អ្នកជំនួញអង់គ្លេសប្តឹងកម្ពុជាថា ចាប់គាត់ជាចំណាប់ខ្មាំងអស់ជិត ១០ឆ្នាំ
2022.04.15
អ្នកជំនួញជនជាតិអង់គ្លេសលោក ហ្ក្រែក ហ្វ្រាយធ៍ (Gregg Fryett) ដែលធ្លាប់ជាប់ពន្ធនាគារនៅកម្ពុជាជា អស់ជាច្រើនឆ្នាំ ពីបទបន្លំឯកសារដើម្បីទិញដី និងបទរានដីដោយខុសច្បាប់ នៅខេត្តបន្ទាយមានជ័យ បានដាក់ពាក្យប្តឹងទៅអាជ្ញាធរកម្ពុជា ដោយចោទប្រកាន់មន្ត្រីតុលាការ និងមន្ត្រីអង្គភាពប្រឆាំងអំពើពុករលួយ ថា បានប្រព្រឹត្តអំពើពុករលួយ និងការជំរិតទារប្រាក់ពីគាត់ ដែលធ្វើឲ្យគាត់ជាប់ជាចំណាប់ខ្មាំងអស់រយៈពេលជិត ១០ឆ្នាំ។
អ្នកជំនួញជនជាតិអង់គ្លេសលោក ហ្ក្រែក ហ្វ្រាយធ៍ (Gregg Fryett) ដែលពេលនេះ បានចាកចេញពីប្រទេសកម្ពុជាទៅហើយ បានសរសេរសារលើទំព័រហ្វេសប៊ុករបស់លោក កាលពីខែមីនា ដោយចោទប្រកាន់ថា រូបលោកត្រូវជាប់ពន្ធនាគារចំនួន៨ ឆ្នាំនៅកម្ពុជា យ៉ាងអយុត្តិធម៌ ដោយសារតែភាពអយុត្តិធម៌ក្នុងប្រព័ន្ធតុលាការ និងដោយសារលោកមិនផ្តល់ប្រាក់សំណូក ១លានដុល្លារ ជូនមន្ត្រីអង្គភាពប្រឆាំងអំពើពុករលួយ និង ២.២ លានដុល្លារ ជូនមន្ត្រីតុលាការ ដែលជំរិតទារពីលោក ជាថ្នូរនឹងការទម្លាក់ចោលការចោទប្រកាន់មកលើរូបលោក។
លោកអះអាង ថាដំបូងចៅក្រម អាំង មាលតី ប្រចាំការនៅខេត្តបន្ទាយមានជ័យ ដែលជាចៅក្រមស៊ើបអង្កេតក្នុងសំណុំរឿងចោទប្រកាន់លោក បានតាមជំរិតទារប្រាក់ពីលោកជាច្រើនគ្រា។ ដំបូងទារលោក ៣លានដុល្លារ និងក្រោយមកទម្លាក់មកនៅត្រឹម ២.២លានដុល្លារ។ តែលោកមិនព្រមឲ្យ។
ប៉ុន្តែ ក្រោយមកចៅក្រមរូបនេះ ក៏ត្រូវបានផ្លាស់មកភ្នំពេញមកធ្វើជាប្រធានសាលាដំបូង។ មិនយូរប៉ុន្មាន នៅក្នុងខែសីហា ឆ្នាំ២០១៥ លោកចៅក្រមរូបនេះ ត្រូវបានអង្គភាពប្រឆាំងអំពើពុករលួយ ចាប់ខ្លួនក្នុងករណីដាច់ដោយឡែកមួយ ពីបទកិបកេងប្រាក់ទាក់ទងរឿងគាត់រឹបអូសយករថយន្តទំនើបមួយគ្រឿងម៉ាក អៅឌី (Audi) ពីអ្នកចែកចាយគ្រឿងញៀន។
