដោះលែងជនជាតិវៀតណាមទាំង ១២នាក់នោះ ទាំងយប់ និងត្រូវឱ្យឋិតក្រោមការពិនិត្យពីបទ ឆ្លងដែនគ្មានលិខិតអនុញ្ញាត និងបទឈូសឆាយព្រៃដើម្បីធ្វើជាកម្មសិទ្ធិ ដែលប្រព្រឹត្តនៅចំណុចក្រុមហ៊ុន សុភាពសុភី ក្នុងស្រុកតាវែង ខេត្តរតនគិរី។ ជនជាតិវៀតណាមទាំងនោះ ត្រូវបានតុលាការឃុំខ្លួនអស់រយៈពេលជាង ១ខែកន្លះ។
ដីកាដោះលែង ដែលអាស៊ីសេរីទទួលបាន ឱ្យដឹងថា ជនជាតិវៀតណាតម្នាក់ ក្នុងចំណោមជនជាតិវៀតណាមទាំង ១២នាក់ ឈ្មោះ ឈ្មោះ ង្វៀន វ៉ាន់ ហុង (NGUYEN VANHUNG) វ័យ ៤៨ ឆ្នាំ រស់នៅខេត្តយ៉ាឡាយ ប្រទេសវៀតណាម ត្រូវបានចាប់ខ្លួនកាលពីថ្ងៃទី ១៦មេសា ឆ្នាំ២០១៩ ក្នុងបទល្មើសមានចែងក្នុងមាត្រា ២៩ និងមាត្រា ៥៦ នៃច្បាប់ស្ដីពីអន្តោប្រវេសន៍ និងមាត្រា ៦២ នៃច្បាប់ស្ដីពីតំបន់ការពារធម្មជាតិ។
អាស៊ីសេរីនៅមិនទាន់អាចទាក់ទង ចៅក្រមស៊ើបសួរនៃសាលាដំបូង ខេត្តរតនគិរីលោក ឡេង វណ្ណារិទ្ធ ដើម្បីសុំការពន្យល់បន្ថែមពីហេតុផល នៃការដោះលែងជនជាតិវៀតណាមទាំងនោះបានទេ នៅថ្ងៃទី២ មិថុនា។
ចំណែកព្រះរាជអាជ្ញាអមសាលាដំបូងខេត្តរតនគិរី លោក ជា ពេជ្រ បដិសេធមិនអធិប្បាយចំពោះ ការដោះលែងជនជាតិវៀតណាមទាំងនោះទេ ដោយលោកគ្រាន់តែនិយាយដោយខ្លីថា សូមឱ្យសួរទៅខាងចៅក្រមស៊ើបសួរវិញ ព្រោះលោកកំពុងជាប់រវល់៖ «ទាក់ទងសួរទៅតុលាការឬចៅក្រមស៊ើបសួរ ខ្ញុំរវល់តិចសុំទោស»។
ជនជាតិដើមភាគតិចទំពួន ខេត្តរតនគិរី លោក ខាំ និន ហួសចិត្តនៅគ្រាដែលតុលាការដោះលែងជនបរទេសឆ្លងដែនប្រព្រឹត្តបទល្មើសឧក្រិដ្ឋព្រៃឈើក្នុងប្រទេសកម្ពុជា ដែលលោកចាត់ទុកថា មិនបានធ្វើឱ្យជនសង្ស័យ ជាជនជាតិវៀតណាមទាំងនោះរាងចាលទេ ផ្ទុយទៅវិញពួកគេនឹងមើលងាយប្រព័ន្ធយុត្តិធម៌នៅកម្ពុជាទៀត ហើយអាចវិលមកកម្ពុជាប្រព្រឹត្តបទល្មើសដដែលៗ៖ «ខ្ញុំរាល់ថ្ងៃអត់មានជំនឿចិត្តតុលាការយើង ព្រោះគាត់អត់អនុវត្តតាមច្បាប់ផង ព្រោះខ្ញុំឃើញនឹងភ្នែក។ ខ្ញុំបានស្នើសុំតុលាការចុះមកមើលផ្ទាល់ករណីព្រៃឈើ គ្រាន់តែឮដំណឹងថា គាត់ចុះមកហើយតែអ្នកកាប់នៅតែកាប់ អ្នកឈូសឆាយនៅតែឈូសឆាយរាល់ថ្ងៃ។ មិនឃើញគាត់ចាប់ជនល្មើសទៅផ្ដន្ទាទោស ខ្ញុំអត់ឃើញ អីចឹងបានខ្ញុំអត់ជំនឿលើតុលាការ»។
មន្ត្រីនាំពាក្យសមាគមអាដហុក លោក សឹង សែនករុណា យល់ថា ការដោះលែងជនជាតិជាតិវៀតណាមទាំងនេះជា គឺជាសញ្ញាបង្ហាញថា រដ្ឋាភិបាលកម្ពុជា ពុំមានសមត្ថភាព ការពារអធិបតេយ្យភាពទប់ទល់ជាមួយប្រទេសជិតខាងបានល្អប្រសើរនៅឡើយទេ។ លោកថា ទម្រង់នៃការអនុវត្តច្បាប់ធូររលុងបែបនេះ ហាក់បង្ហាញថា រដ្ឋាភិបាលកម្ពុជាកំពុងរណប រដ្ឋាភិបាលក្រុងហូជីមិញ បើទោះបីជា សំណុំរឿងនេះ មានភស្តុតាងជាក់ស្ដែងក៏ដោយ៖ «យើងសោកស្ដាយមែនទែន ក្នុងរឿងនេះ មានអំពើបទល្មើសជាក់ស្ដែង ផ្ទាល់ភ្នែកមានការចាប់ឃុំខ្លួន ចោទប្រកាន់ទៅហើយ ហើយបែរជាជនហ្នឹងមានសេរីភាពទៅវិញ ពុំមានអធិបតេយ្យភាពពិតប្រាកដទេ ពាក់ព័ន្ធជនបរទេសយើងមិនហានអារកាត់ និងផ្ដន្ទាទោសដល់ជនបរទេសនោះទេ។ ជាក់ស្ដែងករណីនេះតែម្ដង»។
កាលពីថ្ងៃទី១៦ មេសា មន្ត្រីអាវុធហត្ថខេត្តរតនគិរី បានឃាត់ខ្លួនជនជាតិវៀតណាម ១២នាក់ និងគ្រឿងចក្រ ៦គ្រឿង ក្នុងតំបន់ឧទ្យានជាតិវីរជ័យ របស់ឃុំតាវែងលើ ស្រុកតាវែង។ ជនជាតិវៀតណាមទាំងនោះ បានចូលមកដោយខុសច្បាប់ តាមច្រកព្រៃ ក្នុងភូមិសាស្ត្រ ប៉ុស្តិ៍នគរបាលការពារព្រំដែនគោកលេខ ៥០៥ ក្នុងខេត្តរតនគិរី ជាប់ប្រទេសវៀតណាម។ មន្ត្រីសង្គមស៊ីវិលកត់សម្គាល់ថា នេះពុំមែនជាលើកទី១ទេ ដែលតុលាការខេត្តនេះ ដោះលែងក្រុមឧក្រិដ្ឋជន ជាជនជាតិវៀតណាម ឆ្លងដែនមកប្រព្រឹត្តបទល្មើសព្រៃឈើក្នុងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