ក្រុមមេធាវីការពារក្ដីឲ្យលោក កឹម សុខា ប្រមាណ ៥រូប នឹងកោះប្រជុំគ្នាបន្ទាន់មួយនៅថ្ងៃសុក្រ ទី៣ ខែមិថុនា នេះ ដើម្បីពិនិត្យលើទិដ្ឋភាពច្បាប់ទាក់ទងការចោទប្រកាន់ និងជុំវិញករណីដែលតុលាការនៅតែចេញដីកាកោះហៅកូនក្ដីពួកលោកជាបន្តបន្ទាប់។
លោកមេធាវី សំ សុគង់ មានប្រសាសន៍កាលពីថ្ងៃទី២ ខែមិថុនា ថា ក្រុមមេធាវីបានដាក់ពាក្យសុំឲ្យបញ្ឈប់នីតិវិធីកោះហៅលោក កឹម សុខា ទៅសាកសួរនោះ ដោយសំអាងលើហេតុផលមួយចំនួនទៅចៅក្រមស៊ើបសួរកាលពីថ្ងៃច័ន្ទ ដើមសប្ដាហ៍នេះ៖ «ហើយរហូតមកដល់ពេលនេះ លោកចៅក្រមស៊ើបសួរមិនទាន់ឆ្លើយតបមកពីក្រុមមេធាវីបាននៅឡើយ តែបែរជាមានដីកាកោះទៅវិញ ពីព្រោះអីបើចៅក្រមគាត់សម្រេចហើយ ក្រុមមេធាវីអាចប្ដឹងទៅសភាស៊ើបសួរចំពោះសេចក្ដីសម្រេចចៅក្រមស៊ើបសួរ...»។
សារព័ត៌មានក្នុងស្រុកបានចុះផ្សាយនូវដីកាកោះហៅលោក កឹម សុខា ថ្មីមួយទៀតដែលចេញដោយចៅក្រមស៊ើបសួរនៃសាលាដំបូងរាជធានីភ្នំពេញ លោក ថាន់ ឡេង កាលពីថ្ងៃទី២ មិថុនា។ ដីកានោះបង្គាប់ឲ្យប្រធានស្ដីទីគណបក្សសង្គ្រោះជាតិ លោក កឹម សុខា ចូលខ្លួនបំភ្លឺនៅសាលាដំបូងរាជធានីភ្នំពេញ នៅថ្ងៃទី១៤ ខែមិថុនា ខាងមុខ ដើម្បីសាកសួរពីដំណើររឿងបដិសេធក្នុងការមិនចូលខ្លួនទៅបំភ្លឺតុលាការក្នុងនាមជាសាក្សីកាលពីថ្ងៃទី២៦ ខែឧសភា។
កាលពីថ្ងៃទី២៦ ខែឧសភា អយ្យការអមសាលាដំបូងរាជធានីភ្នំពេញ បានសម្រេចចោទប្រកាន់លោក កឹម សុខា ពីបទបដិសេធក្នុងការចូលខ្លួនក្នុងនាមជាសាក្សីលើសំណុំរឿងសញ្ចារកម្ម តាមមាត្រា៥៣៨ នៃក្រមព្រហ្មទណ្ឌ ដោយអយ្យការបញ្ជាក់ថា ជាបទល្មើសជាក់ស្ដែង។
លោកមេធាវី សំ សុគង់ មានប្រសាសន៍ថា លោកមិនទាន់បានទទួលដីកាពីតុលាការនោះផ្ទាល់នៅឡើយទេ ហើយថា ក្រុមមេធាវីរបស់លោកកំពុងមានភាពស្មុគស្មាញចំពោះការចេញដីកាបន្តបន្ទាប់នេះ និងហាក់មិនយល់អំពីនីតិវិធីរបស់តុលាការចំពោះករណីលោក កឹម សុខា នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។