លោក អាំង មាលតី ត្រូវសាលាដំបូងខេត្តកណ្តាល កាត់ទោសកាលពីដើមឆ្នាំ ឆ្នាំ២០១៦ ឲ្យជាប់ពន្ធនាគារ៣ឆ្នាំ ដោយត្រូវអនុវត្តទោសក្នុងពន្ធនាគាររយៈពេល២ឆ្នាំ ព្យួរ១ឆ្នាំ។ ប៉ុន្តែ នៅចុងឆ្នាំ ២០១៦ ព្រះមហាក្សត្របង្គាប់ឲ្យបន្ធូរបន្ថយទោសនេះ ៦ខែទៀត។ លោកត្រូវបានតុលាការដោះលែងពីពន្ធនាគារ នៅដើមឆ្នាំ២០១៧ ក្រោយជាប់ពន្ធនាគារ បាន១ឆ្នាំកន្លះ។ ទោះជាយ៉ាងនេះក្ដីនៅដើមឆ្នាំ២០១៧ នោះដែរ ព្រះមហាក្សត្របានលុបឈ្មោះលោក អាំង មាលតី ចេញពីក្របខណ្ឌចៅក្រម។
កាលពីពេលលោក អាំង មាលតី ត្រូវផ្លាស់មកភ្នំពេញ នៅឆ្នាំ២០១៤ លោកយកសំណុំរឿងលោក ហ្ក្រែក ហ្វ្រាយធ៍ (Gregg Fryett) និងជនជាប់ចោទដទៃទៀតនៅក្នុងរឿងក្តីនេះ មកជាមួយដែរ បើទោះបីលោកមិនមែនជាចៅក្រមជម្រះក៏ដោយ។ ប្រការនេះ ធ្វើឲ្យក្រុមមេធាវីជនជាប់ចោទ ប្តឹងឲ្យទម្លាក់ចោលការចោទប្រកាន់ ដែលស៊ើបអង្កេតដោយចៅក្រម អាំង មាលតី ព្រោះចៅក្រមរូបនេះ មានរឿងអាស្រូវពុករលួយរហូតជាប់ពន្ធនាគារ។ ប៉ុន្តែ តុលាការជំទាស់។
មេធាវីការិយាល័យក្រុមអ្នកច្បាប់ និងទីប្រឹក្សាអមរិន្ទលោក សុក សំអឿន ដែលការពារក្តីឲ្យជនជាប់ចោទ ដែលជាបុគ្គលិករបស់លោក ហ្ក្រែក ហ្វ្រាយធ៍ (Gregg Fryett) ក្នុងសំណុំរឿងនេះដែរ ហួសចិត្តចំពោះការមិនយកចិត្តទុកដាក់របស់តុលាការ ទៅលើបញ្ហានៃរឿងអាស្រូវរបស់ចៅក្រម អាំង មាលតី ដែលស៊ើបអង្កេតករណីនេះ និងក្រោយមកក្លាយជាប្រធានតុលាការដំបូងក្រុងភ្នំពេញ ដែលជាកន្លែងកាត់ក្តីសំណុំរឿងដដែលនេះទៀត៖ «ចៅក្រមដែលកាត់ក្តីហ្នឹងជាកូនចៅ ចង់មិនចង់ក៏មានឥទ្ធិពលដែរ។ ប៉ុន្តែ វាចម្លែកត្រង់ថាគេចាប់ខ្លួនគាត់ហើយហ្នឹង ចៅក្រមហ្នឹងអត់មានផ្លាស់ប្ដូរអ្វីបន្តិចសោះ! ចៅក្រមជម្រះហ្នឹងអត់ផ្លាស់ប្ដូរគំនិតអ្វីសោះ! នៅការពារការចោទប្រកាន់ហ្នឹងដដែល»។
បើតាមលោក ហ្ក្រែក ហ្វ្រាយធ៍ (Gregg Fryett) ក្រោយចាប់ខ្លួនចៅក្រម អាំង មាលតី លោកថា មន្ត្រីអង្គភាពប្រឆាំងអំពើពុករលួយ ជាអ្នកជំរិតទារប្រាក់ពីលោកជំនួសវិញ ដើម្បីជាថ្នូរក្នុងការទម្លាក់ចោលរាល់ការចោទប្រឆាំងលើរូបលោក។
លិខិតបញ្ជាក់ កាលពីថ្ងៃទី១៤ ខែមីនា ឆ្នាំ២០១២ ដែលចុះហត្ថលេខាដោយ អ្នកស្រី ម៉ៅ ម៉ាឡៃ ដែលជាភរិយាលោកឧបនាយករដ្ឋមន្ត្រី កែ គឹមយ៉ាន និងជាប្រធានក្រុមហ៊ុន វ៉ាយ.អិល.ភី គ្រុប (Y.L.P Group Co., LTD) និយាយអំពីទំហំដីជាង ៦,០០០ (៦,០៧១.៣៨) ហិកតារ ដែលត្រូវប្រគល់ជូនលោក ហ្ក្រែក ហ្វ្រាយធ៍ តំណាងឲ្យក្រុមហ៊ុន អ៊ិនធើណេស្សិនណល ហ្គ្រីន អ៊ិននើជី ( International Green Energy) ដើម្បីដាំដើមល្ហុងខ្វង យកផ្លែទៅធ្វើជាជីវៈឥន្ធនៈ។ ក្រុមហ៊ុននេះបានជួលបុគ្គលិក និងកម្មករខ្មែររាប់រយនាក់។
ក្រុមហ៊ុននេះកំពុងឈូសឆាយដី និងដាំដើមល្ហុងខ្វងនៅកម្ពុជា នៅប្រទេសអង់គ្លេសឯណោះ ការិយាល័យបង្ក្រាបអំពើឆបោកកម្រិតធ្ងន់ បានបង្កកទ្រព្យសម្បត្តិទាំងអស់របស់ក្រុមហ៊ុន សាស្តេណេបិល អាហ្ក្រូ អ៊ិននើជី (Sustainable Agro Energy) របស់លោក ហ្ក្រែក ហ្វ្រាយធ៍ ហើយបានចាប់ផ្តើមស៊ើបអង្កេតករណីចោទប្រកាន់ ដែលថាលោកឆបោកមនុស្សនៅទីនោះ យកប្រាក់អស់ ៥៤លានដុល្លារ។
ក្រោយមក អង្គភាពប្រឆាំងអំពើពុករលួយកម្ពុជា បានចាប់ផ្តើមស៊ើបអង្កេតលោក ហ្ក្រែក ហ្វ្រាយធ៍ និងក្រុមហ៊ុន អ៊ិនធើណេស្សិនណល ហ្គ្រីន អ៊ិននើជី។ អង្គភាពប្រឆាំងអំពើពុករលួយកាលពីឆ្នាំ ២០១៣ បានរកឃើញថា ក្រុមហ៊ុនដាំដើមល្ហុងខ្វងនេះ ជាផ្លូវការមិនដែលទទួលបានសិទ្ធិលើដីនោះឡើយ ក៏ប៉ុន្តែបានចរចាតម្លៃប្រហែល២លានដុល្លារ សម្រាប់ទិញដីនោះពីអ្នកស្រី ម៉ៅ ម៉ាឡៃ។
ទោះជាយ៉ាងនេះក្តី លោក ហ្ក្រែក ហ្វ្រាយធ៍ (Gregg Fryett) អះអាងប្រាប់វិទ្យុអាស៊ីសេរី ថា លោកពិតជាបានទិញដីនោះ ដោយស្របច្បាប់ពីអ្នកស្រី ម៉ៅ ម៉ាឡៃ មែន៖ «យើងមានកិច្ចសន្យាទិញដីនោះ។ យើងបានវិនិយោគត្រឹមត្រូវ។ យើងយល់ថាយើងបានធ្វើអ្វីៗត្រឹមត្រូវតាមច្បាប់ និងនីតិវិធី»។
យោងតាមកិច្ចព្រមព្រៀងផ្ទេរសិទ្ធិកាន់កាប់ដីសម្បទានសេដ្ឋកិច្ច កាលពីខែ តុលា ឆ្នាំ ២០០៩ រវាងក្រុមហ៊ុន ផល្លាឌីវ៉ែលឡុបម៉ិន (Phalla Development Co., Ltd) ដែលតំណាងឲ្យអ្នកស្រី ម៉ៅ ម៉ាឡៃ និងលោក ហ្ក្រែក ហ្វ្រាយធ៍ (Gregg Fryett) ដីជាង ៥,០០០ (៥,០៧៩)...នៅមានបន្ត
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។